Markos 16

Nabiyag a Huway ti Jesus

(Mateo 28:1-8; Lukas 24:1-12; Juan 20:1-10)

1Nadid, kállipas nu Aldew nu Káimang, di Maria Magdalena, ti Maria a ina ni Santiago, sakay ti Salome ay namale ti pangpasáppot para tu bangkay ni Jesus. 2Nikuna a dimadimang tu Aldew nu simba ay maagap hide a immangay hod tu lábbang ni Jesus. 3Mentaras a maglakad hide ay namágtanungan hide tu bawat essa. “Deya wád maare tamay a kauhunán para mánggulung tu bito a dakál a takáp nu páglábbángngan?” 4Nakagi de itod dipo tunay ti kadakál u bito. Pero tu káddemát di hod ay netan de a negulung dán u bito a takáp nu pintuwan. 5Sakay simmáddáp hide tu páglábbángngan, tehhod hide a netan a essa a lállake a nakabadu ti malayon sakay mapudew a damit, sakay mággetnod siya tu danág ti kawanan. Kanya tunay u ánteng de. 6Pero kinagi na nide, “Dyan kam manteng! Tukoy ko a ehyukán moy ti Jesus a taga-Nazaret a nepako tu kudus. Awan dán he siya. Biniyag dán siya a huway nu Diyos! Ilingán moy u pinángdáttonan tu bangkay na.” 7Káttapos ay kinagi nu lállake nide, “Sumole kamon, sakay kagiyán moy tu disepulus na hide, lalo dán ni Pedro, a mágdipalongo siya nikam ti Galilea. Hod moy hod siya a ketan a konna tu kinagi na nikam.” 8Lummuwas hide tu páglábbángngan sakay nággaginanán hide a lummakad, magpágpág hide sakay magulu u isip de. Awan hide ti ingkagi a ányaman maskin deya dipo tu ánteng de.

9[Dimadimang palla tu Aldew nu simba ay nabiyag a huway ti Jesus. Dipalongo na a pimmetaan ay ti Maria Magdalena. Siya u bábbey a inibutan na ti pitto a madukás a ispirito. 10Immangay siya tu disepulus hide ni Jesus, para ibaheta na nide u netan na. Nedemáttan na hide a maglungkut sakay mágsasangitán. 11Pero awan hide maniwala tu baheta na a biyag ti Jesus sakay pimmeta nikuna.]

Pimmeta ti Jesus tu Duwwa a Disepulus

(Lukas 24:13-35)

12Káttapos ni itod, nikuna a pasiyaan a maglakad u duwwa na a disepulus a patamo tu baryo ay pimmeta nide ti Jesus, pero awan di siya natengge dipo nagbagu u hupa na. 13Simmole hide tu kakagumanan de hide sakay imbaheta de nide u nangyare, pero umád de a maniwala.

14Káttapos ay pummeta ti Jesus tu sapulo ay ti essa a disepulus na nikuna a pasiyaan hide a kuman. Pinágngállan na hide dipo tu awan de pánniwala nikuna sakay dipo tu kaigáttan nu ulo de, dipo umád de a maniwala tu nángbaheta nide a nabiyag siya a huway. 15Sakay kinagi nide ni Jesus, “Umangay kam tu buo a mundu sakay ipangaral moy u Maganda a Baheta tu atanan a tolay. 16U sumampalataya sakay magpabawtismo ay maligtas, pero u umád a sumampalataya ay maparusaan. 17U sumampalataya hide ay atádden ti kapangyariyan a maggimet ti makataka-taka a bagay: tu ngahan ko ay magpalayas hide ti mágkadukás a ispirito sakay makapagupos hide ti iba-iba a upos. 18Maski ni mangkáppot man hide ti ulag oni make-inom ti lason ay awan hide maaánya; sakay magpiyya u te saket hide a tupuwan de tu kamát de.”

U Kássole ni Jesus ti Langet

(Lukas 24:50-53; Gimet 1:9-11)

19Nadid káttapos ni Jesus a nagupos nide ay inyontok siya ti langet sakay nággetnod tu kawanan nu Diyos. 20U disepulus na hide ay immangay ngani tu iba-iba a lugar sakay nagtoldu. Tinulungan hide nu Panginoon ti itod a gawain. Pinatunayan nu Panginoon tu tolay hide a tahod u impáppangaral de tu pamamag-itan nu pággimet ti makataka-taka a bagay a inpagkaluub na nide.

U Apehet a Págtapos nu Maganda a Baheta ayun ni Markos

[9 Ummangay u bábbey hide tu kán Pedro sakay tu kaguman na hide, sakay insaysay de u atanan a nakagi nide. 10 Káttapos ay inutusan ni Jesus u disepulus na hide a ipangaral tu atanan a suluk ni munduwáy u banal sakay a awan maglilipas a baheta nu kaligtasan a awan ti kahád.]

Právě zvoleno:

Markos 16: MBJC

Zvýraznění

Sdílet

Kopírovat