MARCOS 14
14
Judío etii poanicuaa Jesosa quecuapanacapoa o manomee'yojji
(Mt 26.1-5; Lc 22.1-2; Jn 11.45-53)
1Judiocuanaja fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo beshahuanei apoa cahui becaneijji pea-ai epoeo'oyajji. Judiocuaa pahui shejjeemeejjima ojee ijjiacaje. Jamajjeya fiesta poechipi'yanijo aje Eyacuiñajjija equi-aijo chacochacopoquiani etii poanicuana, Moisesja tehuehuohuijji poanicuana pea-ai Jesosa quecuapanacapoa. Ajea esohui siajjejo oya iñameecajji equecuamee'yojji miminequiapoa. 2Becacuana etii poani jama poa ba'a: —Judiocuaa fiesta acajo ¡a'a jii oya iñameejji! Queahuisocuana quenequenecuajicananachana o iñacaje bamajje.—
Oe eponaa Jesosa sapa shacapoa shiyeshiyeya
(Mt 26.6-13; Jn 12.1-8)
3Majoya aje Jesosa poquiapoa pueblo Betania meshiyasijje. Oya Simonja, ma yahuajo lepra epo'yo poanaje dejjaja equiyasijje nobiquiñaquiapoa. Jesosa ma equijo eanioque ijjiaijjia-anijo oe epona poeapoa meitahuoo shiyeshiye mejji. Ma ohua yecanaje shiyeshiye huajjima queasosehuisonee poa. Majoya eponaa tahuoo naba cuiayajamajje shiyeshiyeya Jesosa sapa shacapoa. 4Ma Jesosanijje aniapoa dejja becacuana queaquene poa eponaa Jesosa sapa shacaje bamajje. Jama mimime poa cuana ojee ba'a: —¿Apiojji joya queasosehuisonee poani shiyeshiyeya shajeacani coma eponaa? 5Jiquio shiyeshiye queasosehuisonee poanaje, oe eshequiajajo echacojji sosehuisoajja poanaje queaso'dojjohuisonee. Bejjo sosejje quiacajji poanaje. Majoya aema'cuana asahuacajji poanaje ma bejjojoya.— Jamajojoya aje ma epona niñebacapoa cuaa queaqueneya.
6Jesosaa ca o niñebajji poanicuana jama acapoa ba'a: —¡A'a quiana onijje queaquene pojji! ¿Apiojji acuae quiaa jiquio epona niñebaña? Jiquio e ohua sapa shacanaje queapamenee acanaje. 7Aema'neicuana nequipoquijetii miquianaja asahuapoquiajji. Eya caca oe miquiananijje jiquio meshijo enequitiipoquijji pojjeama poaje. 8Jiquio eponaa eya queapame acanaje, chama' pea ojaya e ajji. Quijje eya mano'yajo apoa ehuananobiajjijo eya shacanaje shiyeshiyeya. 9E'ejojonei eyaya quiana aña. Cua Eyacuiñajjija esohui queapame huohuicaje meshicuanahuasijje, jiquio eponajo ma ohua e shacanajejo mimipoquijetii cuana cuamayee ba'eca. Oya pajea'yojjimatii acapoquije cuaa— jama huohuime Jesosaa acapoa eponajo.
Judasya Jesosa iñameesahuacaje cuana bejjo sosejje
(Mt 26.14-16; Lc 22.3-6)
10Jesosaja babaca dejjacuana ona sohuihuohuiquinequijji 12 huisome dejjacuana poa. Oe oja babaca dejja Judas Iscariote bajjani poquiapoa Eyacuiñajjija equi-aijo chacochacopoquiani etii poanicuana huohuiya Jesosa iñameesahuajjijo. 11Ohua iñameesahuacaje shajja-ajjamajje etii poanicuaa queabihuineeya Judas huohuicapoa eso'dojjojo ache huiso oya quiacaje Jesosa iñameesahua sosejje. Majoya Judas jjashahuabacooquiapoa acheshono queapame Jesosa iñameesahuajji.
