Luka 11
11
O Sowal to Saki Pitolon
(Matay 6.9-13; 7.7-11)
1Yo mitolon ci Yis i ccay a pala, mahrek a mitolon i, raoden no ccay a nisawawaan ci Yis a somowal, <<Tapangaw, pasifana'en kami to sapitolon a matiya o pipasifana' ni Yohani to nisawawaan ningra,>> han ningra.
2Saka, sowal sa ci Yis i cangraan, <<Ano mitolon kamo i, haenen ko sowal,
Wamaaw, nanay mapahmek ko nika fangcal no ngangan Iso.
Nanay talahkal ko pikowan no Miso.
3Paflien kami to saka'orip niyam to romi'ami'ad.#11.3 romi'ami'ad -- ano ^ca i, sakicila.
4Hpolen ko raraw niyam,
nawhani, hpolen niyam ko misatatiihay tamiyanan a ma^min.
Kriden kami to saka^caaw ka sawi niyam, han ko pitolon,>> han ni Yis.
5Patinako sa ci Yis a somowal to nisawawaan Ningra, <<Ano tayra ko cima namo i loma' no widang namo to tnok no lafii a somowal, <Idangaw, pacaliwen kako to tolo a 'aplad no ^pang. 6Nawhani ira a tayni ko palafangay a widang ako. Awaay ko sapakaen ako i cingraan,> ano han iso i. 7Paca'of asa cingra i laloma', <Aka pakalifot i takowanan. Ma'defto ko fawahan. Mafoti'to kami ato wawa ako i kafoti'an saka, caay ka nga'ay kako a lomowad a pafli i tisowanan,> wasa cingra. 8Samaan sato? Pasowalen ako kamo, ano caacaay ka lomowad cingra a pafli i tisowanan o widang ningra, nikawrira, tona caay pisawad kiso a mingitangit cingraan, saka o lalomowad cingra a pafli i tisowanan to nilongocan iso.
9<<Orasaka, sowalen Ako kamo, pingitangit ta mapafli kamo. Pikilim ta pakatama kamo. Pikongkong to fawahan ta mafawah. 10Nawhani o mingitangitay a tamdaw i, mapafli. O mikilimay a tamdaw i, pakatama. O mikongkongay to fawahan a tamdaw i, mafawah ko fawahan. 11O romasato, ano milongoc ko wawa iso to foting i tisowanan o mama i, cima namo ko pafli sanay i wawa to 'oner saw? 12O romasato, ano miayi ko wawa iso to fita'ol i, cima ko pafli sanay i wawa to rarikah saw? 13Talacowa o tatiitiihay a tamdaw kamo i, mafana' kamo a pafli i wawa namo to nga'ayay. Ano hatira i, mangalef ko no Wama i kakarayan a pipafli to Fangcalay 'Adingo i milongocay i Cingraan,>> han Ningra.
Ci Yis aci Pilcipul
(Matay 12.22-30; Maroko 3.20-27)
14Yo mafahfahto ni Yis ko ccay a miapaay a palafoay i, masadakto koya palafoay, ta manga'ayto a caciyaw koya tamdaw. Safahka' sato ko finawlan. 15Nikawrira, ira ko somowalay nangra, <<O nano 'icel no kakridan no palafoay ci Pilcipul#11.15 Pilcipul -- o ccay a ngangan ni Satan. ko sapifahfah Ningra a pasadak to palafoay,>> saan.
16O romasato i, ira ko milifetay ci Yisan a mingitangit to pidmak ni Yis to kafahka'an to sapahapinangaw to nika o nai Kawasay Cingra. 17Nikawrira, mafana' ci Yis to harateng nangra saka, sowal sa i cangraan, <<Ano macacoli a malacinowas ko paro no kitakit i, o mamapleng koya kitakit. Ano o loma' to i, ano macacoli a malacinowas ko paro no loma' i, o mamapleng koya loma'. 18Ano mahaen ko dmak na Satan a macacoli a malacinowas i, samaanen no kitakit nira ko nika tomireng saw? Iro ci Pilcipul ko sapifahfah Ningra a pasadak to palafoay saan kamo i Takowanan, 19ano nano 'icel ni Pilcipul ko sapifahfah Ako to palafoay i, nima a 'icel ko sapifahfah no kapot namo to palafoay saw? Ano hatira i, o pahapinangay cangra to nika patlac namo. 20Nikawrira, o nano 'icel no Kawas ko sapifahfah Ako to palafoay. Saka, o pahapinangay konini to nika irato i tamowanan ko pikowan no Kawas.
21<<Tinako sa ano masongila' ko sapilood a lalosidan no ci'icelay a sofitay a misimaw to loma' ningra i, manga'ay ko dafong ningra a ma^min. 22Nikawrira, ano ira ko ccay a ikakaay ningra ko 'icel a tamdaw a tayra a milowid i cingraan i, 'afasen noya ikakaay ko 'icel a tamdaw ko nitadi'ecan noya ciloma'ay a sapilood a lalosidan, ta sakilacen ningra koya ni'afasan ningra a dafong.
23<<O caay pikitini i Takowanan a tamdaw i, o pacoliay Takowanan. O caay pikapot i Takowanan a misa'opo i, o palicinowasay to tamdaw.
O Pipatiko no Kaackan a 'Adingo
(Matay 12.43-45)
24<<Ano masadak ko kaackan a 'adingo nai tamdaw i, misarakarakat ciira i awaay ko nanom a pala a mikilim to malopahanhanan niira. Nikawrira, ano awaay a matama niira i, sowal sa ciira, <Patiko kako a minokay toya nano kaitiraan ako a loma',> saan ciira. 25Orasaka, patiko sa ciira i, ma'araw niira ko nika asik noya loma' a malosimet. 26Saka, sadak sato ciira nai loma'. Tahidangen niira a patayni ko ikakaay niira ko tatiih a papitoay a tatiihay a kawas. Comod sato caira a maro' itira. Orasaka, ikakato no i 'ayaway a pinangan noya tamdaw ko nika tatiihto no pinangan ningra,>> han ni Yis.
O So'linay a Malmeday
27Yo somowal ci Yis tonini i, ira i finawlan ko ccay a fafahiyan. Cli' sa a somowal ci Yisan, <<Malmeday ko mihofocay micocoay i Tisowanan a ina,>> saan.
28Nikawrira, pasowal sa ci Yis, <<Caay, ora mitngilay mido^doay to sowal no Kawas ko malmeday,>> han Ningra.
O Pingitangit to Kafahka'an a Dmak
(Matay 12.38-42)
29Yo sa'aloman sato ko finawlan a mitihlom i ci Yisan i, pararid sa ci Yis a somowal, <<Wata: ko nika tatiih no aniniay a tamdaw. Mingitangit cangra to sapinengnengaw to kafahka'an a dmak no Kawas. Nikawrira, deng oya kafahka'an a dmak ci Yonaan ko mama'araw, awaayto ko roma a kafahka'an a dmak a sapa'araw i cangraan. 30O mamatiya o nipipatalahkal ni Yona to kafahka'an a dmak i Ninifi a tamdaw ko nipipatalahkal noya Wawa no Tamdaw to kafahka'an a dmak no Kawas i aniniay a tamdaw. 31I pisawkitan a romi'ad i, o tatomireng ko no timol a fafahiyan a hongti a mipastek i raraw to aniniay a tamdaw. Nawhani tayni cingra nai maraayay a kitakit to sapitngilaw to citanengay a sowal ni Solomon. Sowalen Ako kamo, ira i tini ko ikakaay ni Solomon ko nika tadamaan. 32I pisawkitan a romi'ad i, o tatomireng ko tamdaw no Ninifi a mipastek i raraw tamowanan. Nawhani yo mitngil to kimad ni Yona ko Ninifi a tamdaw i, pasasiyor ko faloco' nangra a pasayni i Kawas. Sowalen Ako kamo, ira i tini ko ikakaay ni Yona ko nika tadamaan.
O Dawdaw no Tireng
(Matay 5.15; 6.22-23)
33<<Milikat ko tamdaw to dawdaw i, awaay ko misimeday i rfong, ano ^ca i, patliay i la^no no sato. O tatlien ningra i padawdawan to sakata^ngad no micomoday a tamdaw. 34O todong no dawdaw no tireng ko mata. Saka, ano manga'ay ko mata iso i, ta^ngad ko tireng iso a ma^min. Nikawrira, ano tatiih ko mata iso i, to'man ko tireng iso a ma^min. 35Orasaka, pina'on to saka^caaw ka to'man no laloma' iso. 36Ano ta^ngad a ma^min ko tireng iso a awa ko mamamamang aca a to'manay i, matiya o nika patdi no ma'dilay a dawdaw i tisowanan ko nika tdi no tireng iso a ma^min,>> han Ningra.
