Luke 8
8
1မာန်းရာတ်မှါတ်မှါခ့်ခါ ကိုယ်တော်ယေရှုကား တပယ့်တော်ရှစ်နူဘန်းကလိန်းဟူးယောက်အတူတူ မြို့တေ၊ ထိန်တေ အနှံ့လာန်ဘန်း ဘုရားရှာန်ဘင်း သာသနာတော်အကြောင်းဒေ ဟောသကာ ဆွာန်သကာမှာ။ 2အန်ဘင်းအပြာန် ကမာရောဂါ ကယာရာန်ဘင်းဆိတ်တာတ်ယောက် အမဲဘင်းနနူကပ်ပန်းနင်းဘင်းဟက် ကယာဟာန်းစိန်းရီဘင်း အီးရှီစယ်ယာတာတ်ရီးဒါး ကိုယ်တော်ယောက်အတူတူ ဒီရာတ်ကြီးမှာ။ အန်ဘင်းအီးရှီတာတ်နောင်းဘေ အမဲဘင်းနနူ စစ်နူကပ်ခံဒီထှာဘန်းနာ မဲဟာန်းရီဘင်းး မာဂဒလထိန်အီးရှီ မာရိ၊ 3ရှာန်းပလာန်ဟေရုဒ် အမှုထမ်းထှာဘင်း ခုဇဘင်းအိတ် ယောဟန္နယောက် ရှုရှန္နတာတ်ရီဒါး ပါသမှာ။ အန်တာတ်ကား ကိုယ်တော်ယေရှုယောက် တပယ့်တော်တာတ်တေ ကိုယ်စရိတ်ယောက် အွန်နွောပ်အီကြီးမှာ။<br> 4မြို့တေထိန်တေဟက် သမီဆာကလောင်းတုံန်းကား စုရုံးဒီကြီးမှါခ့်ခါ ကိုယ်တော်ယေရှုကား အန်တာတ်တေ ပုံပြာန်ပုဒ်အာယောက် ငှေါကာဘင်းကား 5"လပါးအွန်ဘင်းဆိတ်ဟော်ဝါကား ဟိန်လပါးကွာမ်းဘေ သတူဆက်ကူညယ် ပူလာန်ဘဲမှာ။ လပါးအွန်ဘင်းဆိတ်ကား သတူဆက်နာန်မှါခ့်ခါ စယ်ယာဘင်းသတူတေကား လမ်းစေါက်ပေအက်နာန်ဘန်း သမီဆတာတ်ကောင်လားတေ ခံသထှာဘန်းနာ အူစိတ်ဆတာတ် ကွန်ယုတ်ပင်းရီးဒါး ခံသထှာမှာ။ 6စယ်ယာဘင်းသတူတေကား အော်စစ်ပင်း ကျောက်ဆလစ်ကာစောက်ပေ အက်နာန်ဘန်း ကလွုန်တူရီဒီဒါး ဝဲကွန်းဂွန်းအလူဘင်းအတွာတ် အမှါကျီတ် ရှီးလာန်ဘဲမှာ။ 7စယ်ယာဘင်းသတူတေကား စောဟားချုံနောင်းဘေ အက်နာန်ဘန်း ကလွုန်တူရီဒီဒါး စောဟားချုံတေကား ကာသပဲဘင်းတေခံသထှာမှာ။ 8စယ်ယာဘင်း သတူတာတ်ကား ကာမဲဘင်းနေရာဘေ အက်နာန်ဟွန် ကလွုန်တေတူရီဘန်း ရှရှီတေရီဒါး အဆပါတ်နူထုတ်ကွန်း ရှီကြီးမှာ" ညယ်မိန့်တော်မူသမှာ။ အန်နိမ်မိန့်သစီးမှါခ့်ခါ ကိုယ်တော်ကား "ကနားပါသဘန်း သက်ခါဘင်းသမီဆာတာတ်၊ အာရုံစိုက်သပန်းသက်ကြီး" ညယ်မိန့်သမှာ။ 9စီးမှါခ့်ခါ တပယ့်တော်တာတ်ကား ကိုယ်တော်ယေရှုတေ ဥပမာကား