Markos 14

U Plano a Pángbuno ni Jesus

(Mateo 26:1-5; Lukas 22:1-2; Juan 11:45-53)

1Duwwa dálla a aldew ay piyesta dán nu pággala-ala nu Judio hide tu kálluwas de ti Egipto, sakay Piyesta be nu tinapay a awan ti Págpaalsa. Nadid, u puno nu saserdote hide sakay u eskriba hide a maisto nu Kautusan ay pinamágguhunan de ni kodya de a ipadakáp ti Jesus a awan ti makatukoy sakay pabuno de. 2Kinagi de, “Diyan tam gimitán tu Piyesta, dipo makay magulo u tolay hide.”

Binulakan ti Jesus ti Pabango

(Mateo 26:6-13; Juan 12:1-8)

3Nadid, nikuna a katoy ti Jesus tu banuwan a Betania. Mentaras a kuman siya tu bilay ni Simon, a date a te ketong ay dimmemát u essa a bábbey. Tehhod siya a tawed a mamahalin a pabango a keasák tu bote, gábwat itod tu mula a nardo tunay itod ti kamahal. Binássag na u bote sakay imbulak na tu ulo ni Jesus. 4Nagingál u sangan tu tolay hod hide, kinagi de, “Bakin a sássayangán na i pabango we? 5Inlako na nakwa ina dipo u halaga na ay sataon a suweldu nu essa a tarahabador, Sakay u naglakuwan na a pilak ay meatád tu mágkahirap hide!” Sakay nagingál hide tu bábbey.

6Pero kinagi ni Jesus, “Pabayan moy la siya! Bakin a rebukán moy siya? Maganda u ginimet na nikán. 7Dipo u mágkahirap ay pirme moy la a kaguman sakay maare kam a tumulung nide, maski ánya a odas. Pero awanák moy lagi a kakaguman. 8Ginimet nala u makaya na para nikán. Iye ay pánghanda tu káddemát nu pánglábbáng nikán.#14:8 Basaán tu Juan 19:40. 9Tandaan moy, maski hádya a ipangaral u Maganda a Baheta ay mabanggit dila u ginimet na bilang pággala-ala nikuna.”

U Pángtokyon ni Judas ni Jesus

(Mateo 26:14-16; Lukas 22:3-6)

10Nadid, ti Judas Iscariote, a essa tu sapulo ay ti duwwa a disepulus ni Jesus ay immangay tu puno nu saserdote hide para itokyon na ti Jesus. 11Masaya hide tu kinagi ni Judas sakay impananto de a atádden di siya ti pilak. Sapul hod ay naguhay dán ti Judas ti pagkakataun a metokyon na ti Jesus.

U Katapusan a Pangapon

(Mateo 26:17-25; Lukas 22:7-14, 21-23; Juan 13:21-30)

12Tu dipalongo a aldew nu Piyesta nu tinapay a awan ti Págpaalsa, aldew be nu págbuno de ti tupa para tu Piyesta nu aldew nu págtaleb. Tinanung nu disepulus na hide ti Jesus, “Hádya i gustu muway a pánghandaan me tu pangapon tam para tu Piyesta nu pággala-ala?” 13Kanya inutusan ni Jesus u duwwa na a disepulus, kinagi na, “Angay kam tu banuwan a Jerusalem. Káddemát moy hod ay te matagbu kam a lállake a te báklay a banga a putat ti dinom. Unonudán moy siya 14hanggan tu bilay a sáddáppan na, ‘Sakay kagiyán moy tu makákkao tu bilay, “Ipetanung ben nu Maisto ni tehhod kam a kuwarto a maare na a pangapunan sakay tu disepulus na hide, para tu Piyesta nu pággala-ala.”’ 15Ipeta na nikam u dakál a kuwarto tu ontok nu bilay. Nakahanda dán itod para nikitam kaya ihanda moy dán u pangapon tam.”

