Mateo 27
27
1Vivikile imitondo, watambika wakulu hamonga na walala wa ulukolo wasagula msagu, wamkome Yesu giladi. 2Wamdaza na nzabi, wamsola wamgalila luwali Pilato.
Kwibota kwa Yuda Iskariota
3Mhunde Yuda yuja yamuhimbile, viyaviwene kamba Yesu kamala kutaguswa, kaiyalala mmoyo, kawabwezela watambika wakulu na iwalala zija mhiya milongo midatu. 4Kalonga, “Mbananga niye, ndavile mulopa ulibule na iditozo.” Walonga, “Avo ago gatulumbaze tweye. Galole higo gweye mwenyecho!” 5Kazasa zija zimhiya muna dihekalu, kasegela kachola kwibota.
6Watambika wakulu wazisola zija zimhiya walonga, “Hazilumbile kuhanganya hamonga na mhiya za nhambiko, kilumbo zino mhiya za mulopa.” 7Wazahila msagu wa kuzija kwa kugula mgunda wa muumvi, hawe hanhu ha kuzikila iwahenza. 8Avo mgunda uja na dilelo wokemigwa Mgunda wa Mulopa. 9Baho ivikizwe mbuli ilongigwe na mlaguzi Yeremiya yolonga: “Wavisola mhiya milongo midatu, ningo ya munhu yagulizwe, iwamgulile kulawa kwa Waisraeli, 10Wazija kugula mgunda wa muumvi, kamba Bwana Mulungu viyandagize.”
Yesu hakitala cha Pilato; Watambika wamsagula Baraba; Pilato kanawa makono
11Na heyo Yesu kema behi ya luwali; luwali kamuuza yolonga, “Gweye gwegwe mtawala wa Wayuda?” Yesu kamulongela, “Ona, gweye kulonga.” 12Bali vuwamtaguse watambika wakulu na uwalala, hatongoze mbuli. 13Baho Pilato kamulongela, “Huhulika mengahi gowokusindila?” 14Hamtongoze hata mbuli imonga, na heyo luwali kakanganya nghani.
15Na luwali kakala na luto lwa kuwafungulila Wayuda mfungigwa imonga iwalondile, kilagwa cha isiku nghulu. 16Na siku zija hakala na mfungigwa yatangike, yokemigwa Baraba. 17Vuwetinghanile, Pilato kawalongela, “Molonda niwafungulile yalihi? Baraba yuja, bule Yesu yokemigwa Kristo?” 18Kilumbo kavimanya kumbe wamulava kwa wihilo.
19Na viyakalile hachana ha kigoda cha ulamuzi, sano jake kamgalila msenga kumulongela, “Sikuuwe na mbuli na yuno mwene ihoko, chanduso ngazwa nghani lelo muna zinzozi kwa kilumbo chake.”
20Komu watambika na iwalala wawagela wanhu kiswalu, wamulonde Baraba na kumkoma Yesu. 21Luwali kedika kawalongela, “Molonda niwafungulile yalihi wa wano iwabili?”
Walonga, “Baraba!” 22Pilato kawauza, “Avo nimtendeze Yesu yokemigwa Kristo?” Walonga wose, “Yawambigwe mbiki!”
23Pilato kalonga, “Habali? Wiho gani uyatendile?” Wabanza nghani kulava kibwato na kulonga, “Yawambwe mbi-ki!” 24Basi Pilato viyaviwene havidahika vosevose, bali kiyahiyahi chobanza tu, kasola mazi, kanawa makono behi na mtinghano, kalonga, “Niye mduhu kwa mulopa wa munhu yuno mwene ihoko; galoleni higo mwemwe wenyego!” 25Wanhu wose wedika walonga, “Mulopa wake na uwe kumwetu na wanetu!” 26Avo kuwafungulila Baraba, na Yesu yasunigwe mbongho, kileka yawambigwe mbiki.
Sanzagala da misonga
27Baho asikali wa luwali wamsola Yesu mngʼanda ya ikitala, najo dale gima da minyalinyali wammemela. 28Wamvula nguwo zake, wamvaza guwo dunghu kamba ja undewa. 29Wabota sanzagala da misonga, wamvaza mditwi jake, na mlanzi wamwingha mmkono wake wa ukulume. Wafugama mavindi behi yake, wamtendela uponela, wolonga, “Kwa mpile, Mndewa wa Wayuda!” 30Kuno womtemela mate, wausola uja mlanzi, wamtowatowa mditwi. 31Vuwamalile kumdawalila, wamvula dija diguwo, wambwezela nguwo zake, na kumsola giladi wamkome.
Simoni wa Kirene kadipapa biki da Yesu; kwigola nguwo za Yesu; Yesu viyamgogile Tata na kudanganika
32Vuwakalile wochola mnzila, wamona munhu Mkirene, tagwa jake Simoni; yuno wamnanahiza yadigale biki jake ja kudanganikila. 33Wavika hanhu hokemigwa Golgota, kihindukizo chake Zege da Pala. 34Wamwingha divai ihanganizwe na sungu yangʼwe; na heyo viyalanzile, halondile kuingʼwa.
