Matyu 5
5
Jesus qaukoppa nai mehuqom
1Danab ah Jesus dim lamitteg, Nug danab ah kuɗumnab amu anatta, Nug qaukoppa nakok ta dayeye, nuhig ippunittak awak danab Nug gumidna uɗippig. 2Uɗieg amu Jesus Nug digma, nai matta aum.
3“Danab aun aɗi ag oolagppa, ag am elele iitta dootteb ele amu, ag itittak ena aoppig daatteb.
Aɗinu? Ag Kayaknu ɗo maɗoɗ ooppa daatteb.
4Danab aun aɗi ag oolagppa ⌊hipuninnu⌋ guittak dootteb ele amu, ag itittak ena aoppig daatteb.
Aɗinu? Ag oo mak aoglag.
5Danab aun aɗi ag akka, ag onig qe nak kobol hetteb ele amu, ag itittak ena aoppig daatteb.
Aɗinu? Ag wan imu oh aoglag.
6Danab aun aɗi ag Kayak noobppa genab tutukku daaglagnu oolagppa enug qak bia dootteb ele amu, ag itittak ena aoppig daatteb.
Aɗinu? Ag amu ambak aoglag.
7Danab aun aɗi ag danab laa dilagnu oo gai-iitta doon oolag mattan ehanadtteb ele amu, ag itittak ena aoppig daatteb.
Aɗinu? Dimppa ag eheɗppa daaglag amu, Kayak Nug oo gai-iitta doya oo matta ehanadkku.
8Danab aun aɗi ag oolagppa oppiak ele amu, ag itittak ena aoppig daatteb.
Aɗinu? Ag Kayak anidkkulag.
9Danab aun aɗi ag maɗoɗ ikki daatteb ele amu, ag itittak ena aoppig daatteb.
Aɗinu? Kayak Nug ahilagnu, ‘Ag am da bekkalad,’ awa akku.
10Danab aun aɗi ag genab tutukku hak kobol hetteb, amge danab laala ag amunu oo aeg bak doonna, eheɗ hadatteb ele amu, danab ag genab tutukku hetteb ele, ag itittak ena aoppig daatteb.
Aɗinu? Ag Kayaknu ɗo maɗoɗ ooppa daatteb.
11Ag da dim lamiɗtteb amunu, haen danab ag amu dabmetteb, ag ahilagnu nai nau anana, ag eheɗ hattanna, nai hambuppuak kuɗumppa ag yaaladna hetteb ele amu, ag dahilad amu, ag itittak ena aoppig daatteb. 12Danab kobol nau amu hetteb ele, anukka danab ag Kayaknu propet ele anam eheɗ hadappig amunu, ag gemu ahilagnu ele anam heppeg, aria, ag gamalag ahebeb, ag oolag enaib dayaɗ! Aɗinu? Nob ahilag hab attan am okkainab.
Ooppa genab doyak amuam, yu kalu, amahlak ele bia
13Ag amu wanppan yu kalu bia daatteb, amge yu kalu nug yu ubuhi iitta dayeb amu, attem hepput, nug eɗua ubuhi ele daakku? Yu kalu anam amu, nug uɗat iitta. Danab ag gokkaɗeg ukke, tappan gotteb. 14Ag amu wanppanu amahlak. Aab laa nug qaukoppa daatte amu, nug lokkumak ii daatte; laa lokkumkkunu elele iitta. 15Danab ag ele lam amotna, tappiɗ waappa ii metteb. Iitta. Ag lam maknu balal attan meeg, amahlak nuhig danab lakka daatteb, amu oh amahlak madatte. 16Amubia ag dahilad daatteb ele, laala ag ahilag kobol ena anidna, ag ag Mamelag, hab attan daatte amu, Nug binag mekkulagnu, ag ahilag amahlak danab amelagppa amahalaɗ!
