LUK 8

Eyikwo na o Rungo La ne Jisus

1Na aba inɛ gɛ, ge Jisus tenenji ụshɛpwụ ụshɛpwụ, baa ananga Anabarɛ Ebiye Cɛnjɛ-ta-tugwama ta Agwatana. Eseshi-iyi ubwa umpwa-na-ba-eyebi o rungo nu bwa, 2keeni eyikwo oko a na baa nɛnjɛ la na mpiala ma aba mụ wɛ keeni igwumɛgwumɛ ya aba. Aba shɛ ge Meri ata ɛɛ hiɛŋ, Bumagdala, na bee becinji la atumwa-ibiri ecenje na amɛ ubwa, #Mat 27:55,56; Mak 15:40,41; Luk 23:49 3na Joana, biyikwo Kuza, na shɛ uwacili Hɛrod, na Susana, ne eyikwo anya a na gembi ufwugwo. Eyikwo ga o sugo la iyi nɛ aa 'yajɛ aa ndana Jisus#8:3 aa ndana Jisus: Tɛjɛshɛrɛga tu ko ti cala ti hiɛŋ, aa nda bụ. Aka ofwugwo eyikwo o sugo la ukwuribi wa aba oo mbiyono Eju a na o mbisogono aŋ iyi. keeni eseshi-iyi ubwa iyi.

N-ndumwa Tumanganjɛ iwɛ Bɛbɛrɛ

(Mat 13:1-9; Mak 4:1-9)

4Aka na ta atwa ofwugwo ụ'wụtụ a na bananjɛ nu ụshɛpwụ ụshɛpwụ zhajɛ, aa ụlwatagwụ pi Jisus, baa manganganɛ aŋ n-ndumwa mu ga, bɛɛ hiɛŋ:

5Bɛbɛrɛ beni maa waŋtanga izɛgwu ibwɛ. Aka na tu baa waŋtanga iŋ, inɛ ike waŋtangwụ nụ ụzalụ uhwaŋna, atwa rikeci iŋ, shanụnụ shi zhajɛ shee zenji shaa yɛ. 6Izɛgwu inyɛ waŋtangwụ nu utayɛ-tubala, aka na ti yɛɛ unshɛ, yee hweteni iwɛnɛ ti yaa zasa tulomu. 7Inyɛ izɛgwu waŋtangwụ na ashashɛ esepi, esepi ata waŋnɛ ni ibɛ, aa mɛcɛ iŋ. 8Inyɛ izɛgwu waŋtangwụ na cɛnjɛ ti biye, yaa 'yajɛ u'waba, yaa waŋnɛ, yee meci dipi-yebi. Aka na ti ge Jisus jɛmɛ iwɛ gɛ, baa uganɛ, bɛɛ hiɛŋ, Bụtụ na 'yajɛ acɛbɛ, ga hwuga.#Mat 11:15

Ecilo N-ndumwa ma ata Baa Manganjɛ

(Mat 13:10-17; Mak 4:10-12)

9Ibɛ eseshi-iyi Jisus heŋteni bu iwɛ ecilo n-ndumwa ma ata baa manganjɛ. 10Bɛɛ jishijɛ aŋ, hiɛŋ aŋ, E hi peni iyi tusweci Cɛnjɛ-ta-tugwama ta Agwatana maa hi mepi. Ama a duma iwɛ nu n-ndumwa tumanganjɛ no ofwo atwa vwɛ, iwɛ maa, okwo aa ngbaracɛ, kede a kwụbɛ o, okwo a hwulajɛ, kede e eshiciji o.#Ayiz 6:9; Jɛrɛ 5:21; Izik 12:2

Ge Jisus Eshicigeni Aŋ Ecilo N-ndumwa ma ata ma Bɛbɛrɛ

(Mat 13:18-23; Mak 4:13-20)