Jesosa o shajja-ajjajji poanicuana pea-ai ojee ijjiaijjiapoa eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo
(Mt 26.17-29; Lc 22.7-23; Jn 13.21-30; 1Co 11.23-26)
12Fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo poe'yajo judiocuaa pahui shejjeemeejjima ijjiacapoa ebionei fiesta yajji epojjajo. Ma pojjajotii pea-aiya oveja naa jehuica'yapoa cuaa eijjiajji. Majoya o shajja-ajjajji poanicuaa Jesosa huohuiajjacapoa jama ba'a: —¿Achacua shai ecuana poquimeesa-aña bobi apoa aa eseja ijjiajji ojee fiesta eshahuaba'yojji ma yahuajonei Eyacuiñajjiya eseja etiiquianaja bacuacuana nahuecapoajo?—
13-14Jesosaa beca o shajja-ajjajji poani huoojeajjimahua huohuicapoa jama ba'a: —Poquicue Jerusalén meshiyasijje. Majo nequiya oe dejja oja meshimisijo nequi ena dojocaje baje. Maya equijje acue so'o o nobiquije'yo equiyasijje ebajji. Majoya equimese jama acue ba'a: Esohuihuohuijjiya jama huohuiajjame acani ba'a: “¿Ache equecuayijjiyasijje ecuaa bobi ojee ijjiaje e shajja-ajjajji poanicuananijje eshahuaba'yojji ma yahuajonei Eyacuiñajjiya ebacuacuana nahuecapoajo?” 15O jama huohuiajjame miquiaa ajje equimeseya huohuicaje ache equecuayijji queaquemo queapame eyajo apoa'ya ani eijjiaijjiajji ojee. Jomajo bobi apoa acue eseja eijjiajji ojee— jamaya poa Jesosa.
16Majoya aje o shajja-ajjajji poani beca cuayaquiapoa epoquijji Jerusalén meshiyasijje. Ma beca dejjaaya bacapoa ojjaña ma Jesosaa o huohuicanaje huisotii cuamaya. Majoya bobi apoa acapoa fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo.
17Majoya aje quijjepishana sinepoquianijo Jesosa oja babaca 12 huisome dejjacuananijje ma equiyasijjeya poquiapoa. 18Mesasahuajo jaa ojee ijjiaijjianijo Jesosaa jama acapoa cuana ba'a: —E'ejojonei quiana huohuiaña. Oe jiquio jjeya enijje ijjiaijjianiya eya iñameesahuacaje eso'dojjo sosejje.—
19Jesosaa esohui jama acajje queayenonee ponanapoa ojjaña oja babaca dejjacuana. Majoya aje pea huohuiajja, pea huohuiajja acapoquiapoa majo anicaa jama ba'a: —Emeshimesenei, ¿acheya shai miya jama acaje? ¿Eyaya chi?— Jamaya oya acapoquiapoa cuaa.
20Jesosaa jama saja-ame acacuanapoa ba'a: —E iñameesahuajji epojji oe miquianaya jjeya jiquiojo enijje ani. Joya ecuea platojo oja pahui iyanobiajji poaniya eya iñameesahuacaje. 21Eyacuiñajjija esohui jama poani eya Dejjapojji epo e'ejojonei manomeecaje'yo cuaa. Jiquio e iñameesahuajji poaje dejja caca oe queaneenee poaje'yo ohua e iñameesahuacajejojoya. Jamajjeya, ¿apiojji shai oja naeya oya mejocapoa oya queaneenee epo'yojji?—
22Majoya ojee ijjiaijjianijo Jesosaa pahui jjeshecapoa oja emeya. Eyacuiñajji bihuiamajje Jesosaa pahui mijicapoa o shajja-ajjajji poanicuana quiajji. Pahui quiamajje Jesosaa jama acapoa cuana ba'a: —Ijjiacue jiquio pahui ecuea eyami jayojja.—
23Majoya pahui ijjiamajje caneco jjeshecapoa Jesosaa. Eyacuiñajji bihuiamajje uvajjajjana' quiacapoa o shajja-ajjajji poanicuana oja ishijji. Majoya ishicapoa cuaa. 24Jesosa jama poa pea-ai ba'a: —Jiquio canecojo nequi ecuea ena' jayojja poani. Eya manoje'yo. Ecuea ena' cuayameequije queahuisocuanaja oja mimishi cuijea'yojji yajji. Jamaya Eyacuiñajjija esohui eyacua queahuisocuana ojaya'yo epojji ecuea enaa queaca'atii pomeecani, epajea'yojji pojjeama. 25E'ejojonei huohuiaña ecuea uvajjajjana' eishibeca'yojjitii pojjeama poaje jiquio meshijo nequiya. Quijje ca Eyacuiñajji ojjañacuana huoojeapoquiajjitii poani onaa bacajo eyaya Eyajo nequiya uvajjajjana' eyacua ishije o'oya— jamaya poa Jesosa.
