Matius 27
27
Yesus tomehen hia Gubernur Pilatus ina tomongadili
27:1-2
(Mrk. 15:1; Luk. 23:1-2; Yoh. 18:28-32)
1Ngonyua-nyua lau, kokon imam kopala hintang kawan pomimpin bangsa Yahudi umpi koputusan ina Yesus tomohukum matoi. 2Iroh mowot Are, mehen-Eh, paluh nyarah-Eh hia Pilatus, gubernur propinsi cioh.
Yudas ngompatoi arop eh
27:3-10
(Kes. 1:18-19)
3Yudas, iyohonon dulun co mohianat Yesus, are noto bahawa ocop oko koputusan ika mohukum matoi Yesus. Nyan waktu iyoh, Yudas moneser. Are nompuli tolum pulu kodilat duit perak cioh hia kawan imam kopala hintang kawan pomimpin bangsa Yahudi taiyoh. 4Hieeh, “Akuh ocop bodosa mohianat dulun co aroko kosolaai dapot Are tomohukum matoi.”
Tapi iroh museh, “Ome urusan kaih ma iyoh? Iyoh urusanmu tarop!” 5Paluh, Yudas nyakah duit cioh hia ponah Lopo Mohotara, paluh tulak hintang ngompatoi arop hapo cara ngonyeret arop eh.
6Kawan imam kopala monu duit cioh paluh mantun, “Duit cotuh duit daha. Poko tului iyoh, Hukum Torat ngosiit ito pokuntam eh nyan ponah kotak porsembahan.” 7Jadi, iroh umpi koputusan ika duit cioh ina moli ico kobidang tana co tonisi Tana dulun co tukang nguan buong. Iroh umpi tana cioh jarin ika kolowong kawan dulun tomuoi. 8Poko tului iroh hapo duit co ika bojuar Yesus, maka dapot nyan ondo cotuh tana cioh tonisi ‘Tana Daha’.
9Ma isanioh, antun Nabi Yeremia nyan jaman sinan jarin nyata. Hieeh, “Iroh norima tolum pulu kodilat duit perak, iyohonon leka co tonatap pian kawan dulun Israel ika nyarah Are. 10Hintang duit cioh iroh hapo ika moli tana dulun co tukang nguan buong, nain co tomorentah Tuhan ma akuh.”#27:10 Dari buku Jakaria 11:12-13 dan Yeremia 32:6-9.
Yesus nyan tohimo Gubernur Pilatus
27:11-26
(Mrk. 15:1-15; Luk. 23:1-5,13-25; Yoh. 18:33–19:16)
11Paluh Yesus tomehen hia tohimo gubernur Pilatus. Gubernur cioh ngisok ma-Eh, “Mainboh Iko laca dulun Yahudi?”
Useh Yesus, “Sanioh hiemmu.”
12Kawan imam kopala hintang kawan pomimpin bangsa Yahudi nondah Are. Tapi, nyan waktu iyoh, Are aroko museh sama sindo.
13Paluh hien Pilatus ma-Eh, “Iko ocop ngoneh kokon tondah doh tohimo Iko. Kura Iko aroko ngilang arop-Mu?” 14Tapi Yesus tenden aroko museh sama sindo. Tului iyoh, Pilatus jarin korinah hurong.
15Nah, nyan sika ondo moraya Paskah, gubernur biasaeh pokusit ico beti ingkan seper, sosuai ma pilin dulun orong. 16Nyan waktu iyoh oko ico nyan seper co botisi. Araieh Yesus Barabas. 17Jadi, hiah waktu dulun orong ocop hokumpur, Pilatus ngisok ma iroh, “Comohboh co tonyau me akuh molapas indam me? Yesus Barabas atawa Yesus co tonisi ‘Kristus?’ ” 18(Pilatus mantun sanioh tului are monau alasan kawan pomimpin Yahudi nyarah Yesus hiaeh, iyohonon atoi doh bosingon ma Yesus.)
19Kotika Pilatus dahat tuot nyan korusi pongadilan, oruh eh pokatu tungon indaieh: “Aroh iko toakuakan porokara dulun bujur conon, awi tului Are akuh korinah mondorita ponah nupi momi nin.”
