MARCOS 15
15
Emeshimese Pilatohua Jesosa a'a queamimishi poani bacapoa
(Mt 27.1-2,11-14; Lc 23.1-5; Jn 18.28-38)
1Majoya aje quijje mecajjeahuanei jjapojjaquiajo Eyacuiñajjija equi-aijo chacochacopoquiani etii poanicuana, pea judío etii poanicuana, Moisesja tehuehuohuijji poanicuana, judío etii oopana poanicuana Junta Suprema bajjani pea-ai jjachichaquicapoa ojee etii oopanacuana. Jesosa ejeyo dojocapoa cuaa emeshimese Pilatoque. 2O cojjaneijo nequimeemajje Pilatohua oya huohuiajjacapoa jama ba'a: —¿A'ya acuae mi so'o? ¿A'a miya judiocuanaja emeshimese poani?—
—E'e, eya poani jiquio miya huohuiajjaña jama— Jesosa poa.
3Eyacuiñajjija equi-aijo chacochacopoquiani etii poanicuaa Jesosa queamimishinee poani huohuicapoa Pilatoja eshajja-ajjajji. 4Jamajojoya aje Pilatohua Jesosa huohuiajjacao'oyapoa onaja esohuijo. Jama acapoa ba'a: —¿A'a miya jjasaja-aquiajjatii nequije? De, queahuisocuaa miya queamimishi poani acani.—
5Ohua jama huohuiajjame acajje Jesosa jamatii nequiapoa sohuima'. Jesosa mimima'tii nequi bamajje emeshimese jjabaneineiquiapoa ojo, yajjajje shai oya jama, mimiajja, jjanahuequiajja.
Pilatohua Jesosa manomee'yojji acui ecuiata'apeejo huohuicapoa
(Mt 27.15-31; Lc 23.13-25; Jn 18.38—19.16)
6Ojjaña shequiajajo judiocuanaja fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoa poe'yajo, Pilatohua oe dejja ejeanobia ani huoojeacuayameecapoqui'yapoa. Cua judiocuaa babacacaje dejja huoojeacuayameecapoqui'yapoa. 7Oe dejja Barrabás bajjani ejeanobia aniapoa. Pea dejja queamimishicuana ejeanobia pea-ainijjeya oya aniapoa. Ohuaya oja etii o huohuijji poani cajaa amajje pea dejja quecuaca'yapoa. 8Majoya aje queahuisocuana Pilatoque jjachichaquicapoa o huohuiajjajji oja oe dejja ejeanobia jaa huoojeacuayamee'yojjijo jiquio ecua ojjaña shequiajajo acapoquiani jamaya. 9-10Jamajjeya Pilatohua jama huohuiajjame acapoa cuana ba'a: —¿A'a miquiaaya eya miquianaja judiocuanaja emeshimese Jesosa huoojeacuayamee'yosa-aña?—
Pilatoja ebanei poa yajjajo judío etii poanicuaa Jesosa iñameecanaje. Queahuisocuaa Jesosa queapame poani bacanaje, Eyacuiñajjija equi-aijo chacochacopoquiani etii poanicuana ca queapamepishana bacanaje. Jamajojoya aje oya Jesosa botiamanei acapoa etii poanicuaa. 11Majoya aje Eyacuiñajjija equi-aijo chacochacopoquiani etii poanicuaa ma ejjachichaqui nequicacuana janobajjimanei taaameecapoa jama ba'a: —Barrabás bajjani dejja, joya ejeanobia ani, huoojeacuayamee'yocue.—
12Majo nequica jama taaame poajo Pilatohua huohuiajjacapoa cuana jama ba'a: —¿Yajja shai eyaya Jesosa aje joya miquiaaya aña miquianaja judiocuanaja emeshimese poani?—
13Jama taaasajame ponequiapoa cuana: —¡Oya acui ecuiata'apeejo me cacajeameecue emano'yojji!—
14Pilatohua majo ejjachichaqui nequica huohuiajjacapoa jama ba'a: —¿Ache oja mimishijo shai quiaa oya quecuamee'yosa-aña?—
Jamatii taaasajajeanequiapoatii cuana jama ba'a: —¡Oya acui ecuiata'apeejo me cacajeameecue emano'yojji!—
15Jamajjeya Pilatohua Barrabás dejja ejeanobia ani huoojeacuayameeca'yapoa majo nequica onijje queaquenenee epo poanijje. Majoya aje Jesosa daasa cuiasejjajeameecapoa jjono ejeapashajjajja sa'shejjijjiya. Jama ameemajjeya ohuaya oja soldadocuana Jesosa dojomeecapoa acui ecuiata'apeejo eba'ehuanasohuajeajji emano'yojji.