Jesosaa huohuicapoa Pedrohua Jesosa oja bajjima nisho acajejo
(Mt 26.30-35; Lc 22.31-34; Jn 13.36-38)
26Majoya aje Eyacuiñajji bihuiajji Salmo etehue jaajo sohuicuayamajje Jesosa poquiapoa oja babaca dejjacuananijje eyiyoiyeao Olivos bajjani nequiyasijje. 27Jesosaa eyiyoiyeaojo aniya jama acapoa cuana ba'a: —Jjeya quiaa eya jeananaje dejjamase yajjajo. Jamajjeya enijje enequijjitii pojjeama quiana poaje. Eyacuiñajjija esohui yahuajonei tehuecapoa jama ba'a: “Eyacuiñajjiya ovejajaahuanajji poani quecuacaje'yo. Majoya oja ovejacuana jjajeajajeaquinanaje.” Ma ecua yahuajonei ejo tehuecapoa jama pea-aiya miquianaya poaje. 28Eya emano'yo jaa Eyacuiñajjiya shequimeeca'yajje poquije Galilea meshiyasijje miquianaya cuamaya poquijjimahuajo.—
29Jesosa jama poani shajja-ajjamajje Pedrohua jama acapoa: —Ojjaña peacuana mijo jjashahuabapajeaquiajo eya ca iña mijotii jjashahuabaquipoquije. Minijjetii ca iña nequipoquije.—
30Ohua esohui jama acajje Jesosaa jama acapoa ba'a: —E'ejojonei eyaya miya huohuiaña. Jiquio mecajjetiiya cachinayahue taaajjimahuajo miyaya eya bajjima nisho aje. Tres huisome miyaya esohui jama nisho aje ejo.—
31Pedrohua Jesosa jama amajamajacapoa ba'a: —Chojja de, ecuea miya bajjima nisho eajjitii pojjeama poaje. Eya jamatii minijjetii nequi quecuajeapea-aica'yajje ecuea miya bajjima nisho yajji pojjeama.—
Ojjaña Jesosaja babaca dejjacuaa oya esohuiya a-ajjapea-aicapoa.
Jesosa Getsemaní bajjani meshijo ani mimiapoa oja Chiinijje
(Mt 26.36-46; Lc 22.39-46)
32Majoya aje Jesosa oja babaca dejjacuananijje poquiapoa Getsemaní bajjani meshi shasha queahuiso ebana aniyasijje. Oja babaca dejjacuana jama acapoa ba'a: —Jiquiojotii quiana oe anioquesocue e jocuama poquiajo ecue Chiinijje mimiya.—
33Pedro, Santiago, Juan pea-ai ca jocuamapishana dojocapoa Jesosaa. Majoya oya poquipishanamajje queayenoneenee poñaquiapoa. Queacojjayenonee poa. 34Ma onijje poquipishananajecuana Jesosaa jama acapoa ba'a: —Eya queayenoneenee jjabaquiani, mano'yani jayojja. Jiquiojotii eya ishoa-anisocue, eshetii oe anichichacue quiana.—
35Majoya Jesosa oenei poquiyeepishanapoa. Oja ecuioshajjajo anioqueñaquimajje bahua jaaoqueapoa meshiyasijje Eyacuiñajjinijje emimijji. Oya queayenonee mimiapoa oya dejjamaseja queaneenee pomee'yojjima eajjijo nisho. 36Oya jama mimime poa ba'a: —Ecue Chii, chama'neinei miquea queacamaja eajji. Miya sapoanijo a'a eya queaneenee amee'yojji, a'a eya manomee'yojji. Jamatii cua miqueanei ejjashahuabaquijji poani ejo acue, a'a ecueanei ejjashahuabaquijjijo eya nahuejji— jamaya Jesosa mimiapoa oja Chiinijje.
