लुका 6
6
यहुदीक्याइ ङाःल सोगेन ङीःमाइ बारेला टीःक्योक
(मत्ती १२:१-८; मर्कुस २:२३-२८)
1यहुदीक्याइ ङाःल सोगेन ङीःमाला येशु न्याः सीःङगीइ लाःम पेःदेरा डोदेरा एःके। खुङगीइ योबाक्याइ न्याःइ नीमाल तुःदी लाःक्पाइ मुर्तेरा साःगाला स्युःसी।#६:१ मीःक्या सीःङलाःम्ले डोदेरा एःकासुना तोःपा तोसी लाःना सीःङ्ला कोःङ्क्योक ब्रुम्दो ओःले डुक्या थुदी साःजे ज्योर्कुके। ओःन्डुले साःसी लाःना ओःखोला कुदी साःक्योक मेःलाःप्के। व्यवस्था २३:२४-२५ 2दीखो थोङ्दी फारीसीक्याइ खुङक्याला लाःसी, “यहुदीक्याइ ङाःल सोगेन ङीःमाला छ्येइ ठीमगीइ पेःमीःङे लाःक्योक लेःगाङ ख्याक्या चीले पेःदेरा एःपा?” 3येशुइ खुङक्याला लेःन लोदी लाःसी, “दाऊद ओःले खुङगीइ रोःक्या तोःपा तोक्योक तीःजीला खुङगीइ ची पेःदी एःके? ची ख्याक्याइ टोःदी म्याःपा? 4खुङगीइ नी कोन्ज्योइ चाङ्मा पाल नाःङ्ला स्युःदी कोन्ज्योला फुल्क्योक खुरा तेङ्दी ख्योङ्सी ओःले खुङगीइ रोःक्या ङीमु डीक्ती साःसी। छ्येइ ठीमगीइ च्योःङ्रा एःना ओःखो खुरा पुजाहारीइ चीग्रा साःजे ओःङ्गुके।”#१ शमुएल २१:१-६; लेबी २४:९ 5ओःले येशुइ ताम सीःङ्देरा लाःसी, “ङाः मीःइ पुः नी यहुदीक्याइ ङाःल सोगेन ङीःमाइदीङ प्रभु इःङे।”
लाःक्पा काम्क्योक मीः टाःक्योक
(मत्ती १२:९-१४; मर्कुस ३:१-६)
6फीर्च्या यहुदीक्याइ ङाःल सोगेन राःङ्सा ङीःमा चीग येशुइ जोम्साखीमला काःल्दी लोप्तेरा एःके। ओःला च्याःबु लाःक्पा काम्क्योक मीःङ एःके। 7छ्येइ ठीमगीइ लोबेनक्या ओःले फारीसीक्याइ येशुला माःताक्पा पेःगेन ताम छोल्देरा एःके। ओः सोङ्गारा ओःखो मीःइ लाःक्पा येशुइ यहुदीक्याइ ङाःल सोगेन ङीःमाला टाःच्युदुबा ना लाःती खुङक्याइ तादेरा एःके। 8खुङक्याइ सेमगीइ ताम सेगारा येशुइ लाःक्पा काम्क्योक मीःला लाःसी, “ख्या लाःङ्दी तेला स्यो ले!” ओः तेःकासुरा ओः मीः लाःङ्दी तोःङछ्योले काःल्सी 9ओःले येशुइ खुङक्याला लाःसी, “ताः लोःप, उःइ ठीमगीइ यहुदीक्याइ ङाःल सोगेन ङीःमाला ची पेःजे डीक्पु एः लाःकुबा? याःथाक्चे पेःदो ना माःइबा पेःदो? सेन्च्युदो ना सेतो?” 10ओःले येशुइ थाम्जेरला छ्योसीःलेरा तादी ओः मीःला लाःसी, “ख्याइ लाःक्पा स्याःङ्दो!” खुङगीइ लाःक्पा स्याःङ्सी ओःले खुङगीइ लाःक्पा टाःसी।
11दीखो थोङ्दी फारीसीक्या ओःले छ्येइ ठीमगीइ लोबेनक्या सीःताङ्गीइ मार्थुम खील्सी ओःले येशुला ची पेःकोःन्दी इःङे लाःती खुङक्या ताम लाःकाला स्युःसी।
येशुइ मेःन्दा चीङ्ङी प्रेरीतक्याला दाम्क्योक
(मत्ती १०:१-४; मर्कुस ३:१३-१९)