ဟမာန်တေငှေါကာတ်မှာငှေါဘင်းနာတေ စိန်ယူကြီးမှာ။ 10အန်၌မှါခ့်ခါ ကိုယ်တော်ကား "ဘုရားရှာန်ကား ဟနိမ်တေ ဟိန်ဘင်းသာသနာတော်ဘင်း လျှို့ဝှက်နက်နဲသဘင်းအကြောင်းတေဒေ သက်လူရန်ဘင်းအခွာမ်းတေ အီပဲဘန်းထှာမှာ။ အန်နိမ်စါန်းငှေါဒီ တခြားဘင်းဆိတ်တာတ်ကား ယူဒီဒါး အကတုံန်ရန်၊ သက်ပူဒီဒါး အနားလည်သကြီးရန်ဘင်းအတွာတ် အန်တာတ်တေ အန်နိမ်ဥပမာတေယောက် ရှာန်သကာလားထှာမှာ" ညယ်မိန့်သမှာ။ 11ကိုယ်တော်ကား "သတူဆက်ပင်းဆိတ် ဥပမာဆိုလိုသဘင်းအဓိပ္ပာယ်ကား သတူကား ဘုရားရှာန်ဘင်း နှုတ်ကပါတ်တော်တေ ထှာကြီးမှာ။ 12လမ်းဘေအက်ပင်း သတူငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်လူမှါခ့်ခါ ယုံကြည်သဘန်း ကယ်တာန်သလား အခံသလူစိန်းတင် မာရ်နတ်ကား ထုတ်အီဘန်း အန်တာတ်အဆေင်နောင်းဟက် ဘုရားရှာန်ဘင်း နှုတ်ကပါတ်တော်တေဒေ လာလာန်ဘဲလား ခံသထှာဘင်း ဆိတ်တာတ်ထှာကြီးမှာ။ 13ကျောက်စလစ်ကန်ဘေ အက်ပင်းသတူတေငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်ပူမှါခ့်ခါ ချတ်ချန်းငှေါနိမ် လက်ခံသကြီးဒီဒါး အန်တာတ်အဆေင်နောင်းဘေ အမြဲသဘန်း ခဏဆာ ယုံကြည်သကြီးဘန်း ဘဝဘေ ပါန်ပန်းဆာန်းရဲသဘင်းနာတေယောက် ကြုံသကြီးမှါခ့်ခါ အန်တာတ်ယုံကြည်သပဲဘင်းနာတေကား ချတ်ချန်းငှေါနိမ် ရပ်သကြီးရာန်ဘင်းဆိတ်တေထှာကြီးမှာ။ 14စောဟားချုံနောင်းဘေ အက်နာန်ဘင်းသတူ ငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်ပူလူဒီဒါး အဆေင်ကားထှာဘင်းတေ၊ ဆွာမ်းဘင်းနာတေ၊ လောဖာတုံန်းနင်းဘင်းတေကား ငါကြီးဆွန်ဘန်း ရှရှီအရှီဟာဘင်းဆိတ်တေ ထှာကြီးမှာ။ 15အော်ငှါဘန်း ကာမဲဘင်းနေရာဘေ အက်နာန်ဘင်းသတူတေ ငှေါဘင်းနာကား ဘုရားရှာန်ဘင်း နှုတ်ကပါတ်တော်တေဒေ သက်လူစီးမှါခ့်ခါ အန်တာတ်အဆေင်နောင်းဘေ မလဲကလဲ ပဲကြီးဘန်း လိုက်နာသဘင်းအတွာတ် ရှရှီမလဲတေ ရှီကြီးဘင်းဆိတ်တေထှာကြီးမှာ။" 16"ဝါမ်ပလုပ်တေ ဝါမ်တပ်ပန်း ကုန်ဟာမ်းယောက် ငွတ်ပန်းပဲဘင်းဆိတ် အန်နိမ်အချီ ခတာန်တွန်ဘေ ပဲဘင်းဆိတ်ညယ်အဘိုဝါး။ ဆာန်ရီဘင်းသမီဆာတေကား ဝါမ်အရောင်တေ လူစိန်းဒင် ဝါမ်ပလုပ်တေ တိုင်စောက်ပေ ဝယ်ပဲကြီးဟာမှာ။ 17အကတုံန်ရန်ကွန်း ကဆွန်းပဲဘင်းနာညယ် အဘိုဝါး။ အမိန်းရှာတ်ခါကွန်း ပဲရန်ဘင်းညယ် အဘိုဝါး။ 18အမှာတွာတ် ကနားစိုက်သဘန်းသက်ကြီး။ စားနူစားနာငှါဘင်း သမီဆာတာတ်တေဒေ ပိုသဘန်းအီကူ။ အန်နိမ်စါန်းငှေါဒီ ဟမာန်ကစဲ အဘိုဘင်းသမီဆာတာတ်ခက် ဟိန်ကောက်ဟိန် ငှါမှာညယ် ထာန်သနင်းဘင်းနာတေဒေဆဲ လာလားခံသထှာကူ" ညယ်မိန့်တော်မူသမှာ။ 19ကိုယ်တော်အမယ်ယောက် နရှီတာတ်ရီးဒါး ကိုယ်တော်တေ ကတုံန်ဒင် ထုတ်ကြီးရီမှါခ့်ခါ သမီဆာကလောင်းတုံန်းငှေါပန်းသာငှေါ ကိုယ်တော်ပါအထုတ်ခါ ငှါနင်းကြီးမှာ။ 20အမှာတွာတ် သမီဆာဟော်ဝါကား ကိုယ်တော်တေ "ကိုယ်တော်ဘင်းအမယ်ယောက် နရှီတာတ်ကား ကိုယ်တော်တေ ကတုံန်ကာတ်ပင်းအတွာတ် ပြာန်ဘေစပ်ပန်းဒဲနင်းကြီးမှာ" ညယ်လျှောက်တာန်သကြီးမှာ။ 21အန်၌မှါခ့်ခါ ကိုယ်တော်ကား "ဘုရားရှာန်ဘင်းနှုတ်ကပါတ်တော်တေဒေသက်ပန်း လိုက်နာသဘင်းဆိတ်တာတ်ကား ငါအမယ်ယောက် နရှီတေထှာကြီးမှာ" ညယ်မိန့်သမှာ။ 22မာန်းရာတ်ရအာမှါခ့်ခါ ကိုယ်တော်ကား ဟိန်တပယ့်တေယောက်အတူ လှေတစ်စါန်းစောက်ပေဟယ်ဘန်း "အဘင်းအာမ်းတေယာတ်ကြီးမှါတ်" ညယ်မိန့်သမှာ။ အန်တာတ်ကား အာမ်းတေ ရွက်လွင့်သဘန်းယာပ်ကြီးမှာ။ 23အန်နိမ် ယာပ်နင်းကြီးမှါခ့်ခါ ကိုယ်တော်ယေရှုကား အေ့စ်ဘာတ်ပွတ်ပန်းနင်းမှာ။ စီးမှါခ့်ခါ ချတ်ချန်းဟလာန်းမွန်တက်နီဘန်း လှေကား ဝဲနစ်သကူနိမ်ငါဘန်း ဒုက္ခကြုံသကြီးထှာမှာ။ 24အန်၌မှါခ့်ခါ တပယ့်တော်တာတ်ကား ကိုယ်တော်တေဆော်ပန်း "ကိုယ်တော်၊ ကိုယ်တော် အလေကားရှီးထှာကဘန်း" ညယ်လျှောက်တာန်သဘင်းအတွာတ် ကိုယ်တော်ကား အေ့ပ်နင်းလားဟက်ရဲရီဘန်း မုန်တိုင်းယောက် ဝဲလှိုင်းတုံန်းတေဒေ ရပ်သကွန်း အမိန့်အီရာန်မှါခ့်ခါ အန်ဘင်းမုန်တိုင်းယောက် ဝဲလှိုင်းတုံန်းတေကား