Fartottit hi Abittot 2
2
Quddus kin Ufaye hi mumut
1 #
Leewiiti Sheekhino 23:15-21; Gabbaacime Sercat 16:9-11 Bentheqostheeti cid yekke gedda, usun inkoh inki caralle yinin. 2Gar-heeko wuli dhacuma xaaxattah iggid dhaw caranko yemeeteyaako usun adde defeyak yinin care inkoh emeg-ishe. 3Anrub gira balih akah yumbulluweyaako xazxaazimeh umman tenak defeye. 4Usun lel inkoh Quddus kin Ufayeh yemmeeginyaako Ufayi akah ten dhicshiisheekah aki afofuh waanishoona erherhishen.
5Umbuka caalamti garballe geytima dowalko Yalla mashshitta Yahuud lel Yerusaalemille yemeetiinih yinin. 6Ta dhaw yekke gedda lel mango xiyaw inkidde yemeetiinih, ummanti tenko ishi waanih waanishak ten yoobbiinimhi sabbatah yarhxiinim sorhen. 7Nabaatih bexsiiteenih cibrah rabenyaako tahe yerhxin: “Ta waanishak yane mari inkoh Galiilaako makini kinoonim? 8Aaginah kinni umman tiyak ninni-ninni dik hi waanih waanishak ten aabbuk nanem? 9Nanu Bertiyaati xiyaw, Meedosti xiyaw, Elamiiti xiyaw, Mosobbotaamiyaati xiyaw, Yahuudiyaati xiyaw, Kabbadokiyaati xiyaw, Bontos kee Aasiyaati zoobah xiyaw, 10Ferigiyaati xiyaw, Bamfiliyaati xiyaw, Masriiti xiyaw, Kureeneeko kin Liibiyaati wakale kee Roomaako boodimah temeete, 11Yahuud kee Yahuud diin kabbatte xiyaw inkoh, Kireeteeti xiyaw kee Carab kinon. Ni waanih lel Yalli abe naba ciyyoh zacabah waanishak ten noobbe.” 12“Tayim ayim kinni?” sittiyak arhxuk lel cibrah rabeenih akkuk tinem sorhen. 13Aki mari laakin: “Tamari cusub wayni yoocobiinih yiskiriinih kinni yaniinim” arhxuk alle yoosolin.
Bithroos madare
14Bithroos laakin amaa inikan kee tamanlih daw-arhxuk, ishi dhaw xaf-isheyaako taginah aalih waanishe: “Yahuudiyaati xiyaw kee inkoh Yerusaalemille martamak, tayim taarhagoona sinalle tanem kinnik, yi waanille cokka alle uxuwa. 15Kaddih dhaxiine saaca sagal kinamhi sabbatah atin akah takkaliiniikah ta xiyaw yiskiriinih miyaniini. 16Laakin tayim kinni nabii Yoo-eel waanisheh yinem:
17 #
Yoo-eel 2:28-32
‘Abayshimat lelleecadde tayim takko kinni, yarhxe Yalli:
Anu inni Ufaye umman xiyawalle xarho kiyo,
sin sayto kee sin dhaylo nabii balih waanishoona kinon,
sin gombole mablol yabloona kinon,
sin baarrit soono soonitoona kinon.
18Inni garuuzalle, inkoh saytiya kee labtiyalle,
amaa maxadde inni Ufaye xarho kiyo,
usun lel nabii balih warishoona kinon.
19Anu agana caranalle bexsishsham,
guba baarholle lel cibra kin ishaarar,
biilo, gira kee tiki haffa ayballaw kiyo.
20Tamaa Maddari lellec, carha mece nabaya, yamiitemko basolle
ayrotta dattoyto kinni, alsi lel biilolle yambaddalo kinni.
21Sarrah inkoh Maddari migacah deeciminnanti lel gargeerimo kinni.’”
