Lucas 19
19
Jesús ex Zaqueo
1Okxtzun Jesús tuj tnam Jericó, ex o b'et tuj tnam. 2Ex at jun xjal Zaqueo tb'i, nejeneltoq kye peyil pwaq, ex q'inuntoq. 3O tajb'e Zaqueo tu'n tke'yinte alkye Jesús, ex minti' tumel tu'n tlonte tu'n tlaj nim xjal, porke ch'intoq twa'l Zaqueo. 4Xitzun nej kywitz xjal, jaw qelan ex jax twi' jun tze' sicómoro tu'n tke'yinte twitz Jesús; porke kyja'toq t-xi' Jesús. 5Tejtzun tkanun Jesús jatum ta' Zaqueo, jaw tke'yin jawni, o til, ex xi tma'n te:
—Jurat tku'tza, Zaqueo, ex ax chin kyjel tene tjaya ja'lo.
6Jurattzun ku'tz Zaqueo ex o k'met Jesús tu'n tuj tja, in tzalaj ti'j. 7Tej kylonte xjal jlu, kykyaqil e jaw wululun kyxolx, ex kyma:
—Ma tz'okx Jesús posadiyil tuj tja jun xjal aj il, che chi.
8Atzunte Zaqueo kub' we' ex xi tma'n te Qajaw:
—Tat, mijku at weye kxel nq'o'ne kye meb'a; ex qa at jun ma tz'el welq'a'ne jun ti'xti te, jaku tz'aj nq'o'ne kyaje maj t-xel.
9Xitzun tma'n Jesús te:
—Ja'lo ma tzul ju kolb'il tuj ju ja lu; ex ax tiyjil Abraham te xjal lu. 10Porke aqine, sk'o'maj qine tu'n Dios tu'n ntene kyuk'il xjal, ma chin ule jyolte ex klolte aju tzpetnitoq.
Aju techal ti'j laj pwaq
Mateo 25.14-30
11Ex in che b'intoq xjal ti'j tkyaqil jlu, xi tma'n Jesús juntl techal kye, porke ch'ixtoq tkanun tuj tnam Jerusalén, ex tuj kynab'l xjal qa tu'n tul naj tkawb'il Dios. 12Xitzun tma'n Jesús:
—At jun xinaq ma' toklen xi' tuj jun tx'otx' najchaq k'molte toklen tu'n tok te rey ex tu'n tajtz meltz'aj. 13Na'nxtoq t-xi', e tzaj ttxko'n laj tmajen, ex xi tq'o'n jun pwaq ma' twitz te teyle junjun kye, ex xi tma'n: Che negosyarine ti'j pwaq lu aku in alin ch'in ok wule. 14Ex qe t-xjalil e ok ten ik'ul te, ex lepchix t-xi kysama'n jun comisyón q'malte kyja': Mi'n qaje tu'n tok jlu te rey tu'n tkawin qib'aje, che chi. 15Tejtzun tk'monte toklen, ajtz meltz'aj tuj ttanmi tu'n tok te rey. E je'xtzun txokb'aj qe majen tu'n, aqeju otoq txi q'o'n pwaq kye, tu'n tb'inte jte' otoq tkamb'a junjun. 16Ul aju tnejel ex tma: Tat, aju tpwaqa ma tkamb'a lajtl. 17Xitzun tma'n rey te majen: Ku, aya majen b'a'n; ch'in xi nq'o'ne teya ex ma tz'aq'nanxixa ti'j; kyja'tzun kxel nq'o'ne toklena tu'n tkawina kyib'aj laj tnam. 18Ul juntl ex tma: Tat, aju tpwaqa ma tkamb'a jwe'tl. 19Ax ikx xi tma'n rey te jlu: Ikx teya kkawila kyib'aj jwe' tnam. 20Ul juntl ex tma: Lu tpwaqa lu, tat. B'i'x xi nk'u'ne tuj jun tal k'alb'il; 21ex tzaj nxob'ile twitza, aya jun xjal kyuw, in xi ttzyu'na aju minti' in kub' tq'o'na, ex in jaw tchmo'na twitz awal aju minti' in ku'x tawa'na. 22Atzunte rey xi tma'n te: Aya majen mya b'a'n, tu'nx ju tyola kb'el tcastiwoya wu'ne. Qa b'a'n tu'na aqine jun xjal kyuwxix, in jaw ntzyu'ne aju minti' in kub' nq'o'ne, ex in jaw nchmo'ne aju minti' in ku'x wawa'ne; 23¿tiqu'ntzun minti' okx tq'o'na npwaqe tuj banc? mawtlo nk'ame ch'in ta'l tej ẍin ule. 24Xitzun tma'n rey kye qeju ate'toq: Kyi'mele pwaq te jlu, ex kyq'onxe teju at laj pwaq tuk'il. 25Atzun kye xi kyma'n te rey: Tat, ex at laj pwaq tuk'il. 26Xitzun tma'n rey: Kxel nma'ne kyeye: Alkyeju at ch'in te, mas kxel q'o'ntl te; atzun teju minti' te, aju ch'in at te, k'elel q'i'n. 27Ax ikx qeju e q'ojin wi'je ex minti' o kyajb'e tu'n woke te rey te kawil kyib'aj, kyi'ntze qe tzalu, ex kyb'yonkuye nwitze, chi rey.
