Fartottit hi Abittot 19
19
Bawlos Efesosulle
1Abolloos Korintosulle anuk, Bawlos agani zoobäako tillaabeh Efesosulle yemeete. Amalle katattaynitko garo geye. 2“Teemenin gedda Quddus kin Ufaye kabbatteeni?” akko yerhxe. Usun lel: “Maale, inkinnah Quddus kin Ufayi yanem kee gantah noobbeh minaarhige” akko yerhxin. 3Usuk lel: “Amaydo, awlihimih tinthimmiqhiini?” akko yerhxe. Usun lel: “Yohannis anthammaqhah” akko yerhxin. 4#Maatiyos 3:11; Markos 1:4,7-8; Luukas 3:4,16; Yohannis 1:26-27Bawlos lel: “Yohannis, tamaa kaa sarralle yamiite tiyah yaamanoona xiyawah warishak, toobat aythammaq kinni yiythimmiqhem, amaati lel Yeesus kinni” akko yerhxe. 5Tayim yoobbin gedda lel, Yeesus migacalle yinthimmiqhin. 6Bawlos gaba alle haye gedda lel Quddus kin Ufaye alle oobe, amidhdhiginnixe waaninih waanishoona erherhisheenih lel nobowa balih waanishen. 7Inkoh lamman kee taman takkem kuuk yinin.
8Bawlos sunagoogedde orobeh Yallih nigsinnahi zacabah tenlih ankeexeduk kee ten ashshiminuk adooxa alsa fidbeelih waanishe. 9Tenko gari laakin Maddari Arax xiyaw nifille ashshaamuk, yitririinih yaamanoona xinen gedda, tenko mirix-yerhxeh, katattaynit isheelih beye. Maaxi yamaato lel Tirannosti addaaraashadde aydurusuk yine. 10Tayim, inkoh Aasiyaati zoobälle tine Yahuud kee Giriik inkoh Maddari waani yaabbiinindah, lamma iggida katattayte.
Iskewasti dhaylo
11Yalli lel Bawlos gabah mangum bexsishsham abak yine, 12Amaymih lel manaadil hido maxnaf kaa nabse dhageya beyaanah laxuute maralle hayan gedda ten laxuu akah xabah, uma ufayit akko awcuk yine. 13Hel-arhxuk xiyawko junuun ayyaacuk tine Yahuudko gari amaa uma ufayitik: “Bawlos kaa zacabah akko warroysha Yeesus migacalle tawcoona sin aamirinuk nane” arhxuk, Maddara kin Yeesus migac alle andhaxishoona yicikkinin. 14Tayim abak yine mari lel wuli Iskewas akko yarhxin Yahuud naba shekhti dhaylot malxin kuuk yinin. 15Amaa uma ufayi lel: “Yeesus aarhige, Bawlos aarhigek, atin miya kitiini?” yerhxeh alle yedebbe. 16Amaa uma ufayi yibbirheh yine xiyawti lel tireyaako inkoh ten yootokeyaako inkoh akko yimlike. Amaymih lel casiinih biyaakiteenih amaa careeko kuden. 17Tayim lel inkoh Efesosulle tine Yahuud kee Giriikih timidhdhige. Inkoh gilix alle oobeyaako lel Maddara kin Yeesus migac yenebe. 18Amaa yeemene maraako mango mari lel yemeetinyaako abeenim caddoysheenih aalimuk yinin. 19Amaa shirxe abaa tinemko mango mari lel sinni kitob inkidde baaheenih inkoh xiyaw nifille xararishen. Amaa kitobhi limo yexeesebin gedda lel fiddat solaadiiko kontom shixtiya yekkeh suge. 20Taginah lel Maddari waanitta faax-arhxuk faax-terhxeh, xaylaalih anabuk tenebe.
Efesosti cigirgir
21Kado, tayim inkoh tekkek sarrah, Bawlos Makedooniya kee Akhaayaati araxah abeh Yerusaalem fanah yadaw yexeesebe. “Amalle iniyomko Rooma gufo yolle tane” yerhxe. 22Kaa xattiimeenit kin Timoteyos kee Erastos Makedooniya fanah fareyaako, isheh wuliidhdha Aasiyaati zoobälle suge.
