Matius 26
26
Kawan pomimpin dulun Yahudi ngewak ika ngompatoi Yesus
26:1-5
(Mrk. 14:1-2; Luk. 22:1-2; Yoh. 11:45-53)
1Opah Yesus umbot mantun kawan pongajaran taiyoh, Are mantun ma kawan murid-Eh. 2Hie-Eh, “Ikan monau bahawa duo ondo oni angar oko ondo moraya Paskah. Nyan waktu cioh, kawan dulun angar nawan Anak Kolunon. Iroh angar nyarah Are hia kawan dulun ina Are tomohukum matoi nyan sompolaki.”
3Nyan waktu cioh ka, kawan imam kopala hintang kawan pomimpin dulun Yahudi hokumpur nyan istana Imam Kopala co poko bokuasa, co araieh Kayapas. 4Iroh morunding kewak ina lian nawan Yesus ma cara tonih-tonih paluh ngompatoi Are. 5Tapi iroh mantun, “Aroh ito nyuwah nawan Are nyan waktu kawan dulun moraya ondo Paskah, awi daai angar oko korusuh nyan halo rayat.”#26:5 Mungkin kawan pomimpin agama Yahudi taiyoh takut amun kawan dulun co bopihak ma Yesus ngolawan iroh. Tapi mungkin ka iroh takut pomorintah Romawi angar mohukum iroh amun tolibat ponah korusuhan cioh.
Bawe co nitik minyak harum nyan tungkui kuhung Yesus ika mohormati Are
26:6-13
(Mrk. 14:3-9; Yoh. 12:1-8)
6Kotika nyan kota Betania, Yesus oko nyan lopo Simon co batuh upak eh hoboro. 7Hiah waktu iyoh, oko ico bawe dombut hia Yesus. Bawe cioh mehen ico polonyakan ingkan batu pualam co sangan minyak harum co darang. Hiah waktu Yesus dahat tuot kuman, bawe cioh nitik minyak cioh nyan tungkui kuhung Yesus ika mohormati Are.
8Kotika kawan murid-Eh kito iyoh, iroh jarin bosopo. Hien doh, “Kura minyak harum conon tongosejeng kintu aih? 9Minyak harum conon lian tobojuar ma leka co darang paluh duit eh tomihi indan kawan dulun mala!”
10Tapi Yesus monau pikiran doh yoh. Hie-Eh ma iroh, “Aroh orong naim me ma bawe cotuh! Are umpi aranaang co pio indang-Kuh. 11Ikan horoholuh oko kosempatan ika umpi aang co pio indan kawan dulun mala awi iroh horoholuh oko nyan halo ikan. Tapi Akuh aroko angar horoholuh halo ikan. 12Ma nitik minyak harum conon nyan tungkui Kuh, sobujur eh bawe cotuh ocop nyiap beting-Kuh ika tongolowong. 13Ngoneh ehyoh! Nyan ngolauh dunia, nyan omoh bewe Tarung Pio tomomborita, alogawin bawe cotuh angar tongesah ka dapot are aroko piji tonyolingo.”
Rasul Yudas umpi kewak ika nyarah Yesus hia kawan dulun co ngolawan-Eh
26:14-16
(Mrk. 14:10-11; Luk. 22:3-6)
14Opaiyoh, Yudas Iskariot, iyohonon ico ingkan duo balas rasul Yesus, are tulak hia kawan imam kopala. 15Are mantun ma iroh, “Omeboh co angar ihim me indang kuh amun akuh nyarah Yesus ma ikan?” Maka iroh ngitung tolum pulu kodilat duit perak, paluh mihi duit cioh indaieh. 16Ingkan hiah iyoh, Yudas molai nganyap kosempatan co pio ika nyarah Yesus ma iroh.
Yesus moraya ondo Paskah ma kawan murid-Eh
26:17-25
(Mrk. 14:12-21; Luk. 22:7-14,21-23; Yoh. 13:21-30)
17Ocop dapot waktueh ika molai porami Ondo Rute Aroko Bodagi. Jadi, nyan ondo kosulak poramian cioh, kawan murid Yesus dombut hia-Eh. Hien doh, “Nyan omohboh co tongonyere Mu kaih monyiap indam-Mu ika kuman moraya Paskah?”
