John 20
20
Teȣasen-aton teioteriȣasonterakȣen Oriȣatokenti tsini hoiaton Roiatatokenti San.
1Aȣententaonke, ȣariȣatere eh ȣahete tsi thaiatatakȣe sekon ok satetiokaras, nok ontkatho tsi kanenhiarakȣen ne kanontektonne.
2Tonsonratate saiakororiana ne Simon Tier tanon ne Iesos ronoronkȣakȣe, ȣakenron: Sonȣaiatatakȣen ne Roianer nʼoshonȣakon; iah oni teionkȣaterientare kah niiehonȣaiatenha.
3Nensok rotention ne Tier tanon ne Saiatat, nok eh ȣanete tsi tioshonȣe.
4Nok tetsiaron tenitakke; ne tanon ne saiatat ne tehoka tsiniiot ne Tier, neh kati rahente iaharaȣe tsi tioshonȣe.
5Nok iathastsakete iahatketoten, ȣahatkatho nʼo-niatarahasonha eh kakeron; iah ki tanon tiiehostsnenton.
6Ethone ne Simon Tier ohnaken ratakhe eh ȣaraȣe, nok tahastsnente oshonȣakon ȣahatkatho oni ne raonha noniatarahasonha ehtake kakeron.
7Nok ne rotenontsistoroktonne ne Iesos iah tiiatekaieston nʼotiake oniataraasonha akȣa neneh akte nikaien tanon kaȣenonni.
8Ethone onen ne rahentene siiahaheȣe tsi iokaronte, iahastsnente oni neneh nok ȣahatkatho taretakȣe oni.
9Aseken areko sihoterientare tsiniiot tsi kaiaton tsi enshatonnhete.
10Nok saiatenti.
11Kenh kaien nʼOnȣari astste naoshonȣati kenteron teȣasenttos; tsi kati nikariȣes teȣasenttos, iaontketoten oshonȣakon.
12Nok eh ȣahakoken Tenironhiakeronon kenrakenseroskon ronastston, nistskȣahere saiatat tsi rakonhentakȣe, nok saiatat tsi iatehasitaientakȣe ne Iesos.
13Nok ȣakonȣenhase: oh niiotieren tsi tesasenthos? tontakenron: ne ki tsi teionkekȣenni ne Roianer, tanon iah teȣakaterientare kah onte niiehonȣaiatenha.
14Nok nonen siiaonteȣennokten, ȣateȣatkarhateni, nok ȣahoken eh ihrate neneh Iesos; iah kitanon tetioterientare iah oni teiaȣeron neh ontekenh ne Iesos.
15Ȣahenron ne Iesos: oh niiotieren tsi tesasenthos? onka seiatisaks, ȣahere naonha tsi onnontonnion neh kenh ne ratsitsiaienthos, ȣahaȣenhase kati: Saianer; toka ise iestsiatenha, takrori tsinonȣe nisaien nok iensekko.
16Sarenhase ne Iesos: ȣari! nok tonsontkarhateni, ȣahaȣenhase: Rabbonni!
17Tontahenron ne Iesos tosa kenh niiatatier: aseken areko Rakenineha tiieseȣakenon; ȣas tanon seroriana nʼiakȣatatekenha: Rakenineha sake, nok etsiseȣanineha oni nise; Ake-Niione, Etsiseȣa-Niione oni nise.
18Ȣari-tere ionsonȣe nok saiakorori ne raotiokȣa tsi sahoken ne Roianer nok oni tsi raonha rarori neh nikarihoten.
19Nok okarasneha nonkȣati, neh ȣenniserate ne tiotenniseratierenton noiaiakserake, akȣekon kannhoton tsinikon kannhokaronte tsinonȣe nihonatkennison ne raotiokȣa ne tsi sakotistsaniskȣe ne Sitaeronon, eh ȣahataȣeiate ne Iesos, rahotinenrihen etho ȣathatane nok ȣasakaȣenhase: skennen tikenhak!
20Nok nonen saharihokten, ȣasakonatonhase rasnonsakesson oni ranahatake; nok ne raotiokȣa ȣahontonnharen tsi sahonȣaken ne Roianer.
21Nok sekon sahenron ne Iesos: skennen takenhake niseke! Tsiniiot tsi takatorion ne Rakeniha etho oni nise niiot tsi iakȣatori.
22Nok nonen saharihokten, raonnisera iasakorontate nok ȣahenron; seȣaiena ne Ronikonriioston.
23Onka kiok, entsiestsirakeȣase nakoriȣaneraaksera, entsiakoterakeȣase; nok nenhietsinerenkse, enhiakotnerenkse.
24Kenh kaien nʼAtonȣa ronȣanatonkȣa Dydime, enskat raiatarakȣe ne tekeni iaȣenre Nihati, iah eh tehenterontakȣe sahakȣatho ne Iesos tsinonȣe notiake nihatiterontakȣe.
25Nok ne ronatiake, sahonȣarori ȣahonniron: sesakȣaken ne Roianer. Nok tahenron: toka iah tenkatkatosere tsi karonȣaraieronnianion, iah oni tiiakanisnonsorokhe tsi nonȣe nikaronȣarotonkȣe, iah oni tiiakienasere ne ranahatake, iah ki taontaketakȣe.
26Nok satekon nonta ohnakenke, kanonskon are ratiteron ne raotiokȣa, raiatare oni nʼAtonȣa, Iesos eh ȣahoketote, kannhotonnion sane tsi kannhokaronton, rahotinenrihen eh ȣathatane, nok ȣahenron: skennen tikenhak niseke!
27Ethone iahaȣenhase nʼAtonȣa; kenh iasanisnonsoten, nok skahenhion ne kesnonke; iatsiena oni ne kenahatake; nok tosa sasatennoȣentastskonhak, sariȣatokenhak tanon.
28Nok nʼAtonȣa tahenron: Saianer nok Ake-Niio.
29Nok ne Iesos tontahenron: neh tsi ȣaskken Atonȣa, tasetakȣe; iakotaskat nonka iah teiakotkathon nok tiakaȣetakon.
30Sekon eso tsinihoieren ne Iesos rahotihenton ne ratikȣekonne ne iah tekaiaton ne kentho kaiatonserakon.
31Nok tsi kaiaton ne kenh kaien, neh ki naonteseȣetakȣe tsi Keristos ne Iesos, Niio Roienha, nok tsi entihseȣetakȣe ne raosennakon enseȣaientane naetsionnheke onȣe.
Dewis Presennol:
John 20: MHK
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.