Luuk 24
24
Yesu sii sʋʋŋ lɛ
Mat. 28.1-10; Maak 16.1-8; Jɔɔŋ 20.1-10
1Lahadi chɛɛŋ sɩɩpʋʋraa, haala-la sii a kɛŋ tʋlaalɩɩ-la a kaa mʋ bʋa-la leriŋ. 2Ba sɩ yi lee-la, ba na dɩ tabɩɩ-la ba fa sɩ kaa tɔ bʋa-la niiŋ suro. 3Ŋɩɩ nɛ ba jʋʋ bʋa-la tʋɔŋ, ama ba bɩ La Tɩɩna Yesu kʋsʋʋŋ na. 4Ba chɩŋ nɩmɛ a bɩ jɩŋ wɩɩ-la kala ba sɩ jaŋ ŋaa. Ba ŋaa dɩ ba beŋ, dɩ baalaa balɩa nɛ chɩŋ ba sɛmɛ ŋɩɩ. Ba gɛnnɩŋ faasa tʋtʋl. 5Fawʋllʋŋ faasa kɛŋ haala-la. Ba kɛŋ ba nyusuŋ gʋrɛ. Ŋɩɩ nɛ baala-la pɩɛsɛba, “Bɛɛ nɛ tɩɩ ma chɩchɛ nɩɩ-la sɩ weye nɩsʋʋnʋŋ tʋɔŋ? 6Ʋ tuo daha. Ʋ sie nɛ. Má liise mʋ yi wɩɩ-la ʋ fa sɩ bʋla pɩma lɛ, bʋa-la lɛ ʋ fa sɩ hɛ Galilii lɛ. 7Ʋ fa bʋla pɩma arɩ ba jaŋ joŋ ʋ-na Nuhuobiine Bie a hɛ wʋbɔŋ ŋaaraa nɩsɩŋ lɛ dɩ ba kpaasʋ daagɛsɛ nyuŋ dɩ ʋ sʋʋ, aŋ sii sʋʋŋ lɛ tapʋlaa batori chɛɛŋ.” 8Ŋɩɩ nɛ haala-la liise yi wɩalɩŋ ʋ fa sɩ bʋla pɩba lɛ. 9Ba mɩɩra lɩɩ bʋa-la leriŋ a mʋ bʋla pɩ Yesu harɩ-tooroo fii arɩ kʋbala-la arɩ nɩalɩŋ dɔnsʋŋ fa sɩɩ to ʋ harɩŋ wɩalɩŋ kala sɩ ŋaa. 10Haala-la sɩ mʋ bʋa-la leriŋ nɛ ŋ-la: Mɛɛrɩ Magɩdalɩŋ, Jʋana arɩ Jeems naaŋ Mɛɛrɩ. Ba dɩ haalaa dɔnsʋŋ nɛ bʋl wɩaa deemba sɩ ŋaa a pɩ Yesu nanzɔɔba-la. 11Ama Yesu nanzɔɔba-la fa bɩɩna arɩ wɩɩ-la haala-la sɩ bʋla ŋaa wʋnyɩɛrɩŋ nɛ. Ba bɩ laa dii. 12Ama Pɩɩta sii a fá mʋ bʋa-la leriŋ, a mʋ jʋʋ bʋa-la, a beŋ a na gɛnnɩ-la ba fa sɩ joŋo bɛ Yesu dɩ ba pɩna, aŋ ka ʋ bɩ kʋŋkala na. Ŋɩɩ nɛ ʋ kperu ʋ mɩɩra mʋ dɩa a kɛŋ wɩɩ-la sɩ ŋaa a bɩbɩɩnɛ.