ငြိမ်သအက်လာန်ဘဲမှာ။ 25စီးမှါခ့်ခါ ကိုယ်တော်ကား တပယ့်တော်တာတ်တေ "ဟနိမ်ယုံကြည်သဘင်းနာကားဟာပေကား" ညယ်စိန်ယူရာန်မှါခ့်ခါ အန်တာတ်ကား အကြီးကျယ်အံ့ဩသကြီးဘန်း "အဘင်းဆိတ်ကား ဟာဟမဲကား" "လှိုင်းတေယောက် လေတေစဲ ဟိန်အမိန့်တေ သက်ကြီးထှာမှာ" ညယ်အချန်းချန်းငှေါနင်းကြီးမှာ။ 26စီးမှါခ့်ခါ ကိုယ်တော်ယောက် ဟိန်တပယ့်တာတ်ကား ဂါလိလဲဝဲအာမ်းတေဖြတ်သဘန်း ဂါရစမြို့ ပိုက်ပေငှါဘင်း ကမ်းပါလာန်ကြီးမှာ။ 27အန်ဘင်းနေရာဘေထုတ်ပန်း ကိုယ်တော်ကား ကမ်းစောက်ပါဟယ်မှါခ့်ခါ အန်ဘင်းမြို့ဟက် အမဲဘင်းနနူကပ်ပန်းနင်းဘင်းဆိတ်ဟော်ဝါကား ကိုယ်တော်ပါဒီမှာ။ ဟိန်ဘေ အမဲနနူကပ်ပန်းနင်းဘင်းနာကား မှါတ်နင်းဘန်းတာတ်ငှေါ ဟိန်ကား ကျေမ်းဘေရီးအနင်းနား၊ နိတ်တင် တော်ဒင်တေရီးအတော်ညယ် ဆာန်းကျိုင်းဂူကြားဘေတေ ဟာဆုတ်ဆာတ်ပန်းနင်းဘင်းဆိတ်ထှာမှာ။ 28အန်ဘင်းဆိတ်ကား ကိုယ်တော်ဒေ ကတုံန်မှါခ့်ခါ မန်းဘေ သထူထောက်တာန်ဘန်း ဆကလားဝါတ်ဆလာတ်တုံန်းယောက် "ဘုရားရှာန်ဘင်းဆားတော်ယေရှု၊ ငါဟက် ဟမာန်အလိုငှါတေ၊ ငါတေအနှိပ်စါတ်သဆာ၊ တောင်းပါန်သမှာ" ညယ်ဟာတ်ပန်း လျှောက်တာန်သမှာ။ 29အာနိမ်လျှောက်တာန်သထှာဘင်းကား ကိုယ်တော်ကား အန်ဘင်းအမဲဘင်းနနူတေ အန်ဘင်းဆိတ်ဟက်ပူလာန်ပဲကွန်း အမိန့်အီရာန်ဘင်းအတွာတ်ထှာမှာ။ အန်ဘင်းဆိတ်တေ အမဲဘင်းနနူကား ပလန်းပလန်း ဒုက္ခအီမှာ။ အန်ဘင်းဆိတ်ပင်း သဟူးတေ တာတေဒေ ဆိန်ကလာတ်ရာန်ဟာတ်ယောက် ဟွတ်ပဲဘန်း ဒဲနင်းကြီးဒီဒါး ဟိန်ကား ဆိန်ကလာတ်ရာန်ဟာတ်တေဒေ တွပ်ပန်း သမီဆာအဘိုဘင်းနေရာပါ အမဲဘင်းနနူကော်လားတေခံသထှာမှာ။ 30ကိုယ်တော်ကား ဟိန်တေ "နာန်နာမယ်ဟာနိမ်ကော်တေ" ညယ်စိန်ယူမှါခ့်ခါ အန်ဘင်းဆိတ်ပေ အမဲဘင်းနနူကလောင်းတုံန်း ဆာန်ဘန်းနင်းဘင်းအတွာတ် အန်ဘင်းဆိတ်ကား "လေဂေါင်ထှာမှာ" ညယ်ပြန်သဘန်း လျှောက်တာန်သမှာ။ 31အန်ဘင်းအမဲဘင်းနနူတာတ်ကား အန်တာတ်တေ အမဲဘင်းနနူတေဒေ အပြစ်အီဘင်း