Kayaknu ɗo nai
17Ag oolagppa da ɗo nai, amu propet nai ele heppi iitta mekkunu uɗimi aon aib appig. Da heppi, iitta mekkunu ii uɗimi. Iitta. Da elelenab medakkulnu uɗimi. 18Da genab ag amelagppa attem. Hab wan ele ii qettoɗak haenppa, haen aa daapepeɗ, ɗonu nai huppu nagnag laa, huppu laa oh dilag okkai am imu eɗidtte, huppu amu nuhig uɗat gogppa ii tak dayeb amu, huppu nagnag amu iinab qettoɗma. 19Amunu danab laa nug ɗo nai ooppa ɗo nakoknab laa tippala, nug danab laa ele ag amu hekkulagnu ippunadkku amu, nug onig Kayaknu ɗo maɗoɗppa nakoknab daakku, amge danab ɗo dim lamittatta, danab laa dim lamidkkulagnu ele ippunadkku amu, nug Kayaknu ɗo maɗoɗppa onig okkai ele daakku. 20Da tutukku ag amelagppa attem. Ahilag genab tutukku hak am ɗo mehuqak danab, ɗo gumak danab-Parasia ele dilag ii eɗadkku dayeb, ag Kayaknu ɗo maɗoɗppa nokkulagnu elele iittanab.
Danab qe mauhak kobol
21Anukka ag mamelkad aɗi ag nai laa aoppig amu ag nai amu dootteb. Nai amuam inam. ‘Na danab aib qeppe mauhom,’ amu, ‘Danab laa nug danab laa qeeb mauhkku amu, nug hettoɗiakppa daakku.’ 22Amge da ag amelagppa attem. Danab laa nug layagnu oo nauhkku dayeb, nug hettoɗiakppa daakku. Danab laa nug layag amegppa, ‘Na am genabnab danab kaaka,’ akku amu, nug hettoɗiak okkai onig Sanhidren, appa daakku. Amge laa nug layag amegppa, ‘Na am genabnab genab danab nau,’ akku amu, nug mua laa oh eɗattak, padal mak abenppa gokkunu hette. 23Amunu na nahip mana mettaknu keeke aon, qaɗabppa gona, na layap nug nahipnu nai ele daatte dabmekkut dayeb, 24na nahip mana mettak qaɗab guguittak meppe dayebeb, tatam goppe, layap ele oolah babaitteɗ! Babaittoya, aria, na eɗun gona, nahip mana mettaknu keeke main, Kayak mette!
25Aria, haen danab laa nug hettoɗiakppa meidkkunu heebeb amu, na heppe, aa oolah paha babaitteɗ! Aa ibppa goyaya, na anam he! Iitta amu, nug na epeɗiak danab noobppa meidkkutai. Meitteb, epeɗiak ikki nug hettoɗiaknu daup laa eppegppa meitteb, daup amu nug na maniguittakppa meidkkutai. 26Meitteb amu, da genab ag amelagppa attem. Na maniguittakppa daanna, nahip eheɗ hak nob ohnab eɗun medappe, ag od matulppeg, dimittim dokkut.
Ewau pakkua gappai hak
27Aria, ag mamelkad aɗi ag nai laa aoppig amu, ag nai amu dootteb. Nai amuam inam. ‘Na ewau aib pakkuna gappai heme,’ 28amge da ag amelagppa inam attem. Danab laa nug amegppaib ah laa antta, nug ele oiglahnu dabmette amu, danab amu nug ewau pakkua gappai hak kobol aakku heum. 29Amunu na amen naɗiap he, na hipunin hettem dayeb amu, na amen kehan, maoppe ukkaɗ! Na beɗun laih iitta ele dayebeb, ag na padal mak abenppa ii meidppeg am ena. Na beɗun oh ena dayebeb, padal mak abenppa gokkut am ena iitta. 30O na eppen naɗiap he, na hipunin hettem dayeb amu, na okkulna, maoppe ukkaɗ! Na beɗun laih iitta ele dayebeb, na padal mak abenppa ii meidppeg am ena. Na beɗun oh ena dayebeb, padal mak abenppa gokkut am ena iitta.
Ewau otaɗak kobol
31Anukka ag nai imu Moses oɗeppa ele aoppig. ‘Danab laa nug wau uuidkkunu hette amu, nug uɗug laa ewau okkulaknu ya medakku,’ 32amge da ag amelagppa attem. Danab aun nug wau ewau pakkua gappai ii heum ele, amge danab nug ewau ahilah otaɗtte, amu ah amu nug danab laa aotte dayeb amu, nug gamu tatamnu aakku he, ah nug ewau pakkua gappai hak kobol hette. Aria, danab nug ah amu dimppa aotte amu, nug ele ewau pakkua gappai hak kobol hette.