Tej tokx Jesús tuj tnam Jerusalén
Mateo 21.1-11; Marcos 11.1-11; Juan 12.12-19
28Tej tb'aj tma'n Jesús jlu kub' nej kywitz, kyja' t-xi' tuj tnam Jerusalén. 29Tej ch'ixtoq tkanun kyuj qe tal tnam Betpagé tuk'ix Betania, otoq che pon t-xe' jun witz Olivos tb'i, e je'x t-sama'n Jesús kab'e t-xnaq'tzb'en, 30ex xi tma'n kye:
—Kyxi'ye tuj tal tnam tokx chixin; oktzun kyokxe knetel kyu'ne jun tal bur k'alo'n, aju na'nx tjax jun xjal chejil tib'aj; kypaju'mele, ex kyi'ntze. 31Ex qa at jun xjal ma tzaj qaninte kyeye: ¿Tiqu'n nne'l kypaju'ne? qa chi, kytzaq'wenxe te kyja': K'ajb'el te Qajaw, che chikuye.
32E je'xtzun qe t-xnaq'tzb'en, ex knet tal bur kyu'n ik tza'n otoq tma Jesús. 33Ex matoq nne'l kypaju'n ju tal bur, kyma qe tajwil kye:
—¿Tiqu'n nne'l kypaju'ne ju tal bur?
34Xitzun kyma'n kye:
—K'ajb'el te Qajaw.
35Tzajtzun kyi'n ju tal bur, ul kyi'n twitz Jesús; jax kyq'o'n kyxb'alun tib'aj tal bur tu'ntzun tjax qe' Jesús tib'aj. 36Ex tej kyja'toq t-xi' Jesús, kub' kylik'un kyxb'alun tuj b'e. 37Tejtzun kykanun ttxa'n witz Olivos tb'i tu'n kyxi' kub'l, kykyaqil t-xnaq'tzb'en e jaw tzalaj, in che sch'in wen, ex e ok ten nimsal tb'i Dios tu'nju otoq kyil tb'inchb'en Jesús nim tipumal, 38in kyma'n:
—Ky'iwla'n teju rey aju ma tzul, ma tzaj sama'n tu'n Qman. Atwit tzalajb'il tuj kya'j, ex nimanxwit tb'i Dios tuj kya'j.
39At junjun fariseo kyxol xjal xi kyma'n te Jesús:
—Xnaq'tzal, mayonxa qe t-xnaq'tzb'ena.
40Xitzun ttzaq'we'n Jesús kye, chi kyja':
—Kxel nma'ne kyeye, qa ma che q'ajen qe xjal lu, aqe ab'j che jawil sch'in.
41Tejtzun tpon laq'e' Jesús niqayin tib'aj tnam Jerusalén, xi tke'yin ju tnam ex jaw oq' ti'j, 42ex tma:
—Noqwit sel tnik'a ti'j ja'lo tza'n tten tu'n ttena tuj txub'txaj. Ex ja'lo ewan twitza ex mlay tz'el tnik'a ti'j. 43Porke tzul jun tq'ijlalil mya b'a'n tib'aja, qe aj q'oj ti'ja kjawil kyb'u'yin tx'otx' ti'jeleya, che xel txole' soldad ti'jeleya, ex che okel tzoqpaj ti'ja tuj tkyaqil ttxlaja. 44Kb'el xituna kyu'n, ex che b'el b'yo'n qe xjal ate' tuja, jumajx kb'el xituna tkyaqil, tu'nju minti' el tnik'a ti'j ju q'ij tej tul Dios onil teya.
E je'tz tlajo'n Jesús qe k'ayil tuj tja Dios
Mateo 21.12-17; Marcos 11.15-19; Juan 2.13-22
45Okxtzun Jesús tuj tja Dios, ex ok ten lajol kye xjal aqeju in che k'ayin tuj, 46ex xi tma'n kye:
—At jun yol in tma'n tuj Tu'jil, chi kyja': We nja, ja te nab'l Dios; atzun kyeye ma tz'ok kyq'o'ne te kyjul eleq'.
47Xi tq'o'n Jesús xnaq'tzb'il tkyaqil q'ij tuj tja Dios; atzun kye nejenel kye pal kyuk'ix qe xnaq'tzal ti'j ley ex qe nejenel kye xjal ok tilil kyu'n alkye tumel tu'n tkub' b'yo'n Jesús kyu'n. 48Ex minti' knet tumel kyu'n tza'n tten tu'n tkub' Jesús, ex kykyaqil xjal in kub' kyb'i'nxix tyol.
Právě zvoleno:
Lucas 19: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
