Luke 7
7
1ကိုယ်တော်ယေရှုကား သမီဆာပရိတ်သတ်တာတ်တေ ဟောသကာ ဆွောန်သကာစီးမှါခ့်ခါ ကပေရနောင်မြို့ပါ ကြွတော်မူသမှာ။ 2အန်ဘင်းမြို့ဘင်း ရောမတပ်မူးဟော်ဝါဘေ ကလောင်းတုံန်း အားကိုးသလူဘင်း အစေခံဟော်ကား အကြီးကျယ်တုံန်းကနာဟာဘန်းနာ ရှီးကူနိမ်ထှာနင်းမှာ။ 3အန်ဘင်းတပ်မှုးကား ကိုယ်တော်ယေရှု ဆတာန်းတေ သက်ပူမှါခ့်ခါ ဟိန်ဘင်းအစေခံတေ နင်းမဲဟာန်းစိန်းရီကွန်း ဂျူးသမီဆာဟလာန်းစါတ်စယ်ယာတေ ကိုယ်တော်ပါ တာတ်ပန်း ပါမ်းသစိန်းယုတ်အာန်မှာ။ 4အန်ဘင်းဆိတ်တာတ်ရီးဒါး ဒီဘန်း ကိုယ်တော်တေ "အဘင်းတပ်မှုးကား ကိုယ်တော်ဘင်း အကူညီတေ လူထိုက်သဘင်းဆိတ်ထှာမှာ။ 5ဟိန်ကား အလေအမျိုးတာတ်တေ မစ်ပန်းအတွာတ် အလေအတွာတ် ဓမ္မာရုံဟုတ်အာတေရီဒါး စာဘန်း လှူသပဲဘင်းဆိတ်ထှာမှာ" ညယ်လျှောက်တာန်သမှာ။ 6အမှာတွာတ် ကိုယ်တော်ကား အန်ဘင်းဆိတ်တာတ်ယောက် ကြွတော်မူသဘန်း တပ်မူးကျေမ်းယောက် ထံလားဘေထုတ်မှါခ့်ခါ တပ်မှုးကား ဟိန်မိတ်ဆွေစယ်ယာတေ တာတ်ပန်း ကိုယ်တော်ဒေ "ကိုယ်တော်၊ ငါကျေမ်းဘေကြွသဒင် အထိုက်တန်သဘင်းအတွာတ် ပါန်ပန်းခံသဘန်း အကြွဒီဆာ။ 7အန်ကားအပြာန် ငါရီးဒါး ကိုယ်တော်ပါ ဒီဘန်း ကတုံန်ဒင်အတွာတ်ရီးဒါး ငါယောက်အထိုက်တန်သဝါး။ ကိုယ်တော် အမိန့်အီရာန်ဆယောက် ငါအစေခံကား ရောဂါကယာရာန်ကူ။ 8ငါကိုယ်တိုင်ရီး အထက်အရာရှိ လက်အောက်ပေငှါနိမ် ငါတွန်ဘေရီးဒါး စစ်ဆားတေ ကလောင်းတုံန်းငှါမှာ။ ငါကား စစ်ဆားဟော်ဝါတေ 'လာန်'ငှေါဘန်းကား ဟိန်လာန်ထှာဘန်း၊ 'ဒီ' ငှေါဘန်းရီးဒါး ဟိန်ဒီထှာမှာ။ ငါအစေခံတေဒေ 'အဘင်းနာအွန်' ညယ် ငှေါဘန်းရီးဒါး အန်တာတ် အွန်ထှာမှာ" ညယ်လျှောက်တာန် သစိန်းယုတ်မှာ။ 9အန်ဘင်းတူးတေ ကိုယ်တော်ယေရှုသက်ပူမှါခ့်ခါ အကြီးကျယ်အံ့ဩသဘန်း ဟိန်ဟလိန်းဘေဒီယာတ်ပင်း သမီဆာတာတ်တေဒေ လှည့်သဘန်းယူဘန်း "ငါဟနိမ်တေငှေါကူ။ အစ္စရေးတစ်ခွာမ်ဘေ အနိမ်တုံန်းယုံကြည်ဒဘင်းဆိတ်တေ အကတုံန်ပတ်နွန်း" ညယ်မိန့်တော်မူသမှာ။ 10တပ်မှုးတာတ်နာန်ဘင်း ဆိတ်တာတ်ရီးဒါး ကျေမ်းပါထုတ်ရီမှါခ့်ခါ အန်ဘင်းအစေခံကား စလားဘန်းနင်းဘင်းနာတေ ကတုံန်လူမှာ။ 11နောက်မာန်းရာတ်မှါခ့်ခါ ကိုယ်တော်ကား ဟိန်တပယ့်တော်တာတ်ယောက် နာဣနညယ်ကော်ဘင်းမြို့ပါ ကြွတာန်မှါခ့်ခါ သမီဆာကလောင်းတုံန်းရီးဒါး ဒီယာတ်ကြီးမှာ။ 12မြို့တံခါးဝပိုက်ပေ ထုတ်မှါခ့်ခါ ရှီးနင်းဘင်းဆိတ်ဟော်ဝါအလောင်းတေ နွောပ်ကူညယ် သမီဆာစယ်ယာကား အလောင်းစါန်တေဖဲဘန်း မြို့ပြာန်ပါ လာပူကြီးရီမှာ။ ရှီးနင်းဘင်းဆိတ်ကား မုဆိုးမဟော်ဝါဘင်း ဟော်ဝါဆာဘင်းဆာထှာဘန်း မြို့ဘင်းဆိတ်တာတ်ရီးဒါး ဟိန်ယောက်အတူတူ ဆာတ်ကြီးရီမှာ။ 13ကိုယ်တော်ကား အန်ဘင်းအီးရှီဒေ ကတုံန်မှါခ့်ခါ ဟိန်တေ အကြီးကျယ်အစံဘန်းနာ "အဟပ်ဆာ"ညယ် မိန့်သမှာ။ 14စီးမှါခ့်ခါ ကိုယ်တော်ကား အန်တာတ်ဖဲရီဘင်း အလောင်းစာန်ပိုက်ပေ လာန်ဘန်း အလောင်းစါန်တေ သဟူးယောက်ထိတာန်မှါခ့်ခါ အလောင်းစါန်ဖဲရီဘင်းဆိတ်တာတ်ကား ရပ်သအီရာန်မှါခ့်ခါ ကိုယ်တော်ကား "ရှရှာ၊ နာန်တေငါငှေါကူ။ ရဲစိတ်" ညယ်မိန့်တော်မူသမှာ။ 15အ၌မှါခ့်ခါ ရှီးနင်းဘင်းဆိတ်ကား ရဲဘန်းထုံးငါန်ဘန် စသဘန်းတူးသပေါက်အာန်မှာ။ ကိုယ်တော်ယေရှုကား အန်ဘင်းဆိတ်တေ ဟိန်အမယ်ပါပြန်သဘန်း အပ်တာန်မှာ။ 16သမီဆာတာတ်ကား အကြီးကျယ်အံ့ဩသကြီးဘန်းနာ "အလေဘေ မြင့်မြတ်သဘင်း ပရောဖက်ဟော်ဝါ ပေါ်ဒီဘန်း။ ဘုရားရှာန်ကား အလေတေ ယူအီဘန်း" ညယ် ဘုရားရှာန်ဂုဏ်တော်တေဒေ ချီးမွမ်းသကြီးမှာ။ 17ကိုယ်တော်ယေရှုယောက် ပတ်သက်သဘင်း အဘင်းဆတာန်းတေကား ယုဒပြေသခွာမ်ယောက် အန်ဘင်းပိုက်ပင်း ပြေတစ်ခွမ်လုံး နှံ့သလာန်ဘဲမှာ။ 18စီးမှါခ့်ခါ ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ဘင်း တပယ့်တာတ်ကား အဘင်းအကြောင်းတေဒေ ယောဟန်နင်း ငှေါကာကြီးမှါခ့်ခါ ဟိန်ကား တပယ့်ကလိန်းဟူးတေ ကော်ဘန်း 19"ကိုယ်တော်ကား ကြွဒီကူငှေါဘင်းဆိတ် ချည်လဲ အာနိမ်အချည်ညယ် အလေကားတခြားဟော်ဝါတေ ဒဲထှာယုတ်ကလဲ"ညယ် စိန်ယူဒင် ကိုယ်တော်ပါ သာတ်နာန်မှာ။ 20အန်ဘင်းဆိတ်တာတ်ကား ကိုယ်တော်ယေရှုပါ ထုတ်မှါခ့်ခါ ကိုယ်တော်တေ "ဝဲငွတ်ပင်းမာန်းဂလာ အွန်အီဘင်းအိုးဆကြီး ယောဟန်ကား အလေတေ ကိုယ်တော်ပါတာတ်ပန်နား 'ကိုယ်တော်ကား ကြွဒီကူငှေါဘင်းဆိတ် ချီလဲ၊ အာနိမ်အချီညယ် အလေကားတခြားဟော်ဝါတေ ဒဲထှာယုတ်ကလဲ' ညယ် စိန်ယူစိန်းယုတ်မှာ" ညယ် လျှောက်တာန်သကြီးမှာ။ 21အန်၌မှါခ့်ခါ ကိုယ်တော်ယေရှုကား ကနာဟာဘင်းဆိတ်တာတ်တေဒေ မဲစိန်းကာတ်တေ အမဲဘင်းနနူကပ်ခံသထှာနင်းဘင်းဆိတ်တာတ်ဟက် အမဲဘင်းနနူတေဒေရီး ငါတ်ပူအီလားဆာအချီ မိတ်တူရှီအကတုံန်ဟာဘင်းဆိတ်တာတ်တေဒေရီး မိတ်တူရှီကတုံန်လူကွန်း ကုဒအီနင်းမှာ။ 22ကိုယ်တော်ကား ယောဟန်တပယ့်တာတ်တေ "ဟနိမ်ကတုံန်ကြီးရီဘင်းနာတေဒေ ယောဟန်ပါလာန်ဘန်း ငှေါဟာန်းကြီးရာန်။ မိတ်အကတုံန်ဘင်းဆိတ်တာတ် အရာတ် မိတ်တူရှီကတုံန်ဟာဘန်း။ တာတေ တဟူးတေအအွန်ဟာဘင်းဆိတ်တာတ် လမ်းဟာရန်ဆွန်ဘန်း။ ကမာတုံန်းရောဂါဆိတ်တာတ်ရီဒါး ရောဂါကယာဆွန်ဘန်း။ ကနားကျယ်ဘင်းဆိတ်တာတ်ရီးဒါး တင်းဘူဟာဘန်း။ ရှီးဘင်းဆိတ်တာတ်းရီးဒါး စားဆွန်ဟာန်းဘန်း။ ဆာန်းရဲဒဘင်းဆိတ်တာတ်ရီးဒါး မာန်းဂလာဆတာန်းတေ မိန်းရှာတ်ခါကြီးဆွန်ဘန်း။ 23ငါတေ အငြမ်းသဘင်းဆိတ်တာတ်တေ ဘုရားရှာန်ကား ကောင်းကြီးမာန်းဂလာတေဒေအီကူ" ညယ်မိန့်တော်မူသမှာ။ 24ယောဟန် တပယ့်တေလာန်ဟာန်းကြီးမှါခ့်ခါ ယောဟန်အကြောင်းတေ သမီဆာတာတ်တေ ကိုယ်တော် ငှေါကာဘင်းနာကား " သမီထုတ်လားစစ်ပင်းပုတ်ခါးနောင်းဘေ ဟာဘင်းနာတေဒေယူဒင်လာန်ကြီးတေ။ ဟလာန်းမွန်လားပါယိမ်းသနင်းဘင်း ကျူကလွုန်တေဒေရဲ။ 25ပြာန်ဘေပူဘန်း ဟမာန်တေကတုံန်ကာတ်ကြီးတေ။ ကတန်ဘင်းနာတေတော်ပဲဘင်းဆိတ်တေ ကတုံန်ကာတ်လည်း။ အန်နိမ် တန်ဖိုးငှါဘင်နာတေနိတ်ပဲဘန်း စည်းစိမ်ခံစားဒနင်းဘင်းဆိတ်တာတ်တေ ရှာန်ပလာန်နန်းတော်ဘေ၌ဆာ ကတုံန်လူကလား။ 