11Ecilo n-ndumwa ma ata ma bɛbɛrɛ na: Izɛgwu ɛtɛ ibɛ shɛ n-ndumwa ma Agwatana.#1 Tɛsɛ 2:13; 1 Pita 1:23 12Atwa na shɛmɛ sha aba shɛ sụbɛ ụzalụ uhwaŋna, aba shɛ atwa ata hwụjɛ, n-ndumwa ma ata, nazhɛ Ibiri zhajɛ, baa vwɛ mụ na shɛmɛ sha aba, iwɛ maa kede a tɛtana mụ rishe maa e bicinji aŋ o. 13Atwa na shɛmɛ sha aba shɛ sụbɛ utayɛ-tubala, aba shɛ atwa ata ee mbishi n-ndumwa ma ata, ee leshiji mu nu unyasa, iwɛ ɛtɛ kaa zasa ukpahiŋ na shɛmɛ sha aba o, aa tɛtanɛ-rishe na aka fwalaa. Ama aka na tumanga ti zhajɛ, ee leyi. 14Atwa na shɛmɛ sha aba shɛ sụbɛ cɛnjɛ te esepi, aba shɛ atwa ata ee mbishi n-ndumwa ma ata, ama tɛtɛtaga ti iyi ti'yaga keeni esheyi tɛnda iwɛ uduciya iyi unyizo ga mɛcɛ iwɛ ɛtɛ, tụ'walụ ti ibɛ tɛ nɛ shɛ kwukwuŋ. 15Atwa na shɛmɛ sha aba shɛ sụbɛ cɛnjɛ ti biye, aba shɛ atwa ata ee mbishi n-ndumwa ma ata, ee leshiji mu na amɛ oko na tɛkana, aa untanganɛ mụ dimi ni isɛbwɛ-ti'ima, aa 'wala tụ'walụ.

Ụsụtụla na Ee Shiyeni Tuta tu Umudu

(Mat 4:21-25)

16Za bụtụ zhɛ bo shiyono ụsụtụla ubwa ulwa, maa urugono uŋ ugbamgbam, kwo kaa maa sho uŋ tuta to ogodo, semi bi zhɛ ba patana uŋ nu uteburu-ụsụtụla, iwɛ maa u no hiokono atwa elele na e teni apata uhwaŋna.#Mat 5:15; Mak 4:21; Luk 11:33 17I zasa iyi elele nɛ ee sweci aa zha shɛ ɛ bɛcinjɛ iŋ caakwụ, i zasa kaa iyi elele nɛ ee urigeni aa zha shɛ o mbisono caakwụ maa e mepi iŋ o.#Mat 10:26,27; Mak 4:22,23; Luk 12:2,3; Ɛfɛ 5:13 18Ibɛ po na nda ma pece gana na ahia hwuga iwɛ, iwɛnɛ po bụtụ na 'yajɛ iyi, ubwa ɛɛ zhɛ a pananana, ama bụtụ na zasa iyi, okwo inɛɛ nɛ bee ge heŋshi maa bi 'yajɛ, ɛ zhɛ a lashɛga iŋ ni i'ɛlɛ ibwɛ.#Mat 13:12; 25:29; Mak 4:25; Luk 19:26

Bino Jisus no Ohongwu Ubwa Keeni Angwụfwụ Ubwa

(Mat 12:46-50; Mak 3:31-35)

19Bino Jisus no ohongwu ubwa keeni angwụfwụ ubwa zhajɛ, ama e eri shi o to ofwo na baa namɛ iwɛ atwa ofwugwo na tileni apata. 20Ee mbishi bu, ɛɛ hiɛŋ, Go nobu, no ohongwu bu keeni angwụfwụ bụ, e mbeye shikekeni no tupohondo, a jala maa a bụ kwụbɛ.