O Cacilafo ko Pasifana'ay to Rikec ato Farisay a Tamdaw
(Matay 23.1-36; Maroko 12.38-40)
37Mahrek ci Yis a somowal i, ira ko ccay a Farisay a tamdaw. <<Katayni i loma' ako a komaen,>> han ningra ci Yis. Saka, tayra sato ci Yis i loma' ningra a mitahka. 38Safahka' sa koya Farisay a tamdaw a minengneng to nika ^ca ka monanaw ni Yis i 'ayaw no nika komaen. 39Sowal sa ko Tapang i cingraan, <<Mikorac kamo o Farisay a tamdaw to papotal no takid ato sala. Kirami, o laloma' namo i, matomes no coos a ma'anof ato tatiih. 40Kamo o maapaay a tamdaw! o misanga'ay a Kawas to papotal i, caay ka halolaloma' a masanga' Ningra saw? 41Ka o nipipalada' namo i pakoyoc tora iraay i takid ato sala namo ko nga'ay. Ta makoracto a ma^min ko maamaan namo.
42<<O cacilafo kamo o Farisay a tamdaw! Mipacakat kamo to ccay no mo^tepay a sapafangsis a hakka#11.42 hakka -- o no Ripon a sowal. ato pasayat ato masamaamaanay a dateng. Nikawrira, malawa namo ko mo^celay a dmak no Kawas ato olah Ningra. So'linay, onini ko tadadado^doen namo. O romaroma to i, caay ko lalawaen.
43<<O cacilafo kamo o Farisay a tamdaw. Maolah kamo a maro' i micidekay a kamaro'an no kasa'opoan a loma'. Maolah kamo a ta'ongen no tao i kalali'acaan. 44O cacilafo kamo! Nawhani matiya o caay ka hapinang a tadem kamo. Caay kafana'en no miripa'ay a tamdaw ko nika o tadem,>> han ni Yis.
45Paca'of sa ko ccay a pasifana'ay to Rikec a tamdaw a somowal i Cingraan, <<Singsiaw, ano hatira ko sowal Iso i, halo ami a lokesen Iso,>> han ningra.
46Saka, paca'of sa ci Yis, <<O cacilafo kamo o pasifana'ay to Rikec a tamdaw! Pa'orongen namo ko kartengay a 'inorong a pa'orong i 'afala no tao. 'Arawhani, caay kakahi a pakatayal to ccaccay aca to tarodo' no tireng a mi'isal to 'inorong nangra. 47O cacilafo kamo! Sakapahen namo a misanga' ko 'otoc no tadem to malopiharatengan to nipatayan no tato'asan namo a pali'ayaway to sowal no Kawas. 48Ano hatira i, o nipipawacay o nipihai namo to nidmakan no tato'asan namo. Nawhani patayen no tato'asan namo koya pali'ayaway to sowal no Kawas ta patirengen namo ko 'otoc nangra. 49Orasaka, na pasowalto ko citanengay a tamdaw no Kawas, <O a ocoren Ako a patayra i cangraan ko pali'ayaway to sowal no Kawas ato tarokos. Nikawrira, ira ko mamapatay nangra, ira ko mamakari'ang nangra,> saan. 50Orasaka, o mamatfoc ko aniniay a tamdaw to nano nipipatay nangra to pali'ayaway to sowal no Kawas a ma^min nai satapangan no hkal, 51onini a tadah no rmes i, nanitiya i nipipatay ci Apilan tangasa i nipipatay namo ci Cakaliyaan, oya nipatayan namo itira i la'ed no pipato'ayaan ato Fangcalay Kaitiraan. So'linen Ako a somowal kamo, o mamatfoc ko aniniay a tamdaw to pakayniay tonini a dmak.
52<<O cacilafo kamo o pasifana'ay to Rikec a tamdaw! Rpeten namo ko safawah to sakafana'aw no tamdaw to taneng. Caay ka sapicomodan kamo. Tna'en haca namo ko mangalayay a sapicomodan a tamdaw!>> han ni Yis.
53Yo miliyas ci Yis itira i, ca^des ko pilikaf no pasifana'ay to Rikec ato Farisay a tamdaw ci Yisan. Liclicen nangra ci Yis to masamaamaanay a licay, 54ta misa'imer a mitala to sapirpetaw to patlac no sowal Ningra a mikari'ang i Cingraan.
Dewis Presennol:
Luka 11: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019