16Naglakad ngani u duwwa na a disepulus, sakay nikuna a makademát hide tu banuwan ay netan de u atanan a kinagi ni Jesus nide. Sakay inhanda di hod u pangapon de a para tu Piyesta nu pággala-ala.

17Nikuna a gibi dán ay dimmemát di Jesus, sakay u sapulo ay ti duwwa a disepulus na. 18Mentaras a kuman hide ay kinagi ni Jesus: “Tandaan moy iye: te essa he nikam a katubang ko a kuman u mángtokyon nikán.” 19Nalungkut u disepulus na hide nikuna a masaneg di iye, kanya u bawat essa nide ay nagtanung ni Jesus, “Hikán beman Panginoon?” 20Kinagi ni Jesus nide, “U essa nikam a sapulo ay ti duwwa a kasabay ko a mángsawsaw ti tinapayáy ti malukungáy ay siya u mángtokyon nikán. 21Hikán a anak nu tolay ay bunuwán, ayun tu kinagi nu Kasulatan, pero kakagbi u tolay a mángtokyon nikán! Mas maganda pa ni awan dálla neenak i tolayan iye.”

U Banal a Pangapon nu Panginoon

(Mateo 26:26-30; Lukas 22:15-20; 1 Corinto 11:23-25)

22Mentaras a kuman hide ay nangalap ti Jesus ti tinapay sakay nagpasalamat tu Diyos. Nikuna a matapos dán siya a magpasalamat ay tináppeng-táppeng na sakay inyatád na tu disepulus na hide. Kinagi na, “Alapán moy iye; iye u bággi ko.” 23Káttapos, ay nangalap siya ti tasa a te alak. Nagpasalamat siya tu Diyos sakay káttapos ay inyatád na tu disepulus na hide, sakay imminom hide a atanan.#14:23 Basaán tu 1 Corinto 10:16. 24Kinagi ni Jesus nide, “Iye u dige ko a nebuhus para tu makpal a tolay. Iye u mangpatunay a tehhod dán a bigu a kasunduwan u Diyos sakay u tolay. 25Tandaan moy, awanák dán uminom ti áinumán a gábwat tu ubas hanggan tu aldew a inumán ko u bigu a alak a áinumán tu kahariyan nu Diyos.”

26Nágkansiyon hide ti papure tu Diyos sakay káttapos ay ummangay hide tu buked a Olibu.

Ipamen ni Pedro ti Jesus

(Mateo 26:31-35; Lukas 22:31-34; Juan 13:36-38)

27Nadid, kinagi ni Jesus tu disepulus na hide, “Lakadinák moy a atanan, dipo kinagi nu Diyos tu Kasulatan, ‘Bunuwán ko u pastol sakay u tupa hide a inalagaan na ay magkalat.’ 28Pero ni mabiyagák dán a huway ay mágdipalonguwák nikam a umangay ti Galilea.”#14:28 Basaán tu Markos 16:7. 29Kinagi ni Pedro ni Jesus, “Maski ni lakaden ka nu atanan ay awan taka lakaden.”

30Tinábbeg siya ni Jesus, “Tandaan mo, bagu a magtarakket ti pumenduwwa u manok nadid a gibi ay pentálluwák mo a ipamen.” 31Pero impilit la ni Pedro, “Maski ni bunuwánnák de a kaguman mo ay awan taka ipamen.” Konna bi hod u kinagi nu agum a disepulus na.

Nagdasal ti Jesus ti Getsemani

(Mateo 26:36-46; Lukas 22:39-46)

32Nadid, immangay hide tu lugar a Getsemani u ngahan na. Káddemát di hod ay kinagi ni Jesus nide, “Mággetnod kam pa he mentaras magdasalák.” 33Ingkuyog na di Pedro, Santiago, sakay ti Juan. Nadid, nabalisa siya a tahod. 34Kinagi na nide, “Mabalisaák a tahod a ngahi-ngahiyák a matay! Maguhay kampa he diyan kam mátdug.”#14:34 Basaán tu Juan 12:27. 35Immadeyo siya ti badit, tu disepulus na hide sakay dimmapa siya a nagdasal ani maare ay diyan na dán madanas u paghihirap a dumemát nikuna. 36Impagdasal na, “Ama, Ama ko! Tukoy ko a magimet mo u atanan a bagay. Ni maare ay diyanák mo ped pabayan a maghirap. Pero bakán a u kagustuwan ko u masunud nan u kagustuwan mo.”