ကြီးကျယ်ထိန်ဘင်းသော်ဟွာန်နောင်းပါအဆာတ်ကွန်း တောင်းပန်သကြီးမှာ။ 32အန်၌မှါခ့်ခါ ဝါတ်အဆာန်းတစ်ဆာန်းကား ကုန်းရှရှာစောက်ပေ ယုတ်ပန်းနင်းကြီးမှါခ့်ခါ အန်ဘင်းအမဲဘင်းနနူတေကား ဝါတ်တာတ်နောင်းဘေ ဆာန်လူကွန်း ကိုယ်တော်ဒေ တောင်းပန်သကြီးဘင်းအတွာတ် ကိုယ်တော်ရီဒါး ခွာမ်းအီရာန်မှာ။ 33အမှာတွာတ် အမဲဘင်းနနူတာတ်ကား အန်ဘင်းသမီဆာဟက်ပူဘန်း ဝါတ်တာတ်ပါဆာန်စီးမှားနောက်တေ အန်ဘင်းဝါတ်အုပ်တစ်အုပ်လုံးကား မြာန့်သဘင်းကမ်းပါးစေါက်ဟက် ဝဲအာမ်းနောင်းပါ ဝါးဆာပ်ပန်း ဝဲနစ်သလာန်ပဲကြီးမှာ။ 34အန်၌မှါခ့်ခါ ဝါတ်ပူဘင်းဆိတ်တာတ်ကား အန်ဘင်းထှာရီဘင်းနာတေဒေ ကတုံန်ငါန်မှါခ့်ခါ ကာတ်လာန်ပဲကြီးဘန်း အန်ဘင်းဆတာန်းတေ ထိန်တေ၊ မြို့တေပါအကျန်သောညယ်ငှေါကြီးရာန်မှာ။ 35သမီဆတာတ်ကား အန်ဘင်းအဖြစ်အပျက်တေ ကတုံန်ရန်ကွန်း မြို့နောင်းဟက်ပူကြီးရီမှာ။ အန်တာတ်ကား ကိုယ်တော်ယေရှု ပါထုတ်ကြီးရီမှါခ့်ခါ အမဲဘင်းနနူကပ်ပန်းနင်းဘင်းဟက် လွောပ်သလာန်ဘဲဘင်းဆိတ်ကား နိတ်တင်တော်ဒင်တေတော်ဘန်း ကိုယ်တော်တာဟမုတ်ပေ မလဲအတိုင်းထုံးဘန်းနင်းဘင်းနာတေဒေ ကတုံန်ကြီးမှါခ့်ခါ အကြီးကျယ်အံ့ဩသဘန်း စါတ်ပန်းနင်းကြီးရာန်မှာ။ 36အန်ဘင်းအဖြစ်ပျက်တေဒေ ကိုယ်တိုင်ကတုံန်ရာန်ဘင်းဆိတ်တာတ်ကား အမဲဘင်းနနူကပ်ခံသထှာလားဟက် အန်ဘင်းဆိတ် ဟာနိမ် ကယာရာန်ဘင်းနာတေ ငှေါကာကြီးမှာ။ 37အန်၌မှါခ့်ခါ ဂါရစမြို့ပိုက်ဟက်ဒီဘင်းသမီဆာတာတ်ကား အကြီးကျယ်စါတ်ပန်းနင်းကြီးရာန်ဘင်းအတွာတ် ကိုယ်တော်ယေရှုတေ အန်ဘင်းအရပ်ဟက်ပူလာန်ဘဲကွန်း တောင်းပါန်သကြီးဘင်းအတွာတ် ကိုယ်တော်ယေရှုရီးဒါး တပယ့်တော်တာတ်ယောက် အန်ဘင်းအရပ်ဟက် လှေယောက်
