LUK 9

Ge Jisus Tumwanɛ Eseshi-iyi Ubwa Utumwa

(Mat 10:5-15; Mak 6:7-13)

1Ge Jisus suyanɛ eseshi-iyi ubwa umpwa-na-ba-eyebi no ofwo oko, bee peni aŋ ukpahiŋ keeni ụhwada maa a lasụ atumwa-ibiri elele, maa a nɛnjɛ ụngwụ gɛnɛgɛnɛ. 2Baa tumwanɛ aŋ maa ge enenji iwɛ Cɛnjɛ-ta-tugwama ta Agwatana, maa du a nɛnjɛ agwumashɛ. 3Ge Jisus hiɛŋ aŋ, Ta 'waŋna ma iyi elele na tahaŋnụ ti hiŋ o. Ta 'waŋna ma shekwute, okwo ulapa, okwo iyimɛyɛ, okwo ukwuribi, to urugono ma okwo n-nduka mi yeyebi o.#Luk 10:4-11 4Ofwo elele na ehi zhe, nama ma ni ihwɛ ɛtɛ ehi teni uuwa i ci aka na ɛhi zhɛ hia bana apata. 5Atwa elele ihi leshiji shi, aka na ehi beni nu ụshɛpwụ ata, bibisono aŋ ma upwupwutu shivwɛvwɛjɛ shi hiŋ maa u shanɛ aŋ tiseyida tu na ti zhɛ ta wumana aŋ.#Ugo 13:51

6Ee beni ga ee zhe nu ụshɛpwụ ụshɛpwụ, ee enenji Anabarɛ Ebiye, aa nɛnjɛ agwumashɛ no ofwo elele.

Ahaŋsa Hɛrod Zuga Bụ

(Mat 14:1-12; Mak 6:14-29)

7Aka na ti gɛ Hɛrod na shɛ uhiu cɛnje ta ata hwụjɛ unabarɛ iyi elele nɛ ge Jisus ba nda, ibɛ po ahaŋsa ubwa zuga bụ, iwɛnɛ ta atwa oko hiɛŋ maa ga Jon ubwa hiɛ no tu'wo.#Mat 16:14; Mak 8:28; Luk 9:19 8Ama atwa oko hiɛŋ, ge Elaija ubwa banɛ sasana, atwa oko hiɛŋ, Bụtụ bu ko na ashashɛ egesere na namɛ la cala ubwa hiɛ. 9Gɛ Hɛrod hiɛŋ, M muwoŋ la kaa Jon uhiuhiu, asha gaaba nu ama hwuga iyi gɛnɛ gɛ iwɛ ubwaa? Ibɛ po baa jalakaka gana na maa kwụba Jisus.

Ge Jisus Peni Atwa Igbɛɛ-iyebi-na-kpakwụ-a-ta Iyimɛyɛ

(Mat 14:13-21; Mak 6:30-44; Jon 6:1-14)

10Aka na ta atumwa Jisus gwure, ee swegeni bu iyi elele nɛ ɛɛ njɛ. Nazhɛ ge Jisus suji aŋ bee zhe geri bu ụshɛpwụ uko na ɛɛ hiɛŋ izeci ubwa, Bɛtɛsaida. 11Ama aka na tu ofwugwo wa ata eshiciji aŋ, aa 'wa bụ. Boo to aŋ amuraba, nazhɛ bee enengeni aŋ iwɛ Cɛnjɛ-ta-tugwama ta Agwatana, baa nɛnjɛ du atwa na ukekeshi tɛnɛnjɛ go to.

12Aka na tu ụrụmɛ shɛ, eseshi-iyi Jisus zhe pu bwa, ɛɛ hiɛŋ bụ, Hiɛŋ ofwugwo wa atwa ga maa ge zhe na ashɛpwụ keeni shihilo shɛ na shi rungwutwonu epe maa o so iyimɛyɛ, iwɛnɛ ati namɛ epe no ofwo na bụtụ zasaba.

