Matayo 26
26
1Kikava ili Yesu andemarisya firero filya foose, kaia vaseṛo vamwi: 2Mwishi sheeli iseere mikonu ivili kive kisuku kya Pasaka. Na Mwana wa nndu aniingyoo, amu akabyo nsalabeń. 3Llyo vakohani vanini na vasuṛi va vandu vakakusandya numbeń kwa nkohani nnini eevaangwaa irina lyamwi Kayafa. 4Vakarera kyama kya iwara Yesu na ntambwe, amu vawwaa. 5Kake vakanumbua: Tivere kisuku kiire, amu utave mwaandu vanduń!
6Neeli Yesu eekee kulya Betania numbeń ya Simon ulya eeworwaa ni ivave, 7kashewa ni nka arie kawembe kawore mafura a kisaamu awore uuru unini. Kalletia nrweń wamwi ili eekee rembo eelyaa shoonga. 8Ili vanalosho vamwi vandelolya, vakatuṛuka vakanumbua: A ifwalafwala li llya kiki? 9Amu mafura va eekimbwaa kwa fesa shiingi taavyo vakiva. 10Yesu kamanya kavaia: Nki ili mukee yatara nka uu? Amu anshitanya kindo kinuru. 11Fulya vakiva mukee nawo mikonu yoose, kake niń mukaa nań mikonu yoose ndi. 12Amu ili ashiletya mafura va wiliń wakwa, asongosia iṛikwa lyakwa. 13Nkue namuia: Kundo koose isangeń lyoose kulya kukee ikwanisyo nrumi ii shisha ya ikiṛa vandu, kirerwaa na iki akitana ye, nae akumbulwaa.
14Llyo umwi wa valya ikumi na vavili, eevaangwaa Yuda Isikariote, kaenda kwa vakohani vanini kavauṛa: 15Nkiki mushiniingaa, ili mmworusaa kundo akai? Vakanrekya shilingi makumi araru. 16Kuuka nkonu to kaṛuya mwaanya wa indiinga.
17Kyasia nkonu wa mbele wa kisuku wa ilya mikate itadookye vanalosho vakauṛa Yesu: Nkwi kufurie tikusongosie kuliye-wo yaanri lya Pasaka? 18Nae kavaia: Endeń muṛiń wa ṅanya mumwie: Llosha akuia: Kyeeri kyakwa kikee kufui vai, nkwafo lliyaa yaanri lya Pasaka andu emwi na vanalosho vakwa. 19Vanalosho vakatana sheeli Yesu andevavavasya vakandetobiṛya yaanri lya Pasaka. 20Ili kundeila, kakaa rembo shoongeń andu emwi na vaseṛo vamwi ikumi na vavili. 21Ili veelyaa kavaia: Umwi wanu ashiṛiingaa. 22Vakaṛiika nnu na nndu woose kamwuṛa: Nndumi, nniń? 23Nae kavaaṛua kavaia: Uu ashiṛiingaa tikee iliana nae kyaashoń kimwi alli. 24Mwana wa nndu eendaa shia yamwi da, sheeli eentisiṛyoo. Kake ushi ulya, Mwana wa nndu andeṛiingwaa yye. Nndu to kifo kitaare awonika kiwiaa ńwana. 25Llyo Yuda ulya eendiingyee kamwuṛa: Llosha nnini, nniń? Kamwia: Ee ni iwe kumuni kwanumbua. 26Nawo ili veelyaa shoonga, Yesu kaimboo nkate kaana Iṛuva kaufukyafukya kaavya vanalosho vamwi eevaiaa: Ngyeń kuliyeń! Uu ni vvili wakwa. 27Numa kaimboo umbata kaana Iṛuva kavaniingya eevaiaa: Nwiń ini mu woose! 28Amu ilu llo usao lwakwa luvaa mma shiiya ya imwitanisa na Iṛuva. Lwiritwaa kiimba kya veengi vakooye itio mareko awo. 29Kake namuia: Kuuka alli nkinwaa neeni minuye ii ya mfinyo ndi kumande nkonu ulya nndenwaa neeni minuye miiya ifo umangiń lwa Vaava wakwa. 30Ili vandemaa iimba kiimbo kya mmisa Iṛuva, vakasomuka vakaenda uroń lwa misenifu. 31Llyo Yesu avaia: Kio ki ini mu woose mushituṛukyaa. Fulya kikee kitisiṛe: Nkabaa mwisi na maanri a shoo anyanyakaa. 32Kake nammaa iṛuka kwa vafu niiraa mbele yanu kulya Galiliya. 33Na Petiro kamwaṛua: Na akwaa wwoose vakutuṛukyaa, niń nkutuṛukyaa kutu ndi. 34Yesu kamwia: Kio ki kitaare nguku ya shawu yamiikoro, kushikanaa kararu. 35Petiro kamwia: Na akwaa mfwaa andu emwi nawe nkukanaa kutu ndi. Na vaseṛo vengi woose vakarera kuro.
