Fartottit hi Abittot 20
20
Bawlos Makedooniya kee Giriikille
1Amaa cigirgir dhamaxe gedda, Bawlos amaa katattaynitih akah deecimeh, ten aydukumusek sarrah, mecaanille yerhxeh, Makedooniyah gabolle ugute. 2Amaa akko tillaabinnan zoobälle xiyaw aydukumusak lel Giriikille yemeete. 3Amalle adooxa alsa sugeh, Suuriya fanah doonikih yadaw farhak lel, Yahuud uma xagara alle abeenimhi sabbatah, Makedooniyaako abeh gaxo abayshe. 4Kaa goorisheh yine mari lel, Beroyaako kin Birrosti barha Soopatros yakke Tessaloniikeeko kin Aristarkhos kee Sekundos, Derbeeko kin Gaayos, Timoteyos kee Aasiyaati zoobäako kin Tikhikos kee Tiroofimos kuuk yinin. 5Ta mari ni afadde yedeynih Tirooyasulle ni ilaalen. 6Nanu laakin Cadublat Xabazahi cidko sarrah, Filibbiiko doonikih ugunneh koona lellecille Tirooyasulle tenalle nemeeteh, amalle malxina lellec sugne.
Eytikhos rabaako uguta
7Baxuurooko erherh lellecidde, kinnas nagdalo nekette gedda, Bawlos aalih waanishe. Malammit max yadaw kinamhi sabbatah lel ishi waani barti-abrha fanah yeyrheerhe. 8Tamaa nanu adde neketteh nine bukat caredde lel mango fawaanis yine. 9Eytikhos akko yarhxin burguddi finistirat agaagalle defeyeh yineya lel Bawlos waani yeyrheerhe gedda mangum cundugule. Dhin kaa beyeh lel maddaxit darajaako baarholle radeyaako rabeh kaa yooqhocin. 10Bawlos lel oobeyaako kaa bukalle cunuuneh, yuxqufeh xaf kaa isheyaako: “Wafaalih yanek mibirriigina” yerhxe. 11Bawlos aganalle koreh kinnas yigdileyaako beeteh aykee baarho maxtandah mangum tenlih waanishe. Sarrah lel yedee. 12Amaa gombo wafaalih sinneelih beyen, naba aydukumusnan lel kuuk yine.
13Bawlos doonikidde korishno farhnemhi sabbatah, nanu nookomeh doonikih Assos fanah nedee. Tayim abnem lel, Bawlos ibah aykee Assos fanah yadaw yixiggireh, nottah lel amayim abno noh warishemhi sabbatah kinni. 14Assosulle kaalih sittiya geyne gedda lel, doonikidde kaa korishneh Mitileene fanah nedee. 15Amakkeeko ugunneh lel doonikih nedeeh malammit Khiyosti waacina gufne, malammit max lel Samosulle tabne, sarrat max lel Mileetos fanah nedee. 16Bawlos yekkemko, Bentheqostheeti cidih Yerusaalemille yakko afitemhi sabbatah, Aasiyaati zoobälle caawinnamko ciloh, Efesosko tillabno abaysheh yine.
Bawlos Efesosulle kaniisat naba maraalih waanisha
17Bawlos Mileetosko Efesos fanah farto fareyaako, amaa kaniisat naba mari kaalle yamaatoona akah deecime. 18Kayyalle yemeetin gedda lel tahe akko yerhxe: “Tamaa Aasiyaati zoobädde inni iba ishshicite afti maxko erherhisheh, umman gedda sinlih aaginah iniyom atin sinneh taarhigin. 19Yahuud uma xagararah cakanadde sayak iniyo hanik, amnonobba hinnim dhiimoolih Maddara akhdumiyuk iniyo. 20Tamficemko takkanna inkoh sinah warroysheh, irolle yakko care-careh adiyuk sin uydurusenkah sinak uynuqhusem maliyo. 21Amaye balih Yahuud kee Giriik yotoobiinih Yallalle gaxoona kee ni Maddara kin Yeesusuh yaamanoona ishhide. 22Kado, taykinna lel Ufayi yi qasbisheh Yerusaalem fanah adiyuk ane. Amalle lel ayim yok sugtam maarhige. 23Madhdhuwa kee hadaano yi ilaalak tanem Quddus kin Ufayi umbuka daafofulle yoh warisheya kibah, aarhigem maliyo. 24#2 Timoteyos 4:7Maddara kin Yeesusko yoh yomxoye arax kee khidma abaysho ciloh laakin inni aniina limo letiyäh tee maable. Amayim lel Yallih nicma kin mece warehi shaahid yakkiinim kinni. 25Kado lel, taykinna, inkoh nigsinna akah warroyshe maraako, malammih yi nif walaa inketti yablo makinam eerhegeh aniyo. 26Amaydo, sin biilooko inkoh barii kiyomuh kaafa sinah ashhiduk aniyo. 27Amayim lel inkoh Yallih farhi sinah warishenkah, sinak suumutem maliyomhi sabbatah kinni. 28Amaydo, sinne kee Quddus kin Ufayi kaniisat bukalle macalso abtam akko sinak abeh yane medderoh zeelita. Ishi tiyahi biiloh iraariteh yane Yallih kaniisa zuwa. 29Anu edeemko sarrah amaa medderoh naxinnixe dhacuma suulal sin fanadde yamaatoona kinoonim aarhige. 30Sin fantaako gantah katattaynit sinni lakadde beyoona temxeleelefem waanishsham ugutoona kinon. 31Amaydo, migahritina, anu adooxa iggida kaamil, bar kee lellecih, dhiimoolih sinko umman tiya asuusaanam mixabiyom izikkira. 32Kado Yalla kee kaa nicmah waanittalle sin amaanatishak aniyo. Ta waanitta sin ginto kee umbuka yinqiddise maraalih miiraas taalloona sin dhicshishsho kinni. 33Anu sinko walaa inketti fidda, hido dahab hido lel sara miduumutiyo. 34Inne kee tamaa yottaalih yine mara farhshishsham, ta inni gabubuh abem atin sinneh taarhigin. 35Inkoh ta akah sin uybulluweekah, amaa ginah ashtuqhuluk, xato farha mara xatno nolle tanem Maddara kin Yeesus: ‘Kabbaataanamko yaxaynim ziyaada baraka-le’ yerhxeh yine waani izikkira.”
36Tayim yerhxek sarrah, umbuka tenlih gululluubuweh yissilliye. 37Inkoh wac-yerhxiinih weecenyaako, Bawlos uxquf-isheenih kaa fuguten. 38Ummanimko ziyaada ten tisqidibem lel, tayek sarrah malammih kaa nif yabloona dhiicoona makinoonim waanishe gedda kinni. Doonik fanah lel kaa sukuukuwen.
Právě zvoleno:
Fartottit hi Abittot 20: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia