Yikri 16
16
Mand ne kodense
1La Israyɛll nebã fãa yii Elim. Bãmb dɩka sor n kẽn n ta Sĩn we-raoogã sẽn be Elim ne Sinayi sʋkã. Bãmb taa be kiuug a yiibẽ soabã rasem piig la a nu daare, bãmb sẽn yi Ezɩptã zugẽ. 2La Israyɛll nebã fãa yẽgma ne a Moyiis la a Aarõ we-raoogã pʋgẽ. 3Israyɛll nebã yeela bãmb yaa: «Sẽn-Ka-Saab sã n dag n kʋẽ tõnd Ezɩpt tẽngã wakat ning tõnd sẽn dag n ket n zĩ nemdã rʋgd sɛɛgẽ, la tõnd sẽn dag n dɩt n tɩgdã n são! Bala, yãmb sẽn tall tõnd n wa we-ra-kãngã pʋgẽ wã yaa sẽn na n yɩlẽ tɩ kom kʋ kʋʋn-kãngã fãa!»
4 #
Zã 6.31
Dẽ, Sẽn-Ka-Saab yeela a Moyiis yaa: «Ade, mam na n kɩtame tɩ rɩɩb yi yĩngr n ni wa saag yãmb yĩnga. La nebã na n yii daar fãa n wʋk sẽn sekd daar a yembr dɩɩbo, tɩ mam tõe n mak bãmb n bãng bãmb sã n na n saka mam tõodã. 5Rasem a yoobã daare, bɩ b wʋk wʋsg n wa segl n yɩɩd bãmb sẽn mi n wʋkd daar fãa wã, sẽn na zems rasem a yiib rẽnda.»
6A Moyiis ne a Aarõ yeela Israyɛll nebã fãa yaa: «Zaabrã, yãmb na bãng tɩ yaa Sẽn-Ka-Saab n yiis yãmb Ezɩpt tẽngã. 7La beoog yibeoogo, yãmb na n yãnda Sẽn-Ka-Saab ziiri. Bala, bãmb wʋma yãmb sẽn yẽgemd ne bãmbã. La tõndo, tõnd yaa bõe tɩ yãmb yẽgemd ne tõndo?» 8La a Moyiis yeelame: «Zaabrã, Sẽn-Ka-Saab na n kõo yãmb nemd tɩ y wãbe, la beoog yibeoogo, bãmb na n kõo yãmb dɩɩb tɩ y rɩ n tɩge. Bala, Sẽn-Ka-Saab wʋma yãmb sẽn yẽgemd ne bãmbã. La tõndo, tõnd yaa bõe? Yãmb ka yẽgemd ne tõnd ye, yaa ne Sẽn-Ka-Saabo.»
9A Moyiis yeela a Aarõ yaa: «Yeel Israyɛll zama wã fãa yaa: ‹Kolg-y Sẽn-Ka-Saab taoore. Bala, bãmb wʋma yãmb yẽgengã.› » 10La a Aarõ sẽn wa n ket n gomd ne Israyɛll zama wã, bãmb wẽnemda b nens n tees we-raoogã sẽnẽ. La ade, Sẽn-Ka-Saab ziirã puka sawaodg pʋgẽ.
11Dẽ, Sẽn-Ka-Saab goma ne a Moyiis n yeele: 12«Mam wʋma Israyɛll nebã yẽgengã. Togs bãmb yaa: Zaabrã, yãmb na n wãba nemdo. La beoog yibeoogo, yãmb na n dɩɩ rɩɩb n tɩge. Dẽ, yãmb na n bãngame tɩ mam yaa Sẽn-Ka-Saab sẽn yaa yãmb Wẽnnaam.»
13Zaabr sẽn ta, kodens n wa n lud sik zĩigã. La vẽkembeoogo, meenem n gãneg zĩigã fãa sẽn gilg sik zĩigã. 14La meenemã sẽn wa n mesge, bũmb n be tẽn-gãongã zug we-raoogã pʋgẽ n yaa faasga, n yaa bɩrb-bɩrba, n yaa pɛɛlga. 15#1Kor 10.3La Israyɛll nebã sẽn yãnd mandã, b soka taab yaa: «Yõwã yaa bõe?» Bala, bãmb dag n ka mi a sẽn yaa bũmb ning ye. La a Moyiis yeela bãmb yaa: «Yõwã yaa rɩɩb Sẽn-Ka-Saab sẽn kõt yãmb tɩ y rɩ. 16Ad Sẽn-Ka-Saab sẽn yeele: ‹Bɩ yãmb ned kam fãa wʋk sẽn sek a rɩɩbo. Yaa wamd noor a yembr ned kam fãa yĩnga, wa sẽn zems yãmb nebã y sẽn tog n dɩlgã sõore. Bɩ ned kam fãa wʋk tɩ sek a yir dãmba.» 17Israyɛll nebã maana a woto. La neb kẽer wʋka wʋsgo, tɩ neb kẽer me wʋk bilfu. 18#2Kor 8.15La bãmb sẽn dɩk wam-makdgã n mak mandã, b mikame tɩ neb nins sẽn wʋk wʋsgã ka paam n yɩɩd sẽn zems ye. La neb nins sẽn wʋk bilfã me, ka paoog-b ye. Bãmb ned kam fãa sẽn wʋkã rag n zemsda ne a sẽn date.
