Lucas 20
20
Aju toklen Jesús
Mateo 21.23-27; Marcos 11.27-33
1At jun q'ij in tq'o'ntoq Jesús xnaq'tzb'il kye xjal tuj tja Dios ex in pakb'an ti'j tqanil kolb'il, e pontzun qe nejenel kye pal kyuk'ix qe xnaq'tzal ti'j ley ex qe kytijil xjal, 2ex xi kyma'n te Jesús:
—Q'mantza qeye: ¿ti toklena tu'n tb'inchanteya jlu? ¿Alkye ma tzaj q'onte toklena? Che chi.
3Xitzun ttzaq'we'n Jesús:
—Ikx weye at jun nxjele kyeye; b'a'n tu'n ttzaj kytzaq'we'ne: 4¿Alkye tzaj q'onte toklen Juan tu'n kyb'yan xjal tu'n tuj a'? ¿Tu'npe Dios, ex qa kyu'n xjal? Chi Jesús kye.
5Atzun kye e ok ten yolil ti'j kyxolx:
—Qa ma txi qma'n: Tu'n Dios tzaj q'o'n toklen Juan, ¿tiqu'ntzun minti' xi kyoksla'ne? Chilo qe. 6Ex qa ma txi qma'n: Kyu'n xjal tzaj q'o'n toklen Juan, jakulo qo kub' kyb'yo'n xjal tu'n ab'j, porke oksla'nxix kyu'n xjal qa t-sanjel Dios te Juan.
7Tzajtzun kytzaq'we'n:
—Minti' b'a'n qu'ne alkye tzaj q'onte toklen Juan tu'n kyb'yan xjal tu'n.
8Atzunte Jesús xi tma'n kye:
—Ikx weye mlay txi nma'ne kyeye alkye ma tzaj q'onte woklene tu'n nb'inchanteye tkyaqil jlu.
Aju techal kyi'j qe aq'nal mya b'a'n
Mateo 21.33-44; Marcos 12.1-11
9Oktzun ten Jesús q'malte jun techal lu kye xjal:
—At jun xjal ku'x tawa'n txqan uva tuj ttx'otx' ex xi tq'o'n xjal tx'otx' te kymajen xjal, xi'tzun tuj juntl lugar, ex o ten nim q'ij. 10Tejtzun tpon tq'ijlalil tu'n tkub' twitz awal, tzaj t-sama'n xjal jun majen kyuk'il majenal tx'otx', tu'n t-xi kyq'o'n ch'in twitz awal te; atzun kye majenal tx'otx' b'aj kyk'ixb'isa'n ex aj kysama'n minti' ch'in q'i'n tu'n. 11Ex tzaj t-sama'n tajwil tx'otx' juntl majen; atzun kye majenal tx'otx' b'aj kyyaso'n, b'aj kyk'ixb'isa'n ex aj kysama'n minti' ch'in q'i'n tu'n. 12Ex tzaj t-sama'n tajwil tx'otx' juntl majen; atzun kye majenal tx'otx' b'aj kyk'ixb'isa'n ex ex kylajo'n ti'jxi.
13Atzunte tajwil tqan awal tma: ¿Ti ok nb'incha'ye? Mas b'a'n kxel nsama'ne nk'wa'le aju k'ujla'nxix wu'ne; qapelo at ch'in tchi tuj kywitz ok tpon, chi patrón. 14Atzun kye majenal tx'otx' tej kylonte kyja ttzaj tk'wa'l patrón, e ok ten yolil ti'j kyxolx: Atzunte etzal jlu; chux qeye, qb'yonku tu'ntzun tkyaj ten tetzb'il te qe, che chi. 15Extzun kyi'n ti'jxi tqan awal, ex kub' kyb'yo'n.
—¿Titzun ok tb'incha' aju tajwil tqan awal kyi'j?
16Ktzajeltzun ex che b'el tb'yo'n qe majenal tx'otx', ex kxel tq'o'n ttx'otx' te kymajen txqantl xjal, chi Jesús xi tma'n kye.
Tejtzun kyb'inte fariseo jlu, kyma:
—Kuchiwt mi'n japun jlu.
17Atzunte Jesús e je'x tke'yin, ex xi tma'n kye:
—¿Titzun t-xilen aju yol tz'ib'an tuj Tu'jil? Jatum in tma'n:
Aju ab'j el kyik'un qe b'inchal ja, atzunju ma tz'ok te skyini te simyent. 18Alkye jun xjal ma jaw tolj ex ma kub' tz'aq tib'aj ab'j lu, b'i'x kb'ajel toqj; ex alkye jun xjal ma kub' tz'aq ab'j lu tib'aj, b'i'x kb'ajel b'uchj xjal tu'n, chi Jesús kye.
19Atzun kye nejenel kye pal kyxol xjal judiy kyuk'ix qe xnaq'tzal ti'j ley o kyajb'e b'i'x tu'n ttzyet Jesús kyu'n, tu'nju kanun tuj kynab'l qa kyib'aj otoq kub' tz'aq ju techal lu aju tma Jesús; ex tzaj kyxob'il kywitz xjal.
Tu'n tq'onjtz chojb'il te gobierni
Mateo 21.45-46; 22.15-22; Marcos 12.12-17
20Tu'n jlu e kub' ten xq'uqil te Jesús, ex e je'x kysama'n kab'e xjal b'il tyol, ok kyq'on kyib' mejor xjal qe ex mya ax tok kyu'n, o kyajb'e tu'n tkub' tz'aq Jesús kyu'n tujx jun tyol, tu'ntzun t-xi kyi'n ex tu'n t-xi kyq'o'n tuj tkwent gobernador. 21Atzun kye xi kyqanin te Jesús:
—Xnaq'tzal, b'a'n qu'ne in yolina tuj tumelxix ex in tq'o'na xnaq'tzb'il b'a'n, ex minti' nno'k tke'yina aju t-xilen xjal, noq o'kx in tq'o'na xnaq'tzb'il tza'n tten tu'n qb'ete tuj ju b'e in tzaj tyek'un Dios. 22Q'mantza: ¿b'a'npe tu'n t-xi qq'o'ne chojenj in tqanin gobierni te Roma, ex qa mi'n? Che chi.
23Eltzun tnik' Jesús ti'j kyximb'etz mya b'a'n, ex xi tma'n kye:
—[¿Tiqu'n in che jyone tumel wi'je?] 24Kyyek'untze jun pwaq weye. ¿Al e tilb'ilal tok twitz, ex al e b'iyb'aj tz'ib'an twitz?
—Te gobierni, che chi.
25Xitzun tma'n Jesús kye:
— Kyq'onxe te gobierni aju te gobierni, ex kyq'onxe te Dios aju te Dios.
26Ex minti' kub' tz'aq Jesús kyu'n tujx jun tyol kywitz xjal; o'kx e lab'in ti'j ju tzaq'web'l tu'n Jesús, ex minti'tl e q'ajt.
Aju xjel ti'j ok kyjatz anq'in xjal
Mateo 22.23-33; Marcos 12.18-27
27E pontzun junjun xjal saduceo tuk'il Jesús, aqeju in kyma'n qa mlay jatz anq'in jun xjal kyxol kyimni, ex xi kyqanin te:
28—Xnaq'tzal, che chi, at jun yol kyaj ttz'ib'an Moisés qe: Qa at jun xjal ma kyim at t-xu'jil ex minti' jun tk'wa'l otoq tzaj, ax ju titz'in kmojeb'el tuk'il t-xu'jil qtzan ttzik, tu'ntzun tkyaj jun t-xel qtzan ttzik tu'n, tu'n mi'n tnaj tiyjil. 29At wuq xjal e ten kyitz'in kyib'; aju tnejel knet t-xu'jil, ex o kyim minti' jun tk'wa'l kyaj. 30Ax ju xu'j jaw ti'n tz'inb'aj te t-xu'jil, ax ikx o kyim, minti' jun tk'wa'l kyaj. 31Ex ax ju xu'j jaw ti'n tkab'in tz'inb'aj te t-xu'jil, ex elpun b'aj kywitz wuq xinaq tu'nju xu'j, ex e kyim kykyaqil, minti' jun kyk'wa'l kyaj. 32Ex te mankb'ilxi kyim te xu'j. 33Oktzun kyjaw anq'in qe kyimni, ¿alkyetzun jun kyxol kywuqil k'okel te tchmil ju xu'j lu? Porke kywuqil e xu'jlan te, che chi saduceo.
34Xitzun ttzaq'we'n Jesús kye:
—Qe xjal ate' tuj tq'ijlalil ja'lo, qe xinaq in knet kyxu'jil, ikx kye xu'j in knet kychmil. 35Atzun kye xjal ma tzaj tq'o'n Dios kyoklen tu'n kyjaw anq'in kyxol kyimni ex tu'n kyten tuj juntl anq'ib'l, mi'n che moje'tl xinaq tuk'il xu'j ex qe xu'j tuk'il xinaq. 36Ex mlay che kyim juntl maj, porke ik che okel ik tza'n qe anjel, ex tk'wa'l Dios qe, tu'nju otoq che jaw anq'in kyxol kyimni. 37Ex ti'j tu'n kyjatz anq'in qe kyimni, ax Moisés kyaj q'onte jun xnaq'tzb'il tz'ib'an tuj Tu'jil jatum in tma'n ti'j ch'i'x in k'ant tu'n q'aq' tej tyolin ti'j Dios kyja': Ate Qman, Tdios Abraham, Tdios Isaac ex Tdios Jacob. 38Ex ate Dios mya Kydios kyimni; noq o'kx Kydios itz', ex kykyaqil itz' qe twitz Dios.
39Xitzun kytzaq'we'n junjun xnaq'tzal ti'j ley:
—B'a'n ma tmaya, Xnaq'tzal.
40Ex minti' ok kynimarin kyib' tu'n t-xi kyqanin mastl xjel te.
¿Al e K'wa'lb'aj ju Crist?
Mateo 22.41-46; Marcos 12.35-37
41Xitzun tma'n Jesús kye:
—¿Tza'ntzun tten in kyma'n xjal qa tiyjil David ju Crist aju at toklen tu'n Dios? 42Tu'nju axte David in q'mante tuj u'j Salmo; chi kyja':
Xi tma'n Qman te Wajawe: Qe'kuya tuj nb'anq'ab'e,
43akutzun in kub' kyi'j qe aj q'oj ti'ja wu'ne, chi tuj Tu'jil.
44Qa in tma'n David qa a Crist Tajaw, ¿tza'ntzun tten tu'n tok Crist te tiyjil David? Chi Jesús kye.
In tchik'b'a'n Jesús qa mya b'a'n kyaq'unb'en qe xnaq'tzal ti'j ley
Mateo 23.1-36; Marcos 12.38-40; Lucas 11.37-54
45Kykyaqil xjal in che b'intoq ti'j tyol Jesús tej t-xi tma'n kye t-xnaq'tzb'en kyja':
46—Ten kykwente kyi'je kye xnaq'tzal ti'j ley; nim kygan ti'j tu'n kyb'et tok kyxb'alun ẍjo'w, ex kyajb'il tu'n kyok q'olb'e'n tuj plas, ex kyajb'il tu'n kykub' qe' kyuj kynejel q'uqb'il kyuj ja te k'ulb'il, ex kyajb'il tu'n kykub' qe' kyuj tb'anil q'uqb'il tuj nintz wa'n. 47Nne'l kyi'n kyja meb'a xu'j, ex in che na'n Dios ma' tuj, tu'ntzun mi'n tel kynik' xjal ti'j kyb'inchb'en mya b'a'n; mas nim kycastiw jlu kb'el, chi Jesús kye.
Právě zvoleno:
Lucas 20: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
