Yikri 15
15
A Moyiis ne Israyɛll nebã yɩɩlle
1 #
Vẽn 15.3
Dẽ, a Moyiis ne Israyɛll nebã yɩɩla yɩɩn-kãngã n waoog Sẽn-Ka-Saab n yeele:
«Mam na n yɩɩlame n waoog Sẽn-Ka-Saabo.
Bala, bãmb naamã yaa kãsenga.
Bãmb luba wiid ne b wed-rʋʋdb ko-kãsengã pʋgẽ.
2 #
Yɩɩn 118.14, Eza 12.2 Sẽn-Ka-Saab yaa mam pãnga,
la b yaa mam pãn-kãsenga,
n yaa mam pẽgr yɩɩlle.
Bãmb yaa mam fãagda.
Bãmb yaa mam Wẽnnaam,
la mam na n waooga bãmba.
Bãmb yaa mam ba wã Wẽnnaam,
la mam na n pẽga bãmba.
3Sẽn-Ka-Saab yaa zabr gãndaoogo.
Bãmb yʋʋr la a Sẽn-Ka-Saabo.
4Bãmb luba Faarõ saar-dãmbã
ne a tãb-biisã ko-kãsengã pʋgẽ.
Rudum ko-kãsengã lima tãb-biis
nins yẽnda sẽn yãkã.
5Zĩ-zulums lima bãmba.
Bãmb siga zĩ-zulumsẽ wa kugri.
6Sẽn-Ka-Saabo, yãmb nug rɩtg pãng yaa kãsenga.
Sẽn-Ka-Saabo, yãmb nug rɩtgã wãa bɛɛbã.
7Yãmb naam-kãsengã pʋga,
yãmb lubda neb nins sẽn yik n zabd ne yãmbã.
Yãmb tʋmda y sũ-kãbre,
t'a rɩt bãmb wa moodo.
8Yãmb yõ-bogdã pemsem kɩtame
tɩ koomã yiki.
Koomã wa n sama taaba.
Ko-zoetem yalsa yĩngr wa lalga.
Ko-kãsengã zĩ-zulums koom gĩsa
ko-kãsengã sʋka.»
9Bɛ wã rag n yetame:
«Mam na n pʋgla bãmba.
Mam na n paam-b lame.
Mam na n pʋɩɩ te-zɛɛdem n maan m sẽn date.
Mam na n wõoga m zabr sʋʋga.
Mam nug na n sãamã bãmba.»
10Yãmb fʋʋsame n kɩt tɩ ko-kãsengã lim bãmba.
Bãmb tisga wa namd ko-kãsemsã pʋsẽ.
11Sẽn-Ka-Saabo, wẽnnaam-dãmbã sʋka,
ãnda n zem yãmba?
Ãnda n tar naam ne sõmblem wa yãmba,
n sek zoeese, la sẽn zems waoogre,
n maand tʋʋm-kãsemse?
12Yãmb tẽega y rɩtg nugã, la tẽngã vela bãmba.
13Yãmb yãaga nin-bãmbã y sẽn fãagã
ne y nonglmã.
Yãmb pãngã tara bãmb n dabd yãmb
yir sẽn welg toorã pʋga.
14Nebã wʋmame n digda.
Toog tara Filistẽ-dãmbã soolem nebã
wa pag sẽn kũmd rogem.
15La Edom nanambsã pelens yɩkame.
Moaab pãens rãmbã rigdame.
Kana nebã fãa gĩin maagame.
16Sẽn-Ka-Saabo, rabeem-kãseng
ne yɛɛsg yõka bãmba,
yãmb nugã pãn-kãseng yĩnga.
Bãmb lebga mugs wa kugri,
hal tɩ yãmb nebã looge, hal tɩ yãmb nebã
yãmb sẽn da wã looge.
17Sẽn-Ka-Saabo, yãmb na n talla
bãmb n wa sel yãmb tãngã zugu,
zĩig ning yãmb sẽn segl n na n zĩnd a pʋgẽ wã,
yaa zĩig ning sẽn welg toorã,
yaa zĩig yãmb sẽn yẽbg ne y meng nusi.
18Sẽn-Ka-Saab yaa rĩm wakat fãa
la wakat sẽn kõn sa.»
19Bala, Faarõ wiidã ne a saar-dãmbã la a wed-rʋʋdbã sẽn kẽ ko-kãsengã pʋgẽ wã, Sẽn-Ka-Saab kɩtame tɩ ko-kãsengã koom lebg n lim bãmba. La Israyɛll nebã kẽna tẽn-koɛɛng zug n pɩʋʋg ko-kãsengã.
20La no-rɛɛs-poak a Miryam sẽn yaa a Aarõ tão wã rɩka sɩlsãka, la pagbã fãa yii n pʋgla yẽnda n wẽ sɩlsãgs n sao. 21La a Miryam rag n deesda bãmb yɩɩllã n yetẽ:
«Bɩ y yɩɩl n waoog Sẽn-Ka-Saabo.
Bala, bãmb wilgame tɩ b yaa na-kãsenga.
Bãmb luba wiid ne wed-rʋʋdb ko-kãsengã pʋgẽ»
Maara koomã
22A Moyiis kɩtame tɩ Israyɛll nebã rɩk sor n yi rudum ko-kãsengã zĩigẽ n kẽng Suur we-raoogã sẽnẽ. La bãmb kẽna rasem a tãab kẽnd we-raoogã pʋgẽ n ka yãnd koom ye.
23Bãmb taa Maara, la b ka tõog n yũ Maara koomã ye. Bala, a rag n yaa toogo. Yaa woto n kɩt tɩ b pʋd zĩigã yʋʋr tɩ Maara. 24La nebã yẽgma ne a Moyiis n yeele: «Tõnd na n yũu bõe?» 25Dẽ, a Moyiis zẽka a koɛɛg n pʋʋs Sẽn-Ka-Saabo, la Sẽn-Ka-Saab wilga yẽnda tɩɩg buud a yembre. A Moyiis keega tɩɩgã n los koomã pʋgẽ, la koomã lebga noogo. Yaa beenẽ la Sẽn-Ka-Saab wilg bãmb b no-tũudsã ne b noyã. Leb n yaa zĩ-kãng la bãmb mak nebã. 26Sẽn-Ka-Saab yeelame: «Yãmb sã n sak Sẽn-Ka-Saab sẽn yaa yãmb Wẽnnaamã koɛɛg neere, yãmb sã n maan sẽn tat bãmb yam, yãmb sã n yok y tʋb n kelg bãmb noyã, la y sã n sak bãmb no-tũudsã fãa, mam kõn lobg yãmb ne bãas nins fãa mam sẽn lobg Ezɩpt nebã ba a yembr ye. Bala, mam yaa Sẽn-Ka-Saab sẽn maagd yãmba.»
27Dẽ, bãmb taa Elim, la ko-bunds piig la a yiib ne koms tɩɩs pis-yopoe n dag n be beenẽ. Bãmb tilga b sik-zĩigã koomã noor beenẽ.
Dewis Presennol:
Yikri 15: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.