37Nadid, tu kássole na tu tállo na a disepulus ay nedemáttan na u tállo a tidug kanya linukag na hide sakay kinagi na ni Pedro, “Simon bakin tidug ka? Awan ka beman makapagbantay maski ni essa la a odas mentaras a magdasalák?” 38Sakay kinagi na nide, “Dyan kam mátdug magdasal kam tán awan kam matokso. Nakahanda u ispirito, pero mahina u bággi moy.”

39Immadeyo a huway ti Jesus sakay nagdasal, indasal na a huway u purumero na a indasal. 40Káttapos ay simmole a huway ti Jesus tu disepulus na hide sakay dinemáttan na dámman hide a tidug, dipo garabi u tongka de. Nikuna a malukag hide ay awan de tukoy ni ánya u kagiyán de ni Jesus.

41Tu katállo a sole ni Jesus ay kinagi na nide, “Tidug kam sakay umimang? Tama dán ina! Dummemát dán u odas a pángtokyon di nikán tu makasalanan hide a tolay. 42Umikat kamon ta kadtamon atoy dán u tolay a mángtokyon nikán.”

U Pángdakáp de ni Jesus

(Mateo 26:47-56; Lukas 22:47-53; Juan 18:3-12)

43Magupos palla ti Jesus nikuna a dumemát ti Judas, a essa tu sapulo ay ti duwwa a disepulus na, makpal siya a kaguman a tolay a te mangaáttak sakay gahote. Inutusan hide nu puno hide nu Saserdote hide, sakay u tagapagtoldu hide tu Kautusan, sakay tu puno hide nu banuwan. 44Bagu hide a dinumemát ay kinagiyan dán ni Judas u tolay hide, “Ni ti deya u ámmuwan ko ay siya itod. Dakáppán moy siya sakay bantayan ti husto.”

45Kanya tu káddemát ni Judas ay pagdaka siya a immadene ni Jesus. Sakay kinagi na, “Maisto!” káttapos ay inámmuwan na siya. 46Tu pákketa nu tolay hide ay pagdaka de a tinawiden ti Jesus sakay dinakáp. 47Binagut nu essa a disepulus ni Jesus u áttak na, sakay tinegpas na u alipin nu puno nu Saserdote hide, kanya nahipang u talinga na. 48Kinagi ni Jesus tu nangdakáp hide nikuna, “Ányaák mágbabono? Kaya kam a immangay he a te tawed a áttak sakay gahote dakáppánnák moy? 49Aldew-Aldiwák a magtoldu tu Templo. Bakin awanák moy hod dinakáp? Pero kailangan a matupad u kinagi nu prupeta tu Kasulatan nu Diyos.”

50Ginuminan u atanan nu disepulus na hide sakay inwahak di siya.

51Timmagubet ni Jesus u essa a ulito a nakabadu la ti lino. Hinagad siya nu katolayan 52pero ginuminan siya, newahak na u alikábkáb na kaya uba siya a nággaginanán.

Inyatubang de ti Jesus tu Gurupo nu Judio hide a te Katungkulan

(Mateo 26:47-56; Lukas 22:47-53; Juan 18:3-12)

53Nadid, inyangay de ti Jesus tu bilay nu kapunuwan a Saserdote; naipun dán hod u atanan a puno nu Judio hide. 54Immunonod bi hod ti Pedro, pero adeyo la u distansiya na ni Jesus. Simmáddáp siya tu sássáddáppan nu bilay nu pinakapuno nu Saserdote hide, sakay nákpággetnod siya tu mágbantay hide a magendu tu apoy. 55Nadid, u puno hide nu mágkataas a Saserdote sakay u buo a gurupo ay magehyok hide ti ibintang de ni Jesus tán te dahilan hide a mangpabuno nikuna. Pero awan hide ti ketan. 56Makpal u nagtistigu ti kakabuliyan a kontara ni Jesus, pero awan pari-pareho u kinákkagi de.

57Tehhod a sangan a nagtistigo ti kakabuliyan a kontara ni Jesus kinagi de: 58“Nasaneg me a kinagi na, ‘Hábbaán ko u Templo a ginimet ni tolay, pero tu alay nu tállo a aldew ay maggimiták ti bigu a Templo a awan magimet ni tolay.’” 59Pero awan labe mamágkapareho u kinákkagi de.

60Timmaknág u pinakapuno nu Saserdote hide tu atubang de, sakay tinanung na ti Jesus, “Ánya u makagi mo tu kinákkagi de kontara niko?” 61Pero awan ti kákkagi ti Jesus; kanya tinanung siya a huway nu pinakapuno nu Saserdote hide, “Hiko beman u Cristo a anak nu kataas-taasan a Diyos?”

62Nadid ay nagupos dán ti Jesus, kinagi na, “Hikán ngane, sakay hikán a Anak nu Tolay ay ketan moy, a mággetnod tu kawanan nu makapangyariyan a Diyos. Sakay ketan moy u káddemát kuhe ti munduwáy a kaguman nu diklám ti langet.” 63Nikuna a masaneg iye nu puno nu Saserdote hide ay pinisad na u damit na dipo tu ingál na sakay kinagi na, “Awan tamon kailangan ti magtistigu! 64Nasaneg moy u kinagi na a kontara tu Diyos. Ánya u gusto moy a gimitán tam nikuna?”

Nadid ay kinagi de a atanan a kailangan siya a bunuwán.

65Linoktaben siya nu agum a katoy hod. Pinángngássan de, sakay sinuntuk de. Pinatukoy dipa ni ti deya nangsuntukay nikuna, sakay binálbág siya nu mágbantay hide.

Impamen ni Pedro ti Jesus

(Mateo 26:69-75; Lukas 22:56-62; Juan 18:15-18, 25-27)

66Nikuna a hed palla ti Pedro tu luwas nu pintuwan ay dimmemát u essa a bábbey a alipin nu puno nu Saserdote hide. 67Nikuna a ketan na ti Pedro a magendu tu adene nu apoy ay minámmalas na siya sakay kinagi na, “Awan beman kaguman ka be ni Jesus a taga-Nazaret?” 68Pero impamen ni Pedro, kinagi na, “Awan ku tukoy i kákkagiyán muwe.” Káttapos ay limmakad hod siya sakay limmuwas siya tu kállakad na ay nagtarakket u tandang. 69Netan dámman hod siya nu bábbey a alipin, kanya kinagi nu bábbey tu tolay hide a katoy hod, “I tolayan ina ay essa be a kakagumanan ni Jesus.” 70Pero huway a impamen ni Pedro.

Mamaya-maya ay kinagi nu tolay hide a katoy hod, “Diyan mudán ipamen a essa ka nide. Taga-Galilea ka awan beman?”

71Kinagi ni Pedro, “Isumpa ko, maski ni parusaanák nu Diyos ni magbuli-buliyák, awan ko matengge i tolayan itona.” 72Nagtarakket dámman u tandang. Kanya naala-ala ni Pedro u kinagi ni Jesus nikuna a, “Bagu a magtarakket u manok ti pumenduwwa ay pumentálluwák mo a ipamen.” Kanya nágsasangitán siya ti husto.

Právě zvoleno:

Markos 14: MBJC

Zvýraznění

Sdílet

Kopírovat