13Ge Jisus jishijɛ aŋ, bɛɛ hiɛŋ, Pana aŋ ma iyimɛyɛ ni ikɛnyi hiŋ maa a yɛ.

Eseshi-iyi ubwa jishijɛ bụ, ɛɛ hiɛŋ, iyimɛyɛ nɛ ati 'yajɛ hwɛ hwɛɛ, uhwuri shi mbrad mu ta keeni ijɛnɛ iyebi o, semi asha iwɛ maa ta zha tɛ sɛ iyimɛyɛ iwɛ atwa ga kpaaŋ.#2 Shɛgwu 4:42-44 14Atwa na kaa namba apata a shɛ gana etwenyi igbɛɛ-iyebi-na-akpakwụ-a-ta (5,000).

Ge Jisus hiɛŋ eseshi-iyi ubwa, Hiɛŋ aŋ ma maa ga gɛgaga na shɛwala gana atwa dupu dupu na buwala buwala.

15Nazhɛ eseshi-iyi ubwa njɛ gana ata, aa njɛ maa ga atwa ata kpaaŋ gɛgaga. 16Nazhɛ ge Jisus suji mbrad ma ata keeni ijɛnɛ ɛtɛ iyebi, bee shepi eshe ubwa na azuba, baa tabwa Agwatana maa pana iŋ uwebiye ubwa. Nazhɛ boo dwonu aŋ, bee peni eseshi-iyi ubwa maa ge sheji aŋ na agba ofwugwo ata. 17Atwa ata hwɛ hwɛɛ aba yɛ, ee shigeji, ee suji owunzu mbrad ma ata mụ vwɛ, ee shidinji shɛrɛgada umpwa-na-shɛba-shi-yebi.

Ga Pita Le Tiseyida maa ge Jisus Ubwa Shɛ ga Krast

(Mat 16:13-19; Mak 8:27-29)

18Jitoo ko ti ge Jisus ba nda adua bwooko, eseshi-iyi ubwa zhajɛ pu bwa, bee heŋteni aŋ, bɛɛ hiɛŋ, Gaaba kwuŋ atwa ofwugwo hiɛŋ N shɛɛ?

19Ɛɛ jishijɛ bụ, ɛɛ hiɛŋ, Ɛ hiɛŋ, Ga Jon bɛnjɛ-bu-ubaptizim, anya atwa hiɛŋ, Ge Elaija, anya atwa hiɛŋ maa bụtụ bu ko na ashashɛ egesere na namɛ la cala ubwa hiɛ.#Mat 14:1,2; Mak 6:14,15; Luk 9:7,8

20Ge Jisus heŋteni aŋ, bɛɛ hiɛŋ, Ahiɛba tuba, gaaba kwuŋ ɛhi hiɛŋ N shɛɛ? #Jon 6:68,69

Ga Pita jishijɛ bụ, bɛɛ hiɛŋ, Ga Krast Agwatana.

Ge Jisus Jɛmɛ iwɛ Ụbaụta Ubwa Keeni Tu'wo tu Bwa

(Mat 16:20-28; Mak 8:30—9:1)

21Ama ge Jisus tɛtaganɛ eseshi-iyi ubwa unu maa kede e mbishi bụtụ be elele iwɛ ɛtɛ o. 22Ge Jisus hiɛŋ aŋ, I shɛ tilɛɛ maa Yɛu Bụtụ zhɛ yo hioko ụbaụta iyi ifwugwo. N-nyarɛ, ne ehiu onongbo, keeni embisegeni Undwa, zhɛ a manga bụ, ɛɛ zhɛ a laka bụ gana uzhobu, ɛ zhɛ a kwụna bụ, ama bi zhɛ bɛ hiɛ nụ ụjita ụtatụ.#Luk 9:43-45; 18:31-34; 17:25

