Luka 19
19
Yeso Lai Zakka
1Yeso lang ta Yeriko yis musa ta ashwai. 2Unai mbai nin ta saa ti som i mati cef i wufen, ma asum i Zakka, yisyi a maramwayat. 3Kin hai maɓweti u ɗing awe mii Yeso ya, a mute ii ngguturi amesi shas ɗing ti Yeso, ɓurti ɗufal si ɓal fwet. 4Unai tital wa ta wei, ɗu tasi musya ti makambong nin, ɓa u ɗing Yeso ɓurti ma wa musa ta fisel andi.
5Myan ima Yeso ru ta kyeli, unai ha' shit fit lakus ni, “A Zakka, ɗorakyel kang! A kpak i wa wur yati kwai.” 6Zakka ɗorkyel kang, shwai Yeso ti pipelat na mulut. 7Myan ima shak ɗufal si ɗingi andi, si lang totti findelal i haar nyai, “Ɗing huni, ɗorkyel ta wur ima masti mafwashi ani!”
8Unai Zakka luk fit, lak Deembai ni, “Halai a Deembai, i wa kaar ti ramwayat amen apil i fa som jyel ɓwai andek. Na ai i muk ɗeng, i wa talsus sa ɓaras.”
9Unai Yeso lakus ni, “Kwai bum yes na wur mai, ɓurti yis hwak a al i Ibirai. 10Ɓurti Al i Maɗufal yes ɓa u far u bum som ima si fot.”
Kaani si Cef i Woor
(Mat 25:14-30)
11Sin saa ti hal ti findelal mai, Yeso cu wei ti laksus findel i kaani, ɓurti mata nggas ti Yerushalima, ɗufal sin kintiɓwi nyai kaitat i DeeƁwe ma wa yes fo abet. 12Unai Yeso nyus, “Ai mbai maɗufal nin wa ashwa nin ta maleng ɓa si no'us kaitat, ɗak humkyel. 13Te mulang, lai yarai ames hure, fas cefaf ima ndok roi ture ataat-ataat nyus, ‘Mas hun ro i woor ti cefaf mii, yes myan ima i humkyel.’ 14Ɗufal i mashwa amesi si nggwetus, si ro som shini ti muro takfai tima wis, nyai, ‘Ni ɓwet ɓa mai maɗufal u te ii makai aminin kwa.’
15“Shak ta andi, si no'us kaitati, humkyel ta wur. Unai kin si laiyus shak yarai ames ima ai fas cefaf ɓa u lulus fo, ɓa u shang aɗeng ima si wisi ta si cefaf ima fasi. 16I bya' yes ni, ‘A Dee, i wis mawet hure tasi pam andek ima ha fan.’ 17Unai maɓwai amesi nyus, ‘Awindee, yere amen manderei! Ngga' ima ha mas mwawei ta si ɗama mandyongi hai, i fa mbaitat i ashwaha hure.’ 18Yere mapili yes ni, ‘A Dee, i wis mawet hara ta si pam andek ima ha fan.’ 19Maɓwai amesi nyus, ‘I fa mbaitat i ashwaha hara.’
20“Nin yerei yes ni, ‘A Dee, mata pam andek ama. I no' ya na ɗam wi i foti. 21Ɓurti i myanat sa fo, ɓurti mute sa ti ti shum, I shangi ha matani, ta kyel ima wa' ha kin ta, ha karatani, ta kyel ima wa' ha lai ta.’ 22Unai maɓwai amesi nyus, ‘I wa totsa, ɓur ti findel ima lang ya na fo ama. Ha ya ii yere mafwashi! Ha shangi nyai ima ti shum i shangi, maɓwet ti mal fwet, i karat aɗeng ima wa' i lai. 23Na ha shangi andi, ami sha ha ɓa ha wa, ha kinun cef amen ta wur i cef, ɓurti myan ima i humkyel, i wis al mashu ham nin i hai kwa ya?’
24“Unai lak som ima si mangrai ta kyeli nyus, ‘Mat hun cefi ya ta ra ames, hu fa ima wis hure ani i hai.’
25“Unai si nyus, ‘A dee, yisyi mati hure kuɓa!’
