ሀዋረታ 20
20
ጳዉሎስ ማቀዶነንነ ግርከን
1ዋሶይ ዶችዳፐ ጉየ፥ ጳዉሎስ አማንያ አሳታ ፄግስድ ኤንታ ዞርዳፐ ጉየ፥ ሳሮድ ማቀዶነ ባናዉ ከይስ። 2ሄ ቢታራ አሸ ቃላ ኦድሸ አሳ ዳሮ ምንዳፐ ጉየ ግርከ ቢታ ብስ። 3እ ያን ሄ አጌና ኡትድ፥ ማርካበራ ሶረ ባናዉ ቆፕድ ደእሽን፥ አይሁደት ባና ዎናዉ ኮየይሳ ኤርድ ማቀዶነራ ጉየ ስማናዉ ኮይስ።
4ጳዉሎሳ ሞይዝዳይሳት ቤርያፐ ጳርሁሳ ናኣ ሶጳፅሮሳ፥ ተሰሎንቀፈ አርስፅሮኮሳነ ስኮንዱሳ፥ ዳርበፈ ጋዮሳ፥ ኢሰፐ ትክቆሳ፥ ፅሮፍሞሳነ ፅሞትዮሳ። 5ሄሳት ስን ብድ ኑና ፅሮኣዳን ናጎሶና። 6ኑኒ ኡይ ባልያ ቦንችዳፐ ጉየ፥ ፍልጵስዩሳፐ ማርካበራ ደንድድ፥ እቻሻን ጋላሳን ኤንታ ፅሮኣዳን ጋክድ ያን ላፑን ጋላስ ጋምእዳ።
ጳዉሎስ ፅሮኣዳን
7ሳምንታፈ ኮይሮ ጋላሳን ኑኒ ኡይ መንናዉ ሺቅድ ደእሽን፥ ጳዉሎስ ዎንተ ባናዉ ቆፕዳ ግሾ፥ ኤንታዉ ቃላ ኦድሸ ግድ ብላሄ ጋካናዉ ኦዳ አዱስስ። 8ኑኒ ሺቅድ ኡትዳ ፖቅያን ዳሮ ፖኦይ ደኤስ። 9ኤዉፅኮሳ ጌተትያ እስ ናአተይ ማስኮተ ቦላ ኡትድ፥ ባና ዶግድ ስክስ። ጳዉሎስ ኦዳ አዱስዳ ዎደ ኤዉፅኮስ ስኮ ኤይድ ሄን ፖቅያፐ ኩንድድ ሀይቅዳይሳ አሳይ ደንስ። 10ሽን ጳዉሎስ ዎድ፥ እያ ቦላ ጉፋንስ። እያ እድምድ፥ “እ ሀይቅቤና፥ ህርጎፍተ” ያግስ። 11ሄሳፈ ጉየ፥ ፑደ ፖቅያ ቦላ ከይድ ኡይ መንድ ምስ። ሳአይ ዎንታና ጋካናዉ አሳስ ኦድዳፐ ጉየ ደንድድ ብስ። 12ሄ ፓፅዳ ናአተ ሶ ኤፍድ ዳሮ ኡፋይትዶሶና።
ጳዉሎስ ኤፈሶናፐ ሞይዘትስ
13ሽን ጳዉሎስ ባና ያፐ ሞካና መላ ኑስ ኦድዳ ግሾ፥ ካሰትድ ማርካብያኮ ብድ፥ አሶሳ ባናዉ ደንድዳ። አይስ ጊኮ፥ እ ቶሆን ባናዉ ቆፕዳ ግሾ ኑና ሄሳ ኪትስ። 14እ ኑራ አሶሳን ጋሄትን ማርካብያን እያ ኤክድ ምፅልነ ብዳ። 15ዎንተ ጋላስ ያፐ ደንድድ ማርካበን ክዮሳ ስንን ደእያ በሳ ጋክዳ፤ ቃስ ዎንተ ጋላስ ሳሞሳ ፕንድ ካልያ ጋላስ ምልፀ ጋክዳ። 16ጳዉሎስ ኢሰን ዳሮ ጋምኦና ኤፈሶና ማታራ አናዉ ቆፕስ። ባዉ ዳንዳኤትኮ ጳንፀቆስፀ ባልያ ጋላስ የሩሳላመ ጋካናዉ ኤሶቴስ።
17ጳዉሎስ ምልፀፐ ኤፈሶና ኪትድ ዎሳ ኬ ጭማታ ፄግስስ። 18ዎሳ ኬ ጭማት እያኮ ይን፥ ኤንታኮ ሀይሳዳ ያግስ፦ “ታኒ ኢሰ ገልዳ ኮይሮ ጋላሳፐ ዶምዳ ህንተራ ደእዳ ዎደ ኡባን ዋና ደእዳኮ ህንተ ኤሬታ። 19አይሁደት ዱላትድ ታ ቦላ መቶ ጋኮካ ታኒ አሽከተንነ ዳሮ አፉን ጎዳስ ኦስ። 20ዳባባንካ ህንተ ኬን ኬን ህንተና ታማርስሸ ህንተና ማድያባፐ እስባካ ፓጭሳብከ። 21ታኒ አይሁደታስነ አይሁደ ግዶናይሳታስ ናጋራፐ ፆሳኮ ስማና መላነ ኑ ጎዳ የሱሳ አማናና መላ ማርካታስ።
