Luka 18
18
Patharukai ki walibakane si tarasaibaibange ka pathalrilriku
1Ku Yesu peaelaela liniane ku drumane ku pathalrilriku, ku lrika tainulrinulriane lini, si kai kasulrisulri. 2Kwi lasu amia kai, “Yakai kudra cekele la ikai ku tangea ku tarasaibaibange, kwini lasu laka kai mwakuludru ki Twaumase, kai mwasakene ki naumawmasenga. 3Ikai kwini cekele la ikai ku tangea ku walibakane la wamwamwamua kikawriva iniane, si kitubi iniane ku aparamaramavane, si pathavungu ki ecebaneini. 4Kwini tarasaibaibange la pukaiyaiyaiyane ngiabababalai, ai sakabilrilanenga la kidremedreme iya kai: Unu kunaku nakainaku mwakuludru ki Twaumase, la kai musakene ki umawmase, 5ai kikai walibakane kai yasadrasadra kela upungu nakwane, maesaesai pasikai iniane putaluvaivai ku vinuthane, amani lu keakeakela, si kataruthukane kai isadrasadra.”
6Ku Tamatama la pacuungulu iya kai, “Kunumi kilalalra kai takawrivane kai ki kaimadringelrese ka tarasaibaibange! 7Bekace ku Twaumase kai pasikai putaluvaivai ku vinuthane kudra ki la piavaiyane pimaungu kitubitubi iniane ku akiparalubane kudra laumawmaseini? Ku taiyane, lri ngiabababalai ku apalribulane liniane? 8Nau pelaela numiane, Lri tara kisamwamula pasikai putaluvaivai ku vinuthane lini. Ai, lu kela ku Lalake ki Umawmase, lri maka kidringadhaini ku ngimiyaiya kai ku salrwane?”
Patharwakai ki swa Palrisai si tarakikaziluzilu ka pathalrilriku
9Ku Yesu la pelaelanga ku vaeva ku pathalrilriku, ka papia kwidra ki ngiatatumadringelrese si sidrekase ki palrapalra ka laumawmase. La iya kai, 10“Yakai ku tadrusa ku umawmase ku wamwa ki daane ki Twaumase inulri: Ku tangea swa Palrisai, ku tangea tarakikaziluzilu ka umawmase. 11Kudra swa Palrisai la acegecege si paswabelenge, la inulri iya kai#18.11 “la acegecege si paswabelenge, la inulri iya kai” yakai ku lasidrumane ka hungu ku amia kai, “acegecege, si ngikakawrivariva inulri iya kai” (drela ki Matai 6.5)., ‘Twaumase, kiaseasenaku muswane, asi lwiyane kainaku ngiamia ki palrapalra karau, kaimakalecege, kanganga ki sawvalai si ababai, si la kainaku mia kavai ki tarakikaziluzilu. 12Ki minakapitulane ku vai la kingipusalaku laisi, si ku malramalrali patuelre la pawmangealaku si patarumara ku taingeane.’ 13Ai kwidra tarakikaziluzilu ka umawmase la yadaaili acegecege, adravane ka apaswabeleengane drele kai wathuru, wabakebake ki tukuini sikakathane si iya kai, ‘Twaumase, kakuruaili ka mapasaisaalriwnga ka umawmase!’ 14Nau pelaela numiane, kikai tadrusa lu katwasenga yai, ikai ki tadrelane ki Twaumase ku madringelrese ka umawmase amani ki kwini tarakikaziluzilu ka umawmase, kaika amani kwini swa Palrisai. Asi lwiyane ku Twaumase lri parwabelenge kudra ki ngiatatwalebe ku umawmase, kudra ngiatatwabelenge ku umawmase lai alra pulebe.”
Ku Yesu swabulrubulru ki lavavalake
(Matai 19.13-15; Maruku 10.13-16)
15Yakai ku laumawmase ku waililuku ki lalake lini ka daini kainganai mwa ki Yesu, pakai ku lrika answane ki Yesu pasikai liniane. Ku lasitu sadrele, la kaelaelathe liniane. 16Ai ku Yesu wadawlu kwini ki lavavalake picucubungu iniane, si iya kai, “Bwala pakainganadha ki lavavalake pwakai nakwane, madha teletelenge liniane, asi lwiyane ku kawkawlu ki kuni ki Twaumase ala ngimiyaiya liniane. 17Kunumi pulringava: Sanaka kaika paramia ki lavavalake ngialrau tarumara ku puku ki Twaumase ku umawmase, kai lri maka dulru mudaane ki kuni ki Twaumase.”
Pakakucingalre ki satacekecekelane
(Matai 19.16-30; Maruku 10.17-31)
18Yakai kudra taramasasangililuku ki swa Yuda wakela kivaga ki Yesu iya kai, “Makalecege ka sinsi, lri tumanaku si ala dulru tarumara ku apalralrawthane ka niake?”