18Useh Yesus, “Muntam hia kota Yerusalem hia dulun cioh co tonyono to. Mantun maeh, ‘Bapa Guru oko tungon. Waktu indan Are jonyo dapot.#26:18 Co tomaksud ma ‘waktu indan Are’ iyohco waktu co ocop tonatap Mohotara indan Yesus ika matoi. Yesus iyohco ocop monau aang co angar tojadi ma Are tintun pompatoi-Eh pira-pira kali (16:21; 17:12,22-23; 20:18-19). Mungkin kawan murid-Eh hintang dulun cioh paham ome co tomaksud-Eh yoh. Dulun cioh isantagas mahi jolaha dokin ma Yesus. Are nyau moraya Paskah nyan ponah lopomu homboh ma kawan murid-Eh.’ ” 19Paluh, kawan murid Yesus nguan ome co tonyuhu-Eh ma iroh. Iroh tulak monyiap kanon taiyoh ika moraya Paskah.
20Hayak ondo ocop homalom, Yesus tuot kuman homboh-homboh ma duo balas murid-Eh. 21Kotika iroh dahat kuman, Are mantun, “Porhatieh boh Akuh! Songkolang ico ingkan halo ikan angar nyarah Akuh hia kawan dulun co ngolawan Akuh.”
22Aang cioh umpi atoi doh jorung lau. Iroh hopomasing mantun ma-Eh, “Mositi bokon akuh, yoh Tuhan?”
23Useh Yesus, “Dulun co nucom ruteeh nyan ponah mangkuk homboh Akuh, areboh co angar nyarah Akuh. 24Ocop tonulih ponah Surat Borasih bahawa Anak Kolunon angar tonyarah hia kawan dulun co ngolawan Are. Tapi Mohotara angar mohukum dulun co nguan iyoh. Meleh pio indan dulun cioh amun are aroko piji tonganak sama sindo!”
25Paluh, Yudas, iyohonon dulun co angar nyarah Yesus, are mantun, “Mositi bokon akuh, yoh Pa Guru?”
Useh Yesus, “Saniohboh hiem mu.”
Acara kuman ika mingkat Yesus
26:26-29
(Mrk. 14:22-25; Luk. 22:15-20; 1Kor. 11:23-25)
26Kotika iroh dahat kuman, Yesus monu rute holuh mucap doa sukur. Are nyila rute cioh ma silui-Eh holuh mihieh hia kawan murid-Eh. Hie-Eh, “Monueh, kuman eh, otuhboh beting-Kuh.”
27Opah iyoh, Yesus monu cangkir angur. Are mucap doa sukur kole holuh mihi cangkir cioh hia iroh. Hie-Eh, “Kokom me, ngorih eh ingkan cangkir cotuh. 28Awi, otuhboh daha-Kuh co angar tonumbak indan orong dulun kotika Akuh diuh. Onon angar tojadi ina kawan dulun hegah tomongampun ingkan kawan dosan doh. Ononboh pojanjian Mohotara co tomonsah ma daha-Kuh.#26:28 Hiah jaman sinan, dulun Israel tomalak sobagai ciri iroh umat Mohotara. Iroh mahi momposembah komolum ina dosa tomongampun. Cononboh Pojanjian Mohotara co tomuun. Tapi makitu oko Porjanjian Mohotara co baa, Ome bewe co porocaya ma Yesus, bolum sosuai ma kojere-Eh, dulun cioh tomongampun paluh jarin umat-Eh. 29Tapi porhatiehboh otuh: Akuh aroko angar ngorih angur cotuh bat dapot Akuh ngorih angur co baa homboh-homboh ma ikan ponah Korojaan Tamang-Kuh.”
