Jɔɔŋ 1
1
Wɩɩ-la sɩ pɩ nɩaa mɩɩsɩŋ
1Ka dɩ Wɩa-na ŋaa dʋnɩa, wɩɩ-la fa hɛ nɩmɛ nɛ, ʋ fa hɛ Wɩa teeŋ nɛ. Ʋ dɩ Wɩa kala fa ŋaa kʋbala nɛ. 2Bumbuŋ kala nɛ ʋ fa hɛ Wɩa teeŋ.
3Ʋ lɛ nɛ Wɩa to a ta kʋŋkala. Kʋŋkala tuo a hɛ dʋnɩa lɛ, dɩ ʋ dee bɩ ta. 4Wɩɩ-la fa weye nɛ a kɛŋ pʋlʋmʋŋ kaa kʋ pɩ nɩaa. 5Pʋlʋŋ-la chaanɛ birimiŋ tʋɔŋ, biriŋ-la bɩ pʋlʋŋ-la wuo tɔ.
6Ŋɩɩ nɛ Wɩa tɩŋ ʋ tɩndaarʋ kʋbala baa yɩrɛ Jɔɔŋ. 7Ʋ nɛ kɔ dɩ ʋ bʋl pʋlʋŋ-la wɩaa pɩ nɩaa. Ʋ ŋaa ŋɩɩ dɩ nʋʋkala wuo nɩɩ a to ʋ lɛ a laa pʋlʋŋ-la wɩaa dii. 8Jɔɔŋ fa dee bɩ pʋlʋŋ-la ŋaa, ama ʋ ta kɔ dɩ ʋ bʋl pʋlʋŋ-la wɩaa nɛ a pɩ nɩaa.
9Ŋɩɩ nɛ pʋlʋŋ-la tɩtɩa kʋ tuu dʋnɩa dɩ ʋ chaana hɛ nʋʋkala lɛ. 10Ʋ fa hɛ dʋnɩa-la lɛ Wɩa sɩ to ʋ lɛ ta nɛ, ama dʋnɩa nɩaa bɩ ʋ jɩŋ. 11Ʋ kɔ ʋ tɩtɩa jáŋ, ama ʋ jáŋ nɩaa bɩ ʋ laa. 12Ama nɩaa dɔnsʋŋ-na laaʋ, a laa ʋ wɩaa dii. Ŋɩɩ nɛ ʋ pɩba wombiiŋ dɩ ba wuo ŋaa Wɩa biiriŋ. 13Nɩaa deemba bɩ naga baala sɩ jɩŋ ʋ haala ba lʋl biiriŋ ŋɩɩ nɛ. Wɩa tɩtɩa nɛ ŋaa ba Nyɩmma.
14Ŋɩɩ nɛ wɩɩ-la bɩrɩmɛ nuhuobiine a kʋ hɛ la tʋɔŋ. Ʋ fa hɛ la teeŋ a fɩfá la nenige woruŋ, a kɛŋ wʋtɩtɩɩ. La na ʋ tʋla. Tʋla deeŋ ʋ Nyɩmma Wɩa nɛ joŋo pʋ, arɩ ʋ nɛ ŋaa ʋ Bie kala. 15Jɔɔŋ bʋl ʋ wɩaa pɩla. Wɩalɩŋ ʋ sɩ heele bʋl nɛ ŋ-la: “Nɩɩ-la sɩ jaŋ to mɩ harɩŋ kɔ, ʋ nɛ kɩɩmɛ, bɛɛ wɩaa ʋ hɛ nɩmɛ nɛ ka ba-na lʋlmɛ.” 16Kʋ-la kala ʋ sɩ kɛnɛ, la ma na kpaalɩŋ ʋ tʋɔŋ nɛ. Ʋ yie fá la nenige aa pɛ la lɛ bʋa na-kala. 17Wɩa to Mosis lɛ nɛ a bil wombie-la sɩ maga la tuto pɩla. Ama Yesu Kirisito lɛ nɛ Wɩa to a fá la nenige, a dagɛla wʋtɩtɩɩ. 18Nʋʋkala ha bɩ Wɩa na. Ʋ dɩ ʋ Bii-bala-la sɩ ŋaa kʋbala a hɔŋ ʋ sɛmɛ nɛ dagɛla ʋ wɩaa.
