Luuk 23
23
Ba kɛŋ Yesu kaa mʋ Paalɩt teeŋ
Mat. 27.1-2, 11-14; Maak 15.1-5; Jɔɔŋ 18.28-38
1Ŋɩɩ nɛ nɩalɩŋ kala sɩ kʋ hilimi sii a kɛŋ Yesu a kaa mʋ Paalɩt teeŋ. 2Nɩmɛ nɛ ba suomo dɩdagɛ wɩalɩŋ ʋ sɩ cheye, “La kɛŋ baala deeŋ dɩ ʋ nyɩsɛ la nɩaa dɩ ba vɩa la wombii-la la sɩɩ to, aŋ bʋl dɩ ba sɩ́ lampoo ma time pɩ Rom tinteeŋ kuoru-balɩŋ. Ʋ bɩra bʋla a tɩgɛ ʋ tɩtɩa lɛ dɩ ʋ nɛ ŋaa Kirisito, Nɩɩ-la Wɩa sɩ lɩɩsa, aŋ bʋl dɩ ʋ ŋaa kuoru ma nɛ.”
3Ŋɩɩ nɛ Paalɩt pɩɛsʋ, “Ŋ nɛ ŋaa Juu tɩŋŋaa kuoro?” Yesu bʋla pʋ, “Oo, mɩ nɛ.”
4Ŋɩɩ nɛ Paalɩt bʋla pɩ Wɩɩsʋllɩ sɩpaalaaraa kʋhɩasɩŋ arɩ nɩ-daŋ-la kala sɩ hilime, “Mɩ bɩ wɩɩ-la baala deeŋ sɩ ŋaa chei na a magɛ dɩ ba kpʋʋ.”
5Ŋɩɩ nɛ nɩalɩŋ sɩɩ bʋl Yesu teeŋ ha pɛsɛ a bʋl, “Ʋ dagɛ nɩaa ba hɛ yuosuŋ Judiya tinteeŋ kala lɛ nɛ. Ʋ suomi Galilii lɛ nɛ, aŋ lɛɛlɛ kɔ Jerusalɛm ma ŋ-la.”
Ba kɛŋ Yesu mʋ Hɛrɔd teeŋ
6Paalɩt sɩ nɩɩ ŋɩɩ, ʋ pɩɛsɛ nɩalɩŋ sɩɩ bʋl Yesu teeŋ, “Baala deeŋ ŋaa Galilii tɩɩna nɛɛ?” 7Paalɩt sɩ nɩa arɩ Hɛrɔd nɛ faa beŋ tintee-la Yesu sɩ lɩa, ʋ ŋaa ba kɛnʋ kaa mʋ Hɛrɔd teeŋ. Bʋa-la lɛ dɩ Hɛrɔd hɛ Jerusalɛm lɛ.
8Hɛrɔd tʋɔŋ kala tɔrɛ ʋ sɩ na Yesu, bɛɛ wɩaa ʋ nɩɩ ʋ wɩaa faafaa kala nɛ a yie chɩchɛ dɩ ʋ naʋ. Ʋ faa chɛ dɩ Yesu ŋaa wʋkpuŋkpere nɛ dɩ ʋ na. 9Ŋɩɩ nɛ Hɛrɔd pɩɛsɛ Yesu wɩaa yʋgɛ, ama ʋ bɩ wɩɩ bʋla. 10Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba-la sii tʋɔra mʋ Yesu lɛ a faasa bʋl ʋ teeŋ woruŋ. 11Hɛrɔd arɩ ʋ laalɩyuoroo sieri Yesu lɛ a dɔgɩsʋ, aŋ leŋ ba joŋ gɛrɩ-zɔŋ kʋbala laalʋ, aŋ mɩɩra kɛnʋ mʋ Paalɩt teeŋ. 12Hɛrɔd arɩ Paalɩt faa yuo dɔŋɔ nɛ. A chɩŋ tapʋlɩɩ-la nɛ, ba sɩŋ a ŋaa nandɔsɛ.
