Matayo 27
27
1Ili kundekya, vakohani vanini na vasuṛi va vandu vakafukya sheeli Yesu awalwa. 2Vakamfinga vakankurika vakanrwaa kwa Pilato eekee nshili nnini wa uruka.
3Na Yuda ulya andendiinga ili andelolya, sheeli ammaa yumisyo kavaia: 4Nnderekwa nnu, fulya nndeṛiinga nndu ataare eetanyee fikasha. Nawo vakamwia: Tikiyo ise ndi, nkindo kyafo. 5Nae kakumba shilingi tilya numbeń ya Iṛuva kaenda kandekufiṛa. 6Na vakohani vanini vakadola fesa tilya vakanumbua: Kisumani tirwaa isandukuń lya misimbika ndi, fulya tikee ta usao. 7Vakarera kikwena vakauṛa nato nrema ya mwumbaumba nungu ive ya irika veeni. 8Kwa ikyo nrema yo ivaangwaa nrema ya usao kumande nnu. 9Llyo kindefika kirero kilya kyeemaauywaa mmwauya fisuku ulya Yeremia eenumbuaa: Vakadola fesa tilya makumi araru, wwuuru lwa nndu andereryo maaru, ni ito vana va Isiraeli vandenrerya uuru. 10Vakauṛa nato nrema ya ntana nungu, sheeli Nndumi andeshivavasa.
11Kyasia Yesu kakurikwa kwa nshili nnini wa uruka. Na nshili kamwuṛa: Iwe kukee mangi ya Vayuda dede? Yesu kamwaṛua: Nsheeli kwanumbua. 12Neeli vakohani vanini na vasuṛi vandendiinga nnu, nta yaṛua kirero. 13Llyo Pilato amwia: Kwisile ifi foose ndi iva vakee ikuṛiinga nafo? 14Nae nta imwanta kirero kimwi. Na nshili wa uruka kaṛiika nnu kutu. 15Neeli kisuku kyawo kiifikaa, nshili wa uruka eeishivyee ivaboṛomuya mfinge umwi ulya vandu veemfuraa veni. 16Na kyeeri kyo eeworee mfinge umwi eemanyikyee ngyukasha tamwi, irina lyamwi mBaraba. 17Ili vandu vandekusandya, Pilato kavauṛa: Ni ungau mufurie mmuboṛomuye? MBaraba ana ni Yesu uu avaangwa Kristo? 18Fulya eeishii vakee iṛiinga Yesu kiimba kya imwiria iriso. 19Nae ili eekee irera kikwena kyo, nka wamwi kanrumya nrumi kamwia: Lakana deń na kikwena kya nndu to nsumani, fulya nndetuṛulwa nnu kio yorień kiimba kyamwi. 20Kake vakohani vanini na vasuṛi vakakabiṛya vandu vasaue Baraba vawaa Yesu. 21Na nshili kavauṛa: Ni ungau wa iva vavili mufurie mmuboṛomuye? Vakaaṛua: mBaraba timfurie. 22Pilato kavaia: A Yesu uu avaangwa Kristo nintanyaań ki? Na woose vakanumbua: Akabyo nsalabeń! 23Kavaia: Ni ukasha lungalu antana? Nawo vakaengeṛya iṛoṛongya veenumbuaa: Akabyo nsalabeń da! 24Ili Pilato andelolya atakiwore kirero kya ivinga vandu na kiṛoṛongyo kyawo kyeeṅṅinaa, kavavasa eendewa mura. Kasangya maako amwi mbele ya vandu kanumbua: Niń niifo kikweniń kya iirita usao lwa nndu uu nsumani ndi. Kimuwore ini muveni. 25Na vandu woose vakamwaṛua veemwiaa: Usao lwamwi lutivavye ise na vana veru! 26Llyo andevaboṛomuya Baraba kavavasa, Yesu akabwa. Numa kanrambikya akabyo nsalabeń.
27Na vasikari va nshili wa uruka vakakurika Yesu. Vakanrwaa muṛiń wa vasikari vakavaanga vasikari woose vashe alya Yesu akai. 28Vakamwambua miseto yamwi vakawika nseto utondoṛye wa kimangi. 29Vakaoka kiṛeto kya miinga vakawika nrweń vakanniingya na nsengye ukoń usha lwamwi. Vakafwiṛya nri si mbele yamwi vakamweetya veemwisanaa: Mangi ya Vayuda kia! 30Vakammishya manyiiri vakansoka nsengye ulya vakankaba nato kunu nrwe. 31Nawo ili vandemaa imweetya, vakamwuta nseto ulya utondoṛye vakawika lingi miseto yamwi. Vakankurika vandenkabya nsalabeń.