Yesus mantun bahawa Rasul Petrus angar nisi arop eh aroko nyono Are
26:30-35
(Mrk. 14:26-31; Luk. 22:31-34; Yoh. 13:36-38)
30Paluh, Yesus hintang kawan murid-Eh monyanyi lagu koponara indan Mohotara. Opah iyoh, iroh tulak hia lungkuh Jaitun.
31 Nyan intin, Yesus mantun ma iroh, “Nyan momi cotuh ka, kokon ikan angar naat Akuh. Awi sobulih tojadi sosuai ma Antun Mohotara cotuh co tonulih ponah Surat Borasih: ‘Akuh angar ngompatoi gombala cioh, holuh pumpun dombaeh angar hobomisah.’#26:31 Ingkan buku Jakaria 13:7. Yesus tonyamah ma ‘gombala’ hintang kawan murid-Eh tonyamah ma ‘pumpun domba’. Mula Mohotara aroko ‘ngompatoi’ Yesus, tapi pompatoi Yesus tomasuk ponah roncana Mohotara co somporaka. Noto Kesah 2:23. 32Tapi opah Mohotara umpi Akuh bolum hopuli, Akuh angar tulak nosoun ikan hia propinsi Galilea.”
33Petrus museh Yesus, “Mungkin kokon jolaha co bokon angar naat Iko, tapi akuh mositi aroh!”
34Tapi Yesus mantun maeh, “Ngoneh ehboh! Nyan momi cotuh ka iko angar mantun bahawa iko aroko mongaku nyono Akuh dapot hontolu kali sorinai piak nondu.”
35Hien Petrus ma-Eh, “Oluco akuh sobulih matoi homboh Iko, akuh aroko angar mantun isan iyoh.” Kokon murid co bokon mantun isanioh ka.
Yesus bodoa nyan kabun Getsemani
26:36-46
(Mrk. 14:32-42; Luk. 22:39-46)
36Opaiyoh, Yesus hintang kawan murid-Eh dapot nyan ico ika co araieh Getsemani. Nyan intin, Are mantun ma iroh, “Ikan tuot nyan intoi, sopondehan Akuh tulak hia idi ika bodoa.” 37Are mehen Petrus hintang duo anak Jebedeus umba-Eh. Waktu iyoh, Yesus molai nongkomo jorung lau hintang golisah. 38Are mantun ma iroh, “Atoi-Kuh jorung lau, nyamaieh isan jere matoi. Ikan bolenteng nyan intoi hintang bojaga-jaga ma Akuh.”
39Opaiyoh, Yesus tulak meleh ocu isut. Are bolutut paluh bodoa. Hie-Eh, “Yoh Tamang-Kuh, amun boraoi, mombebas Akuh ingkan pondoritaan co sobulih tonongkomo-Kuh tuh. Tapi aroh monurut kojere-Kuh, molengkan monurut kojere Tamang-Kuh leh.” 40Opah iyoh, Are hopuli hia kawan murid-Eh yoh. Are noto iroh rahat potontirui. Hie-Eh ma Petrus, “Tonyata ico jam mahi aroko hegah ikan bojaga-jaga ma-Akuh! 41Bojaga-jagaboh hintang bodoabat ina ikan aroh buah tingkoh. Mula atoi me nyau umpi aang co bujur tapi tobiat kolunon me hako.”
42Opaiyoh, Yesus tulak bodoa indan kohonduoeh. Hie-Eh, “Yoh, Tamang-Kuh. Amun Akuh sobulih nongkomo pondoritaan cotuh, aroko boraoi tongule, maka nyolungboh sosuai ma kojere-Mu leh!” 43Opah iyoh, Yesus hopuli kole hia kawan murid-Eh. Are noto iroh rahat potontirui awi iroh korinah nundu.
44Yesus naat iroh paluh tulak bodoa indan co kohontolueh. Are bodoa kole ma doa co samah. 45Paluh, Are hopuli kole hia kawan murid-Eh. Hie-Eh, “Ikan incah tirui hintang sotorahat leh! Notobat, waktueh ocop dapot indan Anak Kolunon. Makitu Are angar tonyarah hia kawan dulun co bodosa. 46Monyunbat! Haas, dulun co nyarah Akuh ocop dombutbat.”