Nɩaa balɩa fa sɩɩ to Yesu harɩŋ mʋ taŋ kʋbala baa yɩrɛ Emayɔs
Maak 16.12-13
13Tapʋlɩɩ-la tɩtɩa nɛ nɩaa balɩa fa sɩɩ to Yesu harɩŋ mʋmʋ taŋ kʋbala baa yɩrɛ Emayɔs. Emayɔs arɩ Jerusalɛm yi arɩ meel-daasɩŋ balɩpɛ nɛ. 14Ba sɩɩ mʋ ŋɩɩ, ba bʋbʋl wɩalɩŋ kala sɩ ŋaa. 15Ba sɩ bʋl wɩalɩŋ vɩvɛŋ ŋɩɩ, Yesu tɩtɩa kɔ ba teeŋ ba kala vɩvɛŋ, 16ama ba bɩ wuo jɩŋ arɩ ʋ nɛ. 17Ŋɩɩ nɛ Yesu pɩɛsɛba, “Wʋbɛɛ nɛ ma bʋlaa vɛŋ ŋɩɩ?” Ŋɩɩ nɛ ba chɩŋ, ba tʋɔŋ kala chei. 18Ba dɔŋɔ yɩrɩŋ nɛ Kiliopas. Ŋɩɩ nɛ Kiliopas pɩɛsʋ, “Ŋ dʋndʋŋa nɛ ŋaa nʋhʋɔrʋ a hɛ Jerusalɛm lɛ a bɩ wɩɩ-la sɩ ŋaa tapʋlaa deemba nɩaa?”
19Ŋɩɩ nɛ ʋ pɩɛsɛba, “Wʋbɛɛ nɛ ŋɩɩ?” Ŋɩɩ nɛ ba bʋla pʋ, “Wɩɩ-la sɩ ŋaa Yesu sɩ lɩɩ Nazarɛt lɛ. Baala deeŋ fa ŋaa Wɩa wʋlaabʋllʋ nɛ. Wɩalɩŋ ʋ sɩɩ ŋaa arɩ wɩalɩŋ ʋ sɩɩ bʋl fa kɛŋ doluŋ Wɩa arɩ nuhuobiinee kala teeŋ. 20Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ joŋu hɛ Paalɩt nɩsɩŋ lɛ dɩ ʋ kpʋʋ. Ŋɩɩ nɛ Paalɩt ŋaa ba kpaasʋ mɛrɛ daagɛsɛ nyuŋ ʋ sʋʋ. 21La fa kɛŋ yɩɛlaa arɩ ʋ nɛ ŋaa nɩɩ-la sɩ kɔ dɩ ʋ laa Iziral tɩŋŋaa ta. Ba sɩ kpʋ Yesu, ʋ tapʋlaa batori nɛ jɩnɩŋ. 22La dɩ haala-la dɔnsʋŋ fa sɩɩ to Yesu harɩŋ kʋ bʋl wɩɩ pɩla ʋ kperila. Ba sii mʋ bʋa-la leriŋ sɩɩpʋʋraa, 23aŋ bɩ Yesu kʋsʋʋŋ na. Ba kʋ bʋl ŋɩɩ pɩla. Ba bʋla arɩ ba na Wɩa tɩndaaraa a nagɛ duosoo tʋɔŋ. Ba bʋla pɩba arɩ Yesu weye nɛ. 24La tʋɔŋ dɔnsʋŋ ma mʋ bʋa-la leriŋ a na arɩ wɩɩ-la haala-la sɩ bʋla ŋaa wʋtɩtɩɩ nɛ. Ba bɩ Yesu na.”
25Ŋɩɩ nɛ Yesu bʋla pɩba, “Nɩyaaraa, ma tʋɔŋ dolie, ma bɩ wɩalɩŋ Wɩa wʋlaabʋllaa fa sɩ bʋla laa dii. 26Ma bɩ jɩŋ arɩ ʋ maga dɩ Nɩɩ-la Wɩa sɩ lɩɩsa, na hɛɛŋ nɛ aŋ-na jʋʋ ʋ kuorii-la tʋɔŋ a laa yɩrɩŋ?” 27Ŋɩɩ nɛ Yesu dagɛ wɩalɩŋ kala ba sɩ ŋmʋnsa Wɩa teniŋ tʋɔŋ a tɩgɛ ʋ lɛ bʋbʋɔŋ a pɩba. Ʋ suomi teniŋ-la Mosis sɩ ŋmʋnsa a kaa mʋ tenni-la kala Wɩa wʋlaabʋllaa sɩ ŋmʋnsa lɛ.