32Ili vandesomuka veendaa, vakalolya nndu wa Kirene irina lyamwi eevaangwaa Simon vakankabiṛya ankurikye nsalaba wamwi. 33Vakafika andu avaangwaa Goligota, misendye yayo nKiboṛoń. 34Vakanniinga mfinyo usaandi na kindo kivavaa anwe. Neeli andemungyamungya, andekunda inwa ndi. 35Ili vandemaa inkabya nsalabeń, vakaimboo miseto yamwi vakakwavya veeikabyaa wuuku, amu kifike kilya kyarerwa mmwauya kisuku ulya sheeli: Vankwavya miseto yakwa na kansu yakwa vakee ikabya wuuku. 36Vakakaa rembo vakanringa. 37Na kwa ule ya nrwe wamwi vakatisiṛa-wo firero fa indiinga: Yesu uu mmangi ya Vayuda. 38Na fisoki fivili fikakabyo nsalabeń andu ewmi nae, umwi taari ya uko usha na ungi taari ya uko umuso. 39Na valya veekee iira shień vakanruma veesenisaa mirwe yawo veenumbuaa: 40Iwe mfukya numba ya Iṛuva na iitana lingi andu a mikonu iraru kukiṛeń kumuni, kwakooya kukee Mwana wa Iṛuva! Kwoloke kunu nsalabeń! 41Mfo kuro na vakohani vanini vakamweetya vasaangi na vaaṛia va mitisiṛie na masiingo a vandu veenumbuaa: 42Ye eeshi ikiṛa vengi atamakii ikukiṛa muni. Kwakooya ye mmangi ya Isiraeli aoloke nsalabeń alli. Llyo neese tinkusuraa. 43Ye akusurie Iṛuva, kyasia ankiṛeń alli, kwakooya ankundye! Amu ye anumbua mMwana wa Iṛuva. 44Mfo kuro na akwaa mfisoki filya fakabyo nsalabeń andu emwi nae fikanrumaruma.
45Na kuuka saa isasaru llema ukawa isangeń lyoose kumande kyeeri kya saa kyeenda. 46Neeli kindefika kyeeri kya saa kyeenda, Yesu karera na ununga unini eenumbuaa: Eli, Eli lama sabaktani? Nkimwi na: Iṛuva wakwa, Iṛuva wakwa nkiki ili kwanshitia? 47Na kiindi kya valya veeselelee-wo ili vandeita kuro vakanumbua: Akee ivaanga Elia. 48Na lia eni umwi wawo kaenda eerishaa kandennde kimiminda mura. Kakiishuṛa mfinyo udookaa karwaa irekoń kanrita. 49Kyasia vengi vakanumbua: Tień tille akwaa Elia ashenkiṛaa!
50Na Yesu kaṛoṛongya lingi na ununga unini kanutuka. 51Lia eni isulia lia inini liikee numbeń ya Iṛuva likaranduka kari lyuka ule kumande si. Na isanga likarerema na mbamba tikaalamuka. 52Na mbanga tikaruuka na mivili miingi ya vasongori valya veemfwaa ikaṛuka. 53Neeli vandemaa iṛuka vauka mbangeń numa ya iṛuka lyamwi vakaaka muṛiń nsongori vakakworusa kwa vandu veengi. 54Kyasia nshili ulya wa vasikari andu emwi na valya veekee nae veeringaa Yesu ili vandelolya irerema lya isanga na filya findetanika, vakaeṛea nnu veenumbuaa: Nkue uu mMwana wa Iṛuva. 55Na alya veeyoo vaka veengi veellaa vakee kwaasha. Nawo vvalya veeryanii na Yesu kuuka Galilaya veendundiaa. 56Kari kawo eeyoo Maria wa Magidala na Maria mae wa Yakobo na Yose na mae wa vana valya va Sebedayo.
57Neeli kundeila kafika nndu umwi isimba wa kulya Arimatia, irina lyamwi ni Yosefu. Nae muni eekee mwanalosho wa Yesu. 58Nndu uu kafika kwa Pilato kantereva vvili wa Yesu. Llyo Pilato avavasa aniingyo. 59Yosefu kaimboo vvili wa Yesu kawiṛina na nseto mwelwa fyu. 60Kawaṛa mbangeń yamwi shiiya eeiremyee mbambeń. Kabiṛingitya-wo iwe inini io mwaangoń wa mbanga kakwendya. 61Na alya eeyoo Maria wa Magidala na Maria ulya ungi veekee rembo vandesumana na mbanga.
62Neeli lya ndesi nto wikee nkonu ulatye nkonu wa ikusongosia llyo vakohani vanini na Vafarisayo vakakusandya kwa Pilato. 63Vakanumbua: Nndumi, tankumbua sheeli llembi ulya lia akee na muu anumbua: Numa ya mikonu iraru ndukaa. 64Kyasia vavasa, sheeli mbanga ilya iringwa kisha kumande nkonu to wa kararu wafika, kaaṛa vanalosho vamwi vatashe vamwive, vandeia vandu: Anduka kwa vafu, na ulembi lu lwa ifurumia lukilyaa lua lwa mbele. 65Pilato kavaia: Mukooyaa varingi. Endeń mukanderinga kinuru sheeli mulolyaa. 66Vakaenda vakanderinga mbanga ilya kisha vakarwaya iwe lia kiringisyo vakarawa-wo na varingi valya.
Dewis Presennol:
Matayo 27: RWK72
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.