23Nazhɛ ge Jisus mbishi atwa ata kpaaŋ, bɛɛ hiɛŋ, Yaa shɛ bụtụ be elele ba jala maa ma n 'wa, asha ga bu na mama laka, ama ga shapa ụ'wụ'wụ-ubatanɛ ubwa iyi-heri iyi-heri maa ma n 'wa.#Mat 10:38; Luk 14:27 24Bụtụ be elele na ba jala maa bicingo uraiŋ ubwa, asha nazhɛ bɛɛ zhɛ ba inzhɛnga uŋ. Ama bụtụ be elele na ba kala uraiŋ ubwa iwe mi, nazhɛ bɛɛ zhɛ bo bicingo uŋ.#Mat 10:39; Luk 17:33; Jon 12:25 25Imbe i shɛ ule na bụtụ zhɛ ba ya ti yaa shɛ bee leshiji iyi unyizo ga kpaaŋ maa tuba mama inzhɛnga kwo kaa maa mama nda ufwuu? 26Bụtụ be elele na ba nda ezuye iwe mi keeni iwɛ n-ndumwa mi mi, Yɛu Bụtụ zhɛ ya nda hwuŋ du ezuye bụtụ ata na aka na ti bee ci nu ụjɛrụma ubwa, keeni una Bishi bwa keeni atumwa ubwa tijilo.#Mat 10:33; Luk 12:9; 1 Jon 2:28 27Ama iwɛ-tɛkana Omo hi mbiso maa, tu'wo ti zha shɛ to tumongono atwa oko na shikekeni epe kwukwuŋ tɛ ɛ zhɛ a kwụba Cɛnjɛ-ta-tugwama ta Agwatana.

Ge Jisus Sheyinji ne Eshe Aba

(Mat 17:1-8; Mak 9:1-8)

28Tɛ ɛ hiɛŋ gana ụjita tụndatụ na hwayɛ ti ge Jisus jɛmɛ iwɛ ɛtɛ, bee zeriji Pita, na Jon keeni Jemis, bee munji ni ishɛmɛ maa nda adua. 29Ụpɛshɛka Jisus sheyinji tu baa nda adua, i'wɛŋnɛ nɛ bee urigeni cɛnjɛmɛ paawụụ yaa ta tebiye. 30Aa kwụbɛ atwa eyebi ta a dumanga n-ndumwa ne Jisus, aba shɛ ata Moses, ne Elaija. 31Aa banɛ nu ụjɛrụma, aa jɛmɛ iwɛ ti'ishɛga ti Jisus nu Jɛrusalɛm tu na tu gwumwonu. 32Ama eshe Pita na a na atwa vwɛ. Zhinengeni na malabụ. Ama aka na tɛ ɛ zhinjɛ ngbɛrɛ, aa kwụbɛ ụjɛrụma Jisus keeni una wa atwa ata eyebi a na shikekeni nu bwa.#Jon 1:14 33Aka na ta atwa ata kwuni ti'ishɛga maa e genji Jisus, ga Pita hiɛŋ Jisus, Agwuma-ihwɛ itɛ zhɛmanɛ maa tu nama ma epe. Lono maa ta ta shidulo shɛ tatụ, uko shɛ unaa bụ, uko shɛ una Moses, uko shɛ una Elaija, iwɛnɛ ti bee mepi shi iyi nɛ maa duma.

34Aka na tu ga Pita ta duma iwɛ ɛtɛ, ibɛ udomu uko kezhe wee ubi aŋ, nazhɛ inyɛsɛ shɛ aŋ, te e teni nu udomu ata. 35Nazhɛ rụhwụŋ ru ko ru dumanɛ iwɛ nu udomu ata, rɛɛ hiɛŋ, Bụtụ ga ubwa shɛ Yɛu mi nɛ Ngee teri,#9:35 Yɛu mi nɛ Ngee teri: Tɛjɛshɛrɛga tu ko ti cala ti hiɛŋ, Bụtụ mi na Ngee lubi duwa, kwo kaa tulubo ti mi. na shɛlaga ma iwɛ ubwa.#Ayiz 42:1; Mat 3:17; 12:18; Mak 1:11; Luk 3:22

36Aka na ta rụhwụŋ ra ata ru dumanɛ iwɛ, aa kwụbɛ ya Jisus bwooko. Ama a namɛ saiiŋ jita ata, e mbishi shi bụtụ be elele iyi elele nɛ ɛɛ kwubɛ o.#Mat 17:9; Mak 9:9,10

