Matyu 6
6
Danab ehanittaknu nai
1Laa ele ag dabmeig! Ahilag hak ena am danab anadkkulagnu aib heppig. Ag anam hekkulag amu, ag Mamelag, hab attan daatte, ag nuhigppanu nob ena ii aomna.
2Anam amunu, haen na daɗek danab ehanadttem amu, na hambuppuak danab ag nai doyak lakka, o iitta ib manppa ele danab ah ag binalag mekkulagnu hetteb, amubia ag muttub ele daɗek danab aib ehanadppig. Ag lokkumakppa heig! Da genab ag amelagppa attem. Hambuppuak danab, ag anam hetteb amu, ag ahilag hak amunu nob ena oh aakku aon malappig. 3Amunu haen na daɗek ehanadttem amu, na eppen naneh nug eppen naɗiap uɗat hette amu aib doyom. 4Na anam heppe amu, nahip oo doyak uɗat lokkumakppa dayebeb, na Mamen, Nug keeke lokkumak oh anidtte, Nug nob ena eɗua medakku.
Unuqittak kobol
5Amu haen ag unuqidtteb amu, ag hambuppuak danab ag nai doyak lag ooppa, o iitta ib oɗatleppa danab ah ag anadkkulagnu hippaidna daanna unuqidkkulagnu oolag okkai daatte amu, ag amubia aib heppig. Da genab ag amelagppa attem. Hambuppuak danab, ag anam hetteb amu, ag ahilag hak amunu nob ena oh aakku aon malappig. 6Amge haen na unuqidttem, na lag ooppa nona, od manona, na Mamen, Nug miag atiak ii daatte, na Nug unuqidppe, Nug keeke miag atiak iitta oh anidtte ele amu, Nug nob ena na medakku. 7Amunu haen ag unuqidtteb amu, ag iitta aɗi danab nai hamu kuɗum mattinna unuqidtteb, ag amubia aib heppig. Iitta aɗi ag atteb, ‘Ig nai kuɗum madipput amu Kayak Nug dookku,’ aon atteb, 8amge iitta aɗi ag kobol hetteb, ag amubia aib heppig. Ag, ag Mamelag ii unuqidkkulagnu ii digmeppig haenppa Nug ag keeke ohnu tutu metteb ele amu, Nug dootte. 9Am anam amunu, ag inam unuqitteg! ‘Ig Mamenig, na hab attan daattem. Na heppe, ig danab oh ig na onin am oppiaawak daatte dootu! 10Na heppe, ɗo maɗoɗ nahip wan imuppa daakkunu unuqidttem. Na heppe, hab aabppan daup ag nahip dabmak awak dim lamidna hetteb, amubia ig wanppa daattem ele dim lamidtu! 11Ig ee megattem amu, na gemunu ele megakkutnu na oɗ medattem. 12Laa hipunin megappig, ig uhuqta mattamut, amubia na hipunin ihinig uhuqna megakkutnu na unuqidttem. 13Na ippun ena, ig nau hekkunignu eeɗak iittappa omaigna, Satan eppegppanu awigkkutnu oɗ medattem.’ ” Jesus Nug anam aum.
14Jesus Nug anam ana, Nug nai tuɗitta aum. “Doyeg! Ag danab ah laa dilag hipunin ahilagppa hetteb uhuqna madappeg amu, ag Mamelag, hab aabppa daatte, Nug hipunin ahilag ele uhuqa madakku. 15Amge ag laa dilag hipunin ahilagppa hetteb uhuqna ii madappeg amu, ag Mamelag Nug ele ahilag hipunin uhuqa ii mattama.
Kud ma dayaknu nai
16Amu haen ag ee ohnu kud men daatteb amu, ag iɗulag aib tiguguɗom. Hambuppuak danab ag ee ohnu kud men daatteb, haen amuppa danab laa oh ag anam hetteb anidkkulagnu, ag heeg, iɗulag tiguguɗtte. Da genab ag amelagppa attem. Hambuppuak danab, ag anam hetteb amu, ag ahilag hak amunu nob ena oh aakku aon malappig. 17-18Amge danab ag na ee ohnu kud men daattem ii doomnanu, na ee ohnu kud men daanna, na iɗun ihan, ikkin qe! Na Mamen, Nug miag atiak ii daatte, Nugib dookku. Na Mamen, Nug keeke miag atiak iitta oh anidtte amu, Nug na nob ena eɗua medakku.
