Ioan 18
18
PENNOD XVIII.
Iudas yn bradychu yr Iesu. Y swyddogion yn syrthio i’r llawr. Pedr yn torri clust Malchus. Dal yr Iesu, a’i ddwyn at Annas, a Kaiaphas. Pedr yn gwadu Christ. Holi yr Iesu ger bron Kaiaphas; a cher bron Pilatus. Yr Iudaion yn dymuno cael gollwng Barabbas yn rhŷdd.
1GWEDI i’r Iesu ddywedyd y geiriau hyn, efe a aeth allan, a’i ddisgyblion, dros afon Kedron, lle yr oedd gardd, i’r hon yr aeth efe a’i ddisgyblion. 2A Iudas hefyd, yr hwn a’i fradychodd ef, a adwaenai y lle: oblegyd mynych y cyrchasai yr Iesu a’i ddisgyblion yno. 3Iudas gan hynny, wedi iddo gael byddin, a rhingyllion, gan yr arch-offeiriaid a’r Pharisai, a ddaeth yno â lanternau, a lampau, ac arfau. 4Yr Iesu gan hynny, yn gwybod pob peth a oedd ar ddyfod arno, a aeth allan, ac a ddywedodd wrthynt, Pwy yr ydych yn ei geisio. 5Hwy a attebasant iddo, Iesu o Nazaret. Yr Iesu a ddywedodd wrthynt, Myfi yw. A Iudas, yr hwn a’i fradychodd ef, oedd hefyd yn sefyll gyd â hwynt. 6Cyn gynted gan hynny ag y dywedodd efe wrthynt, Myfi yw, hwy a aethant yn ŵysg eu cefnau, ac a syrthiasant i lawr. 7Yna efe a ofynnodd iddynt drachefn, Pwy yr ydych yn ei geisio? A hwy a ddywedasant, Iesu o Nazaret. 8Yr Iesu a attebodd, Mi a ddywedais i chwi mai myfi yw. Am hynny os myfi yr ydych yn ei geisio, gadêwch i’r rhai’n fyned ymaith: 9Fel y cyflawnid y gair a ddywedasai efe, O’r rhai a roddaist i mi, ni chollais i yr un. 10Simon Pedr gan hynny â chanddo gleddyf, a’i tynnodd ef, ac a darawodd was yr arch-offeiriad, ac a dorrodd ymaith ei glust ddehau: ac enw y gwas oedd Malchus. 11Yna yr Iesu a ddywedodd wrth Pedr, Dod dy gleddyf yn y wain: y cwppan a roddes y Tad i mi, onid yfaf ef? 12Yna y fyddin, a’r milwriad, a rhingyllion yr Iudaion, a ddaliasant yr Iesu, ac a’i rhwymasant ef, 13Ac a’i dygasant ef at Annas yn gyntaf (canys efe oedd chwegrwn Kaiaphas, yr hwn oedd arch-offeiriad y flwyddyn honno.) 14A Kaiaphas oedd yr hwn a gynghorasai i’r Iudaion, mai buddiol oedd farw un dyn dros y bobl. 15Ac yr oedd yn canlyn yr Iesu, Simon Pedr, a disgybl arall. A’r disgybl hwnnw oedd adnabyddus gan yr arch-offeiriad, ac efe a aeth i mewn gyd â’r Iesu i lys yr arch-offeiriad. 16A Phedr a safodd allan wrth y drws. Yna y disgybl arall, yr hwn oedd adnabyddus gan yr arch-offeiriad, a aeth allan, ac a ddywedodd wrth y ddrysores, ac a ddug Pedr i mewn. 17Yna y dywedodd y llangces oedd ddrysores wrth Pedr, Onid wyt tithau o ddisgyblion y dyn hwn? Dywedodd yntau, Nac wyf. 18A’r gweision a’r rhingyllion, gwedi gwneuthur tân glo (o herwydd ei bod hi yn oer), oeddynt yn sefyll, ac yn ymdwymno: ac yr oedd Pedr gyd â hwynt yn sefyll, ac yn ymdwymno. 19A’r arch-offeiriad a ofynodd i’r Iesu am ei ddisgyblion, ac am ei athrawiaeth. 