20Tapi kawan imam kopala hintang kawan pomimpin bangsa Yahudi mohasut dulun orong yoh ika nyawot ina Barabas tomombebas hintang Yesus tomohukm matoi. 21Gubernur cioh mantun kole ma iroh, “Ingkan dulun duo onon, comohboh co tonyau me akuh molapas eh?”
Hien doh, “Barabas!”
22Hien Pilatus ma iroh, “Amun sanioh, ome co tonyau me akuh umpi ma Yesus co tonisi ‘Kristus?’ ”
Iroh uras mantun muhat, “Mohukum matoi Are ma cara tonyompolaki!”
23Hien Pilatus, “Tapi kojahatan ome co ocop tongompiai-Eh?”
Tapi iroh sasar muhat noriak, “Mohukum matoi Are ma cara tonyompolaki!”
24Kojekaieh Pilatus noto bahawa usahaeh ika mombebas Yesus aroko bohasir. Malah, dulun orong taiyoh ocop nyau umpi korusuhan. Jadi, are monu danum paluh munyah siluieh nyan tohimo dulun orong yoh. Hieeh, “Akuh aroko botanggung-jawab ma pompatoi Dulun cotuh! Onon urusan me!”
25Kokon dulun orong yoh museh, “Oluceh kaih hintang kawan anak kaih nangung hukuman tului pompatoi-Eh!”
26Paluh, Pilatus mombebas Barabas indan doh. Tapi nyuhu kawan projurit eh moncambuk Yesus hintang nyarah Are ina tomohukum matoi nyan sompolaki.
Kawan projurit polealea Yesus
27:27-31
(Mrk. 15:16-20; Yoh. 19:2-3)
27Opaiyoh kawan projurit Pilatus yoh mehen Yesus hia istana gubernur.#27:27 Ponah istana cioh, oko markas ika nahan dulun co angar tomohukum. Paluh kokon pasukan tontara hokumpur toliut Yesus. 28Paluh iroh molai polea-lea Are sobagai laca. Iroh nyoloko lembon-Eh paluh pohapo-Eh ma jubah warna ungu. 29Iroh maro somacam mahkota ingkan jakah hoduhi, paluh posungkop nyan kuhung-Eh. Iroh mandak doroh towu bawui nyan ponah silun kontoui-Eh, ina tokitan isan tuntu laca. Paluh, iroh bolutut nyan tohimo-Eh hintang pohulut-hulut Are. Hien doh, “Co tohormat Laca Dulun Yahudi!” 30Iroh ngiwoh-Eh hintang monu doroh towu bawui cioh paluh molantu kuhung-Eh. 31Opah iroh pohulut-hulut Are, iroh mukoi jubah cioh paluh pohapoeh ma jubah-Eh leh. Opaiyoh iroh mehen Are hia luar ika tomohukum matoi nyan sompolaki
Yesus tonyompolaki
27:32-44
(Mrk. 15:21-32; Luk. 23:26,33-43; Yoh. 19:17-24)
32Hiah waktu iroh nyalan hia luar kota Yerusalem, iroh sopopak ma ico dulun ingkan kota Kirene. Co araieh Simon. Iroh momaksa are ika nyanon sompolaki Yesus. 33Opaiyoh iroh dapot nyan ico ika co araieh Golgota. Aran cioh co artieh ‘Ika Ongang’. 34Nyan intin, iroh mihi Yesus korih angur co bocampur ma poru. Tapi opah Are ngonyelek, Are aroko kolu ngorih eh. 35Iroh nyompolaki Are paluh moundi ika hobagi lembon-Eh.#27:35 Poristiwa cotuh umpi antun ingkan Masmur 22:19 jadin nyata. 36Opaiyoh iroh tuot nyan intin ika monjaga Are. 37Nyan hunyung kuhung-Eh tomatop tulisan. Tulisan cioh nisi alasan kura Are tomohukum, “Tuhboh Yesus, Laca Dulun Yahudi.”#27:37 Pomorintah Romawi umpi hukuman matoi nyan sompolaki nyan ika umum ina orong dulun boraoi kito. Iroh mahi masang pongumuman nyan kaju cioh ina dulun monau ome kosolaaieh. Iyoh pokingat dulun ika tuhit ma pomorintah. Tulisan co tomasang nyan hunyung Yesus borupa kelat ma Yesus (awi iroh aroko porocaya Are angar jarin laca) ATAWA kelat ma Yahudi (awi moremeh kuasan doh tombanding ma kuasan pomorintah Romawi). 38Iroh mahi nyompolaki duo dulun porampuk hontong ma Yesus, ico tonyompolaki topit kontoui-Eh hintang ico kole tonyompolaki nyan topit komuloi-Eh.