22“ያን ታና አይብ ጋካኔኮ ኤርከ፥ ሽን ሀእ ታኒ ጌሻ አያናስ ኪተታዳ የሩሳላመ ባይስ። 23ጌሻ አያናይ ቃሾይነ ዋየይ ታና ናገይሳ ካታማ ኡባን ታዉ ማርካትስ። 24ሽን ታ ዎ ፖላናዉነ ጎዳ የሱስ ክርስቶሳፐ ኤክዳ ኦሱዋ፥ ፆሳ አ ኬሀተ ዎንገላ ማርካተይሳ ፖላናዉ ታ ሸምፕዉ ፓናባዳ ታይባስ።#2 ፅሞ 4:7.
25“ታኒ ሀእካ ፆሳ ካዎተ ማርካታሸ ህንተ ኡባ ግዶን ዩያስ። ህዛፐ ጉየ፥ ህንተፈ ኦንካ ታና በኦናይሳ ኤራይስ። 26ሄሳ ግሾ፥ ህንተፈ እስ ኡራይ ይኮካ ታ ኦይሸቶናይሳ ሀች ህንተዉ ጌሻዳ ኦዳይስ። 27አይስ ጊኮ፥ ፆሳይ ኦናዉ ቆፕዳባ ኡባ ህንተዉ አይብባካ አሾና ኦዳስ።
28“ባ ናኣ ሱን ዎዝዳ ፆሳ ዎሳ ኬ ናግተ። ጌሻ አያናይ ህንተና ሀላቃ ኦድ ዶርዳ ዉድያስነ ህንተ ሁጵያስ ናገትተ። 29ታኒ ብዳፐ ጉየ፥ ዉድያስ ቃቶና ዎዛና ምኖ ሱመት ህንተ ግዶ ገላናይሳ ታኒ ኤራይስ። 30አማነይሳታ ባንታ ጌዶ ካለናዉ ዎርዶ ታማርስያ አሳት ህንተ ግዶፈ ደንዳና። 31ሄሳ ግሾ፥ ታኒ ሄ ላይ ቃማነ ጋላስ አፉን ህንተና ሁጰን ሁጰን ምንዳይሳ ቆፕሸ ናገትተ።
32“ሀእካ ህንተና ምንናዉነ ጌሻ አሳራ ላትሳናዉ ዳንዳእያ ፆሳስነ እያ አ ኬሀተ ቃላስ ህንተና ሀዳራ እማይስ።
33“ታኒ ኦደ ብራ ዎይኮ ዎርቃ ዎይኮ አፍላ አሞታብከ። 34ታኒ ታ ኩሸን ኦዳ ታናነ ታራ ደኤይሳታ ኮሽዳባ ማድዳይሳ ህንተ፥ ህንተ ሁጰን ኤሬታ። 35ህንተ ሀይሳዳ ዳቡርድ ኦሸ ዳቡራንቾታ ማዳናይሳነ ጎዳ የሱሲ፥ ‘ኤከይሳፈ እመይስ አንጀትዳይሳ’ ግዳ ቃላ ህንተ ቆፓናዉ በሰይሳ ታኒ ህንተና ኡባባን በሳስ” ያግስ።
36ጳዉሎስ ሄሳ ኦድ ኦንግድ ኤንታ ኡባራ ጉልባትድ ፆሳ ዎስስ። 37ኤንቲ ኡባይካ ጳዉሎሳ እድምድ ዬክድ ዬርዶሶና። 38እ ዛሪድ፥ “ታና በኤከታ” ያግዳ ቃላይ ኤንታ ዳሮ አዛንስ። ኤንቲ ማርካብያ ጋካናዉ እያ ሞይዝዶሶና።
S'ha seleccionat:
ሀዋረታ 20: GFBEVF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Word for the World International and The Word for the World Ethiopia