Jɔɔŋ bʋla arɩ ʋ dee bɩ Kirisito ŋaa
Mat. 3.1-12; Maak 1.1-8; Luuk 3.1-18
19Juu tɩŋŋaa fa sɩ hɛ Jerusalɛm lɛ tɩŋ Wɩɩsʋllɩ sɩpaalaaraa arɩ Levi doho nɩaa, ba kɔ Jɔɔŋ teeŋ a pɩɛsʋ, “Kʋbɛɛ nɛ ŋ ŋaa?” 20Ŋɩɩ nɛ Jɔɔŋ bɩ wɩaa nyɩa aŋ chaasa bʋl arɩ ʋ dee Kirisito, nɩɩ-la Wɩa sɩ lɩɩsa.
21Ŋɩɩ nɛ ba bɩra pɩɛsʋ, “Kʋbɛɛ nɛ saa ŋ ŋaa? Ŋ nɛ ŋaa Ɩlaaja?”
Ʋ bʋl, “Mɩ dee.”
Ŋɩɩ nɛ ba bɩra pɩɛsʋ, “Ŋ nɛ ŋaa Wɩa wʋlaabʋllʋ-la la sɩɩ gbɛrʋ?”
Ʋ bɩra bʋl, “Aɩ.”
22Ŋɩɩ nɛ ba bɩra pɩɛsʋ, “Kʋbɛɛ nɛ saa ŋ ŋaa? Ʋ maga dɩ ŋ dagɛla, dɩ la mʋ bʋla pɩ nɩalɩŋ sɩ tɩnla. Wʋbɛɛ nɛ ŋ bʋl a tɩgɛ ŋ tɩtɩa lɛ?”
23Ŋɩɩ nɛ Jɔɔŋ bʋl, “Mɩ nɛ ŋaa yikoro-la sɩ hɛ tintee-hɩlɩŋ lɛ a heelee bʋl, ‘Má wasɛ wombiiŋ dɩ ʋ tʋʋlɛ a pɩ La Tɩɩna.’ Ŋ-la nɛ Wɩa wʋlaabʋlla Azaaya fa bʋl dɩ ma ŋaa.”
24Nɩalɩŋ fa sɩ kʋ pɩɛsɛ Jɔɔŋ wɩaa deemba, Farisii tɩŋŋaa nɛ fa tɩmba. 25Ŋɩɩ nɛ ba bɩra pɩɛsɛ Jɔɔŋ, “Ŋ dee bɩ Kirisito ŋaa, Nɩɩ-la Wɩa sɩ lɩɩsa, ŋ dee bɩ Ɩlaaja ma ŋaa, ŋ bɩra bɩ Wɩa wʋlaabʋllʋ ma ŋaa. Bɛɛ nɛ saa tɩɩ ŋ fufo nɩaa Wɩɩchʋɔlɛ lɩɩŋ?”
26Ŋɩɩ nɛ Jɔɔŋ bʋl, “Mɩ sɩɩ fo nɩaa Wɩɩchʋɔlɛ lɩɩŋ, lɩɩŋ dʋndʋŋa nɛ mɩ kaa fufoba, ama nʋʋ dɔŋ nɛ hɛ ma tʋɔŋ, ka ma bɩ ʋ jɩŋ. 27Ʋ nɛ to mɩ harɩŋ kɔ. Mɩ paala bɩ maga dɩ mɩ kɛŋ ʋ nɛntɛŋŋɛɛ ŋmɛsɩŋ ma kaa puri.”
28Ba pɩɛsɛ Jɔɔŋ wɩaa deemba kala Bɛtanɩ lɛ nɛ, Jɔdaŋ fuo-la sɛmɛ dɔŋɔ, lee-la Jɔɔŋ fa sɩɩ fo nɩaa Wɩɩchʋɔlɛ lɩɩŋ.