39Kawan dulun co nyihin nyan intin mohina Are hintang samir ngiling kuhung, 40hien doh, “Hei Iko co nyau morohop Lopo Mohotara paluh mangun eh hopuli ponah tolu ondo! Amun Iko bujur-bujur Anak Mohotara, nyolamatbat arop-Mu. Toka bat ingkan sompolaki conon!”
41Sanioh ka kawan imam kopala, kawan guru Hukum Torat, hintang kawan pomimpin bangsa Yahudi. Iroh hopolea Yesus. 42Hien doh, “Are nyolamat dongai, tapi Are aroko liai nyolamat arop-Eh tarop! Amun Are bujur-bujur Laca Dulun Israel, oluboh Are toka ingkan sompolaki conon! Amun Are lian nguan iyoh, punan kaih porocaya ma-Eh. 43Are porocaya ma Mohotara. Are piji mantun bahawa Are iyohco Anak Mohotara. Jadi, amun Mohotara bujur-bujur jorih ma Are, oluboh Mohotara dohop Are makitu!”
44Duo dulun porampuk co tonyompolaki nyan hoponyila Yesus, iroh mahi mohina Are nain iyoh ka.
Yesus matoi
27:45-56
(Mrk. 15:33-41; Luk. 23:44-49; Yoh. 19:28-30)
45Nyan jam duo balas tohun ondo, ngolauh derah cioh jarin pindong dapot jam tolu macohit. 46Kira-kira jam tolu macohit, Yesus noriak ma suara muhat, “Eli, Eli, lama sabaktani?” Co artieh, “Mohotarang-Kuh, Mohotarang-Kuh, kura Iko naat Akuh?”#27:46 Ingkan buku Masmur 22:2. 47Bopira dulun co tonjok nyan intin ngoneh iyoh aroko paham. Hien doh, “Are naah nabi Elia.”#27:46-47 Yesus noriak ponah bohasa Aram (iyohonon bohasa dulun Yahudi). Antun co ‘Eli’ ponah bohasa Aram Artieh ‘Mohotarang-Kuh’, tapi nain antun cioh mirip ma ‘Elias’ ponah B. Yunani. Jadi, oko dulun co bopikir Yesus naah nabi Elia. Hiah jaman sinan nabi Elia aroko matoi (Mohotara mehen are hia sorga ponah koreta co boapui). Jadi, orong dulun Yahudi porocaya nabi Elia hegah dombut hopuli hia dunia tuh ika dohop dulun. 48Ico ingkan iroh mancap tulak monu aranaang co hegah nosop danum. Are monculup eh ponah angur mosom paluh nongkuling eh nyan ujung doroh towu bawui. Paluh are nyoroeh hia baun Yesus ina tongorih-Eh. 49Tapi kawan dulun bokon mantun, “Aroh! Haas ito noto amun Elia dombut ika dohop Are.” 50Yesus mantun kole ma suara muhat, paluh nyarah tambung songai.
51Hiah waktu cioh ka, horden nyan ponah Lopo Mohotara botosah jarin duo, ingkan hunyung dapot hia pinda.#27:51 Ponah gedung Lopo Mohotara, oko ruangan husus kohadirat Mohotara. Oko horden co misah ruangan cioh ma ruangan bokon. Sindo ponah ico toun baya Imam Kopala co poko bokuasa boraoi muntam ruangan cioh. Jadi, hiah horden cioh botosah artieh arelu oko batasan bat. Kohadirat Mohotara arelu oko nyan ruangan husus cioh. Lopo Mohotara aroko jarin pusat ika monyembah Are bat. Molalui Yesus, ito makitu kuhan muntam kohadirat Mohotara. Noto Ibrani 6:19-20; 9:1-15; 10:19-22 hintang Epesus 2:18; 3:12. Oko gempa bumi hintang kawan loong batu bosila. 52Kawan guha kolowong topukap paluh orong dulun ingkan umat Mohotara bolum hopuli ingkan pompatoi. 53(Opah Yesus bolum hopuli, iroh pusit ingkan kawan kolowong paluh muntam hia kota Yerusalem. Nyan intin orong dulun noto iroh.)