Ba sɩ dɩ ba kɛŋ Yesu mʋ kpʋ
Mat. 27.15-26; Maak 15.6-15; Jɔɔŋ 18.39–19.16
13Ŋɩɩ nɛ Paalɩt yɩrɛ Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ arɩ nɩaa dɔnsʋŋ, 14a bʋla pɩba, “Má kɛŋ baala deeŋ kaa kɔ mɩ teeŋ a bʋla pɩmɛ arɩ ʋ nyɩsɛ nɩaa dɩ ba vɩa wombii-la la sɩɩ to nɛ. Mɩ saa pɩɛsʋ wɩaa nɛ ma kala sɩpaaŋ. Wɩalɩŋ ma sɩ bʋla arɩ ʋ cheye, mɩ bɩ ba tʋɔŋ kʋbala ma na dɩ ʋ ŋaa chei. 15Hɛrɔd ma sɩ bɩ na ʋ sɩ ŋaa wɩɩ-la chei, ŋɩɩ nɛ tɩɩ ʋ leŋ ba bɩra kɛnʋ kaa kɔ daha. Má bee na, baala deeŋ bɩ wɩɩkala ŋaa chei a magɛ dɩ ba kpʋʋ. 16Mɩ jaŋ leŋ dɩ ba vɩɩrʋ aŋ joŋu ta.” 17Ama dɩɩsɩŋ kiele bal gbiele-la nɛ yie-na kala, ba yie leŋ Paalɩt lɩɩsɛ dansarɩkaba tʋɔŋ kʋbala nɛ a ta, nɩɩ-la Juu tɩŋŋaa sɩ cho dɩ ba lɩɩsa.
18Ŋɩɩ nɛ nɩalɩŋ kala kpɩa goŋ a bʋl, “Kpʋ Yesu aŋ lɩɩsɛ Barabas ta pɩla.”
19Bʋa kʋbala lɛ, nɩaa sii hɛ yuosuŋ nɛ ba tabalɩŋ lɛ. Barabas kpʋ nʋʋ, ŋɩɩ nɛ tɩɩ ba kɛnʋ mʋ tɔ dɩa. 20Paalɩt fa cho dɩ ʋ joŋ Yesu ta nɛ, ŋɩɩ nɛ ʋ bɩra bʋl wɩaa aa sʋl nɩ-daŋ-la. 21Ama ba faasa kpɩa goŋ a bʋl, “Má kpaasʋ daagɛsɛ nyuŋ, má kpaasʋ daagɛsɛ nyuŋ.”
22Ŋɩɩ nɛ Paalɩt bʋl wɩaa pɩba torimuŋ lɛ, “Wʋbɛɛ nɛ baala deeŋ ŋaa chei? Mɩ-na bɩ wɩɩ-la ʋ sɩ ŋaa chei na a magɛ dɩ ba kpʋʋ. Mɩ jaŋ leŋ dɩ ba vɩɩrʋ aŋ joŋu ta.”
23Ama ba ha pɛsɛ, a faasa kpɩa goŋ a bʋl, “Ʋ maga dɩ ba kɛŋ Yesu a kpaasɛ daagɛsɛ nyuŋ nɛ.” Ba sɩɩ ŋaa goŋ ŋɩɩ, Paalɩt kʋ sɛɩ ba kʋa 24a bʋl dɩ ba kɛŋ Yesu kpaasɛ daagɛsɛ nyuŋ, arɩ nɩalɩŋ fa sɩɩ chɛ ŋɩɩ. 25Ŋɩɩ nɛ Paalɩt lɩɩsɛ nɩɩ-la ba fa sɩ cho a ta, nɩɩ-la ba fa sɩ kaa tɔ dɩa a tɩŋ ʋ sɩ hɛ yuosuŋ a kpʋ nɩaa. Ʋ joŋ Yesu a hɛ ba nɩsɩŋ lɛ dɩ ba ŋaaʋ wɩɩ-la kala ba sɩ cho.