ပူလာန်ပဲကြီးမှာ။ 38အန်၌မှါခ့်ခါ အမဲဘင်းနနူကပ်ပင်းဟက် မဲဟာန်းရီဘင်းသမီဆာကား ကိုယ်တော်ယောက်အတူတူ ဒီယာတ်ကူညယ် လျှောက်တာန်သမှါခ့်ခါ ကိုယ်တော်ကား အန်ဘင်းဆိတ်တေ အဒီယာတ်စိန်းယုတ်ပန်းနာ၊ 39"နာန်ကျေမ်းပါလာန်ဟာန်းဘန်း နာန်စောက်ပေ ဘုရားရှာန်အွန်အီရီဘင်း မဲဘင်းနာတေဒေ သမီဆာတာတ်နင်း ငှေါကာရာန်" ညယ်မိန့်တော်မူသမှာ။ စီးမှါခ့်ခါ အန်ဘင်းဆိတ်ရီဒါး မြို့အနှံ့လာန်ဘန်း ထှာရီဘင်းနာတေဒေ ငှေါကာမှာ။ 40စီးမှါခ့်ခါ ကိုယ်တော်ယေရှုကား အာမ်းအန်းကမ်းပါ ပြန်သဘန်း ကြွသဟာန်းမှါခ့်ခါ သမီဆတာတ်ကား ဒဲဘန်းလာပ်သနင်းကြီးမှာ။ 41အန်ဘင်းဘေ ဂျူးသမီအမျိုးထှာဘင်း ယာဣရု ညယ်ကော်ဘင်း ဓမ္မာရုံတာဝန်ခံဟော်ဝါငှါမှာ။ အန်ဘင်းဆိတ်ကား ကိုယ်တော်မန်းဘေ ထုတ်အီဘန်း သထူထောက်သဘန်းထုံန်းငါန်ဘန်း ကိုယ်တော်ဒေ ငါကျေမ်းပါ ကြွသအီဒင်အတွာတ် ပါမ့်သပဘဲမှာ။ 42ဟမာန်တွာတ်ငှေါဘန်းသာငှေါ ရှစ်နူပန်းကလိမ်းပီးအရွယ် ဟော်ဝါဆာငှါဘင်း ဟိန်
ဆအိတ်ကား ရှီးကူနိမ် ငှါနင်းဘင်းအတွာတ်ထှာမှာ။ အန်ဘင်းကျေမ်းပါ ကြွတော်မူသမှါခ့်ခါ သမီဆာကလောင်းတုံန်းရီးဒါး ကိုယ်တော်တေ ဝိုင်းသဘန်း ဒီရာတ်ကြီးမှာ။ 43အန်ဘင်းသမီဆာနောင်းဘေ ရှစ်နူပန်းကလိန်းပီး ဆယ်ဆပ်ပင်းရောဂါ ထှာနင်းဘင်း အီးရှီဟော်ဝါရီးဒါး ငှါနင်းမှာ။ အန်ဘင်းအီးရှီကား ငှါဘင်းဖူးတေဆွန်ကွန်း အုတ်ဆရာကြီး ကလောင်းတုံန်းယောက် ကုသဒီဒါး ဟာဘင်းအုတ်ဆရာကြီးစဲ ဟိန်ရောဂါကယာကွန်း အကုသအီရန်နား။ 44အန်ဘင်းအီးရှီကား ကိုယ်တော်ဟလိန်းပိုက်ပါ ထုတ်ကွန်းလာန်ဘန်း ကိုယ်တော်ဆာန်ဆုံတေ သဟူးယောက် ထိတာန်ဆာယောက် ချတ်ချန်းညယ် ဟိန်ဆယ်ဆပ်နင်းဘင်းနာ ကယာရာန်မှာ။ 45အန်၌မှါခ့်ခါ ကိုယ်တော်ကား "ငါတေ ဟာဟမဲထိဒီတေ" ညယ်စိန်ယူရာန်မှါခ့်ခါ သမီဆတာတ်ရီးဒါး အန်တာတ်အထိသဝါးညယ် ငြာမ်းသကြီးဘန်း ပေတရုကား "ကိုယ်တော်ပိုက်ပေ သမီဆာကလောင်းတုံန်းကား ပတ်ပတ်လည်ဘေ တိုးကျိတ်သပန်းနင်းကြီးမှာ" ညယ်လျှောက်တာန်သကြီးမှာ။ 46အန်နိမ်စါန်းငှေါဒီ ကိုယ်တော်ယေရှုကား "ငါတေ ဟော်ဝါးဟော်ဝါ ထိတာန်ဘင်းအတွာတ် ငါဟက် တန်ခိုးတေပူလာန်ပဲမှာငှေါဘင်းနာတေ ငါမိန်းရှာတ်ခါဘင်းအတွာတ်ထှာမှာ" ညယ်ငှေါမှာ။ 47အန်ဘင်းအီးရှီရီးဒါး