28Ba sɩ kʋ kpagɛ taŋ-la ba sɩɩ mʋ, Yesu ŋaa a nagɛ dɩ ʋ ha kielee mʋ nɛ. 29Ŋɩɩ nɛ ba kɛnʋ bil aŋ bʋl, “Chʋa la teeŋ, taŋ bire nɛ.” Ŋɩɩ nɛ ʋ jʋʋ dɩ ʋ chʋa ba teeŋ. 30Ba sɩ hɔnɔ dɩ ba dii kʋdiilee, Yesu joŋ boroboro a chʋɔlɛ Wɩa aŋ kaa chɔgɔ pɩba dɩ ba dii. 31Ʋ sɩ ŋaa ŋɩɩ, ba sɩaa lʋɔmɛ ba jɩŋ arɩ Yesu nɛ. Ka ʋ lɛl ba sɩpaaŋ. 32Ŋɩɩ nɛ ba bʋla pɩ dɔŋɔ, “La yaraa fa fɩɛla nɛ woruŋ ʋ sɩ bʋl wɩaa pɩpɩla wombiiŋ lɛ, aŋ pɛ dɩdagɛla Wɩa teniŋ wɩalɩŋ bʋbʋɔŋ.”
33Ŋɩɩ nɛ ba sii lɩma lɩma a mɩɩra mʋ Jerusalɛm, a na Yesu harɩ-tooro-la fii arɩ kʋbala, arɩ nɩalɩŋ dɔnsʋŋ ma fa sɩɩ to Yesu harɩŋ dɩ ba hilime, 34a bʋbʋl, “Wʋtɩtɩɩ La Tɩɩna sɛnɛ sii sʋʋŋ lɛ nɛ ʋ kɛŋ ʋ tɩtɩa kʋ dagɛ Saamɔŋ nɛ.” 35Ŋɩɩ nɛ nɩalɩŋ balɩamɩŋ ma bʋl wɩɩ-la sɩ ŋaa wombiiŋ lɛ, arɩ ŋɩɩ ba sɩ kʋ jɩŋ arɩ Yesu nɛ. Ba sɩ dɩ bʋa-la lɛ ʋ sɩ kɛŋ boroboro chɔgɛ a pɩba lɛ nɛ ba jɩŋ arɩ ʋ nɛ.
Yesu kɛŋ ʋ tɩtɩa kʋ dagɛ ʋ harɩ-tooroo
Mat. 28.16-20; Maak 16.14-18; Jɔɔŋ 20.19-23; Yesu nanz. 1.6-8
36Nɩalɩŋ balɩa sɩɩ bʋl wɩalɩŋ ŋɩɩ, dɩ Yesu tɩtɩa nɛ chɩŋ ba tʋtʋɔbaanɩŋ ŋɩɩ a bʋla pɩba, “Ma jaŋ hɔŋ arɩ yarɩfɩɛlaa.”
37Ŋɩɩ nɛ fawʋllʋŋ kɛmba, ba bɩɩna arɩ nɩdɩma nɛ ba na ŋɩɩ. 38Ŋɩɩ nɛ Yesu pɩɛsɛba, “Bɛɛ nɛ tɩɩ fawʋllʋŋ kɛmma, ma tʋɔbɩɩnaa bibegili? 39Má beŋ mɩ nɩsaa arɩ mɩ naasɩŋ na a jɩŋ dɩ mɩ nɛ. Má digimi na. Ma jɩma arɩ nɩdɩma bɩ yaraa kɛnɛ arɩ mɩ sɩ kɛnɛ ŋɩɩ.”
