約翰 16
16
1「𠊎將這兜事㧯你等講，愛使你等个信心毋會搖動。 2佢等會將你等逐出會堂。這時節就會到了，該兜殺害你等个人會認為佢等所做个事情係忠心事奉上帝。 3其實，佢等會恁樣做係因為佢等毋識阿爸，也毋識𠊎。 4𠊎㧯你等講這兜事，係愛俾你等在這時節來到个時想到𠊎識㧯你等講過。
聖靈个工作
「𠊎當初無㧯你等講這兜事，因為𠊎一直同你等共下。 5這下𠊎愛倒轉該『差𠊎來个』該位去；你等當中並無人問𠊎：『你愛去㖠位？』 6反轉因為𠊎識將這兜事㧯你等講過，你等就滿心憂愁。 7事實上，𠊎㧯你等講，𠊎轉去，對你等較好；𠊎無轉去，該保惠師就毋會來你等這位；𠊎轉去，就差佢來。 8佢來个時，佢愛對世間人證明：佢等對罪、對義、對上帝審判个看法全部毋著淨淨。 9佢等對罪个看法毋著，因為佢等毋信𠊎； 10佢等對義个看法毋著，因為𠊎轉去阿爸該位，你等毋會再看到𠊎； 11佢等對上帝審判个看法毋著，因為這世界个王已經受審判。
12「𠊎還有盡多事愛㧯你等講，總係你等這下揹毋贏。 13等到賜真理个聖靈來到，佢會帶你等進入所有个真理。佢毋會照自家个意思講話，只有將佢所聽到个㧯你等講，也會對你等講將來个事。 14佢會榮耀𠊎，因為佢會將佢對𠊎所領受个㧯你等講。 15吾爸所有个一切全部係𠊎个；所以𠊎講，聖靈會將佢對𠊎所領受个㧯你等講。
憂愁變快樂
16「過無幾久，你等就看𠊎毋到；再過無幾久，你等又會看到𠊎。」
17學生當中有幾個人彼此講：「佢㧯𠊎等講『過無幾久，你等就看𠊎毋到；再過無幾久，你等又會看到𠊎』又講『因為𠊎轉去阿爸該位』；這兜話到底係麼介意思呢？」 18佢等又問：「佢所講个『過無幾久』係指麼介呢？𠊎等毋知佢講麼介！」
19耶穌知佢等想愛問佢，就㧯佢等講：「𠊎講『過無幾久，你等就看𠊎毋到；再過無幾久，你等又會看到𠊎』；你等因為這句話問來問去係麼？ 20𠊎實在㧯你等講，你等會傷心大噭，總係世間人會歡喜快樂；你等會憂愁，總係你等个憂愁會變做快樂。 21婦人家生產以前會憂愁，因為受苦个時間到了；總係孲𤘅仔𫱔出來以後，就毋記得痛苦，因為姖歡喜孲𤘅仔已經出世。 22你等也係恁樣：這下你等有憂愁，總係𠊎再見到你等个時，你等就會滿心快樂；你等个快樂係無人搶得走个。 23到該日，你等就毋會再問𠊎麼介。
「𠊎實在㧯你等講，你等奉𠊎个名，無論對阿爸求麼介，佢一定會賜給你等 #16:23 「你等奉…賜給你等」另外有兜古卷係「若係你等對阿爸求，佢會因為𠊎个名賜給你等」。。 24到這下，你等毋識奉𠊎个名求過麼介；從今以後，你等求，就會得到，使你等个快樂滿滿。
贏過世界
25「𠊎用比喻㧯你等講這兜事。總係時間會到了，𠊎無再用比喻，係愛明明將阿爸个事㧯你等講。 26到該日，你等愛奉𠊎个名求；𠊎毋係講𠊎愛代你等對阿爸求， 27因為阿爸自家惜你等。佢惜你等，因為你等敬愛𠊎，又信𠊎係對上帝 #16:27 「上帝」：有古卷係「阿爸」。該位來个。 28𠊎對阿爸該位來到這世界；這下𠊎愛離開這世界，轉阿爸該位去。」
29學生對佢講：「你看，這下你係明明講，並無用麼介比喻。 30這下𠊎等知，你無所不知，無需要人對你講出佢个問題。因為恁樣，𠊎等信你係對上帝該位來个。」
31耶穌講：「這下你等正信嗎？ 32看啊，時節會到了，這下就係，你等全部會分散，逐儕轉去自家个地方，留下𠊎自家一儕。其實，𠊎毋係自家一儕，因為有阿爸同𠊎共下。 33𠊎將這兜事㧯你等講，係愛你等因為生在𠊎底背 #16:33 「生在𠊎底背」抑係譯做「同𠊎結連共下」。有平安。在這世間你等有苦難；總係你等愛勇敢，𠊎已經贏過這世間。」
Dewis Presennol:
約翰 16: THV12Hdb
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2012
All rights reserved
© 台灣聖經公會版權所有 2012