အအွတ်ပဲရာန်ဘန်း စါတ်ပန်း ကိုယ်တော်မန်းဘေ တထူထောက်တာန်ပန်း ဆာန်ဆုန်ဆတေ ထိတာန်ဆယောက် ဟိန်ရောဂါချတ်ချန်း ကယာရာန်မှာငှေါဘင်းနာတေ သမီဆတာတ်နင်း ငှေါကာမှာ။ 48ကိုယ်တော်ကား အန်ဘင်းအီးရှီတေ "နာန်ယုံကြည်သဘင်းနာကား နာန်ရောဂါတေမဲဟာန်းစိန်းမှာ။ စိတ်ချလက်ချ လာန်ဟာန်းစိတ်" ညယ်မိန့်သမှာ။ 49ကိုယ်တော်ယေရှု အာနိမ်မိန့်သနင်းမှါခ့်ခါ "ယာဣရုကျေမ်းဟက် သမီဆာဟော်ဝါ ထုတ်အီပန်း ယာဣရုတေ "နာန်ဆအိတ်ရှီးပါန်၊ ကိုယ်တော်ဒေ အနောက်ယှက်သဆိတ်" ညယ်ဒီဘန်းငှေါမှာ။ 50အန်ဘင်းတူးတေ ကိုယ်တော်ယေရှုသက်ပူမှါခ့်ခါ ယာဣရုတေ "အကားဆာ။ ယုံသပန်းနာဆာပဲ။ နာန်ဆအိတ်ပြန်သဘန်း စားဟာန်းရီကူ" ညယ်မိန့်သမှာ။ 51စီးမှါခ့်ခါ ကိုယ်တော်ကား ယာဣရုကျေမ်းပါ ကြွသမှါခ့်ခါ ပေတရု၊ ယောဟန်၊ ယာကုပ်ယောက် အီးရှီရှာအဝါ အမယ်တေဟက် လွဲသပန်း ဟာဟမဲတေစဲ ကျေမ်းနောင်းဘေ အဆာန်စိန်းယုတ်အား။ 52သမီဆာ၌တိုင်းကား အန်ဘင်းအီးရှီရှာ ရှီးရာန်ဘင်းအတွာတ် အကြီးကျယ်ဟပ်ပန်းနင်းကြီးမှာ။ အာနိမ်စါန်ငှေါဒီ ကိုယ်တော်ကား "အဘင်းရှာဆာကား အရှီးနွန်း။ ဟိန်အေ့ပ်နင်းလားထှာမှာ" ညယ်မိန့်တော်မူသမှါခ့်ခါ 53သမီဆာတာတ်ကား အန်ဘင်းအီးရှီရှာ ရှီးဘန်းငှေါဘင်းနာတေ မိန်းရှာတ်ခါပဲဘင်းအတွာတ် ကိုယ်တော်ဒေ နီးကြီးမှာ။ 54ကိုယ်တော်ယေရှုကား အန်ဘင်းရှီးနင်းဘင်း အီးရှီရှာသဟူးတေ ငါတ်ပန်းနာ "အီးရှီဆာရဲစိတ်" ညယ်မိန့်တာန်မရောက် 55အီးရှီရှာကား စားဟာန်းရီဘန်းနာ ချတ်ချန်းရဲဘန်း ထုံးရာန်မှာ။ စီးမှါခ့်ခါ ကိုယ်တော်ယေရှုကား အီးရှီရှာတေ ယုတ်တင်စယ်ယာ နွောပ်အီတင်အတွာတ် ဟိန်အမယ် အဝါတာတ်တေ ငှေါရာန်မှာ။ 56ဟိန်အမယ် အဝါတာတ်ကား အကြီးအကျယ်အံ့ဩသကြီးရာန်မှာ။ အန်နိမ်စါန်းငှေါဒီ ကိုယ်တော်ကား အဘင်းထှာရီဘင်းနာတေ ဟာဟမဲတေဆဲ အငှေါဆာညယ် မိန့်တော်မူသမှာ။
S'ha seleccionat:
Luke 8: ktpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.