Matayo 25
25
1Umangi lwa iṛuvewu luvakani na sambuṛa ikumi tindeimboo taa tawo vakaenda indeondoṛa nndumi wa wali. 2Na varaanu vawo veekee vatondo na varaanu veekee vaṛango. 3Na valya vatondo veeriee taa tawo da, kake veeriee mafura engi a mmwasi ndi. 4Kake valya vaṛango vakakurika mafura fiyeń fawo andu emwi na taa tawo. 5Ili nndumi wa wali andesinda, woose vakarengea vakarekya ruoń. 6Isomukoń lya kari kikaitiwa kiṛo-ṛongyo: A uu nndumi wa wali ansha! Somukeń mumwondoṛe! 7Na sambuṛa tilya toose tikakwimboo tikasumanisa taa tawo. 8Na valya vatondo vakaia valya vaṛango: Muṛe tifukiyeń neese mafura wo anu, amu taa teru tikee ifwa. 9Na valya vaṛango vakavaaṛua vakavaia: wode, atifilaa ise neeni ndi. Llyo ńwana mwende kwa vakumbi mundeuṛa-fo anu. 10Ili vakirekye-fo yuṛa, nndumi wa wali kasha. Na valya veenkusumanisyaa vakaaka nae numba ya wali na mwaango ukaraywa. 11Numa sambuṛa tilya tingi nato tikasha tikanumbua: Wui Nndumi! Wui Nndumi! Tirue numba! 12Nae kavaia: Namuia kya dede: Mmwishi ini ndi. 13Kyasia laleń kya umbuura, fulya muteeshi nkonu ana kyeeri Mwana wa nndu ashaa nakyo.
14Amu nkuro kivakani na nndu andeimboo kyaaṛo. Kabooka ivaanga maketi amwi kavaniingya masaa amwi vamfisye. 15Kaniingya ulya umwi feenga firaanu na ungi feenga fivili na ulya ungi kyeenga kimwi. Kaniingya nndu woose kilya kiińańani na finya tamwi. Kakwimboo kyaaṛo. 16Ameenda, lia eni ulya andewaria feenga firaanu kawara shia kandekaba nafo mbusha. Kakooya mbusha ya feenga fingi firaanu. 17Na akwaa ni ulya wa feenga fivili kababa mbusha kakooya feenga fingi fivili. 18Kake ulya andeniingyo kyeenga kimwi kakiimboo kandekiṛika si kafisa fesa ta nndumi wamwi. 19Numa ya mikonu miingi nndumi wa maketi alya kasha kafura itala masaa amwi andu emwi nawo. 20Kasha ulya andewaria feenga firaanu kannde feenga fingi firaanu. Kanumbua: Nndumi, kwashiniingya feenga firaanu. A fi na fingi firaanu nndekooya ifo mbusheń yayo. 21Nndumi wamwi kamwia: Nkisha iketi isha kukee nsongovisi. Kwikee mulla wa findo faangu, kuvaa mulla wa fiingi. Aka ifureń lya Nndumi wafo! 22Na ulya andewaria feenga filya fivili kasha na-wo. Kanumbua: Nndumi, kundeshiniingya feenga fivili. A fi feenga fingi fivili nndekooya ifo mbusheń yayo. 23Nndumi wamwi kamwia: Nkisha iketi isha kukee nsongovisi. Kwikee mulla wa findo faangu, kuvaa mulla wa fiingi. Aka ifureń lya Nndumi wafo! 24Kasha na ulya andeniingyo kyeenga kimwi. Kanumbua: Nndumi, nndemanya sheeli kukee nndu wa myaandu, kwailula kitaare kwaveekya, kwasańirya kitaare kwameeṛa. 25Nań neeṛea nakwendya nandeṛika kyeenga kilya kyafo ifo si. 26Kyasia nndumi wamwi kamwaṛua kamwia: Iwe iketi ikasha kuwore uroko! Kundemanya sheeli niilulaa ntandeveekya, nasańiṛya ntanderema? 27Kyasia kyeenkuwaraa se kurwaa masaa wo akwa kwa vakumbi? Nań ili namuuya niikooyaań masaa akwa na mbusha yayo. 28Kyasia nsokeń kyeenga kyo kyamwi, muniingye ulya awore feenga firaanu. 29Amu ulya awore masaa eengeṛyoo kya mmwasi. Na ulya atawore kindo na akwaa nkilya akee nakyo asokwaa. 30Na iketi ili ikasha leeṛeń ifo wooṛo llemiń! Neefo mfo kivaa kiiyo na ifina kitaku.
31Ili Mwana wa nndu ashaa akee na unini lwamwi aryani na vamalaika vasongori woose, llyo akaa rembo kifumbiń kya unini lwamwi. 32Na vandu va masanga woose vasandyoo kisanguń kyamwi. Nae avaavanisaa sheeli mwisi asauaa maanri na suve. 33Na maanri aarwaa uko lwamwi usha na suve atirwaa uko lwamwi umbuyo. 34Llyo mangi aiaa valya va uko lwamwi usha: Oṛeshoń ia kwakwa, ini mukee vandu va Nde yakwa awavikya mboṛa! Rwaań umangi luve dińu yanu mundefisyo kuuka ilyo isanga lindetanwa. 35Fulya niiworwaa nsoto mukashiniinga shoonga. Niiworwaa nnyura mukashiniinga kya inwa. Niikee mwini mukashiwaria kyeń kwanu. 36Niikuywaa mukashivika isaṛa. Niilolee mukashisengera. Niikee kifingyoń mukashishea. 37Llyo valya va usumani vamwaṛuaa veemwiaa: A Nndumi, ni iri ki tindekulolya kuworwa nsoto tikakuniinga shoonga? Ana kuworwa nnyura tikakuniinga kya inwa? 38Ana ni iri ki tindekulolya kukee mwini tikakuwaria kyeń kweru? Ana kwikuywaa tikakuvika isaṛa? 39Ana ni iri ki tindekulolya kulole ana kukee mfinge neese takakusengera? 40Na mangi avaaṛuaa eevaiaa: Namuia kya dede: Kilya mwantanya vamwanamae vakwa iwo vannya na akwaa ni umwi tubu, mwanshitanya niń. 41Llyo mangi aiaa valya va uko lwamwi umbuyo: Ukeń ia kwakwa, ini vadenge! Mwende muroń utakisiaa undefisyo Satana na vamalaika vamwi! 42Fulya niiworwaa nsoto nta ishiniinga shoonga. Niiworwaa nnyura nta ishiniinga kya inwa. 43Niikee mwini nta ishiwaria kyeń kwanu. Niikuywaa nta ishivika isaṛa. Niilolee na ifingwa nta ishisengera. 44Nawo vamwaṛuaa veemwiaa: A Nndumi, ni iri ki tindekulolya kuworwa nsoto ana nnyura ana kukee mwini ana kwikuywaa ana kwilolee ana kwikee mfinge, neese nta ikuṛundya mashora? 45Llyo avaaṛuaa eevaiaa: Namuia kya dede: Filya kitaare mwantanya vamwanamae vakwa iwo vannya na akwaa ni umwi tubu, nta mwanshitanya nań ndi. 46Nawo veendaa vakaa na ukiva lutasiaa. Na valya va usumani wo veendaa vakaa na muu utakisiaa.
Dewis Presennol:
Matayo 25: RWK72
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.