ሀዋረታ 19
19
ጳዉሎስ ኤፈሶናን
1አጵሎስ ቆሮንቶሳን ደእሽን፥ ጳዉሎስ ቆሞ ባጋራ አድ ኤፈሶና ብስ። ያን እስ እስ አማንያ አሳታ ደምስ። 2ኤንታኮ፥ “ህንተ አማንዳ ዎደ ጌሻ አያና ኤክደቲ?” ያግድ ኦይችስ።
ኤንቲ፥ “አካይ፥ ኤክቦኮ፤ ሀር አቶሽን፥ ጌሻ አያን ደእያባካ ስእቦኮ” ያግዶሶና።
3ጳዉሎስ ኤንታኮ፥ “ያትን፥ አይብን ፃማቀትደቲ?” ያግስ።
ኤንቲ፥ “ኑኒ ዮሃንሳ ፅንቃተን ፃማቀትዳ” ያግድ ዛርዶሶና።
4ጳዉሎስ፥ “ዮሃንስ ባፐ ጉየራ ያ የሱስ ክርስቶሳን አሳይ አማናና መላ አሳስ ኦድሸ፥ ናጋራፐ ስሞ በሲያ ፅንቃተን ፃማቅስ” ያግስ።#ማቶ 3:11፤ ማር 1:4፥ 7-8፤ ሉቃ 3:4፥ 16፤ ዮሀ 1:26-27.
5ኤንቲ ሄሳ ስእዳ ዎደ ጎዳ የሱስ ክርስቶሳ ታማረ ግዳናዉ ፃማቀትዶሶና። 6ጳዉሎስ ባ ኩሽያ ኤንታ ቦላ ዎዳ ዎደ ጌሻ አያናይ ኤንታ ቦላ ዎን፥ ዱማ ዱማ ዶናን ኦደትዶሶና፤ ቃስ ትንብተ ኦድዶሶና። 7ሄ በሳን ታማነ ናምአ ግድያ አሳት ደኦሶና።
8ጳዉሎስ አይሁደ ዎሳ ኬ ገልድ፥ ፆሳ ካዎተባ ያዮና ፓላምሸነ ሎይ ቆንጭስሸ ኤንታራ ሄ አጌና ጋካናዉ ጋምእስ። 9ሽን ኤንታፈ እሶት እሶት በ ግድድ ዳሮ አሳ ስንን ጎዳ ኦግያ ጫይድ አማኖና እፅዶሶና። ጳዉሎስ አማነይሳታ ኤንታፈ ሻክ ኤክድ ፅራኖሳ ጌተትያ ትምርተ ኬን ኡባ ጋላስ ኤንታ ታማርስስ። 10ጳዉሎስ ናምኡ ላይ ጋካናዉ ቃላ ኦድስ። ሄሳ ግሾ፥ ኢሰን ደእያ አሳ ኡባይ፥ አይሁደትነ አይሁደ ግዶናይሳት ጎዳ ቃላ ስእዶሶና።
አስቀዋ ናይታ
11ፆሳይ ጳዉሎሳ ኩሸን ዎልቃማ ማላታታ ኦስ። 12ሄሳ ግሾ፥ አሳይ እያ አሳተ ቦችዳ ማራበ ዎይኮ ማኦ ሀርጋንቾታስ ኤፎሶና። ኤንትካ ፓፆሶና፤ ቱና አያናት ኤንታፈ ከዮሶና።
13ቱና አያናታ ከስሸ ዩይያ አይሁደታፐ እሶት እሶት፥ “ጳዉሎስ ሳባክያ የሱሳ ሱንን ከይተ ግድ ህንተና ኪቶስ” ያግድ፥ ቱና አያናት ኦይክዳ አሳታ ቦላ ጎዳ የሱሳ ሱን ፄግዶሶና። 14ካህነ ሀላቃ አስቀዋ ጌተትያ እስ አይሁደ አድያስ ሄሳ ኦያ ላፑን ናይት ደኦሶና።
15ሽን ቱና አያናይ ኤንታኮ፥ “ታኒ የሱሳካ ጳዉሎሳካ ኤራይስ፥ ሽን ህንተ ኦናንቴ?” ያግስ።
16ቱና አያን ኦይክዳ አደይ ኤንታ ቦላ ጉፕ ዎድ፥ ኤንታ ማዱንፅስድ፥ ሄ ኬፈ ካሎ ባቃታና ጋካናዉ ዎልቃምስ። 17ኤፈሶናን ደእያ አይሁደትነ አይሁደ ግዶናይሳት ኡባይ ሄሳ ስእድ ዳሮ ያይዶሶና። ጎዳ የሱሳ ሱንይ ዳሮ ቦንቸትስ። 18አማነይሳታፐ ዳሮት ባንታ ኦዳ ኢታ ኦሱዋ ፓፅሸነ ቆንጨን ኦድሸ ዮሶና። 19ማሮታፐ ዳሮት ባንታ ማፃፋታ ሺሽድ አሳ ኡባ ስንን ፁግዶሶና። ሄ ማፃፋታ ጋትያ ታይቦይ እሻታሙ ሙኩሉ ብራ ሳንትመ#19:19 ብራ ሳንትመ፦ ማቶሳ 26:15 ፄልተ። ግድስ። 20ሄሳዳ ሀንድ ፆሳ ቃላይ ድጭሸነ ዳልግሸ ብስ።
ኤፈሶናን ኦሽ ከይስ
21ሄስ ሀንዳፐ ጉየ ጳዉሎስ፥ “ታኒ የሩሳላመ ባ ስማዳ ሮመ ባናዉ በሴስ” ያግድ ማቀዶነራነ አካያራ አድ የሩሳላመ ባናዉ ቆፋ ቃችስ። 22ቃስ ባና ማደይሳታፐ ናምአታ ፅሞትዮሳነ ኤራስፆሳ ማቀዶነ ኪትድ፥ ባዉ ኢሰን ጉ ዎደ ጋምእስ።