Yesus tonawan
26:47-56
(Mrk. 14:43-50; Luk. 22:47-53; Yoh. 18:1-11)
47Lambak Yesus incah hopander, Yudas dombut. Are iyohco ico ingkan duo balas rasul. Homboh-homboh ma are, sorombongan dulun dombut ka mehen padang hintang polang. Iroh tonyuhu pian kawan imam kopala hintang kawan pomimpin bangsa Yahudi. 48(Nah, sorinaieh, Yudas yoh ocop umpi kewak ika nyarah Yesus hia rombongan co ngolawan Yesus yoh. Are mihi kode santuh ma iroh. Hieeh, “Dulun co tomarok kuh, ciohboh dulun eh. Nawan Are!”) 49Jadi, kotika rombongan eh dapot, Yudas lansung tulak hia Yesus. Hieeh, “Tabe, Pa Guru!” Paluh, Yudas marok Are.
50Hien Yesus, “Heh konduang, umpilehboh ome co jarin kewakmu”
Jion rombongan cioh maju, nawan Yesus. 51Ico beti co umba Yesus nyopet padang, lansung nyarang ico polayan Imam Kopala co poko bokuasa. Are moriwih tolingan polayan cioh dapot sompuleng. 52Tapi Yesus mantun maeh, “Ngumpang padang conon hopuli hia ponah kumpang eh. Awi kokon dulun co hapo padang angar matoi pian padang ka. 53Kiramu Akuh aroko boraoi nyawot ma Tamang-Kuh, maka Are angar jion ngirim meleh hangki duo balas pasukan tontara molekat ika dohop Akuh? 54Tapi amun Akuh umpi iyoh, ome co tonulis nyan ponah Surat Borasih tintun Akuh aroko angar jarin nyata. Tulisan cioh mantun bahawa kokoieh sobulih tojadi isan co tojadi makitu tuh.”
55Hiah waktu iyoh, Yesus mantun ma dulun orong yoh, “Mambu Akuh tuh ponjahat, dapot ikan sobulih dombut mehen padang hintang polang ika nawan Akuh? Podahar, sika ondo Akuh tuot majar nyan polontaran Lopo Mohotara. Tapi waktu iyoh ikan aroko nawan Akuh. 56Tapi, kokoieh tuh tojadi ina antun tintun Akuh co tonulih kawan nabi jarin nyata.” Paluh kokon murid Yesus ngomuho arop hintang naat Are.
Yesus tomongadili Kolompok pomimpin agama Yahudi co poko bokuasa
26:57-68
(Mrk. 14:53-65; Luk. 22:54-55,63-71; Yoh. 18:12-14,19-24)
57Nyan waktu iyoh, kawan guru Hukum Torat hintang kawan pomimpin bangsa Yahudi ocop hokumpur nyan lopo Kayapas, iyohonon Imam Kopala co poko bokuasa. Kawan dulun co nawan Yesus mehen-Eh hia lopo cioh. 58Petrus ngonulu Are ingkan ocu. Dapot hia lopo cioh, Petrus muntam hia polontaran paluh tuot halo ma kawan ponjaga, ina boraoi monau ome co angar tojadi ma Yesus.
59Kawan imam kopala hintang kokon Kolompok pomimpin agama Yahudi co poko bokuasa, iroh bousaha nganyap bukti ina Yesus lian tomohukum matoi. Jadi, iroh hokanyap kawan dulun co angar jarin saksi mantun unih ina ngolawan Yesus. 60Orong dulun maju, tapi kawan pomimpin taiyoh aroko bohasir haba bukti ome-ome. Tapi, ahir eh oko duo dulun co majuika bosaksi. 61Hien doruo, “Dulun cotuh piji mantun bahawa Are lian nohop Lopo Mohotara paluh mangun eh hopuli ponah tolu ondo.”