Jɔɔŋ bʋl Wɩa Pie-bie wɩaa
29Ʋ taŋ sɩ pʋla, Jɔɔŋ na Yesu dɩ ʋ tʋʋlʋ kʋkɔ. Ʋ bʋl, “Má bee na, Wɩa Pie-bie-la nɛ ŋɩɩ. Ʋ nɛ laa dʋnɩa wʋbɔŋŋɔɔ ta. 30Baala deeŋ wɩaa nɛ mɩ faa bʋl ŋɩɩ, arɩ nʋʋ nɛ jaŋ kɔ mɩ harɩŋ. Ʋ nɛ kɩɩmɛ, ʋ hɛ nɩmɛ nɛ ka ba-na lʋlmɛ. 31Mɩ fa bɩ jɩŋ nɩɩ-la kala ʋ sɩ ŋaa. Ama mɩ ta kʋ fufo nɩaa Wɩɩchʋɔlɛ lɩɩŋ nɛ, dɩ Iziral tɩŋŋaa kʋ jɩmʋ.” 32Wɩalɩŋ Jɔɔŋ sɩ bʋla pɩ nɩaa a tɩgɛ ʋ lɛ nɛ ŋ-la: “Mɩ na Wɩa Dɩŋ-zɔmʋŋ dɩ ʋ lɩɩ wɩa-nyuŋ a nagɛ kokomo, a kʋ tuu togili ʋ lɛ. 33Mɩ ma tɩtɩa fa bɩ ʋ jɩŋ. Ama Wɩa sɩ tɩmmɛ dɩ mɩ fo nɩaa Wɩɩchʋɔlɛ lɩɩŋ, ʋ nɛ bʋla pɩmɛ, ‘Ŋ jaŋ na mɩ Dɩŋ-zɔmʋŋ dɩ ʋ kʋ tuu a hɛ nʋʋ lɛ, tɩɩna nɛ jaŋ joŋ mɩ Dɩŋ-zɔŋ-la a hɛ nɩaa lɛ.’ ” 34Ŋɩɩ nɛ Jɔɔŋ bɩra bʋl, “Mɩ sɛnɛ naʋ nɛ, a bʋlaa pɩma arɩ ʋ nɛ ŋaa Wɩa Bie.”
Nɩalɩŋ sɩ laa sɩpaaŋ kʋ to Yesu harɩŋ
35Ʋ taŋ sɩ pʋla, Jɔɔŋ arɩ ʋ harɩ-tooroo balɩa bɩra chɩŋ lee-la, 36a na Yesu dɩ ʋʋ bal. Jɔɔŋ sɩ naʋ dɩ ʋʋ bal, ŋɩɩ nɛ ʋ bʋl, “Má bee na, Wɩa Pie-bie-la nɛ ŋ-la.”
37Ʋ harɩ-tooro-la balɩa nɩɩ ʋ sɩ bʋl wɩɩŋ deeŋ a to Yesu harɩŋ. 38Yesu mɩɩra daasɛ, dɩ baa to ʋ harɩŋ. Ʋ pɩɛsɛba, “Bɛɛ kʋŋ nɛ maa chɛ?”
Ŋɩɩ nɛ ba ma pɩɛsʋ, “La kʋhɩaŋ, nɩɩ lɛ nɛ ŋ jʋjʋʋ?”
39Ŋɩɩ nɛ Yesu bʋla pɩba, “Má kʋ na lee-la mɩ sɩɩ jʋʋ.” Ba to ʋ harɩŋ a mʋ na lee-la ʋ sɩɩ jʋʋ. Bʋa-la lɛ ŋaa dɩdaanɩŋ nɛ. Ŋɩɩ nɛ ba hɛ ʋ teeŋ wɩɩ-kaanɩŋ tiire jʋʋ.
