Mateo 25
25
Wana imhambe longo dimwe
1“Baho undewa wa Mulungu wogalamka kamba wana-Imhambe longo dimwe, wasolile taa zawo, walawa wagenda kumbokela Mlawila-mhambe. 2Watano wakala wabozi, bali watano wakala na fiyuko. 3Waja wabozi wasola taa zawo, bali hawasolile mavuta gayagwe mvibuyu vyawo. 4Waja wene zifiyuko wasola na mavuta mvibuyu hamonga na taa zawo. 5Avija Mlawila-mhambe viyakawile, wose wakala wokukila, wawasa utulo.
6Bali ikilo kikulu kukala zumozumo: Mlawila-mhambe kavika; laweni mgende mkambokele! 7Mhunde wanamhambe waja wose wenuka, watenda goya taa zawo. 8Waja iwabozi wawalongela wene zifiyuko, Twingheni mavuta genu vidodo, kilumbo taa zetu zozimika. 9Bali waja wene zifiyuko wawedika walonga, Si vivo, hondagatwenele tweye na mweye; avo gogeni nzila, mgende hiko kuwoguliza, mkagule! 10Ahewo vuwakalile wochola kugula, Mlawila-mhambe kavika. Awaja wakalile wombeta wengila hamonga na heyo muna imhambe, mhunde mlango uhindwa.
11Mmabaho weza na waja wanamhambe wayagwe, walonga, Mndewa, Mndewa, tuvugulile! 12Kedika kalonga, Ihoko nomulongelani, simtangileni mweye.
13Avo kaleni meso, kilumbo hamwitanga siku bule ikipi-giti.”
Lugano lwa nhalanta
14“Vivo vogalamka kamba munhu yolonda kuchola mwanza, kawakema nyakadala zake, keka kumwawo mhiya zake. 15Kamwingha imonga nhalanta nhano (zizo silingi elfu nhano), imonga nhalanta mbili, na imonga nhalanta imonga, kamba vija munhu vondayadahe mwenyecho; yomala kachola. 16Mhunde yuja yabokele zija zinhano, kachola kazisanghanila uchuluzi, zongezeka nhano. 17Vivo na ija mwene zimbili na heyo kasuma, zongezeka mbili. 18Bali yuja yapatile ija imonga, kachola kasikula hasi, kazifisa zimhiya za mndewa wake.
19Siku bwando vizibitile, mndewa wa nyakadala waja kabwela, kandusa mpeto hamonga na hewo. 20Keza yuja yabokele zija zinhano, kagala nhalanta nhano ziyagwe, kalonga, Mndewa, kwika kumwangu nhalanta nhano; lola nhano ziyagwe zongezeka. 21Mndewa wake kamulongela, Vinoga, nyakadala gweye unogile na mtamanilwa! Kukala mtamanilwa mvidodo, kumwako nokwika bwando. Kala mdenghelelo ya mndewa wako! 22Keza na yuja yabokele nhalanta zimbili kalonga, Mndewa, kwika kumwangu nhalanta mbili; lola ziyagwe mbili zongezeka. 23Mndewa wake kamulongela, Vinoga, mnyakadala gweye unogile na mtamanilwa! Kukala mtamanilwa mvidodo, kumwako nokwika bwando. Kala mdenghelelo ya mndewa wako! 24Keza na yuja yabokele inhalanta imonga, kalonga, Mndewa, nikutanga gweye kwa munhu mgaga; kohuna haja haulekile kuhanda, kolundiza haja haulekile kugola. 25Avo ndumba, ngenda niifisa nhalanta yako hasi mmisenga. Niigala hano, sola ili yako! 26Mnnewa wake kedika kamulongela, Gweye nyakadala wihile na udodile! Kunhanga kamba mhunaga gaja sigahandile, nolundiza gaja gandekile kugola? 27Avo vikwandama kuzigala mhiya zangu kwa waja walavaga nyongeza, aniye nikwiza nihapatile ichangu na nyongeza yake. 28Avo mbokeni nhalanta hiyo, mwingheni yuja yali na nhalanta longo dimwe! 29Kilumbo yuja mwene kinhu kogwelelwa na kongezelwa kimeme; komu yali bule ikinhu, hata kija kiyali nacho, kobokigwa. 30Na hiyo nyakadala yali bule mzoko, mwaseni kunze mdiziza, kuko kondakuwe ndilo na kugegeda meno.”
Kitala cha wanhu wose
31“Mwanage Munhu vondayeze na iyenzi yake, na malaika wangʼazi wose hamonga na heyo, aho kokala mkigoda cha iyenzi yake. 32Na ngholo zose zokilundiza haulongozi wake, na heyo kowabagula kamba vija mchunga viyobagula nghondolo na mhene. 33Koweka nghondolo mkono wake wa ukulume, na iwamhene mkono wake wa ukumoso. 34Mabaho Mndewa kowalongela waja wali mkono wake wa ukulume: Izoni, mmemezwe mhome na Tata wangu, ubokeleni undewa umwikilwe goya lulawile kuumbigwe ulumwengu! 35Kilumbo nghala na nzala, mningha mandiya; nghala na nghilu, mningʼweza; nghala mbita nzila, mngomela. 36Nghala ukulunge, mnivaza; nghala mtamu, mwiza kundola; nghala fungigwe, mnghakula. 37Baho wene ihoko hondawamwidike wolonga, Mndewa, zuwaki vutukuwene uli na nzala, tukwinghize, bule uli na mghilu, tukungʼweze? 38Kabili zuwaki vutukuwene mbita nzila tukugomele, bule uli ukulunge, tukuvazile? 39Zuwaki vutukuwene uli mtamu bule ufungigwe, tukukagule? 40Na heyo Mndewa kokwidika yowalongela, Kingongongo nomulongelani, vivija vumumsanghanile imonga wa iwandugu zangu wano wasusuwale, msanghanila nene.
41Yomala kowalongela na waja wali mkono wake wa ukumoso, Segeleni kumwangu mdumuke, mgende muna umoto wa digunge, uwamwikile goya Mwenembago hamonga na wasongolo zake! 42Kilumbo nghala na nzala, hamngwelele mandiya; nghala na nghilu, hamningʼweze. 43Nghala mbita nzila, hamngomele; nghala ukulunge, hamvazile; nghala mtamu na mkifungo, hamnghagule. 44Baho na hewo vondawamwidike wolonga, ‘Mndewa, halihi vutukuwene uli na nzala bule nghilu, uli mbita nzila bule ukulunge, uli mtamu bule mkifungo, tulekile kumsanghanila?ʼ 45Na heyo kowedika yolonga, ‘Ihoko nomulongelani, vivija vumulekile kumsanghanila imonga miyawo wasusuwale, hamnisanghanile niye.ʼ 46Na hiwo wogenda kwingila muna ukugaya milongo yose, bali wene ihoko wochola muna upile wa digunge.”
Právě zvoleno:
Mateo 25: ZAM75
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Zaramo © United Bible Societies, 1975.
