Mateo 26
26
Msagu wa iwandumu
1Avija Yesu viyamambukize malonga higo gose, kawalongela wanahina zake, 2“Mvitanga kamba kikomo cha sikumbili yokuwa Pasaka, Nghumbulilo, na Mwana wa Munhu kolavigwa yakomigwe.”
3Kikomo kija watambika wakulu na iwalala welundiza mngʼanda ya Mtambika mkulu Kayafa. 4Wasagula msagu hamonga, giladi wamgoge Yesu muubala, avija wamkome. 5Bali walonga, “Si kamba ikikomo cha isiku nghulu, sikudilawilile zomvu muna iwanhu!”
Kwitilwa mavuta hiko Betania
6Na heyo Yesu viyezile Betania, kakala mngʼanda ya Simoni mwene dikulu. 7Na mtwanzi mwene kichupa cha mavuta, gagulike mhiya bwando, kamkwenhukila, kamwitila mditwi jake viyakalile hana gamandiya. 8Wanahina zake vuwaviwene, wehilwa walonga, “Wachoni ubananzi uno? 9Kilumbo mavuta gano vihanogile kuguligwa na mhiya bwando, wagolelwe wakiwa.” 10Yesu kavitanga, kawalongela, “Habali mumgaza mtwanzi. Sanghano ino inoga iyanhendele niye. 11Kilumbo wakiwa mokala nawo hamonga siku zose, bali niye sikala namwe milongo yose. 12Kuja kunitila mavuta lukuli lwangu, kasanghana ago giladi yanike goya kwa uzisi wangu. 13Ihoko nomulongelani, ihanhu hondaupetigwe Usenga Unogile uno mulumwengu wose, na hijo diyasanghane dopetwa, giladi yatambulwe mtwanzi ino.”
Yuda Iskariota yomuhimbila Yesu
14Imala baho imonga miyawo waja longo dimwe na wabili, tagwa jake Yuda Iskariota, kawagendela Watambika wakulu. 15Kalonga, “Avo choni chondamninghe, na niye nimulave kumwenu?” Wamwingha milongo midatu ya mhiya. 16Kulawa siku hiyo kakala yozahila ulegeho giladi yamulave.
Gamandiya ga ikilo
17Siku ya ichanduso ya Migate ilekigwe kugeligwa mhumba, wanahina zake wamgendela Yesu, wamuuza, “Kolonda tutandike kwahi mandiya ga ikilo, uje Pasaka?” 18Kalonga, “Gendeni mdiwambo kwa munhu fulani mkamulongele, Mkulufunzi kalonga, kipigiti changu chabehi; kumwako noija Pasaka hamonga na wanahina zangu.” 19Wanahina wasanghana kamba Yesu viyawalagize, wamana kuitandika nghondolo ya Pasaka. 20Vivikile ichungulo, kakala hana gamandiya hamonga na waja longo dimwe na wabili. 21Na vuwakalile woja, kalonga, “Ihoko nomulongelani, miyenu imonga konihimbila.” 22Wagwa kizumbo nghani, wandusa kumuuza yumwe yumwe, “Avo nene, Mndewa?” 23Kedika kalonga, “Yuyo yengize mkono wake hamonga na niye muna umkungu, yuyo yonihimbila. 24Mwanage Munhu kochola na zake kamba viyandikilwe; bali kojona munhu yuja yomuhimbila Mwana wa Munhu! Vihanogile kumwake munhu yuja kamba haleligwe.” 25Yuda yuja mwene kumuhimbila kedika kauza, “Avo nene, Mkulufunzi?” Kamulongela, “Ona gweye kulonga.”
26Na hewo vuwokalile woja, Yesu kasola mgate, kaulombokezela Mulungu, kaumega kawagwelela wanahina zake kalonga, “Soleni, muje; luno lulo lukuli lwangu.” 27Kakisola kikonha, kakilombokezela, kawengha yolonga, “Ingʼwileni mose kikino. 28Uno uwo mulopa wangu wa kilagano cha isambi, ukwitika giladi bwando wasegezelwe matozo. 29Avo nomulongelani, lulawile sambi hondaningʼwe umujo uno wa mtongoni, komu sikuhiyo vondaningʼwe uja wa isambi hamonga na mweye mundewa wa Tata wangu.”
Petro kalema kwihilwa
30Na hewo vuwamalile ukwimba, walawa kunze, wagenda kigongo cha mizeituni.
31Baho Yesu hayawalongele, “Mweye mose kwiza mokwihilwa kumwangu ikilo iino, kilumbo yandikigwa: Nomtowa mchunga, na iwanghondolo wa didale wopwililika. 32Bali kikomo cha kuzuka niye, nolongola kuchola Galilea.” 33Petro kedika kamulongela, “Ihawa wokwihilwa wose kumwako gweye, niye hondanihilwe bule.” 34Yesu kamulongela, “Kingongongo nokulongela, ikilo iino nzogolo hanakwika, gweye kombela miyanza midatu.” 35Petro kamulongela, “Hata vihanyandama kudanganika nagwe, hondanikubele ngʼo. Na wanahina wose walonga kamba vivo.”
Nghondo ya kumpula Tata mu Getsemane
36Yomala Yesu kachola hamonga na hewo kukigunda kikemigwa Getsemane, kawalongela wanahina zake, “Kaleni hano, na niye ngende kuja, hampule Tata!” 37Kawasola Petro na waja wana wabili wa Zebedeo, kasonga kugwa kizumbo na msusuwalo. 38Baho yawalongele, “Loho yangu ina kizumbo bwando, isigale kudanganika; kaleni hano mkale meso hamonga na niye!” 39Kakwenhuka hamwande, mhunde kagwa kingubanguba, kapula yolonga, “Tata wangu, vihadahika, kikonha kino kimbitile kutali, sikunikingʼwe. Bali si kamba vinilonda niye, komu vulonda gweye.”