26အန်နိမ်အချီ ဟမာန်သမီဆာအမျိုးတေ ကတုံန်ကာတ်ဟွန် ပြာန်ဘေပူတေ။ ပရောဖက်တေ ကတုံန်ကာတ်တေရဲ။ ချီမှာ။ ဟနိမ်တေငါငှေါကာတ်ပင်းနာကား ယောဟန်ကား ပရောဖက်ထာတ်ပိုသော ကြီးမြတ်သဘင်းဆိတ်ထှာမှာ။ 27ကျမ်းကျိန်းဘေ 'ငါဘုရားကား ဆားတော်မန်းဘေ တယ်ကူဘင်းလမ်းတေ အဆာန်တာန့်ထှာစိန်းကွန်း ငါစေတမန်တေအရာန် တာတ်နာန်ကူ' ညယ်ရေးသပဲဘင်းနာကား ယောဟန်အကြောင်းထှာမှာ။ 28ဟနိမ်တေငါငှေါကူ။ ယောဟန်ထာတ် ကြီးမြတ်သဘင်းဆိတ် ဟော်ဝါစဲ အပန်နွန်း။ အန်နိမ်စါန်းငှေါဒီ ဘုရားရှာန်ဘင်း သာသနာတော်နောင်းဘေ အရေးအပါသဘင်းဆိတ်စဲ ယောဟန်ထာတ် ပိုသောကြီးမြတ်သမှာ" ညယ်မိန့်တော်မူသမှာ။ 29ကိုယ်တော်မိန့်သဘင်းနာတေဒေ သက်ပူဘင်းဆိတ်တာတ်နောင်းဘေ ဘုရားရှာန်ဘင်း အကြံစည်တေဒေ လိုက်နာသကြီးဘန်း ယောဟန်ဘေ ဝဲငွတ်ပင်းမာန်းဂလာအွန်ကြီးဘင်း အခွန်ကွန်ဘင်းဆိတ်တာတ်ရီးဒါး ပါသမှာ။ 30အန်နိမ်စါန်းငှေါဒီ ဖာရိရှဲတာတ်ယောက် ကျမ်းကျိန်းပေါ့ပင်းအိုးဆကြီးတာတ်ကား ဘုရားရှာန်ဘင်း အကြံစည်တေဒေ အလိုက်နာသညယ် ယောဟန်ဘေ ဝဲငွတ်ပင်းမာန်းဂလာအွန်ဒင်အတွာတ် ငြာမ်းသကြီးရီမှာ။ 31စီးမှါခ့်ခါ ကိုယ်တော်ကား ဆာတ်သပန်း "ဟနိမ်ကား ဟမာန်ရောက်တူသောဒေ၊ ဟာနိမ်သမီဆာအမျိုးထှာကြီးတေငှေါဘန်းကား 32'အလေပုလွေတွန်ဒီဒါး ဟနိမ်အကသကြီးရာ။ အလေဟပ်ခါဘင်းတေချန်းကျယ်ဒီဒါး ဟနိမ်အဟပ်ကြီးရား' ညယ်ဈေးနောင်းဘေ အချန်းချန်း ဟာတ်ပန်းငှေါနင်းကြီးဘင်း ရှရှာတေယောက် တူသမှာ။ 33ယောဟန်ရီးဒါး ယုတ်တင်တေအယုတ်၊၊ မူးသဟာဘင်းဝိုင်တေရီးအအူညယ် အန်းပါ အောပါဟာနင်းဘင်းတေရီးဒါး "ယောဟန်ဘေအမဲဘင်းနနူ ကပ်ပန်းနင်းမှာ' ညယ် ဟနိမ်ငှေါကြီးမှာ။ 34အန်ဘင်းအပြာန် သမီဆာဆားတော်ကား ယုတ်ပန်း၊ အူပန်းနင်းဒီဒါး ဟနိမ်ကား 'ယေရှုကား ယုတ်လားလောဖားကြီးသဘင်းဆိတ်ထှာဘန်း၊ အခွန်ကွန်ဘင်းဆိတ်တာတ်၊ အမဲဘင်းသမီဆတာတ်တေယောက် ပဟာန်းအွန်ဘန်းနင်းမှာ' ညယ်ငှေါဟာန်းကြီးမှာ။ 