12ङीःमा चीग येशु कोन्ज्यो ङीमु प्रार्थना पेःजेला काःङ्ला काःल्सी, ओःले कुःङ्मुकाःङ कोन्ज्यो ङीमु प्रार्थना पेःदी तेःसी। 13ङामु काःल्मीःजीक खुङगीइ योबाक्याला केक्याःप्सी ओःले खुङक्या नाःङ्ले मेःन्दा चीङ्ङीला दाम्सी ओःले प्रेरीतक्या लाःती राःङ्सा मीःन तेर्सी। 14दाम्क्योक मेःन्दा चीङ्ङी दी मीःक्यारा इःङे: सीमोन (खुङला येशुइ पत्रुस मीःन ज्यातेर्सी), आन्द्रीयास (सीमोनगीइ नोः), याकुब, युहन्ना, फीलीप, बारथोलोमाइ, 15मत्ती, थोमा, याकुब (अल्फयसकीइ पुः), सीमोन (खुङलादी देशभक्त लाःकुके), 16यहुदा (याकुबकीइ पुः) ओःले यहुदा इस्करीयोत (खुङगीइ तीङ्ला येशुला तुःक तेर्सी)।
येशुइ माःङ्बुरा मीःक्याला टाःच्युक्योक
(मत्ती ४:२३-२५)
17येशु प्रेरीतक्या ङीमुरा काःङलाःम्ले पाःप्कासुना खुङक्या थाङ चीगला लेप्सी। ओःला माःङ्बुरा योबाक्या ओःले राःङ्सा मीःक्याइ छ्योम्बो पोर्चोम काःल्दी एःके। ओः मीःक्यादी यहुदीया क्षेत्रइदी थाम्जेरछ्योले, यरुशलेमलाःम्ले ओःले चाङ्बुइ सुःरक्याला एःक्योक टुरोस ओःले सीदोन क्याःसालाःम्ले ओःङ्दी ओःला जोम्दी एःके। 18खुङक्या येशुइ ताम कोःजेला ओःले नाःजालाःम्ले टाःजेला ओःङ्दी एःके। हेन्डीक्या क्याःप्ती तुःक्पु ज्योर्क्योक मीःक्याङ टाःसी। 19थाम्जेर मीःक्याइ खुङला देजे छोल्सी चीलेलाःना खुङलाःम्ले थेङ्क्योक ल्हेइ थाम्जेर मीःक्या टाःसी।
कीपु ओःले तुःक्पु
(मत्ती ५:१-१२)
20ओः तीङ्ला येशुइ राःङगीइ योबाक्याला तदेरा लाःसी,
“ए प्राङ्नाक्या, ख्याक्याइ काःजे मोलाम ज्योर्ती एः
चीलेलाःना कोन्ज्योइ क्याःल्खाप ख्याक्याइदीरा इःङे!
21ए तोःपा तोक्योकक्या, ख्याक्याइ काःजे मोलाम ज्योर्ती एः
चीलेलाःना ख्याक्या डाङेन एः!
ए ङुःगेनक्या, ख्याक्याइ काःजे मोलाम ज्योर्ती एः
चीलेलाःना ख्याक्या केःदाङ ओःङेन एः!
22ङाः मीःइ पुःखाला सेमल्हुक लुक्योक सोङ्गारा मीःक्याइ ख्याक्याला हेला पेःसी लाःना, युःल्बालाःम्ले तेङ्सी लाःना, ङ्याप्च्युक पेःसी लाःना ओःले ख्याक्याइ बारेला माःइबा लाःसी लाःना ख्याक्याइ मोलाम ज्योर्केन एः। 23ओः तेःकासु ख्याक्या केःदाङ पेःदो ओःले खाम्साङ्बुले छ्याम्दो चीलेलाःना ख्याक्याइ लागी नाःम्खालीङला छ्योम्बो इनाम ज्यादी एः। ताःङ्बुइ कोन्ज्योइ लेःङ्गो तेर्केन्दीक्यालाङ ख्याक्याला तुःक्पु तेर्केनक्याइ फाफामुइ ओःन्डुरा पेःदी तुःक्पु तेर्ती एःके।
24इःनाङ ताःसे छ्युक्पु एःकेनक्या, ख्याक्याला काःन्डुबा तुःक्पु ओःङेन एः,
चीलेलाःना ख्याक्याइ कीपु ओःले केःदाङ ज्योःर्सीःङ्दी एः!
25ताःसे डाङेनक्या, ख्याक्याला काःन्डुबा तुःक्पु ओःङेन एः,
चीलेलाःना ख्याक्या तोःपा तोबारा तेःकेन्दी एः!
ताःसे केःमु स्योर्केनक्या, ख्याक्याला काःन्डुबा तुःक्पु ओःङेन एः,
चीलेलाःना ख्याक्याइ तुःक्पु ज्योर्केन एः ओःले ङुःदी तुःङाल पेःगेन एः!
26ताःसे मीःलाःम्ले प्रशंसा ज्योर्केनक्या, ख्याक्याला काःन्डुबा तुःक्पु ओःङेन एः,
चीलेलाःना एःन्डुबा प्रशंसा नी दी मीःक्याइ फाफामुक्याइ स्योप क्युःर्केन कोन्ज्योइ लेःङ्गो तेर्केन्दीक्यालाङ तेर्ती एःके।
टाःलाङलाङ च्याःम्बु पेःको
(मत्ती ५:३८-४८; ७:१२)
27इःनाङ ङाःइ ताम कोःगेन्दी ख्याक्याला ङाः लाःके, टाःलाङला च्याःम्बु पेःदो ओःले राःङला हेला पेःगेन्दीला याःबु पेःदो। 28ख्याक्याला खाम्सी क्याःप्केनक्याला मोलाम तेर। ख्याक्याला सुइयाङ माःइबा पेःसी लाःना खुङगीइ याःबुइ लागी प्रार्थना पेःदो। 29सुइयाङ ख्याक्याला डाम्बा चीगला रोप्सी लाःना राःङ्सा डाम्बाङ सेःतेर। ख्याइ फोँस्योक खेर्चे छोल्गेन्दीला लबीताङ खेर्चे तेर। 30ख्याक्याला लाङेनक्याला तेर, ओःले खेर्केनक्या ङीमु फीर्च्या मालाङ। 31राःङ्साइ ख्याक्याला ची पेःतेर्क्योक सेम थेकुबा, ओःन्डुरा ख्याक्याइयाङ राःङ्साक्याला पेःदो।
32ख्याक्याला च्याःम्बु पेःगेनक्याला चीग्रा ख्याक्याइ च्याःम्बु पेःउए लाःना ख्याक्याइ ची छ्योम्बो लेःगा पेःबा रा? ओःन्डुबा नी लाःयो पेःगेनक्याइयाङ राःङला च्याःम्बु पेःगेन्दीक्याला पेःउए। 33ओःले राःङला याःबु पेःगेन्दीक्याला चीग्रा याःबु पेःउए लाःना ख्याक्याइ ची छ्योम्बो लेःगा पेःबा ले? लाःयो पेःगेनक्याइयाङ नी ओःन्डुरा पेःउए!
34ओःले च्याल्खुगेन्दीला चीग्रा पेःलेन तेर्कुएः लाःना ख्याक्याइ ची छ्योम्बो लेःगा पेःबा ले? लाःयो पेःगेनक्याइयाङ नी च्याल्खुगेन लाःयो पेःगेन्दीक्याला पेःलेन तेर्कुए।
35ओःन्डु मीःङे, टाःलाङक्याला च्याःम्बु पेःदो, खुङक्याइदी याःथाक पेःदो ओःले पेःलेन लाङेनक्याला फीर्च्या लेःङेन सेम माःबेबारा पेःलेन तेर। ओःन्डु पेःसी लाःना ख्याक्याइ छ्योम्बो इनाम ज्योर्केन एः ओःले ख्याक्या नाःम्खालीङगीइ कोन्ज्योइ पुःपोःमोक्या ओःङेन एः। चीलेलाःना कोन्ज्योइ नी टीःलेन मेःथोङेन्दी ओःले माःताक्पाक्यालाङ च्याःम्बु पेःउए। 36आबा कोन्ज्योइ काःन्डुले नीङ च्योःदी एःपा, ख्योक्याइयाङ ओःन्डुलेरा नीङ च्योःगेन्दी पेःदो।
राङसाला माःताक्पा माःच्याङ
(मत्ती ७:१-५)
