Luka 20
20
Mbaitat i Yeso
(Mat 21:23-27; Mak 11:27-33)
1Nin mweni ndai, Yeso yis kofiti ta Wur i DeeƁwe, yis mba ti ɗufal muro maɗesi, unai mbayai i kocokak, hu som kofiti si anggut hai, akul hu kaya i Isra'ila si yes kyel ames. 2Si lulus nyai, “Laka nin ati nggi mbaitat ti ha maas ti ɗamam mii ya. Awe fa mai mbaitati ya?”
3Yeso matussi ni, “Yin hwak i wa lulsu lul. Lak huna, 4batisma ti Jwon, ii ta fit ahun ii ta kyel i ɗufal ya?”
5Si mas uɓet ɓatasin, si ni “Na kani ‘Yes ii ta kyel i DeeƁwe,’ ma wa lul u ni, ‘Ami kin hunggyu i fati mwawei ta hai yusti ya?’ 6Ma kani, ‘I ta kyel i ɗufal,’ shak ɗufal mii si wa hwyayan sikan ti afyai, ɓurti shak asussi si fa mwawei nyai Jwon Mabatisma a mashit.” 7Ɓurti andi si nyus, “Ni shang kyel ima lang ta kwa.”
8Yeso ni, “Yin hwak i wa laksu ti mbaitat ima i ti masti ɗamam mii kwa.”
Kaani Ti Som i Mahan
(Mat 21:33-46)
9Yeso cu wei ti lak ti findel i kaani nyai, “Ai maɗufal nin lai yang ti manggɓu', unai u kin yangi ta ra i shini som i makoki, ɗak wis ɗa'at i myan hyang. 10Myan i karati manggɓu' ru, unai ro yere ames ɓa si wa kyel i som i mahani, ɓa si fas manggɓu'i ta. Unai som i makoki si ndashus si ti'us ra ashoki. 11Hum tuk ti yere nin hwak, yes, som i makoki si ndashus, si fas shusho, si ti'us ya ra ashoki. 12Hum tuk ti mataati, si masus afolal, si hwitus ya ta saikyel fweng.
13“Unai mayangi ni, ‘Mwashi i wa masti amiya? I wa ro ti al amen ɗwyat ima i ɓwetus fwet, ashang si fas mbaitat!’
14“Myan ima som ima si makoki si ɗingus, si lak ɗiyai nyai, ‘Awinoo! Ma cwai ti kop i deehi mai ru ti haisus. Ka for ya, ɓurti ɓa ka cu kop i sufati ti hai sikan.’ 15Unai si zan si hwitus ya ta saikyel ti yangi, si forus ya.
“Ami mayangi ma wa masti som makoki ani ya? 16Ma wa yes u fwarus ya, u fa shini yangi ya.”
Myan ima som si hali andi si ni, “DeeƁwe u ngga ani ya ta maleng!”
17Unai Yeso ɗingus fo nyus, “Ami findel i kaada i DeeƁwe ani malaki ya?
“ ‘Afung tima som i ta' si zan a ɗama i gbya',
ayit ti ɓin anggumi shak.’#20:17 Ɗing huni hwak: Nak 118:22.
18Shak maɗufal ima fur tasi afung mai, ma wa dyashan, maɗufal ima afungi ti furus hai, ma wa ɓissus ya.”
Tal Ti Cef i Wufen
(Mat 22:15-22; Mak 12:13-17)
19Som kofiti si anggut hai, hu mbaiyai i kocokak si masi ɓa si ka'us tasi myani, ɓurti si shangi nyai Yeso ma lakti kaani mai tasi sin ɗi. Shak ta andi si mwen ɗufali fo. 20Unai si kinus shit hai fwet, si tuk som i mufot ima si kof haisus fota a som ima si ti mwawei, ɓurti ɓa si wis aɗeng ima si ka'us ti, si fa ta ra i makunggul ɓa u totus ɓur. 21Som ima si tukus i mufoti si mas Yeso lul si ni, “A makofiti, ni shangi aɗeng ima ha laki hu aɗeng ima hama kofiti mai, a mwawei. Ni shangi ha mati ɓwet ti hai kwa, ha kofti fisel ti DeeƁwe tasi mwawei hai. 22A kiga' ɓa ka tal cef i wufen wa kyel i Makai mbai, ahun awet ya?”
