Luka 18
18
Mbor Tima ti Fwal Kaciwa' Kat Ya
1Unai Yeso lak fe i ro ames findel i kaani nin, ɓurti ɓa u kofus nyai, ɗat si cu wei ti fwal ti DeeƁwe ngang, kan si ngjwangat kwa. 2Ni, “Ai ta ashwa nin, sin tima tot ti ɓur nin, ima mwen DeeƁwe fo kwa, zan ɗufal a ɗama kwa fweng. 3Mbor nin tima remet motus yit ta ashwai, tima ti wo wa kyel i ma tot ti ɓuri, ti fwal nyai, ‘Kabuk, ha tottun ɓur i mwawei, ɓurti som i wei ti yin mii.’ 4Ha' myan yis yus ɗanggwya. Unai ta takfai yes mbe' wet, lak ɗyus ni, ‘A awei i mwen DeeƁwe fo kwa, i zan ɗufal a ɗama kwa fweng, 5shak ta andi, ɓurti mbor moti ti cu wei ti ɓyolok sun fo ngang, ti honun i wo ham kwa, i wa fyal sut filya ya. Ka ti cu wei ti ɓyolok na ti shan lafos!’ ”
6Unai Deembai ni, “Hal hun aɗeng ima ma tot ti ɓur i fyarat mai lak! 7Unai fwet, DeeƁwe ma wa tot ti ɓur i mwawei si som ames ima benus, ima si kolti kawa ta kyel ames fo' ta reni kwa haa? Ma wa ka'ti nggasus ya haa? 8I laksu, ma wa fyalsus filya ya ti tital ma. Shak ta andi, myan ima Al i Maɗufal humkyel, ma wa wis ti fati mwawei na naya haa?”
Kaani si Mafarisi hu Ma Mat ti Cef i Wufen
9Yeso lak findel i kaani mai wa kyel i ɗufal ima si zan hihai asus nyai sin a munderei, si kom anggum i ɗufali ya. Nyai, 10“Ai ɗufal shini apil si rang ta Wur i DeeƁwe ɓa si fwal, andek a Mafarisi, mandeki a ma mati cef i wufen.
11“Unai Mafarisi luk fit te mangra, fur fwal ti DeeƁwe tasi haisus hai, nyai, ‘A DeeƁwe, i palanga ɓurti yin ima fota anggum i ɗufali kwa. Fota asher, hu som mafwashi, hu som i arak i zuruk. I palanga ɓurti yin ima fota ma mati cef i wufen mai kwa. 12I ka'an ti fo ya nasi cwa sa apil saa ti ya, i fayan ti andek ta saa ti hure i shak ɗamam ima i wyasani.’
13“Shak ta andi, ma mati cef i wufen tes mangra ta maleng, nggwes i ha' ti hai fit. Ɓurti kikyawat na mulut, ka' ajin ames yis nyai, ‘A DeeƁwe i ma fwalsa, ɗinga shum asuni, yin a ma masti mafwashi!’ ”
14Yeso nyus, “I laksu, ma mati cef i wufen mai, a Mafarisi ani kwa, wis mute manderei ta kyel i DeeƁwe, ɗak humkyel ta wur. Maɗufal ima ha' haisus fit, si wa muɗortus kyel, maɗufal ima ɗor ti haisus ya, si wa ha'sus fit.”
Yeso Kin Fe Muyayi Maɗesi
(Mat 19:13-15; Mak 10:13-16)
15Ɗufal sin yes ti fe muyayi ames ɓa Yeso u kinus ra hai. Unai fe i ro ames si ɗingi andi, si fur lak ti ɗufali ɓin. 16Unai Yeso lai fei ɓa si yes ta kyel ames ni, “Hon hun fe muyayi ɓa si yes na kyel amen. Ka hu shaas kwa. Ɓurti kaitat i DeeƁwe ii musuti ames. 17I laksu mwawei, shak maɗufal ima wa' mat kaitat i DeeƁwe fota al al kwa, ma wa mulang ta kwa fweng.”
Mbai Maramwayat
(Mat 19:16-30; Mak 10:17-31)
18Unai mbai i Ju nin lul ta Yeso ni, “A Makofiti manderei, ami te a kpak ɓa i masi i wis mupwet i myan hu myan ya?”