20Yr Iesu a attebodd iddo, Myfi a lefarais yn eglur wrth y byd: yr oeddwn bob amser yn athrawiaethu yn y synagog, ac yn y deml, lle mae yr Iudaion yn ymgynnull bob amser; ac yn ddirgel ni ddywedais i ddim. 21Paham yr wyt ti yn gofyn i mi? gofyn i’r rhai a’m clywsant, beth a ddywedais wrthynt: wele, y rhai hynny a wyddant pa bethau a ddywedais i. 22Wedi iddo ddywedyd y pethau hyn, un o’r rhingyllion a’r oedd yn sefyll ger llaw, a roddes gernod i’r Iesu, gan ddywedyd, Ai felly yr wyt ti yn atteb yr arch-offeiriad? 23Yr Iesu a attebodd iddo, Os drwg y dywedais, tystiolaetha o’r drwg; ac os da, paham yr wyt yn fy nharo i? 24(Ac Annas a’i hanfonasai ef yn rhwym at Kaiaphas yr arch-offeiriad.) 25A Simon Pedr oedd yn sefyll, ac yn ymdwymno. Hwy a ddywedasant wrtho, Onid wyt tithau hefyd o’i ddisgyblion ef? Yntau a wadodd, ac a ddywedodd, Nac wyf. 26Dywedodd un o weision yr arch-offeiriad (câr i’r hwn y torrasai Pedr ei glust), Oni welais i di gyd ag ef yn yr ardd? 27A Pedr a wadodd drachefn; ac yn y man y canodd y ceiliog. 28Yna y dygasant yr Iesu oddi wrth Kaiaphas, i’r dadleudy: a’r bore ydoedd hi; ac nid aethant hwy i mewn i’r dadleudy, rhag eu halogi; fel y gallent fwytta’r pasg. 29A Pilatus a aeth allan attynt, ac a ddywedodd, Pa achwyn yr ydych chwi yn ei ddwyn yn erbyn y dyn hwn? 30Hwy a attebasant ac a ddywedasant wrtho, Oni bai fod hwn yn ddrwg-weithredwr, ni thraddodasem ni ef attat ti. 31Am hynny y dywedodd Pilatus wrthynt, Cymmerwch chwi ef, a bernwch ef yn ol eich cyfraith chwi. Yna yr Iudaion a ddywedasant wrtho, Nid cyfreithlon i ni ladd neb: 32Fel y cyflawnid gair yr Iesu, yr hwn a ddywedasai efe, gan arwyddocâu o ba angau y byddai farw. 33Yna Pilatus a aeth drachefn i’r dadleudy, ac a alwodd yr Iesu, ac a ddywedodd wrtho, Ai ti yw Brenin yr Iudaion? 34Yr Iesu a attebodd iddo, Ai o honot dy hun yr wyt ti yn dywedyd hyn, ai eraill a’i dywedasant i ti am danaf fi? 35Pilatus a attebodd, Nid wyf fi Iudai. Dy genedl dy hun a’r arch-offeiriaid a’th draddodasant i mi. Beth a wnaethost ti? 36Yr Iesu a attebodd, Fy mrenhiniaeth i nid yw o’r byd hwn. Pe o’r byd hwn y byddai fy mrenhiniaeth i, fy ngweision i a ymdrechent, fel na’m rhoddid i’r Iudaion: ond yr awrhon nid yw fy mrenhiniaeth i oddi yma. 37Yna y dywedodd Pilatus wrtho, Wrth hynny ai Brenin wyt ti? Yr Iesu a attebodd, Yr ydwyt ti yn dywedyd mai Brenin wyf fi. Er mwyn hyn y’m ganed, ac er mwyn hyn y daethum i’r byd, fel y tystiolaethwn i’r gwirionedd. Pob un a’r sydd o’r gwirionedd, sydd yn gwrandaw fy lleferydd i. 38Pilatus a ddywedodd wrtho, Beth yw gwirionedd? Ac wedi iddo ddywedyd hyn, efe a aeth allan draehefn at yr Iudaion, ac a ddywedodd wrthynt, Nid wyf fi yn cael dim achos ynddo ef. 39Eithr y mae gennych chwi ddefod, i mi ollwng i chwi un yn rhŷdd ar y pasg: a fynnwch chwi gan hynny i mi ollwng yn rhŷdd i chwi Frenin yr Iudaion? 40Yna y llefasant oll drachefn, gan ddywedyd, Nid hwnnw, ond Mab y Tad. A Mab y Tad hwnnw oedd leidr.
Dewis Presennol:
Ioan 18: JJCN
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Y Cyfammod Newydd gan John Jones. Argraffwyd gan John Williams, Llundain 1808. Cafodd y testun ei ddigideiddio gan Gymdeithas y Beibl yn 2021.