WƖAA DƖ-SUOMUŊ 20
20
Abɩraham arɩ Abɩmɛlɛk
1Ŋɩɩ nɛ Abɩraham sii Mamɩrɛ tɩɩsɩ-la bʋbʋɔŋ ʋ fa sɩ hɔnɔ a mʋ Nɛgɛf tintee-hɩlɩɩ-la lɛ a hɔŋ taŋ-la ba sɩ yɩrɛ Gɛra sɩ hɛ Kadɛs arɩ Suu pɛgɛ. 2Ʋ sɩ yi Gɛra, ʋ bʋl arɩ Sara ŋaa ʋ dɩhaal nɛ. Ŋɩɩ nɛ Gɛra kuoro Abɩmɛlɛk tɩŋ ba mʋ kɛŋ Sara kʋ pʋ.
3Ama Abɩmɛlɛk pɩŋ tɩtaŋɩŋ a duoso na Wɩa, ʋ bʋla pʋ, “Ŋ jaŋ sʋʋ, bɛɛ wɩaa haal-la ŋ sɩ leŋe ba kaa kʋ pɩŋ ŋaa nʋʋ haal nɛ.”
4Ama Abɩmɛlɛk ha bɩ haal-la jɩŋ. Ŋɩɩ nɛ ʋ bʋl, “Mɩ Tɩɩna, ŋ jaŋ sɛɩ kpʋ nɩa sɩ bɩ wɩɩ lɛ jɩŋ? 5Abɩraham tɩtɩa nɛ bʋla arɩ Sara ŋaa ʋ dɩhaal nɛ. Sara ma sɛɩ arɩ ʋ ŋaa ʋ dɩbaal nɛ. Mɩ ŋaa wɩɩŋ deeŋ arɩ tʋɔpʋla nɛ, mɩ bɩ wʋbɔŋ kala bɩɩna.”
6Ŋɩɩ nɛ Wɩa bɩra bʋla pʋ duoso-la tʋɔŋ, “Mɩ jɩma ŋ bɩ wɩɩkala cheye, ŋɩɩ nɛ tɩɩ mɩ bɩ leŋe ŋ digi tolo-la dɩ ŋɩɩ ŋaa wʋbɔŋ. 7Ŋɩɩ wɩaa joŋ haal-la pɩ ʋ bala, ʋ ŋaa mɩ wʋlaabʋllʋ nɛ. Ʋ jaŋ sʋlmɛ pɩŋ dɩ ŋ sɩ́ sʋʋ. Ama dɩ ŋ nɛ vɩa, jɩŋ ma dɩ ŋ nɩaa kala jaŋ sʋʋ.”
8Ʋ taŋ sɩ pʋla chʋchʋɔ-fɩɛla Abɩmɛlɛk sii yɩrɛ ʋ nɩhɩasɩŋ kala kʋ hilimi a bʋl wɩalɩŋ kala sɩ ŋaa a pɩba. Ba sɩ nɩɩ ŋɩɩ, fawʋllʋŋ kɛmba woruŋ. 9Ŋɩɩ nɛ Abɩmɛlɛk yɩrɛ Abɩraham a pɩɛsʋ, “Bɛɛ nɛ tɩɩ ŋ ŋaa wɩɩŋ deeŋ la lɛ? Bɛɛ wɩɩ nɛ mɩ cheyiŋ ŋ lɛrɛ wʋbɔŋ-balɩŋ deeŋ kʋ hɛ mɩ dɩ mɩ nɩaa lɛ? Ŋ ŋaa wɩɩ fa sɩ bɩ maga dɩ ŋ ŋaa nɛ mɩ lɛ.” 10Ŋɩɩ nɛ Abɩmɛlɛk bɩra pɩɛsɛ Abɩraham, “Bɛɛ nɛ tɩɩ ŋ ŋaa ŋ-la?”
11Ŋɩɩ nɛ Abɩraham bʋl, “Mɩ bɩɩna ma bɩ Wɩa ka fá daha, ma jaŋ tɩŋ haal-la wɩaa a kpʋmɛ. 12Dɩ ŋ nɛ bene, ʋ sɛnɛ ŋaa mɩ dɩhaala nɛ, bɛɛ wɩaa ʋ ŋaa mɩ nyɩmma tolo nɛ ama la bɩ naaŋ pɛ. Ŋɩɩ nɛ tɩɩ ʋ ŋaa mɩ haala. 13Wɩa sɩ ŋaa mɩ lɩɩ mɩ nyɩmma dɩa lɛ, mɩ bʋla pɩ mɩ haala Sara, ‘Ŋ-la nɛ ŋ jaŋ dagɛ arɩ ŋ chomi nɛ: Dɩ la nɛ mʋ lee-kala, bʋl mɩ ŋaa ŋ dɩbaal nɛ.’ ”
14Ŋɩɩ nɛ Abɩmɛlɛk kɛsɛ piesee, nɛsɩŋ, baalaa arɩ haalaa sɩ ŋaa yosuŋ a pɩ Abɩraham a pɛ joŋ ʋ haala Sara bɩra pʋ. 15Abɩmɛlɛk bʋla pɩ Abɩraham, “Mɩ tinteeŋ nɛ ŋ-la, hɔŋ lee-la kala ŋ sɩ cho.”
16Ʋ bʋla pɩ Sara, “Mɩ joŋ warɩpʋla bʋɩ nɛ aa pɩ ŋ dɩbaala, ŋɩɩ jaŋ dagɛ ŋ nɩaa arɩ ŋ bɩ wɩɩkala ŋaa chei.”
17Ŋɩɩ nɛ Abɩraham sʋl Wɩa pɩ Abɩmɛlɛk arɩ ʋ haala arɩ ba yoŋ toloo kala ba lʋla suri ba lʋlʋl biiriŋ. 18Wɩa fa leŋe Abɩmɛlɛk dɩa haalaa kala lʋla tɔ nɛ a tɩŋ Abɩraham haala Sara wɩaa.
Právě zvoleno:
WƖAA DƖ-SUOMUŊ 20: SIS
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©Ghana Institute of Linguistics Literacy and Bible Translation 1984, 2014