37राङसाला माःताक्पा माःच्याङ ओःले कोन्ज्योइयाङ ख्याक्याला माःताक्पा मेःच्याङ एः। राःङ्साइदी गल्ती छोल्गेन्दी माःबे ओःले कोन्ज्योइयाङ ख्याक्याइदी गल्ती मेःछोल एः। राःङ्साला क्षमा तेर ओःले कोन्ज्योइयाङ ख्याक्याला क्षमा तेर्केन एः। 38राःङ्साला तेर ओःले कोन्ज्योइयाङ ख्याक्याला तेर्केन एः। खुङगीइ नी तीःङ्दी तीःङ्दी च्युःरु जोदी पुःङपुङथुप तेर्केन एः। ख्याक्याइ राःङ्साक्याला काःजे ताःप्ती तेर्पा, ओःजेरा ताःप्ती ख्याक्याइयाङ ज्योर्केन एः।”
39येशुइ खुङक्याला पेदाम लाःतेरा एःन्डुले लाःसी, “ची मी मेःथोङेन मीःइ राःङ्सा मी मेःथोङेन मीःला लाःम तेङ्दी खेर्खुउबा? चीङ पेःदी खेर्सी लाःना ङीक्कार होपला मीःस्युःबा ले? 40काःन्दीङ योबा राःङगीइ लोबेनलेङ छ्योम्बो मेःयोःङ एः, इःनाङ लोप्सीःङ्दी लाःना खुङ लोबेन च्योःङ्रारा ओःङ्गुए।
41राःङ्साइ गोखाला सीक थोङेन्दीइ राःङगीइ जुबुइ माःइ चीले मेःथोङ्बा? 42राःङगीइ जुबुइ माःइ मेःथोङेन्दीइ राःङ्साला काःन्डुले लाःचे खुउबा, ‘खोइ खोइ, ङाः ख्याइ गोइ सीक तेङ्तेर्के।’ ए खोक्नाकक्या! तोःङ्ला राःङगीइ गोइ माःइ तेङ्दी त्याःदो ओःले का राःङ्साइ गोइ सीक तेःमुलेरा तेङ्खुउए ओःले सेखुउए।
तोःङ्बो ओःले ओःखोइ ब्रुम्दो
(मत्ती ७:१६-२०; १२:३३-३५)
43याःबु तोःङ्बोला माःइबा ब्रुम्दो मेःकोःङए, ओःन्डुलेरा काःन्दीङ माःइबा तोःङ्बोला याःबु ब्रुम्दो मेःकोःङए। 44काःखोङ तोःङ्बो ओःखोइ ब्रुम्दोलाःम्ले ङोःसेउए। चीलेलाःना छेर्माङगीइ पुःङलाःम्ले सुइयाङ नेभारा मीःतुए नाः ओः पुःङ्मालाःम्ले अङ्गुर तुःउबा। 45याःबु मीःइ राःङगीइ सेमला एःक्योक तामलाःम्ले याःबु तामरा तेङ्गुए। माःइबा मीःइ राःङगीइ सेमला एःक्योक माःइबा तामरा तेङ्गुए चीलेलाःना सेमला ची एःपा, ओःखोरा ताम मीःइ लाःकुए।
ङी खाले खीम जोगेन्दी मीः
(मत्ती ७:२४-२७)
46ङाःइ लाःक्योक ताम मीःङीनए लाःना ख्याक्या चीले ङाःला ‘प्रभु, प्रभु’ लाःकुबा? 47ङाःसाःला ओःङ्दी ङाःइ ताम कोःगेन्दी ओःले ङाःइ लाःक्योक ङीःङेन्दी मीःदी काःन्डुबा इःङे, ङाः ख्याक्याला लाःके। 48ओःखो मीः खीम जोगेन्दी च्योःङ्रा इःङे, ओःखोइ होपथुप कोदी राःङगीइ खीमगीइ चार च्यार्का तोःखाला जोसी। ओःले छ्योम्बो नाम क्याःप्ती बाढी ओःङ्दी ओः खीमला क्याःप्सी, ओःले ओःखो खीमला चीङ माःकाल चीलेलाःना ओःखो खीम राःम्बुले जोदी एःके। 49इःनाङ ङाःइ ताम कोःदी ओः च्योःङ्रा मेःबेगेन्दीदी चार मालुबा खीम जोगेन्दी मीः च्योःङ्रारा इःङे। बाढी ओःङ्सी ओःले ओःखोइ खीम रोःम्दी सीःङ्दाक काःल्सी।”
S'ha seleccionat:
लुका 6: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.