54Kopala pasukan hintang kawan projurit co monjaga Yesus noto gempa bumi hintang uras co tojadi yoh. Tului iyoh, iroh jarin takut lau. Hien doh, “Tuu, Dulun cotuh bujur-bujur Anak Mohotara!”
55Nyan intin oko ka pira-pira bawe co noto ingkan ocu. Iroh iyohco ngonulu Yesus ingkan propinsi Galilea ika molayan Are. 56Nyan halo iroh oko ka Maria Makdalena, Maria (tinan Yokobus doruo Yusup), hintang tinan rasul Yokobus doruo Yohanes, iyohonon duo anak Jebedeus.
Yesus tongolowong ponah guha
27:57-61
(Mrk. 15:42-47; Luk. 23:50-56; Yoh. 19:38-42)
57Kotika jonyo mamalom, ico dulun tatou dombut. Araieh Yusup. Are ico murid Yesus co borasar ingkan kota Arimatea. 58Are tulak hia gubernur Pilatus paluh nyawot ijin amun are tokuhan are ngolowong ontun Yesus. Pilatus morentah ina ontun Yesus tomihi maeh. 59Jadi, Yusup monu ontun Yesus yoh, paluh mungkuh-Eh ma benang kaci. 60Are pokaling ontun Yesus nyan ponah kolowong co baa. Kolowong cioh tioh Yusup leh co tonguan eh nyan ponah lungkuh batu. Are ngolinang ico batu bahai nyan muka kolowong cioh ika nutup eh. Paluh, are tulak.#27:60 Yusup tombantu Nikodemus, co mahi anggota Kolompok pomimpin agama Yahudi co poko bokuasa (Yohanes 19:39-42). Bahai komungkinan, iroh mahi tombantu pian kawan polayan doh awi batu tutup kolowong cioh bahai lau. 61(Maria Makdalena hintang Maria co bokon yoh tuot nyan intin nohimo kolowong cioh.)
Kolowong Yesus tomonjaga
27:62-66
62Manyuap ondoeh, iyohonon Ondo Sabat,#27:62 Teks asli bohasa Yunani hapo, ‘opah Ondo Porsiapan’. Dulun Yahudi aroko kuhan bogawi nyan Ondo Sabat. Jadi, sika mengu, nyan ondo Jomahat sorinai Ondo Sabat, dulun Yahudi horoholuh bogawi monyiap kokon aranaang co tomorululu. Iyoh alasan eh Ondo Jomahat tonisi ‘Ondo Porsiapan’. kawan imam kopala hintang kawan pomimpin agama Yahudi ingkan kolompok Parisi, iroh tulak mohadap Pilatus. 63Hien doh, “Bapak, kaih mingkat waktu Yesus dulun co monyasat cioh incah bolum, Are piji mantun, bahawa Are angar bolum hopuli opah tolu ondo. 64Poko tului iyoh, nyuhuboh ina kolowong-Eh tomonjaga dapot ondo co kotolu. Amun aroh, mungkin kawan murid-Eh angar dombut ika nako ontui-Eh. Paluh, iroh angar monyasat rayat ma momborita, bahawa Are ocop bolum hopuli ingkan halo dulun matoi. Cara cioh iroh monyasat dulun angar meleh ceet hangki waktu kosulak Are monyasat dulun.”#27:64 Kawan Pomimpin agama Yahudi aroko porocaya bahawa Yesus iyohco Laca Co Tomonjanji Mohotara. Jadi, iroh bopikir Are monyasat dulun waktu Are mantun bahawa Are iyohco Laca cioh.
65Hien Pilatus ma iroh, “Pioleh. Mehenleh kawan ponjaga tatuh. Jagabat kolowong cioh ma koketat.” 66Jadi iroh tulak hontong ma kawan ponjaga taiyoh ika monjaga kolowong Yesus. Iroh mahi nampek segel, ico ciri resmi nyan batu tutup eh ina tomonau amun oko dulun co ngisat tutup kolowong cioh.
S'ha seleccionat:
Matius 27: TBSS
Subratllat
Comparteix
Copia

Vols que els teus subratllats es desin a tots els teus dispositius? Registra't o inicia sessió