40Nɩalɩŋ balɩa fa sɩ nɩɩ wɩɩ-la Jɔɔŋ sɩ bʋla a to Yesu harɩŋ, dɔŋɔ yɩrɩŋ nɛ Anduru. Ʋ fa ŋaa Saamɔŋ Pɩɩta ŋaana nɛ. 41Ŋɩɩ nɛ Anduru ma chɛ ʋ malɩma Saamɔŋ leriŋ, a bʋla pʋ, “La na Kirisito nɛ, nɩɩ-la Wɩa sɩ lɩɩsa.” 42Ʋ kɛŋ Saamɔŋ kaa kɔ Yesu teeŋ.
Ŋɩɩ nɛ Yesu benu aŋ bʋla pʋ, “Ŋ nɛ Jɔɔŋ bie Saamɔŋ. Ama lɛɛlɛ ba jaŋ yɩyɩrɩŋ Sefas.” Sefas arɩ Pɩɩta fa ŋaa yɩrɩ-bala nɛ, ʋ bʋbʋɔŋ nɛ bʋŋ.
Yesu yɩrɛ Fɩlɩp arɩ Natanɩal
43Ʋ taŋ sɩ pʋla, Yesu sii dɩ ʋ mʋ Galilii tinteeŋ. Ŋɩɩ nɛ ʋ na Fɩlɩp a bʋla pʋ, “Kʋ to mɩ harɩŋ.” Ŋɩɩ nɛ Fɩlɩp to ʋ harɩŋ. 44Fɩlɩp fa lɩɩ Bɛtɩsaada nɛ, taŋ-la Anduru arɩ Pɩɩta ma sɩ lɩa. 45Ŋɩɩ nɛ Fɩlɩp na Natanɩal a bʋla pʋ, “Nɩɩ-la wɩaa Mosis fa sɩ ŋmʋnsa wombie-la Wɩa sɩ bile dɩ la tuto tʋɔŋ, la naʋ nɛ. Wɩa wʋlaabʋllaa ma fa bʋl ʋ wɩaa nɛ. Ʋ nɛ Yesu, Josɛf nanʋala a lɩɩ Nazarɛt.”
46Ŋɩɩ nɛ Natanɩal pɩɛsʋ, “Ŋ ha na kʋzɔŋ dɩ ʋ lɩɩ taŋ-la ba sɩɩ yɩrɛ Nazarɛt?”
Ŋɩɩ nɛ Fɩlɩp bʋla pʋ, “Kʋ na.”
47Yesu sɩ na Natanɩal dɩ ʋʋ kɔ ʋ teeŋ, ʋ bʋl, “Nɩa deeŋ ŋaa Iziral tɩɩna tɩtɩɩ nɛ. Ʋ kɛŋ wʋtɩtɩɩ.”
48Ŋɩɩ nɛ Natanɩal pɩɛsʋ, “Ɛɛ nɛ ŋ ŋaa jɩmmɛ?”
Ŋɩɩ nɛ Yesu bʋla pʋ, “Mɩ naŋ nɛ ŋ sɩ hɔŋ tutogo bʋbʋɔŋ, ka Fɩlɩp-na yɩrɩŋ.”
49Ŋɩɩ nɛ Natanɩal bʋla pʋ, “Kʋhɩaŋ, ŋ nɛ ŋaa Wɩa Bie. Ŋ nɛ ŋaa Iziral tɩŋŋaa kuoro ma.”
50Ŋɩɩ nɛ Yesu pɩɛsʋ, “Mɩ sɩ bʋla arɩ mɩ naŋ dɩ ŋ hɔŋ tutogo bʋbʋɔŋ nɛ tɩɩ, ŋ laa mɩ wɩaa dii koo? Ŋ jaŋ na wʋkpuŋkperisiŋ a kɩɩ ŋ-la.” 51Ŋɩɩ nɛ Yesu bʋla pʋ, “Wʋtɩtɩɩ nɛ mɩ bʋlaa pɩŋ, ma jaŋ na wɩa-nyuŋ dɩ ʋ suro, dɩ Wɩa tɩndaaraa lɩɩ nɩmɛ a kʋʋ tuu mɩ-na Nuhuobiine Bie teeŋ, aŋ mɩɩra jɩjɩl.”
Dewis Presennol:
Jɔɔŋ 1: SIS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©Ghana Institute of Linguistics Literacy and Bible Translation 1984, 2014