Nai ɠagattag qa mattiaknu kobol
33Aria, da baula ele attem. Anukka ag mamelkad ag nai aoppig amu, ag nai amu dootteb. Nai amuam inam. ‘Na nai nahip Naɗi noobppa, keeke laa onigppa ɠagattag qettana, aɗi keeke laa hekkutnu ame amu, na aakku he! Na nahip nai amu aib tippalme,’ 34amge da ag amelagppa attem. Na keeke laa hekkutnu anana, na nai nahip amu keeke laa onigppa ɠagattag aib qettame. Iittanab. Na hab onig aon, nahip nai aib ɠagattag qettame. Aɗinu? Amuam Kayaknu aben. 35Laa ele, na nahip nai wan onig aon, aib ɠagattag qettame. Aɗinu? Amu ele am Kayaknu; am baeg maknu balal nuhig bia. Aria, na nahip nai aab okkai Jerusalem onig aon, aib ɠagattag qettame. Aɗinu? Jerusalem amu King Naɗinu aben. 36Amu laa ele, na nahip nai na ikkin onig aon, aib ɠagattag qettame. Aɗinu? Na heppe, na ikkin uɗug laa aakku hakkab o hinqak bekkunu elele iittanab. Kayak nukka hekkunu elele. 37Ag, ‘Yo,’ akkulagnu dayeb amu, ‘Yo,’ akkulag. Am aakku elele. Aria, ag ‘Iitta,’ akkulagnu dayeb am, ‘Iitta,’ akkulag. Am aakku elele. Ag nai baula ele tuɗidna maditteb dayeb amu, amuam Satan he bette.
Eheɗ hak nob maknu
38Aria, ag anukka nai laa aoppig amu, ag nai amu dootteb. Nai amuam inam. ‘Laa nug laanu ameg heeb nauhkku dayeb, ag nug ameg heppeg nauhaɗ! O laa nug laanu aeg heeb qiikku amu, ag nug aeg heppeg qiiaɗ!’ 39Amge da ag amelagppa attem. Eheɗ hak danab aun nug ahilagppa eheɗ anam bia heeb, ag nuhigppa nob aib meppig. Am inam bia. Danab nug na hippen laih mataɗeb, na nob nau aib eɗun mettame. Iitta. Na hippen laih ele eɗun mette! 40Aria, danab nug na hettoɗiakppa meitta, lamen nakok elab nahip aokkunu oo hekku dayeb amu, na saket ele mette! 41Danab laa ehah amu hekkunu elele nug na nug ehanidppeppe, nug ele 1 kilomita gokkulahnu ɠagattag duttunitta heeb, na nug ele 2 kilomita ukkeɗ! 42Aria, danab nug keeke medakkutnu oɗ metteb amu, na mette! Amu aun nug nahip-ppanu lon aokkunu oɗ metteb amu, na medakkut.
Kekeɗ oo mettaknu
43Amu ag anukka nai laa ele aoppig amu ag nai amu dootteb. Nai amuam inam. ‘Na layapnu oot mauhkku, amge na kekeɗ nahipnu, na ootppa nau ninig ele doye!’ aon appig. 44Amge da ag amelagppa attem. Ag ahilkad kekeɗnu ag oolag mauhaɗ! Amu aun laala ag ahilagppa eheɗ hadatteb amu, ag Kayak ahilagnu unuqitteg! 45Amuppa ag Mamelag, hab attan daatte ele amu, ag Nug bekkod daaglag. Nug he, aam danab nau amu danab ena ele oh qaɗelagppa nette. Nug ele he, gu genab tutukku hak danab, amu genab tutukku hak danab iitta ele oh dilagppa nette. 46Amunu ag danab ahilagnu oolag mauhtte ele, ag amu dilagib oolag mauheb, ag aɗi nob ena aoglag? Takis awak danab ag ele anam iite hetteb? 47Ag lailkadib humadnana, ag danab laala kobol aɗippa ag eɗadtteb? Iitta aɗi danab ag ele amu iite hetteb? 48Anam amunu, ag Mamelag, hab aabppa daatte amu, Nug qa oppiaawak daatte, amubia ag qa oppiaawak dayeg!
Právě zvoleno:
Matyu 5: NB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2022, Wycliffe Bible Translators, Inc. All rights reserved.