MAWOOKIONYI 28
28
1Kyasia Isaki kalaha Yakobo, kammbikia ona, kambawasa, kahamba, manya kuladuo mka kiidi kya wana wa kika wa Wakanaani. 2Kure, nohende Padan-aramu, mṟasa kanyi ko Betueli washidio, nokudaayepfo mka kiidi kya wana wa kika wa Labani washidio. 3Na Ruwa ichu Menyi pfinya nakuwikie ona, nakupfumbutse na ikuengeṟa, kundu nowe mamwingi fo mkambo ya wandu. 4 Nakunenge ona lo Abrahamu, iyo na oshari lopfo hamu na iyo, noidime ioṟa oruka lo kyaṟo kyapfo, Ruwa aweinengie Abrahamu. 5Nahong'u Isaki kaduma Yakobo, nao kahenda Padan-aramu, ko Labani, mana o Betueli, Mshami, msacha o Rebeka, mae o Yakobo na Esau.
Esau aalika mka o kaṟaṟu
6Esau kawona ke Isaki amewikia Yakobo ona na imduma Padan-aramu, kundu nakuwonyiepfo mka, handu hamu na immbikia ona kamtutuma, kechihamba, “Kuladuo mka kiidi kya wana wa kika wa Kanaani,” 7na ke Yakobo ameindia ndee na mae, kahenda Padan-aramu. 8Esau kawona ke wana wa kika wa Kanaani walechihia ndeawo Isakipfo 9Nahong'u Esau kahenda ko Isumaeli kaonduopfo Mahalathi mana o kika o Isumaeli mana o Abrahamu, mshiki o Nebayothi, nawe mka oke handu hamu na waka walya wengi awewode.
Ndodo ya Yakobo kulya Betheli
10Yakobo kakure kulya Beer-sheba, ihenda Harani. 11Kashika handu halyiwe kakaapfo kio taṟaṟaa, kyamba mnengeṟi fuwemeolokia; kaira iho limu lya handu halya kalyihekia mdo foke, kalaa mado alya alya. 12 Kalodia ndodo; ambuya ngasi ihoṟotse o wanda na mdo foyo fukashika ruwehu. Na, ambuya, malaika wa Ruwa waido na isoka. 13 Ambuya, Mndumii-Ruwa nahoṟokiho, kechihamba, “Inyi nyi Mndumii, Ruwa o ndeo Abrahamu, na Ruwa o Isaki; orukalu uleepfo njechikuinenga iyo na oshari lopfo. 14 Na oshari lopfo lochiwa cha kilulyi kya wuyanenyi, na iyo nochikuala wokia ora lo kyukanyi, na lo ngamenyi na ora lo nuka na lo mtsudu; na ipfo kopfo na ko wana wapfo mbaṟi tsa wa wuyana mpfondu wechicha iwikio ona. 15Ambuya, inyi njikeri hamu na iyo, njechikuringa orio handu ohenda, na inyi njechikuendese mṟasa iya orukenyi, kyamba njechikudapfo, na tane ngakuwutia isho njilekuwia.”
16Yakobo kakure kulya madonyi hake, kahamba, “Kya lohi Mndumii-Ruwa nakeri handu ha, manya inyi njilamanye.” 17Nao kaowuo kahamba, “Handuha haoweshie cha kiki! Kofia iya nyi mba ya Ruwa, naho nyiho mongo fo ruwehu.” 18Yakobo kakure ngamenyi otuko, kaira iho lilya alelyihekia mdo foke, kalyihoṟotsa cha ngo, kaletsia mafuda o huyalyo. 19Kadumbuya handu halya rina nyi Beteli kyaindi rina lya mṟi fulya ili kuwoka nyi Luzu. 20Yakobo kawika kiasa kechihamba, kokoya Ruwa akaa na inyi, kanjiringa ipfo njienyi handu njiida, na injiinenga kelya njilye, na nguo tseṟaa 21na inyi ngawuya kui ofoṟo mṟasa kanyi ko wande oko, nyi lyondi Mndumii-Ruwa echiwa Ruwa oko. 22Na iholyi ngalihoṟotsa cha ngo lyechiwa mba ya Ruwa; na ko orio kindo ochinjiinenga nkya lohi njechikuutia-ho iyo kienga kya ikumi.
دیاریکراوەکانی ئێستا:
MAWOOKIONYI 28: KIM2
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Kimochi Bible © Bible Society of Tanzania, 2016.