23ሄ ዎደ ጎዳ ኦግያ ግሾ ኤፈሶናን ዎልቃማ ካች ከይስ። 24እስ ብራ ኦያ ድመፅሮሳ ጌተትያ ኡራይ አርፀምስ ኤቃ ኬ ምስልያ ብራፐ ኦድ ዳሮ ዎ ደሜስ። 25ሄሳ ግሾ፥ ሄሳ መላ ኦሶ ኦይሳታ እስፈ ሺሽድ፥ “አሳዉ፥ ኑ ዱረተይ ሀ ኦሱዋን ግደይሳ ህንተ ኤሬታ። 26ሀይስ ጳዉሎስ፥ ‘አሳ ኩሸን ኦሰትዳይሳት ፆሳታ ግዶኮና’ ያግድ፥ ኤፈሶናንነ ጉ ቢታታፐ አትሽን፥ ኩመ ኢሰ ኡባን ደእያ ዳሮ አሳ ኦድ አማንዳይሳነ ባለዳይሳ ህንተ በእደታነ ስእደታ። 27መቶ ግድዳይ፥ ኑ ኦሶይ ካተይሳ ፃላላ ግዶናሽን፥ ኢሰነ ቢታ ኡባን ደእያ አስ ጎይንያ ግታ ፆሰ አርፀምስ ኬይ ቦንቸቶና አተይሳነ እ ግታተይ ኩንዳናይሳ” ያግስ።
28አሳይ ሄሳ ስእዳ ዎደ ሸነን ፁገትድ፥ “ኤፈሶና አርፀምሳ ግታ” ያግድ ዋስዶሶና። 29ሄ ዋሶይ ካታማ ኡባ ጋክስ። ጳዉሎሳራ ሄመትያ ማቀዶነ አሳታ፥ ጋዮሳነ አርስፅሮኮሳ ኦይክድ ጎችሸ ካሳ በሳ ዎፅዶሶና። 30ጳዉሎስ አሳይ ሺቅዳ በሳ ገላናዉ ኮይስ፥ ሽን አማነይሳት እያ ድግዶሶና። 31ኢሰ ቢታ ሀላቃታፐ ጳዉሎሳ ላገ ግድዳ እሶት እሶት ጳዉሎሳኮ ኪትድ፥ “ካሳ በሳ ቆንጨን ከያዳ በንቶፋ” ግድ እያ ዎስዶሶና።
32ሺቅዳ አሳስ ሀናናባይ ይስ፤ ዳርያ ባጋ አሳይ ሀር አቶሽን አይስ ሺቅዳኮ ኤሮና ግሾ፥ እሶይ እስባስ ዋስያ ዎደ ሀንኮይ ሀራባስ ዋሴስ። 33አይሁደት እስክንድረ ጌተትያ አድያ አድ በስን፥ እስ እስ አሳይ እ ጋናባ ኦድድ እያ ስን አዶሶና። እ አሳይ ስእ ጋና መላ ባ ኩሸን ማል በስድ፥ አሳስ ሞተታናዉ ኤቅስ። 34ሽን እስክንድረይ አይሁደ አስ ግድዳይሳ አሳይ ኤርዳ ዎደ ናምኡ ሳተ ግዳናይሳ መላ ኡባይ እስ ቃላን፥ “ኤፈሶና አርፀምሳ ግታ” ያግድ ዋስዶሶና።
35ዉርሰን፥ ካታማ ፃፈይ አሳ ስእ ኦድ፥ “ኤፈሶና አሳዉ፥ ኤፈሶና ካታማይ ግታ አርፀምስ ኤቃ ኬነ ሳሎፐ ዎዳ እ ሹቻ ምስልያ ናገይ ኤፈሶና አሳ ግደይሳ ኤሮናይ ኦኔ? 36ሀይሳ ካሽ ግያ አስ ባይና ግሾ፥ ህንተ ስእ ጋናዉነ ድርግድ አይኮ ኦና አጋናዉ በሴስ። 37ህንተ፥ ሀ አሳታ ኤቃ ኬ ሚሸ ካይሶቶናሽን ዎይኮ ኑ ፆሳታ ጫይቦናሽን ጮ ሀ አሳታ ኦይክድ ኤህደታ። 38ሄሳ ግሾ፥ ድመፅሮስነ እያራ ደእያ ኦሳንቾት አሳ ሞታናዉ ኮይኮ፥ ፕርዳ ኬይ ዶያ ደኤስ፤ ዳይናትካ ደኦሶና፤ ኤንቲ ሞታናዉ ዳንዳኦሶና። 39ሽን ህንተ ሀራ ኦዳ ኮይኮ፥ ሻንጎ ሺቆን ኦዳይ በኤቶ። 40ሄሳ ግዶና እፅኮ ሀች ሀንዳባስ ሮመ ካዎተይ ኑና ኦይቻና። ሀ ቡቀስ ጋሶይ ባይና ግሾ፥ ኑኒ ጋሶ ኦዳናዉ ዳንዳኦኮ” 41ያግድ ሺቁዋ ላልስ።
S'ha seleccionat:
ሀዋረታ 19: GFBEVF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Word for the World International and The Word for the World Ethiopia