Markos 15

Inyatubang de ti Jesus tu kán Pilato

1Nadid, tunay palla ti kadimadimang ay namágguhon u Saserdote hide, sakay u pinuno hide nu banuwan sakay u tagapagtoldu hide tu Kautusan, sakay u agum hide a pinuno nu Judio hide, namágguhunan de ni ánya gimitán diyay ni Jesus. Pinapungo di ti Jesus sakay inyangay de tu kán Pilato. 2Nikuna a katoy dán hod hide ay tinanung siya ni Pilato, “Hiko beman u hare nu Judio hide?”

Timmábbeg ti Jesus, “Kinagi mo dán.”

3Makpal a bintang u puno hide nu saserdote hide a kontara ni Jesus 4kanya tinanung siya a huway ni Pilato, “Bakin awan ka tumábbeg? Nasaneg mo u kakpal nu ibábbintang de niko.”

5Pero awan pade timmábbeg ti Jesus, kanya nagtaka ti Pilato.

Hinatulan a matay ti Jesus

(Mateo 27:15-26; Lukas 23:13-25; Juan 18:39—19:16)

6Kada kasayaan nu pággala-ala nu Judio hide tu kálluwas de ti Egipto ay ugale ni Pilato a magpalaya ti essa a pireso a gusto nu tolay hide a palayaán. 7Tehhod hod a essa a pireso a u ngahan na ay Barabas. Nepireso siya dipo kaguman siya tu nagribeldi hide sakay nakabuno nikuna a tehhod a kaguluwan. 8Makpal a immadene ni Pilato a inaged de a gimitán na a huway u ugale na a magpalaya ti pireso. 9Kanya tinanung hide ni Pilato, “Gusto moy beman a palayaán ko u Hare nu Judio hide?” 10Kinagi na iye dipo tukoy ni Pilato a u Saserdote hide ay managhile la hide ni Jesus kanya inyangay di hod siya nikuna.

11Pero sinássusutan nu puno hide, nu Saserdote hide u tolay hide a ti Barabas u agidán de a palayaán na bakán a ti Jesus. 12Kanya tinanung hide a huway ni Pilato, “Ánya nadid u gimitán ko ti tolayáy a dáddulawán moy a Hare nu Judio hide?” 13Pimmákhaw u tolay hide, “Ipako siya tu kudus!” 14Kinagi ni Pilato nide, “Bakin, ánya u kasalanan na?” Pero mas lalo pa a pimmákhaw u tolay hide, “Ipako siya tu kudus!” 15Dipo gusto ni Pilato a pagbigyan u tolay hide ay pinalaya na ti Barabas. Sakay pinabálbág na ti Jesus sakay impeatád na tu sundalo hide para ipako de tu kudus.

Sineste nu Sundalo hide ti Jesus

(Mateo 27:27-31; Juan 19:2-3)

16Inyangay nu sundalo hide ti Jesus tu disalad nu kudal nu bilay nu gubernador, sakay pinaipun di hod u atanan a sundalo. 17Sakay sinulutan de ti Jesus ti badu a kurol ni ubi. Sakay nangalap hide ti saet a ginimet de a kurona, sakay indátton de tu ulo ni Jesus, a kurona na. 18Káttapos ay impákhaw de a sineste, “Mabiyag u Hare nu Judio hide!” 19Sakay binakád-bakád de siya, sakay linoktaben de siya, sakay nagkukunware a limmuhud nikuna. 20Káttapos de a lokuwán ti Jesus ay ineklasan de tu badu na a kurol ubi sakay insulot de u date na a damit. Káttapos ay inyangay de siya tu luwas nu banuwan para ipako tu kudus.

Impako de ti Jesus tu Kudus

(Mateo 27:32-44; Lukas 23:26-43; Juan 19:17-27)

21Mentaras a maglakad hide ay natagbu de ti Simon a taga-Cirene a ama di Alejandro ay ti Rufo, gábwat siya tu uma na. Pilit de a impabáklay nikuna u kudus ni Jesus. 22Inyangay de ti Jesus tu lugar a ngángngahanan de a Golgota, a u gusto na a kagiyán ay lugar ni bungo. 23Káddemát di hod ay inatádden de ti Jesus ti alak a te halo a mira. Pero awan na iye ininom. 24Sakay impako de ti Jesus tu kudus sakay pinaghati-hati de u damit na, tu pamamagitan nu bunutan. 25Alas nuwebe ti dimadimang nikuna a ipako de ti Jesus tu kudus. 26Sakay nakasulat tu ontok nu kudus u bintang de nikuna. “U hare nu Judio hide.” 27Te duwwa be a mágtakaw a impako tu kudus a kasabay ni Jesus, essa tu kawanan na sakay essa be tu kawihe na. 28Ti nangyariyan iye ay natupad u kinagi tu kasulatan a, “Nebilang siya a mágbabono.”

29Nadid, u magtaleb hod hide ay áinsultuwán de ti Jesus, kinagi de, “Hala! Hiko bál u manghábba tu Templo, sakay ipataknág mo a huway tu alay nu tállo a aldew? 30Umogsad ka ti kuduse sakay iligtas mo i sadile muwe!” 31Konna bi hod u pángdusta nikuna nu puno hide nu Saserdote hide sakay tu tagapagtoldu hide tu Kautusan. Kinagi de tu balang essa, “Inligtas na u agum, pero awan na meligtas u sadile na! 32Ni ketan tam a umogsad ti kuduse i Hari kane ti Israel ay maniwala kitamon nikuna a siya u Cristo!”

Sakay sinesti be siya nu duwwa a nepako a kaguman na.

U Kákkatay ni Jesus

(Mateo 27:45-56; Lukas 23:44-49; Juan 19:28-30)

33Nikuna a tanghale dán ay nagdiham u buo a luta hanggan alas tres ti apon. 34Nikuna a mag-alas tres dán ti apon ay pimmákhaw ti Jesus ti mabegsák, “Eloi, Eloi, Lema Sabachthani?” a u gusto na a kagiyán ay “Diyos ko, Diyos ko, bakin a pinabayanák mo?”

35Nikuna a masaneg itod nu mágtaknág hod hide, ay kinagi de, “Sanigán moy, dáddulawan na ti Elias!” 36Agad be a nagginan u essa a tolay a nángngay ti damit, sakay binisa na ti suka, sakay indátton na tu ontok nu kayo, sakay impasápsáp na ni Jesus. Sakay kinagi na, “Ilingán tam ped ni dumemát ti Elias a máng-ogsad nikuna ti kuduse.” 37Pimmákhaw ti mabegsák ti Jesus sakay káttapos ay nahángsatan dán siya.

38Ti itod be ay bigla a nahate u kortina tu disalad nu Templo, sapul ti ontok hanggan ti sidung.#15:38 Basaán tu Hebreo 10:19-20. 39Mágtaknág tu atubang nu kudus u kapitan nu sundalo hide. Kaya netan na ni kodya a nahángsatan ti Jesus. Kinagi na, “Tatahoden ngane a Anak nu Diyos i tolayan iye!”#15:39 Basaán tu Markos 1:11; 9:7. 40Katoy bi hod u sangan a bábbey a mágtannaw tu adeyo. Kaguman ti Maria Magdalena, ti Salome, sakay ti Maria a ina ni Jose sakay ti Santiago a dipos de.#15:40 Basaán tu Juan 19:25. 41Iye hide a bábbey ay lagi a mákkuyoyog ni Jesus sakay tumáttulung nikuna tu itod, nikuna a katoy palla siya ti Galilea. Katoy bi hod u agum a bábbey a kaguman ni Jesus a immangay ti Jerusalem.

U Páglábbáng ni Jesus

42-43Nikuna a mágdiha-diham dán ay dummemát ti Jose a taga-Arimatea, essa siya a igággalang a miyembro nu Sanedrin. Maguhay be siya tu káddemát nu pághare nu Diyos. Dipo tu itod ay aldew nu pághanda, oni dispiras nu Aldew nu Káimang ay nagbegsák isip siya a ummadene ni Pilato para agidán na u bangkay ni Jesus. 44Nikuna a masaneg ni Pilato a patay dán ti Jesus ay nagtaka siya. Kanya impadulaw na u kapitan nu sundalo hide sakay tinanung na ni nalay dán a natay ti Jesus. 45Sakay nikuna a masaneg ni Pilato tu kapitan a patay dán ti Jesus ay pinayagan na ti Jose a alapán u bangkay ni Jesus. 46Namale ti Jose ti mapudew a damit a lino a pangbalut na tu bangkay. Nikuna a me-ogsad na u bangkay ni Jesus ay binalutan na tu damit sakay tulos na a inlábbáng tu kuweba a páglábbangngan de. Impagulung na u dakál a bito a nangtakáp de tu pintuwan nu páglábbángngan de. 47Netan di Maria Magdalena sakay ti Maria a ina ni Jose u nánglábbángngan de ni Jesus.

Právě zvoleno:

Markos 15: MBJC

Zvýraznění

Sdílet

Kopírovat