22“Israa-eel xiyawo, ta waani oobbaanta: Atin sinneh akah taarhigiiniikah, Naazret Yeesus, miyatto kinam Yalli kayyah abeh sin fanadde abe xayla-le abittot, bexsishsham kee ishaararah sin yuybulluweh yane. 23#Maatiyos 27:35; Markos 15:24; Luukas 23:33; Yohannis 19:18Ta awwalko bakitte xagara kee Yalli yookomeh suguse irhgah ta xiyawto atin sercat hin Aki-marahi gabah abteenih masqalakke kaa tinkiinih kaa tisgidifin. 24#Maatiyos 28:5-6; Markos 16:6; Luukas 24:5Rabi qath-ishsheh kaa tabbarho mirhictamhi sabbatah, Yalli rabit waaxeltaako kaa yeyyeece. 25#Zaabur 16:8-11Amayim lel kaa zacabah Dawud tahe yerhxeh yinemhi sabbatah kinni:
‘Maddara umman gedda inni nifidde kaa able,
usuk yi mizgi gabooko yanemhi sabbatah
xumuu-arhxo makiyo.
26Amaymih yi afcaado xedente,
yi anrab lel cililishe,
yi xazo lel cagadde marto kinni.
27Amaymih lel yi rooxe Hadeesadde xabto makito,
ku Quddus kinti lel amashmash yablo maki.
28Atu aniinat arax yi tiyshidhdhigeh tanito,
yottaalih tanitomuh lel xedenih yi tamago kito.’
29Yi saculo, kalxit ni abba kin Dawud rabeh yumuccugem, kaa qabri lel kaafa fanah nottaalih yanem thummut-ekkeh sinlih waanisho dhiica. 30Amaymih, usuk nabii kuuk yinemhi sabbatah Yalli aalih waanisheh kaako raddamko inketta kaa nugus-kurselle defeysho kinamah akah dhiiwiteh yinem aarhiguk yine. 31Masiix rabaakohi ugut kee kaa nabsi Hadeesadde raaco makinam, amayim balih kaa xazo tamashmasho makinamhi zacabah yookomeh yeerhegeyaako waanisheh yine. 32Yalli ta Yeesus rabaako uguseh yane, nanu lel tayimhi shohoda inkoh kino. 33Kado Yallih mizgaako nabneelih defeyek sarrah, Abbaako lel wacde akah sayeh yine Quddus kin Ufaye kabbaateyaako, atin sinneh abluk kee aabbuk xarheh yane. 34-35Dawud isheh carshelle mikorinna hanuk, usuk isheh tahe akko yarhxe:
‘Maddari yi Maddarak,
ku nacabtoolitik ku ibih dokka akko koh abandah,
yi mizgi gabooko defee’ akko yerhxe.
36Amaydo, ta atin masqalakke tigdifin Yeesusuk, Yalli inkoh Maddara kee Masiix akko abeh yanem Israa-eel dik inkoh yaarhagoona.”
37Kado, usun tayim yoobbin gedda, afcaado adde xararteyaako, Bithroos kee aki fartottitik: “Ni saculo, kado ayim abno kino?” akko yerhxin. 38Bithroos: “Otooba, sin zambi sinah xabbiimo ciloh lel inkoh umman tiyak Yeesus Masiix migacalle inthimmiqha, Quddus kin Ufayehi muttuxuwa lel kabbattoona kitin. 39Amayim lel ta wacdi inkoh sin cindham kee amaa mirixtalle yane mara, amayim balih Yalli ishelle akah deecima marah kinamhi sabbatah kinni.” akko yerhxe. 40Aki mango waaniilih ten faysheyaako: “Ta kodhdhayti kin ijooko sinne gargera” akko yerhxe. 41Amaymih tamaa kaa farto kabbaate mari yinthimmiqhin, adooxa shiix xiyawtiya takkem lel amaa lellecidde adde ositen.
Yeemene marahi zoobino
42Usun lel fartottitti aydaras kee zoobino inkidde katattaak, kinnas gidlo kee assilluuk yisbitiinih yinin. 43Fartottit mango bexsishsham kee ishaarar abak yinin, umman tenalle lel gilix oobe. 44#Fartottit hi Abittot 4:32-35Inkoh yeemene mari lel inkidde marak yinin, ummannim lel inkidde luuk yinin. 45Usun sinni iraaro kee yabbuxutiinim yeebexiinih amaa solaadi inkoh farhshiisha marah kelak yinin. 46Maaxi yamaato inki afcaadoolih maqhdas care aduuk kee sinni carwadde kinnas agdiluk, xeden kee cado afcaadoolih sinni folo xazziilitak yinin. 47Yalla faylishitak lel umman xiyawko mece kabbat geyak yinin. Tamaa gargeerimtem lel Maddari max-yeenim ten ziyaadishak yine.
Právě zvoleno:
Fartottit hi Abittot 2: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia