Luka 17
17
Patharwakai ki pasalrivane
(Matai 18.6-7, 21-22; Maruku 9.42)
1Ku Yesu amia kai ki lasituini, “Kudra papasalriu ki umawmase ka maneemanenga yai lri tara ikai, ai kudra amani ku pangiamia kikai ku umawmase yai lri matikuru! 2Maesaesai arakai ku madrau ka tapasilribulribwane ka lrenege si pakerenge ki lreini, la pawrenere pwa ki laveke; lu piane kai, maesaesai kwidra ki lu papasalriu kudra ki kaika sapatumatumane ka umawmase. 3Kunumi kipapawlringava!
“Lwiyasi kwini retesanesu la pasalriu, wabulru madu pakipapawlringau iniane; alaiyasi ngitatupela, la pacepe madu iniane. 4Kudra minakavavaalane la kingipitulu pasalriu muswane, lu pasalriu kingivaale la ngibangulu iya kai muswane, ‘Ngiatatusikaelangaku’, lri paacepesu iniane.”
Patharwakai ki salrwane
5Kudra lanisikawlane amia kai ki Tamatama, “Ala drima ku salrwane nai!”
6Ku Tamatama la iya kai, “Alaiyasi pikai numi ku paramia ki berathe ka masetarade ku takathane ku salrwane, adravane kawriva numi kwini ki taliwdru iya kai, ‘Kaakuca patala balace, si mwa ki laveke!’ Lri mialri dulru kilalra numiane.”
Awngane ki sasiakawlu
7“Alaiyasi ikai numiane, kudra yakai ku tangea ku sasiakawluini ka tarakawaungu ki umawma, ka taraagwagu ki kiu, kwini sasiakawlu lu twalai umawma kela, lri maka iyasu iniane, ‘Kirarimwa nene si la kane kai aga’ iya? 8Kaisu lri pia kwini! Lri iyalringasu kai iniane, ‘Pasikaiyanaili padulru ku kwaubu, la situpia, si marasikai nakwane, ala lu makakaanengaku kaneea.’ 9Ku sasiakawlu lu pangimia ku tapadrekadrekasane ki tawkini twatumane, ku tawki lai lri kiaseasene iniane? 10Kunumi la mialri numi. Kudra lu tulrepenge numi ku pia kwini iya ki Twaumase numiane, amia madu kai, ‘Kunai amani nai kudra kadrwa ku paluludane ka sasiakawlu; kikai tapangimiane nai naika apiane nai ka awngane nai.’ ”
Pawadringai ki tamangeale ka macaeme karaibiu
11Ku Yesu sa papiapia Yerusalrime kadadalranane, ngwakakai Samaria si talikai Galrilri. 12Sa mudaane kudra ki vaeva ka cekele, yakai ku tamangeale ku kiapucaemane ki raibiu, wakela kidresenge papia iniane. La sadaili acegecege, 13si tawtau iya kai, “Yesu, sinsi, kakurua naiane!”
14Ku Yesu sadrele, la iya kai liniane, “Kunumi lu katwasa, lani drele numiane ku barakalai!”
Kwini lalasu sakatwase la makitu kabulanga. 15Kwini la ikai ku tangea ku ngiadradrele sa mudringainga, la makakaai siwlriwlri, si akwadrau drengedrengere ki Twaumase, 16la pidruru icucubungu ki drapale ki Yesu si kiaseasene iniane. Kikai umawmase laka swa Samaria. 17Ku Yesu la iya kai, “Kudra kiapawdringai kaika tamangeale, mwainu ku tabangate? 18Anika kathane kikai maelane ka zuku ka umawmase ku siawlri kela kiaseasene ki Twaumase?” 19Ala kirimu ku Yesu iya kai iniane, “Ngidrakala si katwase! Kwini salrwanesu pawadringainga muswane.”