Ba kpaasɛ Yesu daagɛsɛ nyuŋ
Mat. 27.32-44; Maak 15.21-32; Jɔɔŋ 19.17-27
26Ŋɩɩ nɛ laalɩyuoroo kɛŋ Yesu kaa lɩɩ dɩ ba kpaasɛ daagɛsɛ nyuŋ, a cheŋ baal kʋbala baa yɩrɛ Saamɔŋ a lɩɩ Siriini, dɩ ʋ lɩɩ baga a jʋjʋʋ Jerusalɛm. Ba kɛnʋ a joŋ daagɛsɛ-la baasʋ ʋ kaa tuto Yesu harɩŋ. 27Nɩ-daŋ nɛ faa to ʋ harɩŋ, ba tʋɔŋ haalaa ma fa yʋga a yiyel Yesu wɩaa. 28Ŋɩɩ nɛ Yesu mɩɩra daasɛba aŋ bʋla pɩba, “Jerusalɛm haalaa, má sɩ́ mɩ wɩaa yel. Má yel ma tɩtɩa arɩ ma biiriŋ wɩaa. 29Tapʋlaa ka kɔ nɛ, nɩaa jaŋ bʋl, ‘Hapɩraa tʋɔŋ jaŋ tɔrɛ, haala-la sɩ bɩ biiriŋ lʋla a dɩɛsɛ.’ 30Bʋa-la lɛ nɛ nɩaa jaŋ bʋl, ‘Peelee, má tele tɔla, dundolluŋ, má tɔla.’ 31Mɩ sɩ nagɛ tɩɩ-weyiŋ, aŋ ka ba dɔgɩsɛmɛ ŋ-la, ɛɛ nɛ ba jaŋ ŋaa ma ma lɛ, ma sɩ nagɛ tɩɩ-hɩlaa?”
32Ba sɩ kɛŋ Yesu mʋ ŋɩɩ, ba kɛŋ nɩbɔŋŋɔɔ balɩa ma kaa mʋ dɩ ba kpʋba a pɛ Yesu lɛ. 33Ŋɩɩ nɛ ba mʋ yi lee kʋbala baa yɩrɛ nyu-kuŋkogulo. Ba sɩ yi lee-la, ba joŋ Yesu arɩ nɩbɔmɔ-la balɩa a kpaasɛba daagɛsɛ nyuŋ. Dɔŋɔ daagɛsɛ hɛ Yesu nadiiŋ, dɔŋɔ ma daagɛsɛ hɛ ʋ nagʋa. 34Ŋɩɩ nɛ Yesu chʋɔlɛ Wɩa a bʋl, “Mɩ Nyɩmma, joŋ wɩɩ-la ba sɩ ŋaa a chɛba, bɛɛ wɩaa ba bɩ jɩŋ wɩɩ-la kala ba sɩɩ ŋaa.” Ŋɩɩ nɛ ba tɔnsɛ a kɛŋ Yesu gɛnnɩŋ kpaa. 35Nɩaa dɔnsʋŋ ma chɩŋ nɩmɛ a bibeŋ, aŋ ka Juu tɩŋŋaa kʋhɩasɩŋ sisieri ʋ lɛ a bʋl, “Ʋ laa nɩaa tɩta nɛ, ma leŋ dɩ ʋ laa ʋ tɩtɩa ta yeii, dɩ ʋ nɛ ŋaa Kirisito, Nɩɩ-la Wɩa sɩ lɩɩsa.” 36Laalɩyuoroo ma sieri ʋ lɛ a ŋaa sɩnɩŋ sɩ nyala a kaa mʋ pʋ dɩ ʋ nyʋa 37aŋ bʋl, “Dɩ ŋ nɛ ŋaa Juu tɩŋŋaa kuoro, laa ŋ tɩtɩa ta.” 38Ba ŋmʋnsa mɛrɛ ʋ daagɛsɛ-la lɛ a bʋl:
JUU TƖŊŊAA KUORO NƐ Ŋ-LA.
39Ŋɩɩ nɛ nɩbɔmɔ-la dɔŋɔ ma sɩ sagɛ daagɛsɛ nyuŋ tʋʋsɛ Yesu a bʋl, “Ŋ dee Nɩɩ-la Wɩa sɩ lɩɩsaa? Saa laa ŋ tɩtɩa ta aŋ pɛ laa la ma ta.” 40Ŋɩɩ nɛ nɩbɔŋ-la dɔŋɔ kpɩa ʋ lɛ a bʋl, “Ŋ bɩ Wɩa ka fáa? La dɩ ʋ kala nɛ jʋʋ wʋbala. 41Ʋ maga dɩ ba ŋaa la-na ŋɩɩ nɛ, bɛɛ wɩaa la ŋaa wʋbɔŋ nɛ, aŋ ka ʋ-na bɩ wɩɩkala cheye.”
42Ŋɩɩ nɛ aŋ ka ʋ bʋla pɩ Yesu, “Yesu, dɩ ŋ nɛ dii kuoruŋ, liisi mɩ ma wɩaa.”