37Jesosa mimimajje huacuaya poe'yapoa oja babacacuana oja jeanana tres aniyasijje. Ohuaya bacaña'yapoa cuana ecahui jaa. Majoya Jesosaa Pedro jama acaña'yapoa ba'a: —Simón, ¿a'a miya ecahui jaa? Miquiana che oe hora eshe anijjimanei poanaje enijje. 38Eshetii oe quiana anichichacue. Eyacuiñajjinijje oe mimitiitiianicue queamimishi epo poanijje. Miquiaa Eyacuiñajjija echacojji asaneiaña, jamatii miquianaja eyami ca'a-ama oja echacojji eatiitiipoquiajji.—
39Majoya Jesosa poquiyeepishanao'oyamajje oya jayojja esohui oja Chiinijje mimio'oyapoa. 40Jesosaa oja Chiinijje mimio'oyamajje oja babaca dejjacuana oja jeanana ani bacañao'oyapoa ecahui jaa o'oya. Queacojjacahuinee poa cuana. Jamajjeya bajjima poa yajja Jesosa saja-ame yajji. 41Majoya Jesosa oja Chiinijje mimio'oyamajje poeo'oyapoa oja babacacuana aniyasijje. Jama ohuaya acañao'oyapoa cuana ba'a: —¿A'a quiana cahui jaatii jomishoca jaa? Jjeyahuanei eya Dejjapojji epo iñacaje cuaa dejja mimishicuanaja equecuamee'yojji. 42Cua'a, nequisohua'yocue epoqui'yojji. Jjeya dejja joya e iñameesahuajji poaje poeani.—
Jesosa iñacapoa dejjacuaa
(Mt 26.47-56; Lc 22.47-53; Jn 18.2-11)
43Jesosa oja 11 babaca dejjacuananijje mimianijotii, pea oja babaca Judas bajjani, dejja queahuisoneecuananijje poeapoa Jesosa iñaa. Baase'beca mejjicuana, acui mejji pea-ai poecapoa cuana. Ma dejja Jesosa iñaa poecuana Eyacuiñajjija equi-aijo chacochacopoquiani etii poanicuanaja, Moisesja tehuehuohuijji poanicuanaja, pea judío etii poanicuanaja pea-ai huoojea poa. 44Judasya o iñameesahuajji poani dejjaa poquijjimahuaa huohuicapoa cuana jama ba'a: —Joya eyaya shemo tojjoje dejja Jesosa iñaca'acue. Iñaca'aneimajje oya dojocue.— 45Jamajjeya Judasya Jesosa nequiyasijje jjanequichipiquimajje jama acapoa ba'a: —Esohuihuohuijji.— Majoya ohuaya Jesosa shemo tojjocapoa. 46Judasya jama acajo Jesosa iñaca'ajeacapoa cuaa edojojji dejja etii poanicuanahuasijje.