23Yeso ɗing shingat i fyarat ames ya nyus, 24“Kof huna ti cefi. A mashilim i we hu asum i we mana si hai i cefi ya?” Si nyus, “Ii Makai.”
25Unai Yeso lakus ni, “Fahun Makai aɗengi ma mii Makai, hu fa DeeƁwe aɗeng ima mii DeeƁwe.”
26Si pwan ɓa si ka'us ta kyeli, ɓurti aɗeng ima lak ta saa ti ɗufal wi. Findel ima lak lumus fo ya, si te cakat.
Lul Tasi Muluk fit ta Fiyai
(Mat 22:23-33; Mak 12:18-27)
27Shini Sadukiyawai ima si ni na ɗufal si mot si wa muluk fit kwa, 28si yes si mas Yeso lul si ni, “A makofiti, anggut i Mosis worong ni, na maɗufal mot hon mbor na kaciwa' si al tikul, te a kpak ɓa nusus u katut ɓurti ɓa si wisus fe. 29Mwashi, ta wur i maɗufal ma fe muryai pyoron, mambaiyi mas kunggo motus kaciwa' si al hu mbori. 30Mapili kat mbori, 31mataati hwak katut, yis hwak motus kaciwa' si al tikul. Kol ima shak pyoroni ima si kunggot si mwatus kaciwa' si al tikul. 32Anggwe' asut, mbori hwak ti motut. 33Myan ima ɗufal mii si luk fit ta mot wi, ti wa mute ii mbor ti we ta saa ya? Ɓurti shak asussi pyoroni si kunggot.”
34Yeso nyus, “Som i waya moti si makunggo, sin kunggoi ya. 35Som ima ɗat ɓa si wis kyel ta saa ti waya ani, ima si muluk fit ta mot ta fiyai wi, si wa kunggo kwa, si wa kunggoi ya kwa. 36Si wa muhum mot kwa, ɓurti si wa mute fota som lu'. Sin a fe i DeeƁwe, ɓurti ima si luk fit ta mot wi. 37Na si mangga' mai, Mosis hwak kof nyai ɗufal ima si mwat si wa muluk fit ta mot wi, findel kukwish tima ti cu man, lai Deembai, ‘DeeƁwe i Ibirai, i Aizik, i Jakop hwak.’#20:37 Ɗing huni hwak: Mul 3:6. 38Ayis a DeeƁwe i som ima siti mupwet, ii ma si mot kwa, ɓurti andi ta kyel ames shak asussi si ti mupwet.”
39Unai shini som kofiti si ni, “A Makofiti, ha lak a ndere!” 40Nasi mai findeli, si hum wis ti njeng ɓa si lulus lul nin kwa fweng.
Awei Kristi a Al i Devid Ha?
(Mat 22:41-46; Mak 12:35-37)
41Unai Yeso lakus ni, “Ami kin si ni Kristi a al i Devid ya? 42Yis Devid ti haisus lak ta Kaada i Nakwai ni.
“ ‘Deembai lak Deembai amen ni,
“Teha amun na ra i ucwa amen,
43Yes myan ima i wa hatat ti som i ha' ti wei
ti ha ii kyel i kinti sisai amma.” ’#20:43 Ɗing huni hwak: Nak 110:1.
44Yeso lakus ni, Devid laiyus ni, ‘Deembai.’ Atini si ni yis a al ames ya?”
Yeso Ti' Ɗufal Ra Tasi Mangga' i Som i Kofti Anggut
(Mat 23:1-36; Mak 12:38-40; Luk 11:37-54)
45Yeso lak fe i ro ames ta wei i ɗufal shak ni, 46“Mas hun mute ti shingat wa kyel som kofiti si anggut hai. Si ɓwet sok ti mbayai i faginan sin ati ti, si ɓwet ɓa ɗufal si to'us ta kyel i woor, si ɓwet ɓa si wis kikyal i mute maɗesani ta mareha, hu kyel i mute maɗesani ta kikyal i got. 47Si ɓal muk ti arof ima arya ames si motus. Na sin fwal ti DeeƁwe si mas fwali ii masyai, si masi fota sima fwali ti mwawei. A musut mii si wa totsus ɓur manjengi.”
Právě zvoleno:
Luka 20: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
