मर्कुस 16
16
येशु सीक्योकलाःम्ले फीर्च्या सेन्क्योक
(मत्ती २८:१-८; लुका २४:१-१२; युहन्ना २०:१-१०)
1ङाःल सोगेन चाङ्मा ङीःमा सीःङ्मीःजीक ओःखो कुःङ्मु मरीयम मग्दलीनी, याकुबकीइ आमा मरीयम ओःले सलोमीइ येशुइ फुम्बुला टुःल्जेला सीःम्बु टीःमा तेर्केन माःर्कु ङ्योःसी। 2साताइ तोःङ्गीइ ङीःमाला ङामु ङीःमा थेङ्लुङ्म्याःपा खुङ्क्या तुःर्साला काःल्सी। 3लाःमला डोदेरा एःकासुना चीगकीइ राःङ्साला टीःसी, “तुःर्साइ खाला उप्क्योक तोःदी सुइ तेङ्तेर्टो?” 4इःनाङ तुःर्साला लेप्ती तागासुना नी ओःछेइ छ्योम्बो तोः तोःङ्लारा तुःर्साइ खालाःम्ले तेङ्सीःङ्क्योक थोङ्सी। 5खुङक्या तुःर्सा नाःङ्ला स्युःदी तासुना ओःला मेःराङ चीग कार्मु केःला केःङ्क्योक स्यारा मीः तुःर्साइ च्याःबुछ्योले तेःतीरहीतीदी एःके। दीखो थोङ्दी खुङक्या ङाङ्सी। 6इःनाङ ओः स्यारा मीःइ खुङक्याला लाःसी, “माःजी, ख्योक्या क्रुसला प्याङ्क्योक नासरतकीइ येशुला छोल्देरा एः। खुङ नी दीला म्याः, खुङ नी सोम्बो काःल्सीःङ्सी! तादो, खुङला ज्याक्योक ठाउँ दीखोरा इःङे। 7इःनाङ ताः काःल्दी खुङगीइ योबाक्याला ओःले पत्रुसला लोःप, ‘येशु ख्याक्या भन्दा तोःङ्ला गालीलला डोदेरा एः। खुङगीइ ख्याक्याला लाःक्योक च्योःङ्रारा ख्याक्याइ खुङला ओःला थोङेन एः।’” 8खुङक्या जीबा पेःदेरा ओःले दार्तेरा तुःर्सालाःम्ले फीला थेङ्सी ओःले छ्योङ्सी। खुङक्याइ सुलाङ चीङ माःलाःप चीलेलाःना खुङक्या माःङ्बुरा जीदी एःके।
येशु योबाक्यासाःला थोङ्क्योक
(मत्ती २८:९-२०; लुका २४:१३-५३; युहन्ना २०:११-२३; प्रेरीत १:४-११)
9[येशु साङीःमाइ ङामुरा सीक्योकलाःम्ले सोम्बो लोःमीःजीक थाम्जेर भन्दा तोःङ्ला मरीयम मग्दलीनीसाःला थोङ्सी। मरीयमलाःम्लेदी तीःनथाल हेन्डीक्या तेङ्दी एःके। 10मरीयम योबाक्यासाःला काःल्सी ओःले खुङगीइ येशुला थोङ्क्योक ताम खुङक्याला लाःतेर्सी। खुङक्या तुःङाल पेःदेरा ओःले ङुःदेरा एःके। 11इःनाङ मरीयमगीइ येशु सोम्बो लोःक्योक ताम ओःले खुङगीइ येशुला थोङ्क्योक ताम खुङक्याला लाःसुना खुङक्याइ सेमल्हुक मालु।
12ओः तीङ्ला युःलछ्योले डोदेरा पेःक्योक मेःराङ ङी योबाक्यासाःला येशु राःङ्सारा छेन्दा पेःदी थोङ्सी। 13खुङक्याइयाङ ओःङ्दी दी ताम राःङ्सा योबाक्या लाःसी। इःनाङ योबाक्याइ खुङक्याइ लाःक्योक तामला सेमल्हुक मालु।
14ओः तीङ्ला मेःन्दा च्युजीक योबाक्या साःप्च्या साःगेन तीःजीला येशु खुङक्याइ कील्ला थोङ्सी। येशुइ खुङक्याला केतेङ्सी चीलेलाःना खुङक्याइ सेम ताःम्बु जोदी खुङ सीक्योकलाःम्ले सोम्बो काःल्मीःजीक खुङला थोङेनक्याइ तामला सेमल्हुक लुदी म्याःके।
15ओःले येशुइ खुङक्याला लाःसी, “जाम्बुलीङगीइ थाम्जेरछ्योले सुङ ओःले थाम्जेर मीःक्याला याःबु लेःङ्गो प्रचार पेःदो। 16सेमल्हुक लुदी बप्तीस्मा लेःङेनक्या थार्केन एः, इःनाङ सेमल्हुक मीलुगेन्दीदी कोन्ज्योइ तोःङ्ला दोषी ओःङेन एः। 17ओःले सेमल्हुक लुगेनक्याला याःमाछाककीइ लेःगाक्या पेःगेन ल्हे तेर्केन एः। खुङक्याइ ङाःइ मीःनला हेन्डीक्या तेङेन एः ओःले सेम्बा तामक्या लाःकेन एः, 18प्रुःलक्याला जुम्ङेन एः ओःले वीषरा थुङ्नाङ खुङक्याला चीङ मेःन्डोगेन एः। खुङक्याइ नेःपाक्याखाला लाःक्पा ज्यासुना खुङक्या टाःगेन एः।”
19प्रभु येशुइ योबाक्या ङीमु एःन्डुले ताम लाःसीःङ्मीःजीक खुङला याःरला नाःम्खालीङला खेर्सी ओःले खुङ कोन्ज्योइ च्याःबु लाःक्पाछ्योले तेःसी। 20ओः योबाक्या काःल्दी थाम्जेर ठाउँक्याला लेःङ्गो प्रचार पेःसी। प्रभुइ खुङक्यालाःम्ले लेःगा पेःसी ओःले खुङक्याइ टाःम्क्योक लेःङ्गोक्या तेःन्दामगीइदी इःङे लाःती खुङक्याइ पेःक्योक याःमाछाककीइ लेःगाक्यालाःम्ले तेङ्तेर्सी।]#१६:२० काःजे ग्रीक तामगीइ तोःङ्गीइ कोन्ज्योइ छ्येक्याला ९ पद मीःजीक २० पदथुप म्याः।
S'ha seleccionat:
मर्कुस 16: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.