19Yeso lulus ni, “Ami kin ha laisun ii manderei ya? Ɗeng a manderei kwa, a DeeƁwe je. 20Ha shang aɗeng ima anggut i Mosis lak, ‘Ka ha mas arak i zuruk kwa, ka ha for maɗufal kwa, ka ha shir shir kwa, ka ha vo fai i fyarat kwa, Faha dya hu nasa ngye.’#18:20 Ɗing huni hwak: Mul 20:12; Muh 5:16-20. ”
21Maɗufali lak ni, “Shak ɗamam mii i cu wei ti masus ta si myan ima yin ɗiri i ali.”
22Myan ima Yeso hal mai, lakus ni “Mwashi a ɗama andek je kat. Juwila shak ɗamam ima hati ya, ha kaar som jyeli ya, ha wa wis ti sufat ta fit. Ɗak ha yes, ha kolfai asuni.” 23Myan ima hal mai findeli, rafat mulut ya, ɓurti ramwayat fwet.
24Yeso ti ɗing ti maramwayati ni, “Ma wa mute ti shum som ima si ti ramwayat si wis mulang ta kaitat i DeeƁwe! 25Ti mwawei, ma wa ɓin ti mbwesh ɓa rukumi ti lang ta swai i twen, hu ima ɓa maramwayat u lang ta kaitat i DeeƁwe.”
26Som ima si hal mai si lul lul si ni, “Na andi, awe ma wa wis ti bum ya?”
27Unai Yeso nyus, “Ta kyel i maɗufal ma wa mas kwa, ma wa mas ta kyel i DeeƁwe.”
28Unai Pita ni, “Ni hon shak aɗeng ima ni mati, ni koltifai asai.”
29Yeso matussi ni, “I laksu mwawei, shak maɗufal ima hon wur, hon mborsus, hon shunus, hon dee hu naa, hu fe, ɓurti kaitat i DeeƁwe, 30ma wa wis ti ɗamam hyang na naya ti kwai moti, hu waya tima ti yes, ma wa wis ti mupwet i myan hu myan.”
Yeso Hum Lak ti Findel i Mot Ames
(Mat 20:17-19; Mak 10:32-34)
31Unai Yeso haar fe i ro ames hure mulang apili si wa ta ɓwaiyi, nyus, “U mai ka muɗu wa Yerushalima moti. Shak ɗamam ima som shit si worong nasi yin, Al i Maɗufal hai, si wa hya. 32Si wa fasun ta ra i ramam ya. Si wa gbafsun ya, si sya'un, si tufun lyau hai, si saraamun, ɗak si forun ya. 33Mwen mataat i wa mulukfit ta fiyai.”
34Fe roi, si shang ɗama nasi hai i findel ima Yeso ma laki mai kwa. Aɗengi fotus fo, si ka' aɗeng ima malaki kwa fweng.
Manzyau ma Fwal Wis Ɗing ti Kyel
(Mat 20:29-34; Mak 10:46-52)
35Myan ima Yeso ru ta nggas ti Yeriko, manzyau nin yis amun ta foi fisel, yis fwal ti fwal ta. 36Myan ima manzyauwi hali ɗufal hyang sin musa ta fiseli, unai lul ni, “Ami ma wa na fisel mai kwai ya?”
37Si nyus, “A Yeso i Nazaret ma musana.”
38Unai lai lai ti a ambas ni, “Yeso! Al i Devid, ɗinga shum asuni!”
39Ɗufal ima sin ta wei si lakus ɓin ɓa u te cakat. Fota si dala a yafi taanja ti la mbai fwet, yis nyai, “Al i Devid, ɗinga shum asuni!”
40Yeso kat mangra, ni ɓa si yestus ta kyel ames. Myan ima yesta nggas yusti, Yeso lulus, 41“Ami ha ɓweti ɓa i masai ya?”
Unai manzyauwi lak ni, “A Deembai, i ma ɓweti ɓa i ɗing kyel.”
42Unai Yeso nyus, “Mat ta ɗing ti kyel, fati mulut ama kina ha wis cala.”
43Fo abet wis ɗing ti kyel, kolfai ti Yeso, yis ha' ti asum i DeeƁwe fit. Myan ima ɗufal si ɗingi, sin hwak shak si fa DeeƁwe mbaitat.
Právě zvoleno:
Luka 18: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
