लुका 5
5
येशुइ तोःङ्गीइ योबाक्याला केक्याःप्क्योक
(मत्ती ४:१८-२२; मर्कुस १:१६-२०)
1ङीःमा चीग येशु गनेसरेत लाःकेन छोइ सुःरला लाःङ्दी तेःती एःके। कोन्ज्योइ ताम कोःजेला माःङ्बुरा मीःक्याइ पोर्चोमगीइ खुङला फुल्सी। 2येशुइ छोइ सुःरला ङीथाल टुः थोङ्सी। ङ्याः सेकेनक्याइ टुः पोःर्ती जाल ठुगाला स्युःदी एःके। 3टुः चीगदी सीमोनगीइदी एःके। येशुइ ओःखोरा टुःला जादी सीमोनला लाःसी, “टुः सुःरलाःम्ले तीबी चीग फारला खेर।” ओःले खुङ टुःला तेःतीमाराङ मीःक्याला लोप्काला स्युःसी।
4लोप्सीःङ्मीःजीक येशुइ सीमोनला लाःसी, “टुः ओःपछ्योले खेर ओःले जाल क्योःप!” 5दीखो कोःदी सीमोनगीइ येशुला लाःसी, “लोबेन, ङीःइ नी कुःङ्मुकाःङ जाल क्याःप्सी ओःलेङ ङ्याः चीगकाङ माःज्योर। इःनाङ ख्याइ लाःक्योक सोङ्गारा ङाः जाल क्याःप्तेर्के।” 6जाल क्याःप्सुना नी एःजे माःङ्बु ङ्याः ज्योर्सी ओः सोङ्गारा, खुङक्याइ जालरा राःल्गाला स्युःसी 7ओःले खुङक्याइ राःङ्सा टुःला एःक्योक रोःक्याला ङ्याः तुःजे रोः पेःजेला लाःक्पाइ केक्याःप्सी। ओःले खुङक्या ओःङ्दी ङयाः तुःगाला स्युःसी। तुःगासुना तुःगासुनारा ङीक्कार टुःला ङ्याः एःजे काःल्सी ओः सोङ्गारा, टुःरा बीङ्जे छोल्सी।
8दीखो थोङ्दी सीमोन पत्रुसकीइ येशुइ काङ्बा तोःङ्ला पीमु चुदी लाःसी, “ए प्रभु, ङाः लाःयो पेःगेन मीः इःङे, ङाःइ सुःरला माःयुङ!” 9चीलेलाःना एःजे माःङ्बु ङ्याः ज्योर्कारा सीमोन ओःले खुङगीइ रोःक्या याःमाछाक काःल्सी 10ओःले सीमोन ङीमु डीक्ती लेःगा पेःगेन जब्दीयाइ पुःक्या याकुब रा युहन्नालाङ माःङ्बुरा याःमाछाक नेती एःके। येशुइ सीमोनला लाःसी, “माःजी, ताःमीःजीक ख्या ङ्याःला मीःङे, मीःक्याला जुम्दी ङाःसाःला ख्योङेन्दी ओःङेन एः।” 11दीखो कोःदी खुङक्याइ टुः टीःती पाङ्ला ख्योङ्सी ओःले खुङक्याइ थाम्जेर लेःगा पोःर्ती येशुला ब्य्राङ्सी।
येशुइ जे नाःजा क्याःप्क्योकला टाःच्युक्योक
(मत्ती ८:१-४; मर्कुस १:४०-४५)
12थाङ्मा चीग येशु युःल चीगला एःके। ओः युःलला जुबुकाःङ जे थेङ्क्योक मेःराङ चीग मीः एःके। येशुला थोङ्दी ओःखो मीःइ येशुइ तोःङ्ला खाप्लु क्याःप्ती वासी पेःदी लाःसी, “प्रभु, ख्याइ सेम थेसी लाःना ङाःला टाःच्युखुउए ओःले चाङ्मा जोखुउए।”#५:१२ यहुदीक्याइ ठीम च्योःङ्राले एःना, नेःपा काःल्क्योक मीःलादी असुद्ध लाःकुके ओःले राःङ्सा मीःक्याइ सुःरला ओःङ्जे मेःयोःङ्के ओःले खुङक्याला देजेङ मेःयोःङ्के। 13येशुइ खुङखाला लाःक्पा ज्यादी लाःसी, “ङाः सेम पेःगे, ख्यो टाःज्युक।” ओःले ओः तेःकासुरा ओः मीःइ जे नाःजा टाःसी। 14ओःले येशुइ ओःखो मीःला लाःसी, “दी ताम सुलाङ माःलाःप, इःनाङ पुजाहारीसाःला काःल्दी राःङला तेङ्दो ओःले मोशाइ लाःक्योक च्योःङ्रारा बली तेर्ती ख्या चाङ्मा काःल्क्योक दास्यी थाम्जेरला तेर।”#५:१४ यहुदीक्याइ ओः तीःनामलादी जे नाःजा थेङ्क्योक मीः राःङ्सा मीःक्या ङीमु तेःचे मेःयोःङ्के। खुङलादी खुङक्याइ युःललाःम्ले पाङ्ला तेःच्युउके। ओःन्डुबा नाःजा क्याःप्क्योक मीः टाःबा की माःटाःबा लाःती पुजाहारीइ चीग्रा ताजे ज्योर्कुके। ओःले ओः मीः ओःङ्दी राःङ्सा मीःक्याइ ङीमु तेःचे तोःङ्ला मोशाइ ठीमगीइ लाःक्योक च्योःङ्रा खुङगीइ कोन्ज्योइ मन्दीरला काःल्दी बली तेर्कोःउके।
15ओः ङीःमामीःजीक येशुइ लेःङ्गो ताःरुङ माःङ्बु टाःम्सी ओःले माःङ्बुरा मीःक्या खुङगीइ ताम कोःजेला ओःले टाःजेला ओःङ्गाला स्युःसी। 16इःनाङ खुङदी सुनसान ठाउँक्याला काःल्दी प्रार्थना पेःउके।
येशुइ चा खोङ्क्योक मीःला टाःच्युक्योक
(मत्ती ९:१-८; मर्कुस २:१-१२)
17ङीःमा चीग येशु मीःक्याला लोप्तेरा एःके। ओःला गालील रा यहुदीयाइ थाम्जेर युःल ओःले यरुशलेमलाःम्ले ओःङ्क्योक फारीसीक्या रा छ्येइ ठीमगीइ लोबेनक्या खुङगीइ सुःरला तेःती एःके। कोन्ज्योइ टाःच्युगेन ल्हे खुङ ङीमु एःके। 18ओःले मीःक्याइ मेःराङ चीग चा खोङ्क्योक नेःपाला तेनरा ङीमु खुर्ती ख्योङ्सी। खुङक्याइ नेःपाला खीम नाःङ्ला खेर्चे छोल्सी ओःले येशुइ तोःङ्ला ज्यातेर्चे छोल्सी। 19इःनाङ मीःक्याइ पोर्चोमगीइ पेःगासुना खुङला येशुसाःला क्याल्गेन लाःमरा माःज्योर। ओः सोङ्गारा खुङक्याइ ओः नेःपाला खीमगीइ तुःङ्सोखाला खेर्सी ओःले ओःला काप्क्योक तोः तेङ्दीमाराङ ओःलाःम्ले माःर्ला नेःपाला कोःलेले तेनरा ङीमु येशुइ तोःङ्ला पाप्सी।#५:१९ ओः तीःनामला इस्राएलगीइ खीमक्याइ तुःङ्सोदी थाङ च्योःङ्रा सम्म एःके। खीमगीइ तुःङ्सोखालादी मीःक्या जाजे ओःङ्गुके ओःले छुरफार ताजे ओःङ्गुके। 20ओः मीःक्याइ एःन्डुबा सेमल्हुक लुक्योक थोङ्दी येशुइ ओः नेःपाला लाःसी, “ए नोः, ख्याइ लाःयोक्या क्षमा काःल्दी एः।”
21येशुइ लाःक्योक दीखो ताम कोःदी छ्येइ ठीमगीइ लोबेनक्या रा फारीसीक्याइ राःङ राःङलारा लाःकाला स्युःसी, “कोन्ज्योइ नीन्दा पेःगेन्दी दीखो सु इःङे? कोन्ज्योइ चीग्रा लाःयो क्षमा पेःखुउए।” 22खुङक्याइ सेमगीइ ताम येशुइ सेसी ओःले खुङगीइ लाःसी, “ख्याक्या चीले एःन्डुबा ठीवा चेकुबा? 23ओः चा खोङ्क्योक मीःला ‘ख्याइ लाःयो क्षमा काःल्सी’ लाःचे रा ‘लाःङ्दी डो’ लाःचेला काःखोदी तेःमु एःस्वाँ, लो लोःप? 24इःनाङ, तादो दीखो साजाम्बुलीङला ङाः मीःइ पुः ङीमु मीःइ लाःयो क्षमा पेःगेन आङ्ज्या एः लाःकेन तामगीइ दास्यी ङाः ख्याक्याला तेङ्तेर्के।” ओःले येशुइ ओःखो चा खोङ्क्योक नेःपाला लाःसी, “ङाः ख्याला लाःके, ताः लोःङ ओःले राःङगीइ तेन खुर्ती खीमला सुङ।” 25ओः मीः ओः तेःकासुरा खुङक्या थाम्जेरकीइ तोःङ्ला लाःङ्सी ओःले राःङगीइ तेन खुर्ती कोन्ज्योइ प्रशंसा पेःदेरा खीमला काःल्सी। 26खुङक्या थाम्जेरला माःङ्बुरा याःमाछाक नेसी ओःले कोन्ज्योइ एःन्डुबा छ्योम्बो ल्हे थोङ्दी जीसी। खुङक्याइ कोन्ज्योइ प्रशंसा पेःदेरा लाःसी, “तीःरीङ उःइ नी काःन्डुबा याःमाछाककीइ ताम थोङ्सी!”
येशुइ लेबीला केक्याःप्क्योक
(मत्ती ९:९-१३; मर्कुस २:१३-१७)
27ओः तीङ्ला येशु डोदेरा एःकासुना लेबी#५:२७ लेबी खुङला मत्तीङ लाःकुके। लाःकेन मेःराङ चीग च्याल्गो तुःगेन्दी मीःला चेङाङला तेःतीरहीतीक्योक थोङ्सी। येशुइ खुङला लाःसी, “ङाःला ब्य्राङ्दो।” 28लेबी लाःङ्सी ओःले थाम्जेर पोःर्तीमाराङ येशुला ब्य्राङ्सी।
29ओः तीङ्ला लेबीइ येशुला राःङगीइ खीमला डेन साःगाला केक्याःप्सी। ओः डेनला च्याल्गो तुःगेन्दीक्या माःङ्बुरा एःके ओःले माःङ्बुरा मीःक्याङ एःके। 30फारीसी ओःले फारीसीइ छ्येइ ठीमगीइ लोबेनक्याइ येशुइ योबाक्याला वीरोध पेःदेरा लाःसी, “ख्याक्या चीले च्याल्गो तुःगेन्दीक्या ओःले माःताक्पाक्या ङीमु तेःती साःगेन्दी थुङेन्दी पेःउबा?” 31येशुइ खुङक्याला लेःन लोदी लाःसी, “डाक्टर नी मेःनाःगेनक्याला मीःङे, नाःगेनक्याला का कोःउए! 32ओःन्डुलेरा ङाः ताःक्पाक्याला केक्याःप्काला ओःङ्क्योक मीःङे, इःनाङ माःताक्पाक्याला स्याबा पेःदी लाःयो पोःर्तो ओःले कोन्ज्योछ्योले लोःदो लाःती केक्याःप्काला ओःङ्क्योक इःङे।”
खा चाङ्मा तेःकेन बारेला टीःक्योक
(मत्ती ९:१४-१७; मर्कुस २:१८-२२)
33मीःक्याइ येशुला लाःसी, “युहन्नाइ योबाक्या तेन्दुराःरा खा चाङ्मा तेःकुएः ओःले प्रार्थना पेःउए। फारीसीक्याइ योबाक्याङ ओःन्डुरा पेःउए, इःनाङ ख्याइ योबाक्यादी साःगेन्दी थुङेन्दी चीग्रा पेःउए।” 34येशुइ लेःन लोदी लाःसी, “ची याःर्का क्याःप्साइ डेनला माःक्पा सेम्बा ङीमुरा एःथुप जन्तीक्याला खा चाङ्मा ज्याउबा रा? 35इःनाङ ओःन्डुबा ङीःमाक्याङ ओःङ्गुए, काःखोङीःमु माःक्पा सेम्बा खुङक्यालाःम्ले खाफ्याच्युगेन एः, ओःले का जन्तीक्या खा चाङ्मा तेःकेन एः।”
36येशुइ खुङक्याला पेदाम चीगकाङ लाःसी, “काःखोङ मीःइ सेम्बा केःला राल्दी नीङ्बा केःलाला लेःम्बा मेःक्याःप एः। चीङ पेःदी एःन्डुबा पेःसी लाःना, सेम्बा केःला नोःङ्गुए ओःले सेम्बा केःला नीङ्बा केःला ङीमु मीःडीक एःङ।
37ओःले सेम्बा अङ्गुरकीइ नीःङ्गार नीङ्बा कोबाइ काःल्दाला सुइ ज्याउबा ले? चीङ पेःदी ज्यासी लाःनाङ काःल्दा केःकुए ओःले नीःङ्गार पुःङ्गुए ओःले कोबाइ काःल्दा नोःङ्गुए।#५:३७ ओः तीःनामला यहुदीक्याइ आराकदी कोबाइ काःल्दाला ज्याउके। 38सेम्बा अङ्गुरकीइ नीःङ्गारदी सेम्बा कोबाइ काःल्दालारा ज्याकोःउए। 39इःङ्जे नी सुइयाङ नीङ्बा अङ्गुरकीइ नीःङ्गार थुङ्दी सेम्बा अङ्गुरकीइ नीःङ्गार थुङ्जे मेःछोलए। चीलेलाःना खुङगीइ लाःकुए, ‘नीङ्बा दी सीःम्बु ओःङ्गुए।’”
S'ha seleccionat:
लुका 5: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.