16Majoya aje soldadocuaa Jesosa dojocapoa emeshimeseja equi-aiquiquibohuasijje. Jesosa majo nequijoya aje emeshimeseja soldadocuana jjachichaquicapoa o nequipejjeyasijje. 17Majotii nequiya soldadocuaa soadojoneineicanequiapoa Jesosa. Oya daqui-aohuo'o huoshomeecapoa ojaya emeshimese nisho yajji. Esapajo eiyajji acuisha oja sipiya Jesosaja sapahuasijje iyape'ejeacapoa janobajjimanei. 18Jama bihuianishome acapoa soldadocuaa ba'a: —Canequitiitiiquiahua judiocuanaja emeshimese epojji.—
19Majoya soldadocuaa Jesosa sapa cuiacapoa acuiya. Cojja cuichojeacapoa pea-ai. Majo nequiya soldadocuaa oja ecuioshajjajo nequimajje Jesosa bihuianishocao'oyapoa. 20Majoya aje oya soadojoneineimajje, bihuianishojeyomajje pea-ai daqui-aohuo'o oja yamijo ba'e huijjiajeaca'yapoa cuaa. Oja daquinei huoshomee'yomajje soldadocuaa Jesosa dojocuayaquicapoa esecueyasijje edojojji acui ecuiata'apeejo ba'ehuanasohuajeaa emano'yojji.
Jesosa acui ecuiata'apeejo ba'ehuanasohuajeacapoa cuaa emano'yojji
(Mt 27.32-44; Lc 23.26-43; Jn 19.17-27)
21Oe dejja Simón bajjani Cirenecuiñajji dejja pea meshiyasijje poqui poe'yapoa Jerusalén meshiyasijje. Oja bacuaejja beca poa Alejandro bajjani, pea Rufo bajjani. Majoya aje Simón majo nequi bamajjeya soldadocuaa oya Jesosa ba'ejji acui abomeecapoa.
22Majoya aje soldadocuaa Jesosa dojosohuaquicapoa eyiyoiyeao Gólgota bajjani nequiyasijje. Gólgota bajjani jama poanijje ba'a: “Sapajjii anijji” bajjani. 23Majoya aje eyiyohuasijje jaasohuaquimajje soldadocuaa Jesosa uvajjajjana', mirra, eshicuijji o neeamapishana pojji quia-ajjacapoa. Jesosaa cajaa acapoa, ishijjima. 24Majoya Jesosa me cacajeacapoa cuaa oja jeojjijje pea-ai acui ecuiata'apeejo. Jesosa acui ecuiata'apeejo ecaca jaa jjequisohuacapoa soldadocuaa emano'yojji. Oya Jesosa acuijo ba'e majo nequi soldadocuaa hue'ecapoa ebajji acheya shai oja daqui eiyachicha'yo ani jjeshecaje'yo.
25Eshequi ejaasohuapishanajo a las nueve Jesosa acui ecuiata'apeejo jjequisohuacapoa cuaa. 26Jesosa sapa ba'e biacuapishana acuisisijo tehuecapoa ebajji ajeo oya manomeeca'yani cuaa. Jama tehueme acapoa cuaa ba'a: —Jesosa bajjani judiocuanaja emeshimese poani.— 27Jesosa ba'epejjeneijo ojee beca dejja siipojjinei queamimishinee ba'ehuanasohuapea-aijeacapoa. Oe oja bañeimijijje, pea ca oja shanimijijje ba'yapoa acui ecuiata'apeejo pea-ai. 28Yahuajonei Eyacuiñajjija esohuihuohuijjiya tehuecapoa jama ba'a: —Eyacuiñajjija huoojea dejja queamimishinee jayojja quecuameecaje'yo cuaa.—
29Majoya Jesosa ba'epejjeneijje jjayejjequijeya esohui Jesosajo soadojocapoa cuaa. Oja sapa jeacajjacanequiacuaapoa Jesosa soadojomajje. Jama soadojome acapoa cuaa ba'a: —Miya jama poanaje Eyacuiñajjija equi-ai quecuajeabichajea'yomajje tres cahui huiso poajo ojaya equi-ai iyacuajije'yo miyayenei. 30Miyatii jjanahuequi'yocue jjeya. Nequioque'yocue acui ecuiata'apeejo ba'e.—
31Oya jayojja Eyacuiñajjija equi-aijo chacochacopoquiani etii poanicuaa, Moisesja tehuehuohuijji poanicuaa pea-ai Jesosa soadojopea-aicapoa. Jama soadojome etiicuaa oya acapoa ba'a: —Ohuaya peacuana nahuecapoquinaje, jamatii oyaneitii jjanahuequi'yoajja. 32Oya e'ejojonei Eyacuiñajjija huoojea ojjaña nahue'yojji epojji, Israelcuiñajjicuanaja emeshimese poanijo nequioqueje'yo. Oya jama po'yajo eseya e'ejojonei jjashahuabaquije'yo ojo.—
Ma opejjejo acui ecuiata'apeejo ba'e dejjaa oya esohuiya Jesosa soadojopea-aicapoa.
