Matayo 24
24
1Ili Yesu andesomuka numbeń ya iterevya, kawara shia eendaa na vaseṛo vamwi vakanshea vakamworusa unuru lwa numba tilya. 2Na Yesu kavaia: Mulolye ifi foose? Namuia kya dede: Nta iwe limwi lya numba ti lyekeṛyani na lingi liifo litaare liburuyoo si ndi. 3Numa ili andekaa rembo alya uroń lwa misenifu, vaseṛo vamwi vakasha alya akai vakee kyaanya kyawo vakamwia: Tiie kyeeri ifi fikaa five. Neese timanyamanyaań are kyeeri kuuyaa nakyo na kyeeri isanga lisiaa? 4Yesu kaaṛua kavaia: Kwiiseń ninnsha kaaṛa ataire nndu amutevetaa! 5Fulya veengi vashaa veekusendaa na irina lyakwa na inumbua: Nniń Kristo. Nawo vatevetaa veengi. 6Na lingi mulolyaa fira na iita mboni ta fira na ntindi wayo. Manyiń mutataṛaake! Fulya kyawara kive mbele kuro. Kake ifurumya lya isanga lyamfika ndi. 7Fulya uruka lumwi lwimboo fira lukabe lungi na mamangi eemboo fira akabe mamangi engi. Na soto ishaa nini na si ireremaa yoose. 8Na ifi foose mfo fibookye fa ngyukiva ta ifurumya. 9Numa llyo vamurambikyaa muliswa ukiva na imuwaa. Na lingi musulwaa vvandu woose kiimba kyakwa. 10Llyo veengi vanu vatuṛukyanaa na ikuṛiinga na isuyana wo veni na veni. 11Na vaauya fisuku veengi va wongo vakwimboo na iteveta veengi. 12Neeli ngyukasha tifumbukaa, nkyo kyaangusaa ikunda lya veengi. 13Kake ulya asisiryaa kumande ifurumya, ito yye akiṛwaa. 14Na mboni shinuru ta umangi lwa Iṛuva toongoywaa masangeń woose, amu vandu va masanga varambuywa nawo vamanyi. Kikamfikań kuri, na ifurumya lyamfika.
15Kyasia ili mulolyaa kituṛua kilya kya ikasheesa andu asongori ave irama kyammaa isha, nkilya kyarerwa mmwauya fisuku ulya Danieli — na ulya asomaa amanye! — 16llyo iwo vakee kunu Yudaya varishye ngyuroń. 17Na ulya akee mmbeewu manya ataoloke eemboo filya fikee numba yamwi. 18Na ulya akooywaa akee nremiń, manya atauye numa eemboo isaṛa lyamwi. 19Kake ushi valya vakufingye na vakee yosa mikonu yo. 20Tereveń amu irisha lyanu litave kyeeri kya mbyoo ana nkonu wa Sabato. 21Amu feeri fo avaa-fo mavaviso manini kitaare allolika a mikae yo kuuka mbooko ya isanga kumande alli, ana atakilolikaa lingi kutu. 22Na kikooye kitaare mikonu yo iifwiswaa, nta umwi eekiaa. Kake kiimba kya vasaue mikonu yo yanguswaa.
23Na kyeeri kyo kwakooya nndu amuiaa: A uu Kristo ia ana a ulya kulya, manya mutamwirikye! 24Amu vakwimboo Makristo a wongo na vaauya va wongo, nawo vaorusyaa myorusye minini na maṛiikiso, amu varete na akwaa vvalya vakee vasaue, kwakooya kivaa. 25Lleń te nammaa imwikimba mbele. 26Kyasia vakamuia: Akee bateń, manya mutauke kyeń mwende-fo. Na kwakooya vakee imuia: Akufisye ifo numba, manya mutairikye. 27Amu sheeli kimuli kiveṛukaa kuuka taari ya ngama kikalolika kumande taari ya ukwawuń, mfo kuro kivaa kya isha lya Mwana wa nndu. 28Amu alya woose nnyińa ukai, wwo na mamutoń akwitiṛimu.
29Na mavaviso a mikonu ilya akamiira, llyo saa yaṛukaa ive llema na akwaa mmwiri wotoṛaa langa yayo. Na nyinyiri tiwaa tuuka iṛuvewu na finya ta iṛuvewu tiseniswaseniswaa. 30Na io llyo ilolikaa myorusye ya Mwana wa nndu iṛuvewu. Llyo ngyufwari toose ta isangeń tiishiṛaa, ili valolyaa Mwana wa nndu eeshaa na ma-ṛumbe auka iṛuvewu akee na finya na unini. 31Nae ammaa vamalaika vamwi varie mbembe tireraa nnu. Nawo vasandyaa valya veensaulwaa yye kuuka taari toose iinyi veebookaa kuuka mbaai ya iṛuvewu na kumande mmando wayo.
32Kyasia kulosheń na mikae ya nri wa nkuu. Maṛamba ayo akamfumbisa na itaṛambua maru, mumanyaa sheeli kyeeri kya mateeri nkufui. 33Mfo kuro neeni: Ili mulolyaa ifi foose, manyiń sheeli Mwana wa nndu ansha kufui na mwaangoń. 34Nkue namuia: Kishuku ki kiiraa kutu ndi kumande ifi foose faawukyaa. 35Iṛuvewu limandaa na isanga, kake firero fakwa fo fimandaa kutu ndi. 36Kake nkonu ulya ili ufikaa na saa yayo, nta eefo nndu eeshi, nta vamalaika va iṛuvewu ana nta Mwana kita Nde ye muni tubu.
37Kake sha lia kyave kyeeri kya Noe, mfo kuro da kivaa, ili Mwana wa nndu auyaa. 38Amu mikonu ilya kitaare iwala lia lyansha vandu veekee ilya na inwa veealikaa na yalikwa kumande nkonu ulya Noe aaka nato isandukuń lia inini. 39Nta vandemanya filya fivaa ndi, kumande iwala lia inini lyasha likavamiṛa woose deń. Mfo kuro da kivaa, ili Mwana wa nndu ashaa. 40Kyeeri kyo vandu vavili vakooywaa vakee nremiń, umwi awaryo̱o̱ na ungi aleekaa. 41Vaka vavili vakooywaa veeseaa andu emwi, umwi awaryoo na ungi aleekaa.
42Kyasia laleń kya umbuura! Fulya muteeshi nkonu Nndumi wanu ashaa nato. 43Kake manyiń kirero ki: Kifo muni numba eemanyaa kyeeri inini lishaa nakyo kio, eelalaa kya umbuura, kaaṛa ataotoṛye numba yamwi ifukyo. 44Kiimba kya ikyo neeni kusongosyeń! Amu Mwana wa nndu ashaa saa ilya mutankusaṛye. 45Kyasia ni iń akee iketi itele na iṛango, Nndumi wamwi anrambikye va numba yamwi avaniinge shoonga saa yawo ikamfika? 46Ulya akee wa ngoma ni iketi lia Nndumi wamwi ankooyaa eetanaa kuro ili ashaa. 47Nkue namuia: Anrambikyaa masaa amwi woose aaringe. 48Kake iketi ikasha linumbuaa ngooń yamwi: Nndumi wakwa ansinda. 49Nalyo likabooka ikaba maketi alya engi na ilya na inwa andu emwi na vanangwa. 50Kyasia nndumi wa iketi lia ashaa nkonu atawerye na saa litaiishi. 51Nae alirumbuaa feenga fivili na ilitalya andu emwi na vamakavili. Llyo kivaa kiiyo na irafuna mayoo.
Dewis Presennol:
Matayo 24: RWK72
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.