Noy buud toor-toor mandã wɛɛngẽ
19A Moyiis yeela bãmb yaa: «Bɩ ned baa a yembr da bas mandã tɩ beoog vẽeg ye.» 20La bãmb ka kelg a Moyiis ye. Neb kẽer bas-a lame t'a vẽeg beoogo. La a pida ne zũnzũy n tar yũugu. A Moyiis sũurã yika ne bãmba. 21Dẽ, daar fãa, bãmb wʋkda mandã sẽn zems ned kam fãa rɩɩbo. La wĩndgã sã n bɩ, a boogdame.
22La rasem a yoob daarã, bãmb wʋka sẽn zems rasem a yiib rɩɩbo. Yaa wam a yiib-yiib ned kam fãa yĩnga. La nebã nanambsã fãa wa n togsa a Moyiisi. 23#Yik 20.8-11Dẽ, a Moyiis yeela bãmb yaa: «Yaa Sẽn-Ka-Saab n yeel tɩ b maan a woto. Beoog na n yɩɩ vʋʋsg daare. Yaa vʋʋsg daar sẽn welg toor Sẽn-Ka-Saab waoogr yĩnga. Yãmb sẽn dat n kɩɩm bũmb ninsã, bɩ y kɩɩme, la yãmb sẽn dat n dʋg bũmb ninsã, bɩ y rʋge. La bũmb nins fãa sẽn kellã, bɩ y bĩng tɩ ta beoogo.» 24Dẽ, bãmb yãkame n bĩng tɩ ta beoog wa a Moyiis sẽn yeel bãmbã. La rɩɩbã ka põoge, la zũnzũiy me ka kẽ-a ye. 25A Moyiis yeelame: «Bɩ y rɩ-a rũndã. Bala, rũndã yaa vʋʋsg daar Sẽn-Ka-Saab waoogr yĩnga. Rũndã, yãmb ka na n yãnd mandã weoogã pʋgẽ ye. 26Yãmb na n wʋk-a-la rasem a yoobe, la rasem a yopoe wã daar sẽn yaa vʋʋsg daarã, a ka na n zĩnd ye.»
27La rasem a yopoe wã daare, kẽer yii nebã sʋk n kẽng n na n tɩ wʋk mandã, la b ka yãnd ye. 28Dẽ, Sẽn-Ka-Saab yeela a Moyiis yaa: «Yãmb na n kɩɩsa mam noyã ne m tõodã hal tɩ ta dabʋre? 29Ges-y-yã! Sẽn-Ka-Saab sẽn kõ yãmb vʋʋsg daarã yĩng n kɩte, tɩ bãmb kõt yãmb dasem a yiib rɩɩbo, rasem a yoobã daare. Bɩ ned kam fãa kell n pa a zĩigẽ n da yi rasem a yopoe wã daar ye.» 30Dẽ, nebã vʋʋsa rasem a yopoe wã daare.
31 #
Sõd 11.7,8 Israyɛll nebã pʋda rɩɩbã yʋʋr tɩ mande. A rag n wẽnda wa baninga, n yaa pɛɛlga. La a noosmã wẽnda wa bur-maas sẽn maan ne sɩɩdo.
32A Moyiis yeelame: «Ad Sẽn-Ka-Saab sẽn kõ noor ninga: ‹Yãk-y mandã n pid wam-makdgã n bĩng y yagensã yĩnga, tɩ b wa yãnd rɩɩb ning mam sẽn kõ yãmb tɩ y rɩ we-raoogã pʋgẽ, mam sẽn wa n yiis yãmb Ezɩpt tẽngã wakatã.› » 33#Ebr 9.4A Moyiis yeela a Aarõ yaa: «Rɩk-y yʋʋr n sui mandã ne wam makdgã noor a yembr n tẽgn-a Sẽn-Ka-Saab taoore, n bĩng-a beenẽ yãmb yagensã yĩnga.» 34Dẽ, a Aarõ tẽgna yʋʋrã ne mandã kug-walsã sẽn kɩt Wẽnnaam tõodã kasetã taoore, n bĩng a beenẽ wa Sẽn-Ka-Saab sẽn dag n yeel a Moyiisã.
35 #
Zoz 5.12
La Israyɛll nebã rɩɩ mandã hal tɩ ta yʋʋm pis-naase, hal n wa n ta tẽng neb sẽn be. Bãmb dɩɩ mandã hal n ta wakat ning bãmb sẽn ta Kana soolmã toadgẽ wã. 36Wam-makdgã noor piig yaa peoog a yembre.
Dewis Presennol:
Yikri 16: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.