Jesosa mano'yapoa
(Mt 27.45-56; Lc 23.44-49; Jn 19.28-30)
33Majoya aje eshequi biacojjajjanei nequijo quea-aaponee ponanapoa ojjaña meshiyasijje. Tres horas huisome eshequi chama'yotii poa. 34Ma sinecuanei quea-aapotii nequijo, a las tres, Jesosa jama taaame poa ba'a: —Eloi, Eloi, ¿lama sabactani?— Jama poanijje ba'a: —Ecue Chii, ecue Chii, ¿yajjajo acuae moya cajaa anaje?—
35Becacuaa majotii nequiya Jesosa taaani shajja-ajjamajje jama acapoa ba'a: —Bacue, ohuaya iyaacani esohuihuohuijji poa Elías bajjani.— Jama poani posoya acapoa cuaa.
36Majoya aje oe dejja majotii nequi cuajicuajinanapoa uvajjajjana' queasesepase jjequiya. Ohuaya uvajjajjana' shamajje taposisi cuiabebocapoa acui quea-aojo ejeasohuajji Jesosaja ejjequibibijji nisho. Oya jama poa ba'a: —Ishoasocue, a'a Elías poeje baa o nequiaoquea'yohua acui ecuiata'apeejo ba'e.—
37Jesosa ca acui ecuiata'apeejo ba'e taaasajeamajje mano'yapoa. Chama'yotii poa. 38O mano'yojeahuajotii daquimoo, equecuayijjijji'ya Eyacuiñajjija equi-aijo ba'e, oyatii becaneijji pea-ai epojji ejamacoojje ebionei jjaisajeananaquiapoa meshiyasijjeyee. 39Romano soldadohuohuijji poani capitanya Jesosa cojjaneijo nequiya oya mano'yonaje bamajje jama acapoa ba'a: —E'ejojonei jiquio dejja Eyacuiñajjija Bacuaejjanei poanaje.—
40Eponacuana pea-ai majotii aniapoa. Queahueshapishana aniya Jesosa manoje'yo baca-aniapoa cuaa. Jama aniapoa ba'a: María Magdalena, pea María ma Santiagoja etiipishanaja enaese poa Joseja pea-ai, pea Salomé bajjani pea-ai aniapoa. 41Yahuajo Jesosa Galilea meshijo nequi ma eponacuaa Jesosa asahuacapoquiapoa. Onijje anipoquiapoa. Pea eponacuana ma Jesosanijje Jerusalén meshiyasijje poecuana Galilea meshijje aniapoa majotii pea-aiya.
Jesosa huananobiacapoa cuaa meijjaniyasijje
(Mt 27.57-61; Lc 23.50-56; Jn 19.38-42)
42Ma pojjajotii sinecuanei judiocuana epojja sábado ejomishocajji mecahuajje epojjijo jja-aquicapoa. 43José Arimateacuiñajji dejja judío etii oopana poanicuana Junta Suprema bajjanicuananijje nequiapoa. Ohuaya ishoacanequiapoa Eyacuiñajji ojjañacuana huoojeapoquiajjitii poani acheshono poeje. Ma dejja Joseya meteamaa Pilatoque poquimajje Jesosaja eyami huohuiajjacapoa ehuananobiajji meijjaniyasijje. 44Ohua jama huohuiajjame acajje Jesosaja eyamijo Pilatohua Jesosa mano'yojjima poso acapoa. Jamajojoya aje ohuaya soldadocuanahuohuijji capitán iyaacapoa a'a e'ejojonei oya Jesosa mano'yonaje ebajji. 45Majoya aje soldadocuanahuohuijji capitanya Pilato huohuicaña'yapoa oya Jesosa chama'yotii ba'e, mano'yonaje. Ohua jama huohuime acañajje Pilatohua José Jesosaja eyami dojomeeca'yapoa. 46Majoya aje Joseya daquiosheai queapame jjeshecapoa bejjo sosejje Jesosaja eyami bebojji. Ohuaya Jesosaja eyami acui ecuiata'apeejo ba'e huanaoquea'yomajje bebocapoa daquiosheaiya. Majoya oja yami ebebo jaa huananobiacapoa meijjaniyasijje. Joseya mei queaquemo jeacajjajjameecapoa cuana meijjani naba cuiaca'ajji. 47María Magdalenaa pea María Joseja enaeseya pea-ai Jesosa huananobiacaje meijjaniyasijje bacapoa. Achacua oya jaaje bacapoa cuaa.
Dewis Presennol:
MARCOS 15: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006