21Ama ge Jisus jishijɛ aŋ, bɛɛ hiɛŋ, Atwa ga a hwuga n-ndumwa ma Agwatana a na kaa a hwuga-unu muba, aba shɛ bino mi, no ohongwu mi keeni angwụfwụ mi.#Luk 11:28; Jon 15:14

Uvwugo Keeni Itekwu Hwụjɛ-unu Jisus

(Mat 8:23-27; Mak 4:35-41)

22Jitoo ko namba ge Jisus teni nu ụhaŋtụ ne eseshi-iyi ubwa, bɛɛ hiɛŋ aŋ, Hwure ti keshi ma hileniye itekwu, ee hwuri ga. 23Aka na to o mwo, ge Jisus tuba leyi malabụ. Nazhɛ uvwugo ụ'wụtụ kwuni tɛnda ni itekwu ɛtɛ, meni mu kwuni tishino nụ ụhaŋtụ, ebe kwuni aŋ tumana. 24Ibɛ po ee zhe pi Jisus, ɛɛ zhingicinjɛ bu, ɛɛ hiɛŋ, Agwuma-ihwɛ, Agwuma-ihwɛ, atuba na ti zhɛ to 'wo!

Ge Jisus zhinjɛ bee tezhigeni uvwugo keeni adanga ata. Nazhɛ uvwugo hwuwowu, ofwo lemi suu. 25Ge Jisus heŋteni aŋ, bɛɛ hiɛŋ, Cee rishe ri hiŋ tɛtɛtana rụ namɛɛ? Ibɛ po inyɛsɛ shɛ aŋ, yaa dama aŋ, oo momo hoŋtongonu, ɛɛ hiɛŋ, Bụtụ bi ce na yaa? Bi peni uvwugo keeni adanga unu, aa hwụjɛ-unu ubwa.

Ge Jisus Nɛnje Bụtụ na Atumwa-ibiri Namɛ na Amɛ Ubwa

(Mat 8:28-34; Mak 5:1-20)

26Aka na ti ge Jisus ne eseshi-iyi ubwa keshi ee ci cɛnjɛ ta atwa Gɛrɛsa,#8:26 Gɛrɛsa: Tɛjɛshɛrɛga tu ko ti cala ti hiɛŋ, Gadara, ti nya ti hiɛŋ, Gɛgɛsɛ. Kwụba du buwala bu 37. na namɛ geri-be-eshe bu Galili. 27Aka na ti ge Jisus banɛ nu ụhaŋtụ, ibɛ bụtụ bu ko na atumwa-ibiri namɛ na amɛ ubwa twa nu bwa. Bụtụ go te urigeni shi tugwuno hwuwayɛ o, bɛ jɛjɛ shɛ okwo ni ihwɛ o, semi ne e'uye baa nama. 28Aka na tu baa kwụbɛ Jisus, baa uganɛ, bee leyi nɛ vwɛvwɛjɛ ubwa, bee keri n'ungwa taawụụ, bɛɛ hiɛŋ, Imbe shɛ inee mi na bụ, Gabụ ge Jisus, Yɛu ya Agwatana na Hwuri Kpaaaŋ? Ma bu tabwa maa kede m mbiseni ụbaụta duwa o.#Mak 1:24 29Ibɛ po ge Jisus peni mpiala ma ata mụ wɛ unu maa ga mu banɛ na amɛ bụtụ ata. Ma shana maa hwayɛgwa ɛgbɛ ɛgbɛ, a shana aa ta bụ ashɛnjɛ keeni shigbo, a na ngbaraka bụ. Ama ba shana baa dwatwaga iyi nɛ oo umpo bu, atumwa ata ibiri o unzo bu maa nama nu ụshɛka.

30Ge Jisus unseni bu, bɛɛ hiɛŋ, Nanaa ɛɛ hiɛŋ izeci buu?

Bɛɛ jishijɛ, bɛɛ hiɛŋ, Ɛ mɛ hiɛŋ, Ge Lijon, iwɛnɛ ta atumwa-ibiri ofwugwo zweni na amɛ ubwa. 31Nazhɛ atumwa-ibiri tabwa Jisus maa kede pana aŋ unu maa a ishɛjɛ e teni nu u'ibwa ata iri tutu tutu o.