40Ʋ sɩ bʋl ŋɩɩ, ʋ kɛŋ ʋ nɩsaa arɩ ʋ naasɩŋ kala a dagɛba. 41Ba ha bɩ laa dii, ka wɩɩ-la sɩma pɩba aŋ ŋaaba wʋkpuŋkpere. Ŋɩɩ nɛ ʋ pɩɛsɛba, “Ma kɛŋ kʋdiilee nɛɛ?” 42Ŋɩɩ nɛ ba joŋ chenfiliŋ ba sɩ wasa a pʋ. 43Ʋ laa chaŋ ba sɩpaaŋ.
44Ŋɩɩ nɛ ʋ bʋla pɩba, “Mɩ fa sɩ hɛ ma teeŋ, mɩ bʋla pɩma arɩ wɩɩ-na kala ba fa sɩ ŋmʋnsa a tɩgɛ mɩ lɛ jaŋ kʋ ŋaa wʋtɩtɩɩ: Wɩalɩŋ Mosis fa sɩ ŋmʋnsa bil dɩ nɩaa tuto arɩ wɩalɩŋ Wɩa wʋlaabʋllaa fa sɩ ŋmʋnsa, arɩ Wɩa teniŋ sɛmɛ dɔŋɔ ba sɩɩ yɩrɛ Wɩa yɩɩlaa tʋɔŋ.”
45Ŋɩɩ nɛ Yesu ŋaa ba kɛŋ wʋjɩmɩŋ dɩ ba wuo jɩŋ Wɩa teniŋ wɩaa bʋbʋɔŋ. 46Ŋɩɩ nɛ ʋ bʋla pɩba, “Ŋ-la nɛ ba ŋmʋnsa bil: Ʋ maga dɩ Kirisito, Nɩɩ-la Wɩa sɩ lɩɩsa na hɛɛŋ a sʋʋ aŋ sii sʋʋŋ lɛ tapʋlaa batori chɛɛŋ.
47Ba jaŋ bʋl Wɩa wɩaa ʋ yɩrɩŋ lɛ, tintee kala lɛ, dɩ nɩaa bɩrɩma lɩɩ ba wʋbɔŋŋɔɔ lɛ dɩ Wɩa joŋ ba wʋbɔŋŋɔɔ chɛba. Ba jaŋ suomo ŋaa ŋɩɩ Jerusalɛm lɛ. 48Ma ŋaa wɩaa deemba kala sɩada nɛ, dɩ ma wuo bʋla pɩ nɩaa. 49Mɩ jaŋ leŋ dɩ kʋ-la mɩ Nyɩmma sɩ sɩ ʋ jaŋ joŋo pɩma kɔ ma teeŋ. Ama má gbɛrɛ Jerusalɛm lɛ, a kaa mʋ yi bʋa-la lɛ doluŋ sɩ jaŋ lɩɩ Wɩa teeŋ a kʋ tuu hɛ ma lɛ.”
Yesu jɩl Wɩa-jaŋ
Maak 16.19-20; Yesu nanz. 1.9-11
50Ŋɩɩ nɛ ʋ kɛŋ ʋ harɩ-tooro-la ba lɩɩ tabal-la lɛ a joŋ wombiiŋ a mʋmʋ Bɛtanɩ dɩɩrɩŋ. Nɩmɛ nɛ ʋ kɛŋ ʋ nɩsaa je ba nyuŋ aŋ chʋɔlɛ Wɩa pɩba. 51Ʋ ha sɩ chʋɔlɛ Wɩa pɩpɩba ŋɩɩ, ŋɩɩ nɛ ʋ sii ba teeŋ (ka Wɩa joŋu kaa jɩl Wɩa-jaŋ). 52Ŋɩɩ nɛ ba chʋɔlʋ aŋ mɩɩra mʋ Jerusalɛm. Ba tʋɔŋ kala faasa tɔrɛ. 53Ba yie jʋʋ Wɩa dɩɩ-bal-la bʋa na-kala lɛ a chʋchʋɔlɛ Wɩa.
Dewis Presennol:
Luuk 24: SIS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©Ghana Institute of Linguistics Literacy and Bible Translation 1984, 2014