Ge Jisus Nɛnjɛ Yɛu-ye-eyi Ike nɛ Mpiala mụ Wɛ mu Namɛ na Amɛ Ubwa

(Mat 17:14-18; Mak 9:14-27)

37Aka na ti iyi heri, te e kezhe ni ishɛmɛ ɛtɛ, atwa ofwugwo ụ'wụtụ twa ne Jisus. 38Nazhɛ bụtụ bu ko na ashashɛ atwa ofwugwo ata uganɛ, bɛɛ hiɛŋ, E-Bimbisegeni, Ma bu tabwa maa kwụbɛ yɛu mi ye eyi, iwɛnɛ ti yaa shɛ ubwa kiri shɛ yɛu mi mokondo nɛ Ngaa 'yajɛ. 39Hioko, mpiala mu ga ma ima bu eshigiri, bu na ugaga, mpiala mu ga ma nda bụ maa bu na zhɛgɛda, unu ubwa no fwuno, mu na sụkwụta bụ, ɛdicɛ nazhɛ maa ganga bụ. 40Ngaa lụpwa eseshi-iyi bu maa e becinji mu, ama e eri shi o.

41Ge Jisus jishijɛ, bɛɛ hiɛŋ, Oo uwaŋnɛ ga zasa rishe-tɛtɛtana, a na kaa ontongonu! Ụkwụmbwụ umbaa Ngɛɛ zhɛ ma ima-isɛbwɛ maa Ma nama ne hiiŋ? Bɛɛ hiɛŋ bishi bi yɛu ɛtɛ, Shapɛ yɛu ɛtɛ bi epe. 42Ti bee ci, butumwa ata bɛ ibiri keri yɛu ɛtɛ tigbici na cɛnjɛ. Ge Jisus tezhigeni mpiala ma ata mụ wɛ, baa nɛnjɛ yɛu ɛtɛ, nazhɛ bee shepi iŋ bee peni bishi bwa. 43Yaa dama aŋ kpaaŋ aba, iwɛ igɛhi i'wɛtwɛ ya Agwatana.

Ge Jisus Dumananɛ iwɛ Tu'wo tu Bwa

(Mat 17:22,23; Mak 9:30-32)

Iyi elele nɛ ge Jisus njɛ dama aŋ kpaaŋ. Nazhɛ ge Jisus mbishi eseshi-iyi bwa, bɛɛ hiɛ, 44Gɛ iwɛnɛ Ama duma hwuwayɛ ne hi tono na shɛcɛbɛ. Ɛ zhɛ a shapa Yɛu Bụtụ o utogono bu atwa. 45Ama eseshi-iyi ubwa eshiciji shi n-ndumwa ma ata, mu swakanɛ aŋ, iwɛ maa kede e eshiciji mu o. Inyɛsɛ kaa shɛ aŋ maa e unseni bu iwɛ n-ndumwa ma ata.

Gaaba Hwuri Atwa Vwɛɛ?

(Mat 18:1-5; Mak 9:33-37)

46Nazhɛ eseshi-iyi Jisus kwuni tụ'wụtụ tudundo iwɛ bụtụ na hwuri atwa vwɛ na ashashɛ aba.#Luk 22:24

47Ti ge Jisus mepi tuhaŋsa ta aba, bee shepi yɛu ike ticwɛŋ, bee shikicinji iŋ todongonu bu'aŋbụ bu bwa. 48Bɛɛ hiɛŋ aŋ, Bụtụ be elele na ba lashɛga yɛu ticwɛŋ gɛnɛ gɛ ni izeci mi, asha Gamba baa la, bụtụ be elele na kaa n le shi, asha bi le shi du bụtụ na n tumwanɛ o. Iwɛnɛ po bụtụ na 'nyanɛ na ashashɛ hiŋ kpaaŋ, asha ubwa hwuri atwa vwɛ.#Mat 10:40; Luk 10:16; Jon 13:20

Bụtụ na Shɛ shɛ Bụtụ bi I'ime tu, Asha no Tu Baa Namɛ

(Mak 9:38-40)

49Ga Jon mbishi Jisus, bɛɛ hiɛŋ, Agwuma-ihwɛ, tụ kwụbɛ bụtụ bu ko tu baa bacɛnga atumwa-ibiri ni izeci bu, atu lakanɛ bụ, iwɛnɛ tu baa bu 'wa sụ.

50Ge Jisus jishijɛ bụ, bɛɛ hiɛŋ, Ta lakana bu ma o, bụtụ be elele na ihiɛ sukakanɛ shɛ, asha bụtụ hiŋ ta.

Atwa Ụshɛpwu na Leshiji Shi Jisus na Cɛnjɛ tu Samaria

51Aka na ta aka gwumwonu maa e shepi Jisus na azuba, yaa namɛ kaa na ahaŋsa ubwa maa zha Jɛrusalɛm. 52Baa tumwanɛ atumwa nu umbe ubwa. Ibɛ atumwa ata teni ụshɛpwụ wa atwa Samaria uko maa a imanganɛ bụ iyi elele. 53Ama e leshiji shi bu o, iwɛnɛ ta a kwụbɛ maa bi zhɛ Jɛrusalɛm. 54Aka na te eseshi-iyi ubwa ge Jemis na Jon kwụbɛ iŋ, ɛɛ hiɛŋ bụ, Agwangwama, ibu kwụlanɛ suu maa tɛ hiɛŋ ga ulwa banɛ na azuba maa u hwoŋzhinji aŋ maa e 'wi? #2 Shɛgwu 1:1-16

55Ama ge Jisus mbiyanganɛ aŋ, bee tezhigeni aŋ, [bɛɛ hiɛŋ, Hi mepi shi iyiri mpiala mu na ahiɛ shɛ atwa muba o. Yɛu Bụtụ zhe shi maa nda araiŋ atwa ufwu o, semi iwɛ maa bicingo aŋ].#9:55 bɛɛ hiɛŋ…maa bicingo aŋ: Tɛjɛshɛrɛga tu ufwugwo tu zasa n-ndumwa ma ata o. 56Nazhɛ ee zhe nu ụshɛpwụ unya.

Atwa na Hiɛŋ Jisus N Zhɛ ma Bu 'Wa

(Mat 8:19-22)

57Tɛ ɛ zhɛ nu uhwaŋna, bụtụ bu ko hiɛŋ Jisus, Iyɛri,#9:57 Iyɛri: Tɛjɛshɛrɛga tu ko tu zasa Iyɛri o. N zhɛ ma bu 'wa no ofwo elele na ɛbi zhɛ.

58Ge Jisus hiɛŋ bụ, N-nyonyo mi 'yajɛ a'ibwa aba, shanụnụ shɛ 'yajɛ tuhwurugwo ta aba, ama Yɛu Bụtụ zasa ofwo elele na maa shilo uhiuhiu ubwa o.

59Ge Jisus hiɛŋ du binya bụtụ bu ko, N 'wa. Ama bụtụ ata hiɛŋ bụ, Iyɛri, lono maa Ma zha tugwo mo no bishi mi.

60Ama ge Jisus hiɛŋ bụ, Ganga n'wo maa mu momo nonu, ama zhaga ananga iwɛ cɛnjɛ-ta-tugwama ta Agwatana.

61Binya bụtụ du hiaŋnanɛ Jisus, Iyɛri, N zhɛ ma bu 'wa, ama lono maa Ma zha tugwo mɛ njɛ atwa ihwɛ mi ongbo.#1 Shɛgwu 19:20

62Ama ge Jisus hiɛŋ bụ, Bụtụ be elele na untwangwanua igewe itimɛ, yaa shɛ baa ta mbiyana aba, asha bi teni shi cɛŋ na Cɛnjɛ-ta-tugwama ta Agwatana o.

Právě zvoleno:

LUK 9: RBT

Zvýraznění

Sdílet

Kopírovat