62Paluh Imam Kopala co poko bokuasa cioh tonjok. Hieeh ma Yesus, “Mainboh Iko aroko museh tondah conon co tonuju indam-Mu?” 63Tapi Yesus tonih leh. Paluh Imam Kopala cioh ngisok kole, “Demi Mohotara co bolum, mantun ehboh ma kaih. Mainboh Iko Laca Co Tomonjanji Mohotara co ito nisi ‘Mesias’? Main Iko Anak Mohotara?”
64Useh Yesus, “Sanioh hiem me. Tapi ngoneh ehlah otuh! Molai makitu, ikan angar noto Anak Kolunon, tuot nyan ika co tohormat topit kontoun Mohotara Co Poko Bokuasa. Ikan angar kito Are dombut ingkan sorga nyan tungkui kawan hawun nyan langit.”
65 Ngoneh iyoh, Imam Kopala co poko bokuasa yoh nirat-nisah lembon eh. Hieeh ma kawan pomimpin co bokon nyan intin, “Are ocop mohina Mohotara! Aroko usah nganyap saksi ika mantun kosolaai-Eh! Ikan ocop ngoneh hie Are nyamah Arop eh ma Mohotara! 66Jadi, ome koputusan me?”
Useh doh, “Are sobulih tomohukum matoi!”#26:66 Kawan pomimpin dulun Yahudi aroko porocaya Yesus iyohco Laca Co Tomonjanji Mohotara. Maka, iroh bopikir Yesus mohina Mohotara waktu Are mantun Are bokuasa (tuot nyan topit kontoun Mohotara hintang nyan tungkui kawan hawun). (Noto Dan. 7:13-14) Monurut agama Yahudi, dulun co umpi kosolaa cioh sobulih tomohukum matoi (Imamat 24:16). Tapi, awi dulun Israel tonguasai pomorintahan Romawi, baya pomimpin Romawi boraoi umpi koputusan ika dulun tomohukum matoi. Maka, Yesus tomehen hia Gubernur Pilatus.
67Paluh iroh ngiwoh tampa Yesus hintang nampar-Eh. Kawan dulun bokon paluh molantu Are. 68Hien doh, “Mombuktieh amun Iko bujur-bujur Laca Co Tomonjanji Mohotara co tonisi Mesias. Cuba nanguh, ome co molantu Iko?”
Rasul Petrus mantun are aroko mongaku nyono Yesus
26:69-75
(Mrk. 14:66-72; Luk. 22:56-62; Yoh. 18:15-18,25-27)
69Ponehan iyoh, Petrus tuot nyan polontaran lopo cioh. Ico bawen polayan ngoroni are. Hien polayan cioh, “Iko mahi horoholuh homboh-homboh ma Yesus, dulun ingkan propinsi Galilea di!”
70Tapi Petrus aroko mongaku nyan tohimo kokon dulun. Hieeh, “Akuh aroko monau ome maksutmu!.”
71Paluh, are tulak hia tungkang kuta polontaran cioh. Ico bawen polayan co bokon notoeh. Hien polayan cioh ma kawan dulun co oko nyan intin, “Dulun cotuh homboh-homboh ma Yesus, dulun ingkan desa Nazaret conon.”
72Tapi Petrus aroko mongaku kole ma bosumpah. Hieeh, “Akuh tuu-tuu aroko nyono dulun conon!”
73Aroko tahi opaiyoh, kawan dulun co oko nyan intin ngoroni Petrus. Hien doh, “Mositi iko mahi iyohco ico ingkan iroh, kawan murid Yesus ingkan Galilea. Onon tonta ingkan logat mu.”
74Holuh Petrus bosumpah, olu Mohotara mohukum akuh amun ngoncunih. “Mositi akuh aroko nyono dulun cioh!” Hiah iyoh ka, manuk nondu. 75Paluh Petrus topingkat antun Yesus maeh, “Sorinai manuk nondu, iko angar nisi aroko mongaku nyono Akuh hontolu kali.” Opah iyoh, Petrus pusit ingkan polontaran lopo cioh, paluh nangih awi moneser lau.
S'ha seleccionat:
Matius 26: TBSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió