Lucas 18
18
Aju techal ti'j ju meb'a xu'j ex ju jwes
1Ax ikx xi tma'n Jesús jun techal kye, tma qa ilxix ti'j tu'n qna'n Dios tkyaqil q'ij ex tu'n mi'n qkub' numj. 2Ex tma Jesús:
—Attoq jun jwes tuj jun tnam, minti' in xob' twitz Dios ex minti' tilwi jun xjal te. 3Ax ikx at jun meb'a xu'j tujx ju tnam lu, kukx in xi aj tuk'il jwes tu'n ttzaj b'incha'n ti'j tu'n tklet twitz aj q'oj ti'j. 4Atzunte jwes ela' maj minti' xi tb'i'n tyol xu'j; ex yajxitl kub' t-ximan: Maske minti' in chin xob'e twitz Dios ex minti' tilwi jun xjal tuj nwitze, 5ex tu'nju kukx in wulin meb'a xu'j lu wi'je, kxel nb'incha'ne ti'j, tu'ntzun mi'n tultl siksal weye, chi jwes.
6Xitzun tma'n Qajaw kye t-xnaq'tzb'en:
—Atzun jlu o tma aju jwes mya b'a'n. 7¿Yajtzunlo te Dios, mlaypelo tzaj tb'i'n kyyol qeju sk'o'maj tu'n, aqeju in che kub'san twitz q'ijtl ex qonik'an? ¿Ex mlaypelo che tzaj tb'i'n naj? 8Kxel nma'ne kyeye: Juratlo che tzajel tb'i'n. Ex oktzun wule juntl maj, aqine sk'o'maj qine tu'n Dios tu'n ntene kyuk'il xjal, ¿atxpelo kyokslab'l xjal twitz tx'otx'?
Aju techal ti'j jun fariseo ex jun peyil pwaq
9Ax ikx xi tma'n Jesús juntl techal kye junjun xjal, aqeju tuj kynab'l qa tz'aqlxix qe ex nne'l kyik'un qe txqantl. Chi Jesús kyja':
10—At kab'e xinaq e je'x na'l Dios tuj tja Dios, jun fariseo ex jun peyil pwaq. 11Aju fariseo wa'l tten tej tok ten na'l Dios ex tma kyja': Dios, kxel nq'o'ne chjonte teya porke mya ik qine ik tza'n qe txqantl xjal, eleq' qe, mya b'a'n qe, aj pajil qe; ex mya ik qine ik tza'n jun peyil pwaq lu. 12Kab' maj in kub' nyo'ne we'yaj tuj seman, ex in xi nq'o'ne tlaji'n teya ti'j tkyaqilju in nkamb'a'ne, chi fariseo. 13Atzunte peyil pwaq najchaq xi we', minti' o tajb'e tu'n tjaw tke'yin twitz kya'j, o'kx ok tq'o'n tq'ab' ttzi t-xu'k, ex tma kyja': Dios, kuchiwt tu'n ttzaj q'aq'an tk'u'ja wi'je, aj il qine, chi peyil pwaq. 14Kxel nma'ne kyeye: Aju peyil pwaq lu xi' tja najsa'majtl til; atzunte fariseo minti'; ex alkye jun xjal ma jaw tniman tib', k'okel q'o'n te ch'in; ex alkye ma tz'ok tq'on tib' te ch'in, kjawil nimsa'n.
E kub' tky'iwla'n Jesús qe k'wa'l
Mateo 19.13-15; Marcos 10.13-16
15Ex tzaj kyi'n xjal qe k'wa'l twitz Jesús tu'n kyok tmako'n; tejtzun kyke'yinte qe t-xnaq'tzb'en jlu, e mayet qe xjal kyu'n, aqeju e tzaj q'inte kye k'wa'l. 16E tzajtzun ttxko'n Jesús qe t-xnaq'tzb'en, ex tma:
—Kyq'onxe amb'il kye k'wa'l tu'n kytzaj wuk'ile ex mi'n che'x kymayo'ne; porke aju tkawb'il Dios kyekye xjal aqeju nno'k kyq'on kyib' ik tza'n qe k'wa'l. 17Ax tok kxel nma'ne kyeye, alkye minti' ma tz'ok ik tza'n jun k'wa'l tu'n t-xi tniman tkawb'il Dios, mlay b'ant tu'n tokx tuj.
Jun ku'xun q'inun in yolin tuk'il Jesús
Mateo 19.16-30; Marcos 10.17-31
18At jun nejenel kye xjal xi tqanin te Jesús kyja':
—Xnaq'tzal b'a'n, ¿ti ok nb'incha'ye tu'n nkamb'anteye chwinqlal te jumajx?