43Ŋɩɩ nɛ Yesu bʋla pʋ, “Wʋtɩtɩɩ nɛ mɩ bʋlaa pɩŋ, mɩ dɩŋ kala jaŋ hɛ Wɩa-jaŋ lɛ jɩnɩŋ.”
Yesu sʋba
Mat. 27.45-56; Maak 15.33-41; Jɔɔŋ 19.28-30
44Wɩa sɩ kʋ magɛ nyu-gbaŋa, leriŋ kala biri lim a mʋ yi dɩdaanɩŋ, ka leriŋ bɩra pʋllɛ. 45Patɩɩsaŋ nɛ fa hɛ Wɩa dɩɩ-bal-la tʋɔŋ ba kaa kɛrɛ. Ʋ kɩɛsɛ balɩa. 46Ŋɩɩ nɛ ka Yesu faasa yɩrɛ a bʋl, “Mɩ Nyɩmma, mɩ joŋ mɩ tɩtɩa a hɛ ŋ nɩsɩŋ lɛ.” Ʋ bʋl ŋɩɩ nɛ aŋ wiesi ʋ wiesi katɩɩ aŋ sʋʋ.
47Ŋɩɩ nɛ dɩ laalɩyuoroo zɔlɔ kʋhɩaŋ kʋbala fa chɩŋ nɩmɛ. Ʋ na wɩɩ-la sɩ ŋaa, a dɛnnɛ Wɩa a bʋl, “Wʋtɩtɩɩ, baala deeŋ fa ŋaa tʋɔpʋl tɩɩna nɛ, ʋ bɩ wɩɩkala cheye.” 48Nɩalɩŋ kala fa sɩ hilimi nɩmɛ dɩ ba na wɩɩ-la sɩ jaŋ ŋaa, aŋ lɛɛlɛ na wɩɩ-la sɩ ŋaa, ba paa ba nɩsaa chʋŋ nyuŋ lɛ a mɩɩra mʋ dɩa. 49Nɩalɩŋ kala fa sɩ jɩŋ Yesu, arɩ haala-la kala fa sɩɩ to ʋ harɩŋ a lɩɩ Galilii kɔ, ba chɩŋ dɩ-bolii a na wɩaa deemba kala.
Ba hugi Yesu
Mat. 27.57-61; Maak 15.42-47; Jɔɔŋ 19.38-42
50Baal kʋbala ma nɛ fa hɛ nɩmɛ baa yɩrɛ Josɛf. Ʋ fa ŋaa nɩalɩŋ sɩ yie hilimi a vʋvʋʋrɛ wɩaa dɔŋɔ nɛ, a ŋaa nɩzɔŋ, a ŋaa tʋɔpʋl tɩɩna. 51Ba fa sɩɩ vʋʋrɛ dɩ ba kpʋ Yesu ŋɩɩ, ʋ fa bɩ sɛyɛ. Ʋ fa lɩɩ Juda taŋ-la ba sɩɩ yɩrɛ Arɩmatɩya nɛ a gbɩgbɛrɛ Wɩa kuorii-la dɩ ʋ kɔ. 52Ŋɩɩ nɛ ʋ sii mʋ Paalɩt teeŋ a sʋl Yesu kʋsʋʋŋ, ʋ sɛɩ. 53Ʋ mʋ sori a joŋ gɛrɩ-pʋla a bɛʋ, a kɛnʋ kaa mʋ hugi bʋŋ ba sɩ lɔsɔ lɛ. Ba ha bɩ nʋʋkala hugo nɩmɛ. 54Zʋma chɛɛŋ nɛ ŋɩɩ, dɩ baa ŋaa siri dɩ ba suomi ba chɛ-wiesii-la.
55Haala-la fa sɩ to Yesu harɩŋ a lɩɩ Galilii kɔ, ba to Josɛf harɩŋ a mʋ na bʋbʋa-la, arɩ ŋɩɩ ʋ sɩ hugi Yesu. 56Ŋɩɩ nɛ ba mɩɩra mʋ dɩa a chɛ tʋlaalɩɩ dɩ ba kaa mʋ tɩsɛ Yesu. Ba sii chɛ-wiesii-la chɛɛŋ a wiesi, arɩ wɩalɩŋ Mosis fa sɩ ŋmʋnsa bil dɩ nɩaa tuto sɩ dagɛ ŋɩɩ.
Dewis Presennol:
Luuk 23: SIS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©Ghana Institute of Linguistics Literacy and Bible Translation 1984, 2014