19Ku Yesu la kivaga iniane, “Asu makalecege iya nakwane? Kai paelre ki Twaumase, kadrwanga ku tharirane. 20Kusu lri tara ka wathingalesu ku nitukakudhanane ki padradrekase ‘Madha sudringai madha pasudringai; madha papacapacai ki umawmase; madha kupawpa; madha draedraedrangelre kawriva; musakena ki marudrawdrangesu.’ ”
21Kwini umawmase la tubalre, “Kikai padradrekase patuelre singika lavavalakaku pangiamianga naku paluludu.”
22Ku Yesu sakilalra kikai vaga, la tupela kawriva iniane, “Yakai kwini kaiyana ka pangimiasu ku taingeane. Lu kilangadha ku tacekecekelanesu patuelre, si apavalavala baai ki matiakukuru, lri tara ikai ku tacekecekelanesu ikai subelebelenge; si la kainganadha tupapalra nakwane.” 23Kwini lasu sa kilalra kikai vaga, la kasalivaalrau kasuulringa, asi lwiyane kwi lasu satacekecekelane turamuru.
24Kai Yesu la drele iniane, la iya kai, “Ku sapaiswane ku umawmase nau akawkawlu ki kuni ki Twaumase lu iya ala makucingalre! 25Ku sapaiswane ku umawmase nau akawkawlu ki kuni ki Twaumase lu iya makuciacingalreana ki lrakeda lu ngulratuku ki maca ki inamai!”
26Kudra kialalra kikai vaga ku laumawmase la kivaga, “Lwiyane kai, laika aneane ku lri maka dulru kipalribulu?”
27Ku Yesu la iya kai, “Ku kaika dulru ki umawmase, ku Twaumase wadulru patuelre.”
28Ki kikai, ku Pitiru la iya kai, “Drela, wacilringa nai ki tacekecekelane nai si kainganai tupapalranga muswane.”
29Ku Yesu la iya kai, “Unu, nau pudriadriingai pelaela numiane, sanaka pasiakai ki kuni ki Twaumase si cilri ki daaneini, labaibaini, labetakaneini ka sawvalai si labaibai, marudrawdrangeini, si lalalakeini, 30lri tara ikai kai zidai kaikameane tarumara ku makaakalra, si ikai ki mwabalrithi ka kawmasane kisupisupilri ku palralrawthu ka niake.”
Saka kingitulrulu ki Yesu pakanaswala pelaela ku apacadhaneini
(Matai 20.17-19; Maruku 10.32-34)
31Ku Yesu la iluku puthili ki ta 12 ka lasitu, si iya kai liniane, “Kaiasasane lri katwaseta mudradha mu Yerusalrime; ku lapacase ki layuginsia ku patharukai ki Lalake ki Umawmase lri ngimia patuelre. 32Lri alra iniane baai patarumara pikai ki alrima ki sakamaelanane ka umawmase; kwini lalasu lai lri tusinalrelreme sivavangane iniane, tusinalreme iniane, si sungangalrai iniane, 33la lri lrumai iniane, si papacai iniane; ai luka samakatulrulu ku vai, kwi lasu lri siela panianiake.”
34Kai lasituini pangukai kikai kadrwa ku pulringalringau lini, kikai pelaela ki Yesu kadrwa ku thingale lini, asi lwiyane kudra pacugane kwini vaga kaiyana mwataluvaivai athingalane.
Ku Yesu pawadringai ki mamukici ka kiciacia
(Matai 20.29-34; Maruku 10.46-52)
35Ku Yesu la kela mwa kwini adeethe talikai Yeriku, yakai ku tangea ku mamukici wanene ikai babiabila ki kadadalranane si abababange ku akaneane. 36Kwini lasu sa kilalra ki laumawmase lribalribate yai, la kivaga watumatumane kikai.
37La ikai ku umawmase ku peaelaela iniane, “Kudra swa Nazarethe ka Yesu walribalribate kikai.”
38Kikai lasu la tawtau iya kai, “Lalake ki Davidi ka Yesu, kakuruuaili!”
39Kudra yacucubungu iniane dadadavace ku umawmase la kaelaelathe iniane, si madha avavagavaga iya iniane. Ai kwi lasu arwakwadrawlringa tawtau iya kai, “Lalake ki Davidi, kakuruaili!”
40Lakamani kwidra ku Yesu idrengere, si padawlu alra iluku kwini ki mukimukici pucucubungu iniane. Sakela mucucubungu kwini lasu, la kivaga ku Yesu iniane, 41“Anitumane amiasu nakwane pasikai muswane?”
La tubalre kwini lasu, “Tamatama, nau dulru drele amiaku!”
42Ku Yesu la iya kai iniane, “Kusu ala drela! Kwini salrwanesu pawadringainga muswane.”
43Kwini mamukici la makakaai dulru drele, la katwasenga tupapalra ki Yesu, tarakadalranane drengedrengere ki Twaumase. Ku lamapapangale sadrele ki kikai, la makitu drengedrengere ki Twaumase.
Dewis Presennol:
Luka 18: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017