26“Maɓwaiyi nyus, ‘I ma laksu, shak maɗufal ima mati ɗama, si wa fa sus hyang i hai. Maɗufali ma mati kwa, al i maɗeng ima matii si wa mati ya. 27Som ima si nggwetun mii, ima si ɓwet ɓa i te ii makai ames kwa, yehuntus nati hu fwaar ya na wei yunti.’ ”
Yeso Lang ta Yerushalima
(Mat 21:1-11; Mak 11:1-11; Jwn 12:12-19)
28Takfai tima Yeso lak kaani moti, cu wei ti kinti hai wa Yerushalima. 29Myan ima ru ta nggas ti Betafaji hu Betani ima si ta wei ti fwere ima si lai ii Anggash i Yitat i Mbar, ro fe i ro ames apil nyus, 30“Ɓu ta hweng muwei andi, na hu ru ta, hu wa ɗing ti al i njaki nin ima wa' si langi mano' ta foi fisel. Hwet hun ya hu yes ti nati. 31Na ɗeng lul ni, ‘Ami kin hu hwet ti njakii ya?’ Hu nyus, ‘Deembai ma ɓweti.’ ”
32Fe i roi si wa si wis njakii ta ngga' ima Yeso lakus ta. 33Sin saa ti hweti ti al ti njakii ndai, unai som i njakii si lulus nyai “Ami kin hu hweti ali njaki ya?”
34Si nyus, “A Deembai ma ɓweti.” 35Si kol Yeso al ti njakii, si mbwet faginan ames si gwa' tasi al ti njakii hai, ɓa Yeso u langi. 36Yis saa ti ati, unai ɗufal si cu wei ti wash ti faginan ames ta fisel.
37Myan ima ru ta kyel ima fisel ti ɗor ta Fwere i Yit i Mbari, unai shak suɓut i som koltifai ames, si lang jakak, fati DeeƁwe mbaitat ti njeng ɓurti shak ɗamam i shok na fo ima si ɗingi.
38Sin nyai,
“Disyo' ma akul hu makai
ima yes ta saa ti asum i Deembai!”#19:38 Ɗing huni hwak: Nak 118:26.
“Mute cala ta fit,
mbaitat wa kyel i DeeƁwe.”
39Unai shini Farisiyawa ima si ta saa ti ɗufal wi si lak Yeso si ni, “A Makofiti, laka fe i ro ama ɓin!”
40Unai matussi ni, “I laksu, na mii si te cakat, afyai mii si wa jolok i jakak.”
Yeso Kawa Ta Si hai i Yerushalima
41Myan ima ru ta nggas ti Yerushalima, ɗingi kawa ɓursut, 42unai ni, “Naɗin hu shang aɗeng ima kwai ma wa kolsu cala, u mai mwashi si fotuti fo. 43Myan si yes ima som ima si ha' ti wei ti hun, si wa ta' ti kyel i muɗu tasi bang amu, som ɓwol si wa nggarsu ya ta ɓwayai shak ti ɓwol. 44Si wa dyashan ti hihai amu ya na fisha, hun hu femu na wii bang amu. Si wa honti afung nin si nusus hai kwa, ɓurti hu shang mwen ima DeeƁwe ma wa yes u bumu kwa.”
Yeso Sapa Wur i DeeƁwe Ya
(Mat 21:12-17; Mak 11:15-19; Jwn 2:13-22)
45Unai Yeso lang ta wii Wur i DeeƁwe fur nggati som woor ya.
46Nyus, “Si worong nyai, ‘Si wa lai ti wur amen ii wur i fwal ti DeeƁwe’#19:46 Ɗing huni hwak: Ish 56:7. hun hu hat ti ii ‘ton i asher.’#19:46 Ɗing huni hwak: Irm 7:11.”
47Shak mukonani, yis kofiti ta Wur i DeeƁwe. Unai mbayai i kocokak, hu som kofiti si anggut hai hu mbayai i mashwa si far fisel ɓa si forus ya. 48Shak ta andi, si wisi kwa, ɓurti suɓut i ɗufali si ɓweti halti findel ames fwet.
Právě zvoleno:
Luka 19: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
