WƖAA DƖ-SUOMUŊ 21
21
Sara lʋl Aɩzɩk
1La TƖƖNA fá Sara nenige a ŋaa wɩɩ-la ʋ fa sɩ sɩ ʋ jaŋ ŋaa pʋ. 2Ʋ kɛŋ luoruŋ a lʋl hambolibie a pɩ Abɩraham bʋa-la tɩtɩa lɛ Wɩa fa sɩ daga arɩ ʋ jaŋ lʋl, dɩ Abɩraham hɩɛsa. 3Ŋɩɩ nɛ Abɩraham hɛ bile yɩrɩŋ Aɩzɩk. 4Aɩzɩk sɩ yi tapʋlaa chori, Abɩraham keri ʋ peniŋ arɩ Wɩa fa sɩ dagʋ ŋɩɩ. 5Abɩraham fa ŋaa jɩsɩŋ zɔlɔ nɛ aŋ ka ba lʋl Aɩzɩk.
6Ŋɩɩ nɛ Sara bʋl, “Wɩa leŋe mɩ tʋɔŋ tɔrɛ nɛ mɩ mʋmɔŋ. Dɩ nʋʋkala nɛ nɩɩ wɩɩŋ deeŋ, ʋ jaŋ pɛ mɩ lɛ dɩ la mɔŋ.” 7Ʋ bɩra bʋl, “Kʋbɛɛ nɛ fa jaŋ wuo bʋla pɩ Abɩraham arɩ mɩ-na Sara jaŋ lʋl bie a kɛŋ yɩlɩŋ pʋ dɩ ʋ wasɛ? Ama ʋ hɩɛsa ŋɩɩ nɛ aŋ ka mɩ lʋl bie pʋ.”
Ba kiri Haga arɩ Ɩsɩmɛl ta
8Aɩzɩk waa, ba kɛrʋ yɩlɩŋ lɛ. Tapʋlɩɩ-la ba sɩ kɛrʋ yɩlɩŋ lɛ, Abɩraham ŋaa kʋdiilee ba gbieli gbieli-bal. 9Chɛɛ-kʋbala Sara na Haga Ijipiti tɩŋŋaa tolo-la sɩ lʋl bile pɩ Abɩraham dɩ ʋ sieri Aɩzɩk lɛ. 10Ŋɩɩ nɛ Sara bʋla pɩ Abɩraham, “Kiri yomo-la arɩ ʋ bie ta, mɩ bɩ chɛ dɩ yomo-la bie pɛ mɩ bie Aɩzɩk lɛ dii dɩa.” 11Wɩɩ-la wɩɩ Abɩraham woruŋ a tɩŋ Ɩsɩmɛl ma sɩ ŋaa ʋ bie wɩaa. 12Ŋɩɩ nɛ Wɩa bʋla pʋ, “Sɩ́ leŋe dɩ wɩɩŋ deeŋ walɩmɩŋ a tɩŋ bile arɩ ʋ naaŋ wɩaa. Jegile nɩɩ wɩɩ-la kala Sara sɩ bʋla, bɛɛ wɩaa Aɩzɩk lɛ nɛ mɩ jaŋ to pɛ ŋ doho nɩaa lɛ. 13Mɩ jaŋ leŋ dɩ ŋ yomo bie Ɩsɩmɛl ma pʋŋ a ŋaa nɩ-daŋ, bɛɛ wɩaa ʋ ma ŋaa ŋ doho nʋʋ nɛ.”
14Taŋ sɩ pʋla chʋchʋɔ-fɩɛla Abɩraham ŋaa kʋdiilee a ŋaa lɩɩŋ ma hɛ puruŋ tʋɔŋ a joŋo laalɛ Haga aŋ kiri ʋ dɩ ʋ bie ta. Ŋɩɩ nɛ ba lɩɩ jaŋ-la lɛ a mʋ bɩbaarɛ Bɛɛsɩba tintee-hɩlɩɩ-la lɛ.
15Lɩɩ-la fa sɩ dɛrɛ puru-la tʋɔŋ, ʋ joŋ bile bil tɩɩ-puguŋ bʋbʋɔŋ. 16Ŋɩɩ nɛ aŋ kiele mʋ hɔŋ a yi naakieliŋ zɔlɔ aŋ bʋl, “Mɩ bɩ jaŋ wuo bibeŋ ka dɩ bile sʋʋ.” Ʋ sɩ hɔnɔ ŋɩɩ, ʋ yiyel.
17Wɩa nɩɩ bile sɩɩ yel. Ŋɩɩ nɛ Wɩa tɩndaara lɩɩ wɩa-nyuŋ a yɩrɛ Haga a bʋl, “Bɛɛ nɛ, Haga? Sɩ́ fawʋllʋŋ fá, Wɩa nɩɩ bile sɩ pɩŋ nɩmɛ aa yel nɛ. 18Sii mʋ a kɛŋ bile dɩ ʋ sɩ́ yel, bɛɛ wɩaa, mɩ jaŋ leŋ dɩ ʋ pʋŋ a kʋ ŋaa tintee-bal.”
19Ŋɩɩ nɛ Wɩa suri Haga sɩaa ʋ na viliŋ sɩ kɛŋ lɩɩŋ. Ʋ mʋ ŋaa lɩɩŋ a su puru-la a kaa kʋ pɩ bile ʋ nyʋa.
20Wɩa pɛ bile lɛ ʋ waa a kʋ ŋaa nambagɩl a hɛ gɩrɩŋ tʋɔŋ. 21Bile sɩ hɛ Paraŋ tintee-hɩlɩɩ-la lɛ, ʋ naaŋ jaa Ijipiti tɩŋŋaa tolo pʋ.
Nii-la Abɩraham arɩ Abɩmɛlɛk sɩ bile pɩ dɔŋɔ
22Bʋa-la lɛ Abɩmɛlɛk arɩ ʋ laalɩyuori-hɩaŋ Fiko mʋ Abɩraham teeŋ a bʋla pʋ, “Wɩa chɩŋ ŋ harɩŋ nɛ, wɩɩ na-kala ŋ sɩɩ ŋaa lɛ. 23Ŋmɩɛsa pɩla Wɩa sɩpaaŋ arɩ ŋ bɩ jaŋ nyɩsɛla, a bɩra bɩ jaŋ nyɩsɛ la biiriŋ ma, koo la doho nɩaa. La ziliŋ nɛ. La sɩ ziliŋ ŋɩɩ, ŋ ma zilla arɩ la nɩaa, tintee-la ŋ sɩ́ hɔnɔ lɛɛlɛ a ŋaa nʋhʋɔrʋ lɛ.”
24Ŋɩɩ nɛ Abɩraham bʋl, “Tɔɔ, mɩ jaŋ ŋmɩɛsɛ.”
25Ŋɩɩ nɛ Abɩraham bʋla pɩ Abɩmɛlɛk, “Ŋ tɩntɩnnaa sɩ kɛŋ vil-la laa mɩ teeŋ wɩɩmɛ nɛ woruŋ.” 26Ŋɩɩ nɛ Abɩmɛlɛk bʋl, “Mɩ bɩ jɩŋ nɩɩ-la sɩ ŋaa wɩɩŋ deeŋ. Ŋ ma bɩ bʋla pɩmɛ, jɩnɩŋ nɛ mɩ nɩɩʋ ŋ-la.”
27Ŋɩɩ nɛ Abɩraham kɛŋ piesee arɩ nɛsɩŋ a kaa kɔ pɩ Abɩmɛlɛk, ba balɩa-la bil niiŋ pɩ dɔŋɔ. 28Ŋɩɩ nɛ Abɩraham lɩɩsɛ pie-keyee balɩpɛ, ʋ piesee tʋɔŋ. 29Abɩmɛlɛk pɩɛsɛ Abɩraham, “Wɩɩ-la ŋ sɩ ŋaa bʋbʋɔŋ nɛ bɛɛ?”
30Ŋɩɩ nɛ Abɩraham bʋl, “Laa pie-keyee deemba balɩpɛ mɩ nɩsɩŋ lɛ dɩ ŋɩɩ dagɛ arɩ mɩ nɛ lu viliŋ deeŋ.”
31Baa yɩrɛ lee-la Bɛɛsɩba, bɛɛ wɩaa nɩmɛ nɛ ba ŋmɩɛsa pɩ dɔŋɔ. 32Ba sɩ bil nii-la Bɛɛsɩba lɛ dɛrɛ, Abɩmɛlɛk arɩ ʋ laalɩyuori-hɩaŋ Fiko mɩɩra mʋ Fɩlɩsɩtɩa tɩŋŋaa tinteeŋ. 33Ŋɩɩ nɛ Abɩraham chɔnsɛ tɩa kʋbala baa yɩrɛ tamarɛs Bɛɛsɩba lɛ. Nɩmɛ nɛ ʋ yɩrɛ La TƖƖNA yɩrɩŋ, Wɩa-la sɩ hɛ nɩmɛ a kaa mʋ wuu. 34Abɩraham hɔŋ Fɩlɩsɩtɩa tɩŋŋaa tinteeŋ lɛ a dieni.
Právě zvoleno:
WƖAA DƖ-SUOMUŊ 21: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014