Matyu 7
7
Lailkad hettoɗiaknu nai
1Ag laa dilag ⌊oo ɠagattagppa⌋ aib epeɗiadppig. Ag anam epeɗiadkkulag dayeb amu, ag ele epeɗiak amubia aoglag. 2Aɗinu? Ag laa dilagppa epeɗiak kobol attenppa epeɗiadppeg amu, ag epeɗiak kobol amuppa aoglag. Ag lailkad dilagnu aɗi melemelppa keeke hetteb, ag melemel amuppaib geha keeke aoglag.
3Aɗinu na layap amegppa ad huppu nagnag gikkiakppanu daatte, na amunu neegttem, amge na nakka amenppa ad imuag laa daatte, na amunu dab-ii-mettem? 4Na dabmak attem aona, na layap amegppa, ‘Lai, da ad huppu nagnag gikkiakppanu na amenppa daatte amu aokkulnu hettem,’ attem? Na anam attem, amge na nakka na amenppa ad imuag dayakib daatte. 5Na am hambuppuak danab! Tatam na ad imuag na amenppa daatte mautppe na ukkeb, na pehettan neegnana, na layap amegppa ad huppu nagnag gikkiakppanu amu maute!
6Qai ag eɗun eheɗ emaladmananu amu, ag ahilag keeke oppiaawak ele aib madappig. Amu laa ele, bo ag baelagppa tappamnanu amu, ag ahilag kalele ena ena perlppa heppig amu aib madappig.
Danab unuqittak ɠagattag hekkunu nai
7Ag Kayak unuqidppeg, Nug ag madakku. Ag mattina, ag anidkkulag. Ag od qeqalppeg, Kayak Nug ahilagnu od matulkku. 8Aun nug Kayak unuqidtte, nug aotte. Aun nug maditte, nug anidtte. Aun nug od qeqaltte, Kayak Nug od matultte.
9Ag oolagppanu danab laa bekka nug mameg bret medakkunu oɗ metteb amu, mameg nug mente medakku? Iitta. 10O nid amu nug mameg kakai laa medakkunu oɗ metteb amu, mameg nug mat nau medakkute? Amu ele iitta 11amunu, ag nau aɗi ag genab keeke ena ag nid ahilkad mattaglagnu dootteb dayeb, genabnab ag Mamelag, hab attan daatte, Nug danab ag Nug unuqidppeg, Nug keeke ena ag madakku. 12Anam amunu, ag dahilad ag danab ag kobol atten ahilagppa hekkulagnu oolag daatte, ag kobol amuib ahilagppa heig! Ɗo nai, amu propet nai ele amuib ippunigkkunu daatte.
Bauklel ibnu nai
13Ag ib laa, ib amu oɗeppan od hogogdoak ele, ag amuppa noig! Aɗinu? Ib okkai padal mak abenppa gotte ele amu, nuhig od am okkainab, am danab ah kuɗum ag ib amu dim lamidtteb. 14Amge ib bauklel abenppa ukkak amu, nuhig od am hogogdoak, ib ele am hogogdoak amunu, danab ah laippu laippuib ag ib amu anidna gotteb.
Propet hambuppuaknu nai
15Ag propet hambuppuak dilag dabmeig! Propet hambuppuak ag, ‘Da Kayak ippu ippunadttem,’ aon atteb, amge amuam nai hambuppuak. Propet hambuppuak ag wulp sipsip emala lakkunu, sipsip gaɗa awa ma, sipsip oolagppa oitte, ag amubia oitteb. 16Ag propet hambuppuak dilag hakppa ag am propet hambuppuak anadna dooglag. Danab ah ag grep meu ad naunau qaun eleppanute aotteb? O ag ad fig meu uud qaun eleppanute aotteb? Iittanab. 17Anam amunu, ad ena oh ag meulkad ena otteb, amge ad nau ag meulkad nau otteb. 18Ad ena nug meu nau okkunu elele iitta; aria, ad nau nug meu ena okkunu elele iitta. 19Ad oh, ag meu ena ii otteb ele amu, danab ag oadna, aab aɗuppa akkaeg teeg eotteb. 20Amunu ag propet hambuppuak dilag hakppa ag am propet hambuppuak anadna dooglag.
21Danab ah ag da amelppa, ‘O Naɗi, O Naɗi,’ atteb ele, amu oh ag dahil ɗo maɗoɗ ooppa ii nomana. Iitta. Danab nug da Mamel, hab aabppa daatte, nug nuhig dabmak dim lamidtte ele, nugib dahil ɗo maɗoɗ ooppa nokku. 22Anam daatte amunu, epeɗiak deɗ naɗippa danab ah kuɗum ag da amelppa akkulag. ‘Naɗi, Naɗi, ig na oninppa propet nai iite mehuqmut? Na oninppa ele ouɗi nau iite lamadmut? Ig na oninppa kobol danab haknu elele iitta kuɗum laa iite hemut?’ 23Ag anam akkulag, amge da haen amuppa miag appi dooglag. ‘Da ag nakoknab laa ii doyadttem. Ag am eheɗ hak danab amunu, ag uuiɗna ukkeg!’ awe akkul.
Jesus Nug doyak dabmak ena elenu ippunittak nai mattiom
24Amunu danab nug nai dahil imu doya dim lamidtte amu, nug danab laa doyak dabmak ena ele, nug danab laa men qaɗeppa lag ukku aɗe, men aɗa dayeye, aria dimppa nug amu attan lag heum bia daatte. 25Nug lag he, gu ne, ui o, ulah ɠagattagnab ele heum, amge lag amu ii na qeum. Aɗinu? Danab amu nug lag amu ukku men qaɗeppa heum. 26Amge danab nug nai dahil doya ii dim lamidtte amu, nug am dabmak tutukku iittappa keeke laa hak danab, nug danab laa ihi qaɗeppa lag ukku aɗe, ihi aɗa dayeye, aria dimppa nug amu attan lag heum bia daatte. 27Lag he, gu ne, ui o, ulah ɠagattagnab ele heehe, lag amu na qeum. Amu genab nug na qa nauha auta awom,” awa aum.
28Jesus Nug nai amu mattia male, danab ah kuɗumnab amu ag Nug nai mattiom, ag amunu dabmak kuɗum aoppig. 29Aɗinu? Nug ahilag ɗo mehuqak danab nai ippunadppig bia ag ii ippuanattom. Iitta. Nug danab nug anam hekkunu ehah ele, Nug amubia nai ippuanattom.
Právě zvoleno:
Matyu 7: NB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.