Autaluvaivadhane ku puku ki Twaumase
(Matai 24.23-28, 37-41)
20Yakai kudra la swa Palrisai ku wakela kivaga ki Yesu, pakai ku athingalane lukamani lwigane ku autaluvaivadhane athingalane ku puku ki Twaumase. Ku Yesu la tubalre, “Kudra autaluvaivadhane athingalane ku puku ki Twaumase kaika amaka dulrwane drele arakai kai maca. 21Kadrwa ku umawmase ku lri iya kai, ‘Drela kawvai yakai kai!’ si ‘Kawvai yakai kavai!’ Asi lwiyane ku puku ki Twaumase yai yakai ki kidremedreme numi#17.21 “yakai ki kidremedreme numi” ku wahunyake madu iya kai “yakai numiane taelre” si “kiariimu utaluvaivai ikai numiane”.!”
22La pacungulu iya kai ki lasituini: “Lri darurunga kwini vai, mwarikai numi ku adulrwane drele ku akelane ku amagagemegemane ku puku kwini Lalake ki Umawmase ka vai, ai kai numi lri maka drele. 23Yakai ku umawmase ku lri iya kai numiane, ‘Drela yakai kavai!’ si ‘Drela yakai kai!’ Kunumi madha katwatwase mulatadre si drele, si la madha tupapapalra liniane. 24Lri mia ki lrikace salraelre kai subelebelenge, twalai talikai kai palrikace pakela talikai kavai, lu kela ku vai ki Lalake ki Umawmase lrika ngimiyaiya kikai. 25Ai kwi lasu lri pakanaswalana tarumara ku makaalra ku akipakwalriane, si kicilri kai ki zidai ki umawmase. 26Mia saka zidai ki Nua, ku akelane ki Lalake ki Umawmase ku vai lrika ngimiyaiya. 27Kudra zidai kwini ku umawmase paiya ku tapiapiane kanekane ungungulu pakarudrarudrange, pakela kudra sa mudaane ki varukuru ku Nua ku vai, la kela ku telebe, si ala amudu liniane. 28Kudra vai ku akelane ki Lalake ki Umawmase, maiyalri mia ki zidai ki Lute; kudra zidai kwini ku laumawmase paiya ku tapiapiane lini kanekane, ungungulu, tusiwbawbai, la tuumawmawma si tudadaane. 29Ala kudra sa daruru ku vai ku takatwasane ki Lute kwini ki Sudume ka cekele, kudra thilaru ka apwi twalai subelebelenge mulebe, si alra amudu liniane makanaelre. 30Kudra lrika autaluvaivadhane athingalane ki Lalake ki Umawmase kwini vai lai lrika miyaiya kikai.
31“Luka vai kwini, ku yakai ki cavalri, madha mulebelebe si mudaane malra ku lamanemaneini; thadaalrane, ku yakai umawma kawaungu, la mialri madha mubalribalriu. 32Ngwalringau madu ku takipadradresengane ku taelrelre ki Lute! 33Kudra apia palakebe ku niakeini, lri pawciilrilringa ki niakeini; ala kudra pawacilri ku niakeini, lri palakebe ki niakeini. 34Nau pelaela numiane, kwini vai lukamaungu, ku tadrusa ku umawmase wapece taelre itapeapecane, lri kiluku ku tangea, lai asuru ku tangea; 35ku tadrusa ku ababai taelre pasilribulribu, ku tangea lai kiluku, ku tangea lai asuru.”#17.35 Yakai ku sidrumane ka hungu ku padrima ku mwasaka 36 ka vaga, “Ku tadrusa ku yakai umawma kawaungu, lri kiluku ku tangea, lri kisuru ku tangea.” (Drela ki Matai 24.40.)
37Ku lasitu la kivaga, “Tamatama, kilakikai lri ikai inu ngimia?”
Ku Yesu la tubalre, “Luka taikaiyane ki wapacai ka kinawmasane, ku kwau lri ikaai kwini irurubu.”
Dewis Presennol:
Luka 17: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017