19Xi tma'n Jesús te:
—¿Tiqu'n in chin ok tq'o'na te b'a'n? Mi a'l jun xjal b'a'n, o'kxte Dios b'a'n. 20B'a'n qe mandamyent tu'na: Mi'n kyb'inchaye aj pajil; mi'n che b'iyune; mi'n che elq'ane; mi'n jaw kynik'ane yol ti'j juntl; kynimanxe kymane ex kytxu'ye, chi tuj Tu'jil.
21Atzunte nejenel xi tma'n:
—Tkyaqil jlu o japun wu'ne ntzajlenxe matoq k'wa'lx qine.
22Tej tb'inte Jesús jlu, xi tma'n te:
—At jun atx taj teya: K'a'yinxa tkyaqilju at teya, ex q'onxa kye meb'a, kteltzun tq'inumab'la tuj kya'j; ex tzaja, lpe'ka wi'je.
23Tej tb'inte nejenel tkyaqil jlu, tzaj nimxix tb'is, porke nimtoq tq'inumab'l at. 24Ex tej tke'yinte Jesús in b'isunxix nejenel, tma:
—Kyuw tu'n kyokx tuj tkawb'il Dios qeju at kyq'inumab'l. 25Mas jurat jaku tz'ex jun chej camey tuj toy' jun b'aq, twitzju tu'n tokx jun q'inun tuj tkawb'il Dios.
26Kymatzun qeju e b'inte:
—Qa ikju, ¿alkyetzun jaku klet?
27Ex tma Jesús kye:
—Aju mlay b'ant kyu'n xjal, in b'ant tu'n Dios.
28Xitzun tma'n Pedro te:
—Tat, kina qo'ye ma kyaj qq'o'ne tkyaqilju at qeye ex ma qo ok lpe'ye ti'ja.
29Ex tma Jesús kye:
—Ax tok in xi nma'ne kyeye, qa at jun xjal ma kyaj tq'o'n tja, ex qa tman, ex qa ttzik ex qa titz'in, ex qa t-xu'jil, ex qa tk'wa'l, tu'n tlaj tkawb'il Dios, 30ok tk'ma' nimxix t-xel tuj tq'ijlalil ja'lo, ex tuj tq'ijlalil tzul ok tk'ma' tchwinqlal te jumajx.
In yolin Jesús juntl maj ti'j tkamik
Mateo 20.17-19; Marcos 10.32-34
31E je'x tuk'in Jesús qeju kab'laj t-xnaq'tzb'en kyjunalx ex tma kye:
—Kyb'intze, ja'lo qo jawix tuj tnam Jerusalén, ex kjapunel tkyaqilju tz'ib'amaj wi'je kyu'n t-sanjel Dios, aqine sk'o'maj qine tu'n Dios tu'n ntene kyuk'il xjal. 32Chin xel q'o'ne tuj kyq'ab' stranjer xjal, ex chin okel xmayine kyu'n, ex chin okel yaso'ne, ex k'okel tzub'an tuj nwitze. 33Ex nb'ajlenxi k'ixb'isa'ne, chin b'el b'yo'ne kyu'n; ex tuj toxin q'ij chin jawil anq'ine.
34Atzun kye t-xnaq'tzb'en minti' el kynik' ti'j jlu, tu'nju myaxix clar ela tuj kywitz, ex minti' ex tuj kywi' aju tzaj q'ma'n kye.
Jun xjal moẍ te tnam Jericó b'anix tu'n Jesús
Mateo 20.29-34; Marcos 10.46-52
35Tejtzun tpon laq'e' Jesús ttxa'n tnam Jericó, at jun moẍ q'uqltoq ttzi b'e, in qanin tkotz. 36Tej tb'inte moẍ nim xjal in che b'et tuj b'e, xi tqanin kye xjal ti t-xilen jlu. 37Xitzun kyma'n xjal te:
—Tzul Jesús aj Nazaret, che chi.
38Atzunte moẍ jaw sch'in:
—Jesús, Tk'wa'l David, q'aq'antz tk'u'ja wi'je, chi xjal.
39Ex aqeju nejni twitz Jesús e ok ten ilil ti'j moẍ tu'n mi'n tq'ajt; atzunte moẍ mas jaw sch'in kyuwxix, ex tma:
—Aya Tk'wa'l David, q'aq'antz tk'u'ja wi'je.
40We'tzun Jesús ex xi tma'n kye xjal tu'n ttzaj q'i'n moẍ. Tejtzun tul laq'e' moẍ, xi tqanin Jesús te:
41—¿Alkye tajb'ila tu'n nb'inchanteye teya?
Atzunte moẍ tma:
—Tat, wajb'ile tu'n tjaqet nwitze.
42Xitzun tma'n Jesús te:
—Ma jaqet twitza; tu'nju ma tokslaya ma b'anixa.
43Jurat jaqet twitz moẍ; ex ok lpe' ti'j Jesús ex jaw tnimsa'n tb'i Dios; ex kykyaqil xjal tej kylonte jlu, xi kyq'o'n chjonte te Dios.
Právě zvoleno:
Lucas 18: MAMNO
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