40Kawabwelela waja iwanahina, kawavika wawasile, kamulongela Petro, “Vilihi hamdaha kukala meso hamonga na niye kimilo cha saa imonga tu? 41Kaleni meso mpule, sikumwize kwingila mkugezwa. Loho yolonda, bali lukuli lukweyuka.”
42Kachola vivija mwanza wekabili, kapula yolonga: “Tata, vihawa havidahika kikonha kino kimbite sikunikingʼwe, goulonda gweye gavikizwe!” 43Kabwela kabili, kawavika wawasile, kilumbo meso gawo gamema utulo.
44Kawaleka baho, kagenda kapula mwanza wekadatu, yolonga malonga gagaja. 45Yomala kawabwelela wanahina zake kawalongela, “He, muhaliwasa na kuhumula. Loleni ikikomo cha habehi; Mwana wa Munhu kogeligwa mmikono ya wene matozo. 46Halaweni hano, tuchole; lola yuja yondava, ka behibehi.”
Yesu viyagogigwe
47Baho viyakalile yolonga, lola Yuda imonga miyawo waja mulongo umwe na wabili, keza hamonga na dale kulu wene misime na mikota, walawa kumwawo watambika wakulu na Iwalala. 48Ayuja Muhimbila kakala yawenghile utango yolonga, “Ayo yondanimnonele mulomo, hiyo yuyo, mgogeni!” 49Mhunde kamgendela Yesu, yolonga, “Kwa mpile, Rabbi,” kamnonela. 50Yesu kamulongela, “Mbwiga, sanghana diuwinzile!” Weza waja, wagolosa makono gawo, wamgoga. 51Na imonga wawo wakalile hamonga na Yesu, kagolosa mkono wake, kasomola sime, kamtowa mtumwa wa mtambika mkulu, kamkanha digutwi. 52Yesu kamulongela, “Bweza sime jako ihanhu hamwake, kilumbo wose wene kugoga sime wokwangamila kwa sime. 53Hebu kokwagiza, niye sidaha kumpembela Tata wangu, na heyo kongalila madale kubanza longo dimwe na mabili ga malaika sambi baha? 54Kumbe gaja gandikigwe kamba vyandakane viwe hivo, govikizwa vilihi?”
55Saa ija Yesu kawalongela gamadale, “He, mwiza na misime na mikota kungoga kamba mbazazi; mazuwa gose nghalaga mdingʼanda ja Mulungu nilangukiza, hamngogile bule. 56Gano gose gagalamka, giladi gavikizwe malonga gaja gandikigwe na Watula-Ndagu.”
Baho wanahina wose wamuleka, wakimbila.
Yesu kema haluhengo lwa Kayafa
57Na hewo wamgogile Yesu wamgala kwa Kayafa mtambika mkulu, kuwakalile wetinghanile wana-Nzuma na Iwalala. 58Na Petro kamkoleleza kutalitali kukisogo, kavika halubuga lwa mtambika mkulu, kakala hamonga na wanyakadala, yalole ikikomo. 59Basi watambika wakulu na wana-Nhaguso wose wazahila usindi wa uvwizi kumwake Yesu, giladi wamkome. 60Hawauwene; womana kulawa wasindi bwando wa uvwizi, vivo kumwande wabili welaviliza. 61Walonga, “Yuno kalongaga, nodaha kuditula dihekalu ja Mulungu na kudizenga kwa siku ndatu.”
62Mhunde mtambika mkulu kenuka kamulongela, “Hulonga mbuli? wano wokusindila choni?” 63Bali Yesu kavudala. Baho mtambika mkulu kamulongela, “Nokudumiliza kwa Mulungu mwene Upile, utulongele kamba gweye gwegwe Kristo Mwana wa Mulungu?” 64Yesu kamulongela, “Ona gweye kulonga. Avo nomulongelani, sambi baha momona Mwana wa Munhu voyokala ukulume kwa Mhiko, kabili vondayeze uchana mmawingu ga kuulanga.” 65Baho mtambika mkulu kadega nghanzu yake yolonga, “Kifukuzi. Wasindi towalonda choni kabili? Tegelezeni muhulika kifukuzi chake! 66Mokonaze mweye?” Wedika walonga, “Imwandama ifa!”
67Baho wamtemela mate ga mkihanga, wamsuna mikonde; wayagwe wamtowa makofi, 68kuno wolonga, “Gweye Kristo, tutambulile yakutowile yuyo yalihi?”
Petro viyambelile Yesu
69Na Petro viyakalile kunze halubuga, nyakadala imonga kamgendela yolonga, “Gwegwe na gweye kukala hamonga na Yesu wa Galilea!” 70Kabela chalinze yolonga, “Aka, hidijuwa diulonga.” 71Na heyo viyalawile kunze kuvikila mlango, mtwanzi iyagwe kamona, kawalongela wanhu wakalile hiko, “Yuno kakala hamonga na Yesu Mnazareti!” 72Kabela lwekabili na kwiduwila, “Simmanyile munhu yuno.” 73Mhunde bule waja wakalile baho wamwizila, wamulongela Petro, “Ona na gweye kwa imonga wawo, kilumbo ulonzi wako witambula.” 74Baho yomana kwidumiliza na kwiduwila yolonga, “Simmanyile munhu yuno.” Mhunde nzogolo keka. 75Baho Petro kadikumbuka dija Yesu diyalongile, “Nzogolo hanakwika, kombela miyanza midatu.” Kalawa hanze, kalila mahozi.
Právě zvoleno:
Mateo 26: ZAM75
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Zaramo © United Bible Societies, 1975.