35Vuwamalile kumwamba mdibiki, watenda kibafuti giladi wazigole nguwo zake, kilumbo divikizwe Longa dilongigwe na mtula-Ndagu: “Wazigola nguwo zangu mmwanza wawo, na mfuliya wangu wautendela kibafuti”. 36Hivo wakala hasi, womwimiliza hiko. 37Uchana hana iditwi jake wamana kwandika kilumbo chake: Yuno yuyo Yesu, Mndewa wa Wayuda.” 38Bahaja mibazazi mibili iwambigwe mmibiki hamonga na heyo, imonga mkono wake wa ukulume, iyagwe mkono wake wa ukumoso.
39Na hewo wakalile wobita nzila, wamuliga wotigisatigisa matwi gawo. 40Wolonga, “Gweye mwene kuditula dingʼanda ja Mulungu na kudizenga kwa siku ndatu, ihonye mwenyecho! Uhawa gweye mwana wa Mulungu, hulumuka mdibiki!” 41Vivo na watambika wakulu wamponeza hamonga na wana-Nzuma na iwalala, walonga, 42“Kawahonya wayagwe, mwenyecho hadaha kwihonya. Kumbe heyo mtawala mndewa wa Israeli? Kamba yahahulumuka sambisambi mdibiki, na tweye tomtogola! 43Kamgoga Mulungu, avino na yamuhonye, kamba yahamulonda – kilumbo kalonga, Niye na Mwana wa Mulungu.” 44Mpaka ija mibazazi iwambigwe hamonga na heyo, wamdudumiza vivija.
45Vivikile saa sita imisi, kukala na ziza isi yose hata saa kenda. 46Na behi ya saa kenda Yesu kalava nyangi kwa mhiko yolonga, “Eli, Eli, lama sabaktani”, kihindukizo chake, “Mulungu wangu, Mulungu wangu, vilihi vuunyasa?” 47Wayagwe vuwagahulike mmwawo wemile hiko, walonga, “Yuno komkema Eliya.” 48Mhunde imonga wawo kachola yokimbila, kasola sifongo, kaimemeza siki, kainanika hasota ya mlanzi, kamwinghiza. 49Waja wayagwe walonga, “Leka tuvone kamba Eliya kokwiza kumuhonya.”
50Bali Yesu kalava nyangi lwekabili, baho kailava loho yake.
51Na lola guwo kulu ja mdihekalu didegeka nyenza mbili, kulawa uchana kuvika hasi. 52Isi igudema, mibwe itulika, kabuli zigubuka, na nghuli bwando za wangʼazi wawasile zizuka. 53Walawa mzikabuli zawo, wengila mdiwambo dingʼalile kimilo cha kuzuka kwa Yesu, wonekelwa na wanhu bwando.
54Baho yuja akida na hiwo wakalile hamonga na heyo womwimiliza Yesu, vuwawene nyukwanyukwa ja isi na mazingaombwe gatendeke, wadumba nghani walonga, “Kweli yuno kakala Mwana wa Mulungu.” 55Hakala na watwanzi bwando, wema kutali wolola; hiwo wawaja wamkoleleze Yesu kulawa Galilea na kumsanghanila. 56Mmwanza wawo kakala Maria Magdalena, na Maria mama wa Yakobo na Yosefu, na mama wa wanage Zebedeo.
Yesu viyazikigwe; kabuli jake disepwa
57Hata vivikile ichungulo, kavika munhu mwene mhiya, yolawa Arimatia, tagwa jake Yosefu, na heyo kakala mwanahina wa Yesu. 58Kamgendela Pilato, kampula mtufi wa Yesu; baho Pilato kalagiza wamwinghe. 59Yosefu kausola mtufi, kaugubikagubika sanda za bafuta ya isambi. 60Kawika mkabuli jake ja isambi, diyasongole mdibwe, kabimbilisa dibwe kulu hana umlango wa dikabuli, kachola. 61Na Maria Magdalena na Maria yuja iyagwe wakala wolola dikabuli.
62Imitondo iyagwe viibitile siku ya kwisasala, watambika wakulu na Mafariseo wammemela Pilato. 63Walonga, “Mndewa, tukumbukila gaja galongigwe na mbala yuja viyakalile mpile, Zihabita siku ndatu nozuka. 64Avo lagiza kuja kuna dikabuli kusepwe goya kuvikila siku ya ikadatu; wanahina wake sukuweze wamwibe, wakawapetele iwanhu kamba kafufuka kulawa kwa wafile; na uvwizi wa ikimambukizo wobanza ulongole.” 65Pilato kawalongela, “Soleni dale da asikali, gendeni mkadisepe goya vondamdahe!” 66Wachola wadigela dija dibwe utango, waweka wasepi.
Právě zvoleno:
Mateo 27: ZAM75
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Zaramo © United Bible Societies, 1975.