32Nkomu mu ufwugwo mi tileni apata ne embi ishɛmɛ maa yaga. Ibɛ atumwa ata ibiri tabwa Jisus maa ga pana aŋ ohwolu maa e teni na shɛmɛ sha muba. Ge Jisus peni aŋ ga ohwolu. 33Nazhɛ atumwa ata ibiri beni na amɛ bụtụ ata, ee teni na shɛmɛ sho nkomu ma ata. Nazhɛ nkomu ma ata mu hwayɛgwa mee gezhiji mee zwi nu ugbongboro, maa 'waŋ ni itekwu ɛtɛ mee 'wi.

34Aka na ta atwa na a biga mu kwụbɛ iyi nɛ teni, ee gezhiji, ɛɛ jimɛ nu ụshɛpwụ keeni shihilo. 35Ibɛ po atwa beni ee zhe pi Jisus maa a kwụbɛ iyi nɛ teni, aa kwụbɛ bụtụ ata atumwa-ibiri beni na amɛ ubwa, tu baa jɛjɛ to dongonu ɛvwɛvwɛjɛ Jisus, bee urigeni tugwuno, baa namɛ fwaaŋ. Ibɛ po inyɛsɛ shɛ aŋ. 36Atwa na kwụbɛ iŋ mbishi aŋ gana na baa njɛ bụtụ ata atumwa-ibiri ga namɛ na amɛ ubwa upo baa namɛ ya fwaaŋ. 37Nazhɛ atwa ata cɛnjɛ ti Gɛrɛsa kpaaŋ lụpɛ Jisus maa bana na cɛnjɛ ta aba, iwɛnɛ ti inyɛsɛ shɛ aŋ. Ge Jisus teni nụ ụhaŋtụ, bee genji aŋ bee hwuri.

38Ama bụtụ ata atumwa-ibiri beni na amɛ ubwa tabwa Jisus, bɛɛ hiɛŋ bụ, Lono maa ma bu 'wa.

Ama ge Jisus jishijɛ bụ, bɛɛ hiɛŋ, 39Zhaga jiyo ni ihwɛ bu, maa swegeni aŋ iyi elele nɛ Agwatana ubu ndanɛ. Ibɛ po bụtụ ata tenenji ga ashɛpwụ ata kpaaŋ, bee enenji iyi nɛ ge Jisus ndanɛ bụ.

Yɛu-yo-o Jairos, ne Biyikwo na Timengeni Utogwo Jisus

(Mat 9:18-26; Mak 5:21-43)

40Aka na ti ge Jisus gwuri hileniye ukwokwo ata, ibɛ atwa ofwugwo to bu amuraba, iwɛnɛ aa ga 'yacɛ bu kpaaŋ aba. 41Nazhɛ bụtụ bu ko na ɛɛ hiɛŋ izeci ibwɛ ga Jairos, na shɛ uhiu umwono Tụ'ụlwatagwụ zhajɛ bee leyi nɛ ɛvwɛvwɛjɛ Jisus, baa tabwa bu maa ga zhajɛ ni ihwɛ ibwɛ. 42Iwɛnɛ ti yɛu ibwɛ yo o mokondo nɛ namɛ shiywa umpwa-na-shɛba-shi-yebi te e meci iŋ zhɛ tu'wo.

Ama ti ge Jisus zhɛ tahaŋnụ ta ata, atwa ofwugwo a hwụngwụlangana bụ. 43Ama biyikwo bu ko na ba bana mehieŋ shiywa umpwa-na-shɛba-shi-yebi, na kaa nduwa i'wɛŋnɛ ibwɛ ufwu kpaaŋ na awa-inibi,#8:43 na kaa nduwa i'wɛŋnɛ ibwɛ ufwu kpaaŋ na awa-inibi: Tɛjɛshɛrɛga tu ufwugwo tu zasa n-ndumwa ma ata o. na kaa yaa zasa bụtụ na eri ba nɛnga bụ. 44Ibɛ po biyikwo ata zhajɛ na aba Jisus, bee timengeni tukwushɛ tu utogwo ubwa, gunu ata mehieŋ mu bwa mu na mu ga zhɛnga mu dwa.

45Ibɛ po ge Jisus heŋteni aŋ, bɛɛ hiɛŋ, Gaaba n timengenii?

Aka na ta atwa ata a nda ashamanjɛ, ga Pita keeni atwa na namɛ ne Jisus#8:45 keeni atwa na namɛ ne Jisus: Tɛjɛshɛrɛga tu ufwugwo tu zasa n-ndumwa ma ata o. hiɛŋ bụ, Ta atwa ofwugwo ma bu hwụngwụlangana i ci gana ga! Ibɛ hŋ obu to hoŋtono waa maa, Gaaba n timengeni?

46Ama ge Jisus jishijɛ aŋ, bɛɛ hiɛŋ, Bụtụ bu ko n timengeni, iwɛnɛ tu Ngaa hwụjɛ tu ukpahiŋ beni na tu'waba ti mi.#Luk 5:17; 6:19

47Aka na te biyikwo ata kwụbɛ maa bu swakanɛ shɛ Jisus o, baa zhajɛ na tɛzhɛgɛda, bee leyi nɛ ɛvwɛvwɛjɛ Jisus, ne eshe atwa ata kpaaŋ, bee mbishi bu ecilo no po bee timengeni bu keeni gana na tu baa zhɛmwanuanua gunu ata.

48Nazhɛ ge Jisus hiɛŋ biyikwo ata, Rishe rụ bụ tɛtɛtana rụ bụ nɛnjɛ, zhaga na amɛ-olom.#Mat 9:22; Luk 7:50; 17:19; 18:42

49Ti ge Jisus ta duma iwɛ ɛtɛ, bụtụ bu ko banɛ ni ihwɛ ebe uhiu umwono Tụ'ụlwatagwụ, bɛɛ hiɛŋ uhiu ata, Yɛu bu uwo, ta zuga ya Bimbisegeni gbi o.

50Ama aka na ti ge Jisus hwụjɛ iwɛ ɛtɛ, bɛɛ hiɛŋ uhiu ata, Ta nda inyɛsɛ o. Tɛtana yibwa rishe kiri, nazhɛ bɛɛ zhɛ ba zhɛmanana.

51Aka na ti ge Jisus ci ihwɛ uhiu ata, bi leni shi maa bụtụ be elele teni nu umwono ata nu bwa o, semi ga Pita, na Jon, ne Jemis keeni bishi no bino bi yɛu ɛtɛ kiri. 52Atwa elele na namɛ apata, a twagana-u'wo, aa pa shɛgba sha aba iyi iwɛ yɛu ɛtɛ. Ama ge Jisus hiɛŋ aŋ, Ta twa ma u'wo, bu 'wi shi kaa, malabụ boo woto.

53Nazhɛ atwa ata hiɛnjɛ bụ ilɛtu ya asada, iwɛnɛ te e mepi maa yɛu ɛtɛ 'wi.

54Ama ge Jisus imɛ yɛu ɛtɛ u'ala, baa suyanɛ bụ, bɛɛ hiɛŋ, Ɛ-yɛu-yo-o, ishijɛ! 55Nazhɛ ihwungwɛ yɛu ɛtɛ gwure, bɛɛ ishijɛ gunu ata.

Ge Jisus peni aŋ unu maa ge peni bu iyimɛyɛ maa ya. 56Yaa dama atwa na meci yɛu ɛtɛ, ama ge Jisus tɛtaganɛ aŋ unu duwa maa kede e mbishi bụtụ be elele iyi nɛ baa njɛ apata o.#Mat 8:4; Mak 3:12; 7:36; Luk 9:21

Právě zvoleno:

LUK 8: RBT

Zvýraznění

Sdílet

Kopírovat