Wan enub qagmaknu nai
19Wan imuppa amu, keeke laala tiig qe, iitta mette, keeke laala dittuɗ laeg, iitta mette, amu yabhoi danab ele ag lag keeke loppaɗna, keeke yab aotteb amunu, ag wan imuppa en okkai ahilagnu aib qagmeppig. 20Amge ag ahilag en hab aabppa qagmeig! Hab aab appa amu, tiig qak, dittuɗ ele am keeke laa heeg ii nauhtte, amu yab danab laa ele dayaya, keeke yab ii aotte. 21Aben adekkuppa ag enulkad daatte ele amu, ahilag dabmak ele am appaib daakku.
22Na amen am, na beɗun laih laih oh amahlak madatte. Na amen ena dayeb amu, na beɗun laih laih oh am amahlak ele daaglag, 23amge na amen am nau dayeb amu, na beɗun laih laih laa oh am gatatu manak ooppa daaglag. Amunu amubia, na ootppa Kayak keekenu dabmekkutnu elele iitta daattem dayeb amu, na gatatu naunab ooppa daattem.
24Danab laippu nug gumak danab aɗit dilahnu uɗat hekkunu elele iitta. Am nug laanu oo mauhebeb, laanu amu nug ooppa nau ninig ele dookku. Doyaya, laaib amu nug dim lamittatta, laa amu dimedakku. Ag danab ah, ag Kayaknu uɗat, amu enub uɗat ele oh hekkulagnu elele iitta.
25Anam daatte amunu, da ag amelagppa attem. Ag wanppan bau dayaknu dabmak aqadna, ‘Ig ee le elete daagnig?,’ o iitta beɗulagnu, ‘Ig beɗunigppa takkaknu amu, ig lamen elete daagnig?’ aib appig. Bau dayak amu ee lanakib iitta, beɗu nug lamen takkaknuib ele iitta. 26Ag ai aakkud anatteg! Ag ee ii ebatteb, ag qagmena bakkalenu lakka ele ii metteb, amge ag Mamelag, hab aabppa daatte, Nug ai ee madatte. Ag Kayak amegppa ai iite eɗadtteb? 27Amu ag oolagppa aun nug wanppa dayaknu dabmak qeeqe, haen nuhig baula ele tuɗidtte? Elele iittanab.
28Am ag aɗinu lamennu dabmak aqadtte? Ag atuppan bala lili haɗag bena daatteb, ag amu anatteg! Ag uɗat ii hetteb, lamen ele ii hetteb, 29amge da ag amelagppa attem. Anukka Solomon nug bala nuhig oh meum, amge nuhig bala ena amu, am enanag bala haɗag amubia laa iitta. 30Ag antteg! Gikkiɗah gemu hippaitta daatte amu, butti ag okkulna, aab aɗuppa maoppeg tekku. Gikkiɗah am keeke hamu bia, amge Kayak Nug bala medatte amunu, ag tutukku doyeg! Kayak Nug ag ele genabnab dabmadakku. Ag oolagppa genab nakokib dootteb. 31Anam amunu, ag aib dabmak aqebeb, ‘Ig ee elete daagnig?’ o ‘Ig le elete daagnig?’ o ‘Ig lamen elete daagnig?’ appig. Iitta! 32Amuam iitta aɗi ag keeke amu ohnu hik aqadtte, amge ag dahilad amu, ag Mamelag, hab attan daatte, Nug ag keeke amu oh aoglagnu dootte. 33Amge tatam ag Kayaknu ɗo maɗoɗnu, amu genab tutukku kobol ele hekkulagnu anuqak dooppeg, geha Nug keeke amu oh ele ag madakku. 34Anam amunu, ag keeke buttinu aoglagnu dabmak aib aqom. Buttinu amu, nukka piɗe nuhig keekenu dabmekku. Am uug laa deɗ amuppa bekku amu, deɗ amunu am aakku elele.
Právě zvoleno:
Matyu 6: NB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.