47Jesosa iñaca'ajeacaje bamajje oe dejjaa onijje nequiya oja baa jjequihuijjiacapoa. Majoya Eyacuiñajjija equi-aijo chacochacopoquiani ebionei etii poanijo chacochacoani dejjaja eshajja jajasejjajeacapoa Jesosa nahuejo. 48Majoya Jesosaa ma oque poeyanaje cuana huohuiajjacapoa jama ba'a: —¿Apiojji acuae quiana poeyanaje acuijji, baajji pea-ai e iñaa? ¿A'a cuae jja iña queamase, siipojji pojja'a? 49Eyaya Eyacuiñajjija equi-aiquiquibojo nequiya ojjaña pojjajo ja'anei esohui huohuipoquianaje, quehuajje pojjeama. Majo nequiya eya iñajjima poanaje quianaja. Jamaya miquiaa eya aña ma yahuajo esohui tehuecapoa jama pea-ai eajeyo'yojjijo oya jayojja.—
50Majoya aje oja babaca dejjacuana ojjañatii cuajicuajinanapoa dejjacuaa oya Jesosa dojocaje bamajje. Jesosa oenei jeajeananacapoa cuaa metemajje. 51Oe dejjasho'iya daqui socojjimajo jjabeboqui nequiya Jesosa equijje a-ajjacapoa. Majoya dejjacuaa oya iña-ajjapea-aicapoa oja daquijo. 52Oja daqui iñacajo ohuaya jjequihuijjiajeajeananacapoa ecuajicuajijji. Jamajjeya oya daquima'tii poquiquehuajeapoa.
Judío etii poanicuaa Jesosa bacapoa ehuohuiajjajji
(Mt 26.57-68; Lc 22.54-55,63-71; Jn 18.12-14,19-24)
53Majoya aje Jesosa iñamajje dojocapoa cuaa Eyacuiñajjija equi-aijo chacochacopoquiani ebionei etii poani dejja cojjaneijo enequijji. Ma equijoya queahuiso pea Eyacuiñajjija equi-aijo chacochacopoquiani etii poanicuana, pea judío etii poanicuana, Moisesja tehuehuohuijji poanicuana pea-ai jjachichaquicapoa Jesosa bajji. 54Pedrohua Jesosa equijje acapoquiapoa queahueshapishana ma o dojocaje equiyasijje, Eyacuiñajjija equi-aijo chacochacopoquiani ebionei etii poanija equiyasijje. Oya equiquibojo nequiñapoa cuaquipejjejo ejjayoquijji Eyacuiñajjija equi-aijaahuanajji poanicuananijje.
55Eyacuiñajjija equi-aijo chacochacopoquiani etii poanicuaa, pea judío etii poanicuaa Junta Suprema bajjani pea-ai ejjachichaqui aniya ba-ajjacapoa ache esohui siajjejo oya Jesosa quecuameeca'yojji. Jamatii oja mimishi o quecuamee'yojji chama'nei poa. 56Queahuisocuaa siajje acapoa Jesosa o queamimishi poani poso ebajji etiicuanaja. Jamajjeya pea esohui siajje pea esohui siajje yecapoa cuaa ojo. Jamatii oja esohui siajjecuana oya jayojja pea-ai pojjeama poa. 57Majoya aje quijje beca dejjacuana Jesosa queamimishi poani nisho ajji ehuiyasijje nequipea-aiapoa. Jama jjaniñebaquime poa cuana Jesosajo ba'a: 58—Jiquio jjeya nequi dejja jama poanaje ba'a: “Eyayenei Eyacuiñajjija equi-ai queapame dejjaja iya quecuajeabichajeaje'yo. Majoya tres cahuime huiso poajo eyayenei pea iyaje'yo dejjacuananijje pojjeama” jamaya jiquio Jesosa poanaje.—
59Jamatiiya oja esohui siajje peacuanaja jama pea-ai pojjeama poa.
60Majoya aje Eyacuiñajjija equi-aijo chacochacopoquiani ebionei etii poani dejja nequisohuapoa ojjañacuana ejjachichaqui anicajo Jesosa huohuiajjajji. Jama huohuiajjame oya acapoa ba'a: —¿Yajjajje miya jjasaja-aquiajja oja esohuijo? ¿Yajja poanijje shai jiquio esohui miya niñebacani cuaa?—
61Jesosa jamatii nequiapoa mimima'nei, jjasaja-aquijjimatii. O jama poani bamajje Eyacuiñajjija equi-aijo chacochacopoquiani ebionei etiiya oya jama huohuiajjame acapoa ba'a: —¿A'a miya Eyacuiñajjija huoojeanei poani ojjaña nahue'yo epojji, oja Bacuaejja?—
62Jesosaa oya saja-acapoa jama ba'a: —E'e, joya ecua miya poanaje jamaya eya. Quijje eya Dejjapojji epo Eyacuiñajji queaca'aneetii poanija ebañeimijijje ani'yo baje quiaa. Miquiaaya eya botejjee nequioqueje bapea-aije.—
63Oya jama poani shajja-ajjamajje Eyacuiñajjija equi-aijo chacochacopoquiani ebionei etii poaniya oja daqui-ao oja yamijo ba'e jjequi-isajeacapoa queaqueneneenee pomajje. Jama oya poa queaquenenee ba'a: —A'a peacuana iyaajji o queamimishinee poani ehuohuijji. 64Miquiaaya oja esohui queamimishinee oya Eyacuiñajjija Bacua poso jjabaquiani shajja-ajjapea-ainaje. ¿Yajja oya acajji?—
Majo anicacuaa oya saja-acapoa jama ba'a: —Oya queamimishinee poani, quecuameeca'yojji oya.—
65Majoya aje becacuaa majo nequiya Jesosa cojja cuichojeacapoa. Oya daquisisiya cojja bebomajje cuiacapoa emeya. Majoya oya cuiamajje huohuiajjacapoa cuaa jama ba'a: —Acheya miya cojja cuiasejjajeacani huohuipocue.—
Majoya Eyacuiñajjija equijaahuanajjicuaa oya cojja cuiasejjajeacapoa pea-ai ojaya emeya.
Pedrohua Jesosa bajjima nisho acapoa
(Mt 26.69-75; Lc 22.56-62; Jn 18.15-18,25-29)
66Dejjacuaa Jesosa cuiacaquijotii Pedro equiquibo esecuejotii aniapoa. Majoya aje oe epona Eyacuiñajjija equi-aijo chacochacopoquiani ebionei etii poanijo chacochacoani poeapoa o aniyasijje. 67Ohuaya Pedro cuaquijo jjayoquiani bamajje oya jama acapoa ba'a: —Miya pea-aiya aje Jesosanijje ponequinaje ma provincia Galilea meshijje poe dejjanijjeya o shajja-ajjajji pea-ai epo.—
68Epona jama mimime poajo ona ejjachichaqui anicajo Pedrohua Jesosa oja bajjima nisho acapoa jama ba'a: —Chojja de, ajeo shai miya jama mimime poani ecuea oya bajjimanei.—
Pedro jama mimime pomajje poquiyeepishanapoa esecuejjanipejjeyasijje. Majoya cachinayahue taaapoa. 69Pedro esecuejjanijo nequi eponasho'iya oya bacao'oyapoa. Jama acapoa cuana ba'a: —Bacue oya jiquio dejja Jesosanijje nequipoquinaje.—
70Pedrohua ca Jesosa bajjima nisho acao'oyapoa. Majoya aje quijjepishana majotii anicacuana Pedro aniyasijje jjanequichipiquiapoa onijje mimiya. Jama mimime poacuana onijje ba'a: —E'ejojonei miya o shajja-ajjajji epo pea-aiya. Miya Galileacuiñajji pea-aiya.—
71Majo anicacuaa jama acajje Pedrohua jama huohuime aneicapoa cuana ba'a: —Eyacuiñajjiya eya e'ejojonei queanee capomeecahua eya siajje poanijo, ecuea oya bajjimanei jiquio dejja.— Jama bajjima nishoya Jesosa acapoa.
72Pedrohua esohui jama acajeahuajotiiya aje cachinayahue taaao'oyapoa. Majoya Pedrohua shahuabacuajica'yapoa ma Jesosaa esohui huohuicanaje jama ba'a: “Jiquio mecajje cachinayahue taaajjimahuajo miyaya tres huisome esohui eya bajjima nisho aje.” Jamajjeya Pedro paneineiapoa.
Dewis Presennol:
MARCOS 14: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006