23Amaa waqhtedde lel Maddari Araxhi zacabah mango cigirgir yekke. 24Wuli Demeetriyos akko yarhxin fidda abati yine, usuk Artemisti fiddat maqhdas carehi misle siraaxak amaa cijaajeenitih mango kasbe akah baahak yine. 25Ta mara kee aki tenah higgidin ciyyo le mara inkidde yesketteyaako tahe akko yarhxe: “Ko xiyawo, ni maksab ta ciyyooko kinam taarhigin. 26Akah abluk kee aabbuk taniiniikah, ta Bawlos: ‘Ta gabah aban yallit, yallit makinooni’ arhxuk, Efesosulle bisa akkekkah, umbuka Aasiyaati zoobälle mango xiyaw yishshimineyaako ten yeyleleeh yane. 27Gidcatah tanem lel, ta ni ciyyo ilaacimtam bisa akkekkah, umbuka Aasiyaati zooba kee caalam akah tacbude, naba sayi yalla kin Artemisti maqhdas cari tibbodde loyyiimamko kee tee nabne raddamko kinni.”
28Tayim yoobbin gedda yuxurtumiinih: “Efesos marih Artemis naba tiyä kinni” arhxuk zeerak yinin. 29Amaymih amaa daafo andhax kee dhawko temmeegeh, amaa Bawlos gor kuuk yine Gaayos kee Aristarkhos Makedooniyaako kinya gototak sinneelih baaheenih, tamaa catabti boorha fanah yerdiinih yemeetin. 30Bawlos amaa xiyawhi fanadde orobo farhe, katattaynit laakin kaa deesen. 31Aasiyaati reezonko gari kaa cadhdhit kinya gantah alle farenyaako, amaa xiyaw adde takattedde orobamko kaa dhaacimen. 32Amaa xiyaw andhadhdhaxak yinin, wuli mari wulim, wuli mari lel wulim arhxuk yinin. Sittiyadde cigirgir yekkeh yine. Inkinnah tenko mango mari amalle aymih yemeetiinim aarhiguk miyiniini. 33Amaa mango xiyawhi fanadde tine Yahuud Aleksaanderih yarhxem akah warishenyaako dufuweenih nifille kaa baahen. Aleksaander sik-yarhxoona gabah akah kinisheyaako, amaa mango xiyawhi nifille ten caarah waanisho farhe. 34Usuk Yahuuddo kuuk yinem yeysherheerhegin gedda, lamma saaca takkem inki dhawah: “Efesosti xiyawhi Artemis ummanimko naba tiyä kinni” yerhxiinih andhaxen.
35Amaa daafoh nabara amaa xiyaw sik-ishisheyaako: “Efesosti xiyawo, Efesosti daafo tamaa naba Artemisti maqhdas care kee tamaa caranko rade quddus kin dhayitto kee tee misleh dhawrheena kinam sorhati sinadde yaneho? 36Amaydo, tayim xinnitimto dhiicinnixem kinamhi sabbatah, sik-tarhxoona kee afite waytoona sinalle tane. 37Talle bahteenih tanin xiyaw maqhdas care migaracinnooni, ni sayi yallah lel miwaatiminnooni. 38Demeetriyos kee cijaajeenit laakin tharaaco yeelliinimko, firdi makaano fakkot kinni, Roomaati zoobah masxadaadarit lel yanin. Sinne-sinneh sitta yaksasoona. 39Tayimko ziyaada fadhdheenimko lel, tamaa akottalle yamballaw dhiica. 40Ta andhax kee dhawah akah naxaye takale malino. Kaafa yekkeh yane cigirgirih nankissisemko mashshinna” yerhxe. 41Tayim yerhxeh lel amaa akotta faax-ishe.
Právě zvoleno:
Fartottit hi Abittot 19: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia