MARCOS 16
16
Jesosa shequi'yapoa
(Mt 28.1-10; Lc 24.1-12; Jn 20.1-10)
1Epojja ejomishocajji sábado jjayejjequiajo María Magdalenaa, Santiagoja enaese María bajjaniya, Salomé pea-aiya shiyeshiye jjeshecapoa Jesosaja eyami shajji. 2Jamajjeya domingo pojjajo mecajjeahuanei eshequi jaasohuanijo eponacuana poquiapoa Jesosa huananobiacanaje meijjaniyasijje. 3Meijjani bañaquijjimahuajo jama mimime poa eponacuana ba'a: —¿Aya acuae mei queaquemonee jeacajjajjacaje ese nobiquijji?—
4Majoya aje eponacuaa mei queaquemo enaba cuiaca'ajji'ya enequiashiña nequi bacañaquiapoa. 5Jamajjeya eponacuana meijjaniyasijje nobiquiapoa. Nobiquimajje oe dejja jayojja daquioshejji ebañeimijijje eanioque ani bacapoa eponacuaa. O bamajje jjajjasoaneineiquiapoa cuana. 6Ma dejja jayojjaa jama acapoa eponacuana ba'a: —¡A'a queamete pojji! Miquiaa Jesosa Nazaretcuiñajji dejja sa-ajja'yaña, ma acui ecuiata'apeejo mano'yonaje. ¡Oya shequi'yonaje! Chama' oya jjeya jiquiojo. Bacue jiquio o jaanaje meijjani, oya chama'yo. 7Jamajjeya huohuicuajiqui'yocue o shajja-ajjajji poanajecuana, Pedro pea-ai. Oya shequi'yonaje, eshe jjeya nequi'yo huohuiqui'yocue cuana. Jesosa poquije ebionei Galilea meshiyasijje. Ma meshijoya aje quiaa oya baje'yo ma ecua ohua huohuicanaje quiana jamaya.—
8Jamajjeya eponacuana meijjanijo ani cacacuayaqui'yapoa queameteneenee. Majoya cuajicuajipoqui'yapoa. Peacuana ojaya huohuinaqui'yojjima acapoa queameteneeyajjejojo.
Jesosa jjaja'aqui'yapoa María Magdalenajo
(Jn 20.11-18)
9Jesosa ebionei epojja domingojo mecajjeahuanei shequi'yomajje María Magdalena eponajo jjaja'aqui'yapoa. Jiquio Mariaja yahuajonei Jesosaa mano'yojjimahuaa siete huisome eshahuamasecuana oja yamijo nequi huoojeacuayajeaca'yapoa. 10Majoya aje Jesosa eshequi'yo ba'yomajje María poquiapoa o shajja-ajjajji poanajecuana huohui'yohua. Ohuaya huohuiquica'yapoa cuana ma queayenonee paca-anicuana Jesosajo. 11Jesosa shequi'yonaje, oya eshe nequi'yo Mariaa baca'yonaje. O jama mimime poani shajja-ajjamajje Jesosa shajja-ajjajji poanajecuana oja esohuijo jjashahuabaqui'yojjima poa. Oya shequi'yojjima poso acapoa cuaa.
Jesosa jjaja'aqui'yapoa beca o shajja-ajjajji poanaje dejjajo
(Lc 24.13-35)
12-13Majoya aje quijje beca oja epeejji ejeojjijje poquianijo Jesosa ojo jjaja'aqui'yapoa. Oya pea poso aca'yapoa cuaa. Majoya oya queaja'a ba'yomajje huohuiquica'yapoa cuaa pea o shajja-ajjajji poanajecuana. Jamatii pea o shajja-ajjajji poanajecuana esohui Jesosajo jjashahuabaqui'yojjima poa.
Jesosaa oja esohui oe-ejjenei huohuicapoa cuana
(Mt 28.16-20; Lc 24.36-49; Jn 20.19-23)
14Majoya aje quijje oya Jesosa oja babaca poanaje oncenei huisomejo jjaja'aqui'yapoa o mesajo ijjiaijjianijo. Oja babaca dejjacuana tecueacapoa jama ba'a: —¿Yajjajje acuae quiana queasapaca'a jayojja poani ejo? E shequi'yojjijo jjashahuabaqui'yojjima poani. Ma e eshe nequi'yo bajji poanajeja esohui e'ejojonei pojjeama poso miquiaaya anaje— jamaya acapoa cuana Jesosaa. 15Jesosaa oja babaca dejjacuana jama huohuime apea-aicapoa ba'a: —Ojjaña meshiyasijje poquicue ojjañajaajjicuana sohuihuohuiya jiquio esohui queapame ojjañacuana nahue'yojjijo huohuiquicue. 16Ojjaña joya e'ejojonei ejo jjashahuabaquije'yocuana ecue nahue'yo poaje. Majoya oya enaojjohuasijje iñajeanobiacue. Ojjaña joya ejo jjashahuabaqui'yoajja poanajecuana caca Cuaqui-aiyasijje poquicaje'yo. 17-18Joya e'ejojonei ejo jjashahuabaqui'yanicuaa dejjaja ajjima'neineicuana apea-aicaje. Jama acaje ba'a: Eshahuamasecuana huoojeacuayajeameecaje'yo ecuea bajjanijo, peajaajjicuanaja esohuicuana oja bajjimanei esohui queaja'anee huohuicaje cuaa. Peyo quease'nee emeya iñamajje mano'yojjima poaje ohua ijjiacajje. Ohuaya eshicuijji queapasenee, veneno, ishicaje jamatii manojjima poaje. Emano jaacuana o oja emeya napacajje jja-ajaquije'yo. Jamaya Eyacuiñajjiya oja epeejjicuana dejjaja ajjima'neinei ameecaje— jamaya poa Jesosa.
Eyacuiñajjiya Jesosa dojosohuaquica'yapoa Eyahuasijje
(Lc 24.50-53)
19Majoya aje Jesosa Emeshimesenei oja babaca dejjacuananijje mimijeyoajo Eyacuiñajjiya oja Chiiya oya jjequisohuaca'yapoa Eyahuasijje o aniyasijje. Jesosa oja Chiija ebañeimijijje aniñaqui'yapoa ojjañacuana huoojeapoquiajji poani. 20Majoya aje quijje oja babaca dejjacuana poquiapoa ojjañajaajjicuana sohuihuohuiquiya ojo. Emeshimesenei Jesosaa poquimeesahuacapoa cuana. Dejjaja ajjima'neineicuana Jesosaa ameesahuacapoquiapoa o shajja-ajjajji poanajecuana peajaajjicuanaja ebajji oja huoojeaa e'ejojonei esohui huohuicani.
Dewis Presennol:
MARCOS 16: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006