35အန်နိမ်စါန်းငှေါဒီ ဘုရားရှာန်ဘင်း စစ်မှန်သဘင်းဆာဆအိတ်တေငှေါဘန်းကား ငါယောက် ယောဟန်တာတ် အွန်ဘင်းတေဒေ ချည်မှာငှေါဘင်းတေ မိန်းရှာတ်ခါကြီးကူ" ညယ်မိန့်တော်မူသမှာ။ 36စီးမှါခ့်ခါ ဖာရိရှဲဟော်ဝါကား ကိုယ်တော်ယေရှုတေ ဟိန်ကျေမ်းဘေ နာတ်ကြယ်အသားယုတ်တင်ပါမ်းဒါန်မှာ။ အမှာတွာတ်ကိုယ်တော်ကား အန်ဘင်းဆိတ်ကျေမ်းဘေ ကြွတာန်ဘန်း ယုတ်ကူညယ် စားပွဲဘေထုံးငါန်မှာ။ 37အန်ဘင်းမြို့ဘေ အမဲဘင်းအွန်ပတ်ပင်း အီးရှီဟော်ဝါငှါမှာ။ ဖာရိရှဲကျေမ်းဘေ ကိုယ်တော်ထုံးဘန်း ယုတ်ပန်းနင်းမှာငှေါဘင်းတေ သက်ပူမှါခ့်ခါ အီးရှီးကား အကြီးကျယ်တန်ဖိုးငှါဘင်း တွန်းဘင်းဆလောပလာန်းဒေလာဘန်း အန်ဘင်းဘေဒီမှာ။ 38စီးမှါခ့်ခါ အီးရှီကား ဟိန်ဟလိန်းပါဒီဘန်း စပ်ပန်းနာ ဟပ်ပန်း ဟိန်မိတ်ဝဲတေကား ကိုယ်တော်တာဘေ စွတ်နာန်ဘင်းအတွာတ် ဟလာန်းဟူးယောက် ကူးကွန်းနွန်အီရာန်မှာ။ စီးမှါခ့်ခါ ကိုယ်တော်ဘင်းတာကလိမ်းပိုက်တေ ဆနာယောက်သွန်းဘန်း သွန်းဘင်းဆလောယောက် ဘောအီရာန်မှာ။ 39အန်၌မှါခ့်ခါကိုယ်တော်ဒေ ပါမ်းဒီဘင်းဖာရိရှဲကား ကတုံန်ငါန်မှါခ့်ခါ "အဘင်းဆိတ်ကား ပရောဖက်ချီဘန်းကား ဟိန်တေထိသဘန်းနင်းဘင်း အီးရှီကား ဟာနိမ်အီရှီ ထှာဘင်းနာတေ မိန်းရှာတ်ခါထှာကူ။ အမဲဘင်းအီးရှီထှာမှာ ငှေါဘင်းနာတေရီးဒါး မိန်းရှာတ်ခါထှာကူ" ညယ်အဆေင်နောင်းဘေတွေးဒနင်းမှာ။ 40ကိုယ်တော်ရီးဒါး ဟိန်တေ "ရှိမုန်၊ နာန်တေငါ ငှေါဒင်စားနူငှါမှာ" ညယ်မိန့်တော်မူသမှါခ့်ခါ ရှိမုန်ကား "ကိုယ်တော်၊ ဟမာန်ကားငှေါ" ညယ်ငှေါမှါခ့်ခါ 41ကိုယ်တော်ကား "ဖူးဟယ်အီဘင်း သမီဆာဟော်ဝါဘေ သမီဆာကလိန်းဟူး ဖူးဟယ်ကြီးမှာ။ ဟော်ဝါကား ဒေနာရီဒင်္ဂါးငါးရာ၊ အနားဟော်ဝါကား ဖူးဒင်္ဂါးငါးဆယ် အကြွေးတာန်သမှာ။ 42အန်တာတ်ကား အကြွေးရှာန်တေ ပြန်သဘန်း အအီဟာမ်းရန်ဘင်းအတွာတ် အကြွေးရှာန်ကား အန်တာတ်ကလိန်းဟူးစလုံးဘင်း အကြွေးတေဒေ ပြန်သဘန်းအီတင်အလိုသဘန်းညယ် ငှေါရာန်မှါခ့်ခါ ဟာဟမဲကားပိုသော အကြွေးရှာန်တေ ကျေးဇူးတာန်သကူတေ" ညယ်စိန်ယူရာန်မှာ။ 43ရှိမုန်ကား "ဖူးပိုသောဟယ်ပဲဘင်းဆိတ်ကား ပိုသဘန်းကျေးဇူးတာန်သမှာ" ညယ်လျှောက်တာန်သမှာ။ ကိုယ်တော်ကား "ချီမှာ" ညယ် မိန့်သစီးမှခ့်ခါ 44အန်ဘင်းအီးရှီပါ လှည့်ဒါတာန်ဘန်းနာ ရှိမုန်တေ "အဘင်းအီးရှီတေကတုံန်လဲ။ ငါကား နာန်ကျေမ်းဘေ ကြွဒီမှါခ့်ခါ နာန်ကား ငါတာဒေဆင်ဒင် ဝဲအအီရီဒီဒါး ဟိန်ကား ငါတာတေ ဟိန်မိတ်ဝဲတေယောက် ဖောအီဘန်း ဟိန်ဟလာန်းဟူးယောက် ကူးကွန်းနွန်အီရီမှာ။ 45နာန်ကား ငါကြွဒီမှါခ့်ခါ ငါတေသွန်းဘန်းအကြိုဒီရား။ အန်နိမ်စါန်းငှေါဒီ ဟိန်ကား ငါတာဒေ အဆက်အပြတ်သောညယ်သွန်းရီမှာ။ 46နာန်ကားငှါဟလာမ်းတေ သံလွင်ဆလောယောက်ဆစဲ ဘောဘန်းအအီရီဒီဒါး ဟိန်ကား အကြီးအကျယ်တန်ဖိုးငှါဘင်း သွန်ဘင်းဆလောယောက်ငါတာဒေ ဖောအီရီမှာ။ 47အမှာတွာက် နာန်တေ ငါငှေါကာတ်ပင်းနာကား အဘင်းအီးရှီဘင်း အမဲဘင်းအပြစ်တေဒေ ခွာမ်းလွတ်ခံသထှာဘင်းအတွာတ် ဟိန်ဘင်းမေတ္တာတုံန်းဘင်းအတွာတ်ထှာမှာ။ အမဲဘင်းအပြစ်အစစ်ဆာတေ၌ဆာ ခွာမ်းလွတ်သလားခံသထှာဘင်းဆိတ်ကား အစစ်ဆာ၌မေတ္တာတေကာကူ" ညယ်မိန့်တော်မူသမှာ။ 48စီမှါခ့်ခါ ကိုယ်တော်ကား အန်ဘင်းအီးရှီဒေ "အမဲဘင်း နာန်အပြစ်ကလောင်းတုံန်းတေ ခွာမ်းလွတ်သဘန်း" ညယ်မိန့်သမှာ။ 49အန်၌မှါခ့်ခါ ကိုယ်တော်ယောက်အတူတူ ထုံးဘန်းနင်းဘင်းတခြားဘင်းဆိတ်တာတ်ကား "အမဲဘင်းအပြစ်တေဒေစဲခွာမ်းလွတ်သရန်မှာညယ်ငှေါနင်းဘင်းအတွာတ် အဘင်းသမီဆာကား ဟာဟမဲကား" ညယ် အန်တာတ်အချန်းချန်းငှေါနင်းကြီးမှာ။ 50အာနိမ်စါန်းငှေါဒီ ကိုယ်တော်ယေရှုကား အန်ဘင်းအီးရှီဒေ "နာန် ငါတေယုံကြည်သဘင်းကား ဘုရားရှာန်ကား နာန်တေ ကယ်တာန်သဘန်း။ ငြိမ်းငြိမ်းချမ်းချမ်း လာန်ရန်ဘန်း" ညယ်မိန့်တော်မူသမှာ။
S'ha seleccionat:
Luke 7: ktpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.