36Numa Yesu kaenda andu emwi nawo andu eevaangwaa Getisemane. Kaia vanalosho vamwi: Kaań ia kuri neende allya nndeterevya-wo. 37Kakurika Petiro na vana valya vavili va Sebedayo. Kabooka ikunarya na irerema. 38Yesu kavaia: Nrima wakwa uwore unaari nnu, useere ifwa da. Kaań ia mulale rembo andu emwi nań. 39Kaserika kinnya na kwa mbele kawa si na kisangu katereva Iṛuva eereraa: Vaava wakwa, kwakooya kivaa kwite ukiva lu kwaashaań. Kake kitave sheeli niń mfurie ndi, kive sheeli iwe kufurie. 40Kauya na kwa vaseṛo vamwi kavakooya vallala. Kaia Petiro: Nta mumakii ilala rembo andu emwi nań nta saa imwi ndi? 41Laleń rembo mwiterevaa Iṛuva, amu mutavingwa mmakusaṛo a inunua. Nrima ufurie itomaa da, kake vvili ni llemwa. 42Kaenda lingi lya kavili katereva Iṛuva eereraa: Vaava wakwa, kwakooya ukiva ilu lutavaa lushuuke, kive sheeli iwe kufurie. 43Kauya lingi kavakooya valele, fulya miso awo eemeemyoo nruo. 44Kavarea kaenda lingi katereva lya kararu eereraa firero filya feni. 45Numa kauya kwa vaseṛo vamwi kavaia: Naare ini womi mufurie ilala da? Lleń alli kyeeri kyamfika, Mwana wa nndu arambikyo̱ maakoń a varekwa. 46Kwimbooń teende, amu ulya andeshiṛiinga ansha kufui.
47Ili eereraa kuri, lia eni Yuda kasha akee umwi wa valya ikumi na vavili. Ariani na syamu shiingi inderumwa vvakohani vanini na vasuṛi va vandu. Nayo irie shombo na ndata. 48Kake ndiingi ulya eewaikimbaa kuri: Ulya mmwongaa mimo yye uu muwware. 49Lia eni kaserikya Yesu kamwisana kamwia: Llosha nnini kia! Kamwonga mimo. 50Yesu kamwia: Ndoo yakwa, kwashea ki? Llyo vandu valya vatambukya Yesu vakawwara vakamfinga. 51Na umwi wa valya veekee andu emwi na Yesu kasomua shombo yamwi kaminya iketi lya nkohani nnini kuri kumwi. 52Na Yesu kamwia: wiiṛa shombo yafo kiboń! Amu woose vawaa na shombo nawo vawalwaa na shombo. 53Ana kukusaṛye se, sheeli niimakii itereva Vaava wakwa ashirikye vamalaika veengi kita fiku ikumi na fivili? 54Kake kifo niitanaa kuro, naare mitisine iifikaa? Sha lia kyatisiṛwa kyawara se kive kuro? 55Llyo Yesu andeia vandu valya: Mwansha isheshiwara murie shombo na ndata, sheeli nkee kisoki. Na mikonu yoose nkaa numbeń ya Iṛuva niiloshaa-fo, nta ishiwara. 56Kake ifi foose favva, amu mitisine ya vaauya fisuku ifike. Lia eni vaseṛo vamwi woose vakantia vakarisha. 57Na valya vandewara Yesu vakanrwaa kwa nkohani nnini eevaangwaa Kayafa. Mfo veekusandyee valosha va vandu na vasuṛi. 58Kake Petiro kalatya Yesu eekwovaa kumande afikaa wooṛo kwa nkohani nnini kakaa rembo andu emwi na maketi, alle kasa kivaa.
59Llyo vakohani vanini na vasuṛi woose va kikwena vakaṛuiya Yesu findo fa imfingya fa uresi, amu vawwaa. 60Nta ikooya, lla kasa veefilee iwo veekee imfingya uresi. 61Numa vakasalala vavili vakanumbua: Uu anrera: Mmakii isakya numba ya Iṛuva niitanye kari ka mikonu iraru. 62Nkohani nnini kakwimboo kaia Yesu: Kwaṛuaa nta kirero kya filya iva vakee ikuṛiinga nafo se? 63Kake Yesu kasia do. Nkohani nnini kamwia: Nakulisa ikite na Iṛuva eefo na muu kutiie, akwaa iwe kukee Kristo Mwana wa Iṛuva. 64Yesu kamwia: Ee nsheeli iwe kwanumbua. Na alli namuia: Kuuka alli mulolyaa Mwana wa nndu akee rembo taari ya uko usha lwa Iṛuva. Na numa ashaa na maṛumbe a ringewu. 65Llyo nkohani nnini arandaranda miseto yamwi eenumbuaa: Uu ammaa iruma Iṛuva. Tikisokodyaań ki kingi? Mwamiita alli kuri sheeli aruma Iṛuva. Mulla naare? 66Nawo vakamwaṛua vakanumbua: Kyawara awalwa. 67Llyo vabooka immishya manyiiri kisanguń na inkaba na ṅunde. Na vengi vakankaba na ngyui veemwuṛaa: 68Kristo, tirambue ni i akukaba? 69Nae Petiro eekee rembo io wooṛo. Kashewa ni iketi limwi lya kika likamwia: Na akwaa ni iwe kukee andu emwi na Yesu uu wa Galilaya. 70Kaira ngani mbele ya woose eenumbuaa: Niishi kilya kukee irera ndi. 71Ili Petiro eesomukaa kishomiń, nka ungi kallolya kaia valya veeyoo: Nndu uu eekee andu emwi na Yesu wa Nasareti. 72Kaira ngani lingi na ilya ikite eenumbuaa: Niń niishi nndu uu ndi. 73Kwa numa kinnya valya veeselelee alya wooṛo vakashea Petiro vakamwia: Nkya dede iwe kukee umwi wa vaaroe va Yesu, fulya mirerie yafo yyo ikee ikurambua. 74Llyo abooka ikudenga na ilya ikite eenumbuaa: Niń niishi nndu uu kutu ndi. Lia eni nguku ya shawu ikaikoro. 75Io Petiro kakumbua kirero kilya kya Yesu eemwiaa: Kitaare nguku ya shawu yamaa iikoṛo, kushikanaa kararu. Kasomuka wooṛo ya muṛi kaiya kutu na unaari unini.
Dewis Presennol:
Matayo 26: RWK72
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.